गलाती 2

जिरोसालेम रे संत पौलुस के मान्यता

1 # प्रे.कामी 11:30; 15:2 नोःआँ चौदा बरीस तयोम ईङ लोः फिन बरनाबस जिरोसलेम सेन नेनाय। आउर ईङ तीतुस केहोः ईङ लोः इदी लियीङ। 2ईङ होनाःड़े निआँ लःअय सेन ताही निंग ची परमेसर ईङ के दिसतार ताही लःअय ची ईङ के होनाःड़े सेनोः चाही। ईङ एटाअ जाईतकु रअः ताला रे जे बेस खभाईर रअः परचारेईंग, हिना रअः बारे ईङ मियांड अपन खास सभा रअः ताला रे कलीसिया रिनकु मुखियाकु के सुनावऊ लिकुईंङ। ताकि जे काम ईङ पहिल रे कामी ताही लिईङ, चाहे जेके ईङ कामीअ दिंग, होना बेकार आलु सेन कोअ। 3बकिर हुनी तीतुस के होः, जे ईङ लोः हीःग ताहिनाय आउर युनानी हेके, नुई के लाचार काय लिया ची हुनी अपन खतनाअ ची। 4बकिर हुंकू झुठो बोकोकु रअः चलते, जे उकु-उकु आबु ताला रे बोलो केते, ख्रीस्त ईसु तरअः आबु के भेटाव ताना “निछुंद” के ईइदी लःअय आउर भेद इदी केते आबु के धाँगड़ बबनाव चहाअ केनाकु। 5आले हुंकू मड़ांग रे मि घड़िक होः काईंग मनाव नेना, हिना लःअय बेस खभाईर रअः सचाई आपे लःअय बनाव दोदोहो चहाअ तनिङ।

6 # कन 10:17 बकिर जे होड़कु के जाने-माने आदर भेटाव ताना, हुंकू जाईसने होः ताहिनाकु, ईङ के नोःआँ रे एतान होः फरक का पड़ाआ। बेगार जहान भेद-भाव रे जामा होड़ परमेसर रअः मड़ांग रे मियांडाकु। मरजाईद भेटाव उनकु होड़कु तरअः ईङ चाहे ईङ आला बेस खभाईर के एतान होः नावाँ बात रअः का भेटाव ताना। 7बकिर नुकू मुखियाकु नेल लआकु, ची परमेसर ईङ के हिकान गी मियांड जरूरी काम जिमा तदाय, जे लकान पतरस के परमेसर जाहुदीकु के बेस खभाईर सुसुनाव लःअय काम एमा ताही लियाय। बकिर परमेसर बे खतना कु के बेस खभाईर सुसुनाव लःअय ईङ के कामी एम ताही लःअय। 8एता लःअय ची जे परमेसर, पतरस के खतना उनकु कु आली प्रेरित बनाअः रअः हक एमा ताही लियाय, हिनी ईङ के एटाअ जाईतकु आली धरम परचार बनाअः लःअय सवांग एम ताही लःअय। 9नोःआँ लकान हुंकू ईङ लःअय भेटाव उना परमेसर आला होना दया के पाड़ी लःअय आउर कलीसिया रिनकु खुंटा समझाअ केनाकु, जे याकुब, कैफा आउर जोहन, बरनाबस आउर ईङ लोः भागीदारी रअः भेस रे तीः मिलाव लअकिन आउर हुंकू नोःआँ बात रे सहमत नेनाकु ची आलिंग एटाअ जाईतकु दुबाःड़े सेनालिङ, आउर हुंकू खतना उनकु ताला रे सेनकु। 10हुंकू आला कंहड़ी निमनेः केन ताहिना ची आले गरीब कु के धेयान एमोः चाही, आउर नोःआँ लःअय ईङ खुद मुरुक इच्छुक ताहिनिंग।

पौलुस आला पतरस तरअः टकराव

11बकिर जब पतरस अन्ताकिया हीःग नेनाय दो ईङ हुनी के मुरुक बिरोध लियीङ, एता लःअय ची कैफा दोसी थिनाय। 12हुनी पहिल एटाअ जाईतकु लोः जोमे केनाय, बकिर जब याकुब दुबाःड़े तरअः थोड़ेक होड़ हीःग नेनाकु, दो खतना उनकु तरअः बोर ते एटाअ जाईतकु पखी आउर हुंकू तरअः अलगे ताहिनोअ केनाय। 13एटाअ जाहुदी बोकोकु होः नोःआँ लकान देखाव कामी केते, नोःआँ होः ची बरनाबस केहोः हुंकू आला कपट कामी रअः चलते भटकाव नाय। 14जब ईङ नेल लाईङ, ची हुंकू बेस खभाईर रअः सचाई रे बेस चाईल काकु चलाआ, दो ईङ जामाकु मड़ांग रे कैफा के बेता लियीङ, ची “जब आम जाहुदी हुयाव केते एटाअ जाईतकु आला रिती मोताबिक कोवान, बकिर एटाअ जाईतकु आला रिती मोताबिक जिवोडो-आम, दो आम एटाअ जाईतकु के जाहुदी रिती रे एता लःअय चलाअ लःअय बेता कुआम?”

बिसवास दोवासते धरमी बनाव नेयाय

15आले दो जनम तरअः “जाहुदी हेके”, आले पापी एटाअ जाईतकु तरअः जे मुसा आला कनहुन तरअः बाहरी रिनकु हेके, कोवान। 16#सिरिंग 143:2; रोमी 3:20; रोमी 3:22सेरे होः नोःआँ पाड़ी केते ची होड़ कनहुन रअः पालन रअः चलते कोवान, बकिर ईसु ख्रीस्त रे बिसवासे रे धरमी ठहराआकु। हिना लःअय आले ख्रीस्त ईसु रे बिसवास लआले, जेकर से ची आले कनहुन रअः पालन रअः चलते कोवान, बकिर ख्रीस्त रे बि-बिसवास रे धरमी ठहराअकु, एता लःअय ची कनहुन रअः पालन रअः चलते ओके मनवा होः धरमी काकु ठहराआ। 17जदि आबु जे ख्रीस्त आला बिसवास दोवासते धरमी ठ-ठहराव परमेसर मड़ांग बनाव चिनोअ चहाआकु, कनहुन रेनअः का मनाअ रअः चलते पापी बनाव जुनोआबु दो नोःआँ रेनअः माने हुयाआ ची ख्रीस्त पाप के बढ़ावा एमेआय? हिरगीस कोवान! 18बकिर जदि ईङ फिन से मुसा आला हुकूम रेनअः पलानेईंग, जेके ईङ बाई थिलिईंग आउर ईङ मेनगेईंग ची मुसा आला कनहुन के पा-पालन चाही, दो नोःआँ सफा एदनाआ ची ईङ पापी हेके एता लःअय ची ईङ मुसा आला कनहुन के तोड़ाव केदिङ। 19ईङ मुसा आला कनहुन रअः मोताबिक गोएःग निंग, आउर ईङ रे मुसा आला कनहुन रअः हक कनोआँ। हिना लःअय ची परमेसर लःअय जिवीःड ताहिनोईंग। ईङ ख्रीस्त लोः कुरूस रे गोएःग निंग। 20ईङ नहाअः जिवीःड कनिङा, बकिर ख्रीस्त ईङ रे जिवीःड इदानियाँ। नहाअः ईङ अपन होड़ो रे जे जिनगी जिविडोईंग ईङ दो होना बिसवास भाईर तरअः जिवीःड एदानिङा जे परमेसर आली होपोन रे एदनाआ, जे ईङ लोः दुलार लःअय आउर अपन खुद के एमा लिङाय। 21ईङ परमेसर आला दया के काईंग इनकार दा। जदि मुसा आला कनहुन रअः चलते मनवा धरमी परमेसर मड़ांग सही बनाव ताही कोआकु दो ख्रीस्त बेकार रअः गोएःग नेनाय।

Currently Selected:

गलाती 2: ASR

Highlight

Copy

Compare