Iroomaani 2
2
Ukwaasanaay Whukwim
1Aflaay baruuk oodehay eeraw haakamiini been, gwabab kaabari tindiyee dehaay kaꞌadgirta. Eeraw haay haakamtiniyeet toona ugarooyook gwabab haay tisꞌabiika. Baruuk whaakamiini beet toona tookna tꞌiiteena saktiniya. 2Oontꞌa Ukwaasanaay whukwim baliit teena shagaameen oodehayi kehii ikwasiyeeb sidik ikatiyeet toona nikteen. 3Aflaay baruuk wari dehay haakamtiniya, malya uknaayuuk teen teena teekna danꞌiyihoob, Ukwaasanaay whukwimii teedhhaniyeeb hiistiniya han? 4Tari bariitaah tidaayiinayti miraaywa, itarmuumaawwa oosbirwa, baruuk abaabtiniya han? Ukwaasanaayt tidaayiinay tituuba beeti istoobiineetook toona kitkana han?
5Laakiin wꞌamaag niyaayookwa, uginꞌook utuubaab baakaaynaay sabbiiwwa, Ukwaasanaay whukwim wꞌaadil ikatiyeet tooyin, baruuk Ukwaasanaay igadabeet tuyintii dehaay ugarooyook dehaay gadab danbiya. 6Ukwaasana gaalka toona tushagaamaab ikatiyeet iyaaw indi. 7Tudaayiinaay soorarimti dꞌiitiit matuunwa, hamooyseewwa, daayim midhhanwa yhariw baliib, Ukwaasana bareeh daayim midhhan iyaaw indi. 8Laakiin baliib igarooyeehna rayiisti oobhaat yhariw, aree oosdik ribtiit toomaag eetriim, Ukwaasana bareeyooh kehii gadabwa hasiyaaytwa iifif indi. 9Oodehay maagnaayt sakeen kasseeh, beentooy gwirhaabwa lhanaytwa dehaay iikti iyadna. Hankaab Iyahuudii dehaay iikti iyadna, malya Ijintiilee dehaay iikti iyadna. 10Laakiin tudaayiinaay danꞌiibka matuunwa, hamooyseewwa, mꞌasigwa imaar indi. Hankaab Iyahuudi imaar iyadna, malya Ijintiili imaar iyadna. 11Ukwaasana giraadtiib karhisiya.
12Baliin whag baabari maagnaayt sakiyaan kassaah, whag anu kwidhi iyadna. Baliin whaggi whii maagnaayt sakiyaan kassaah, whaggii haakamami iyadna. 13Baliin whag eemsiiw Ukwaasanaay suurii shibu dehay ikatiin miyaad kiiki. Laakiin baliin whag isnaakiir shibu dehay ittiyuud iyadna. 14Ijintiili whag baabariin whag hooy yharriiweet teena ilamadii shagaameen. Baraah hag biibariineek han, igarooyeehna dehaay hag ikatiin. 15Baraah whag yharriiweet teena iginꞌaayeeb katab ikatiineet toon rhiseena, igirmaayaahna han badehiib dehaay ikatiin. Tikwoonaniitaahna door gaal bareeh atehimeena, aree door gaal bareeh yheebna. 16Tuun tuuna aree Ukwaasana uudehay kwibsaab ikatiineet teena Yasuuꞌaab Umasiihi geebii haakami indiyeeb oombꞌi iikti tindi. Aniib Usakana Udaayi sooyiiniyeet toonaatiit iikti tindi. 17Aflaay baruuk ugarooyook Yahuudiib waliiktiniyeek, whaggii dehaay adehamtiniyeek, teetriimeek, Ukwaasanaay wꞌayaaysamtiib faalamtiniyeek, 18baruuh yharriiweet toona kantiit tudaayiinaay hanyiideek, baruuk whag sooyaneet toona tidꞌiya. 19Baruuk yhamashayaayi maalhi tikatiyeet toona akkadtiniyeek, uthibniib eefeen baliib nuur dehaay tikatiyeek, 20imiskiinaayi mitiyaayani tikatiyeek, inisrikaayi allamani tikatiyeek, whaggiib akraat kanaantwa oosdikwa tibariyayt, 21aflaay baruuk eeraw allamiiniib been, ugarooyook kaꞌallamta han? Baruuk toogwihar baagwiharna indiib been, uknaayuuk tingwhiira han? 22Baruuk uudehay biijakiinneet toonaati indiib been, uknaayuuk jankiina han? Baruuk isanama imooriib been, diini gawaayeeb tingwihiira han? 23Baruuk whaggii faalamiiniib been, whag kitꞌatiit Ukwaasanaay dehaay sikwꞌiib haay eetniya han? 24Uuktaab bak indi: “Bariiyook sabbii Ukwaasanaay uusim Ijintiili bitik kifuur ikati.” indi.
25Whaggii shagaamteeneek ukwishuub takweet ibari. Laakiin whag tikatꞌaneek, kwashab baakaayna tꞌiiteeb iikti tiyadna. 26Baliin ikwashab baakay whag yharriiweet teena idꞌaneek, kwashaabna tꞌiiteeb ikatiineet toona kitti han? 27Uutak uukna kwashaab baakaay masi whag eetriim ittiw hookna indi. Baraak beet toona uktaabiib kataabt akay tibariina, kwashabaana, laakiin whag tikatꞌana.
28Uutak tisaradtee oobhaat Yahuudiib ikatiyeek, uun baruuh Yahuudiib kiiki. Ukwishuub tisaradteewwa barraaywa aabhat Yahuudiib kiikwaasna. 29Abadan, uutak Yahuudiib ikatiib, tehooytee Yahuudiib ikatiyeet toonaati. Ukwishuub aree ooginꞌi kwishuub Ishuukee ikatiib nuun, uktaabiib kataabt toona kitti. Been ootaki hamaad aree Ukwaasanaay ikati nuun oodehayii kiiki.
Currently Selected:
Iroomaani 2: BEJA
Highlight
Copy
Compare
Share
Want to have your highlights saved across all your devices? Sign up or sign in
2026 Seed Company and the MTT
