Ilinguumamti 21
21
Baawloos Algudus ibi
1Bareesooh oogiig ribee nimshamaadhiit harꞌii, markabtii Koos nibi. Tooyin tooraaw Roodees niktim, beentooysii aree ubharii Baataraab nibi. 2Fiiniigiyaab tiibiit markabt nimriit kehii nꞌamaayt iibaabna. 3Gubrus rhinani mhiin niktimihoob, utarhagwadii hasamnaayt Tiiroos niktimeeb ookiik Suuriyaab nibi. Beentooy tumarkab irabeeyooh tikwisti jillaay tiibi. 4Wꞌakwanaay aamanana nimriit bareeyooh geeb asaramaat yina nisꞌa. Aashuuk Imugaddasa bareeh sooyaaniit, Baawloos Algudus biibaayeet toona sooyaan. 5Laakiin tꞌasaramaat yina ingadnihoob, tꞌiibaabtoon nisoorarim. Yꞌaamanana kassaahwa, timꞌateesoohwa yꞌareesoohwa tumadiinaatii oobhari dar ookiik geeboon hiireeriyaan. Beentooy iyami daraag nignafaayt siileelna. 6Malya taktakee dehaay usalaamiib nimsiyoodaayiit, hinin tumarkab nꞌam, aree baraah igawaayeehna beeti yꞌagarna.
7Tiiroosee giignaayt Butoolaayis beeti oobharii giigna. Beentooy yꞌaamanana shoobnaayt bꞌeeb geeb nhagit. 8Tooyin tumalya yaknaayt, Gaysariyaab niktim. Fiilibus ubhaliiyanaay ugawiib amnaamna. Baruuh eenda yꞌasarama ilinguumiya ishamneeb gaal iikti. 9Baruuh fadhigt arit iisridt dꞌart baakayt iibri.
10Hinin Gaysariyaay yinaat gat nisꞌa. Beentooy Nabiib Agaabuus iidneeb Yahuudaay whaashii eeya. 11Baruuh eeyaayt hoon, Baawloosiib whaba yakisiya. Baruuh uukna yꞌayeehwa iragadaayeehwa haay yhaakwir. Malya “Oon whabaay kina, Alguduseeb Yahuudi suurkina bak yhiikwar iyadneet toona Aashuuk Imugaddasa sooyeen. Masi barooh Ijintiili nuuni iyadna.” idi.
12Hinin eeen ibhali nimaasiwihoob, hininwa yꞌaamanana beentooy iifiinwa Baawloos Algudus biibaayeet toona hooy nhariw. 13Laakiin Baawloos “Naanhooy waawteena aree ooginꞌu tikatꞌana? Wꞌankwana Yasuuꞌi jillaay usijni shuumtii dehaay oobhaat amaar kaaki, laakiin Alguduseeb bariiyooh jillaay tooyat dehaay amaaru!” idi. 14Hinin bariiyooh wꞌaguur adgirat niribihoob, tim nikaayt, “Wꞌankwana yharriiweet tuuna batiikti!” nidi.
15Beenaay harꞌii, nimaraayt Algudus nibi. 16Aamanana gali Gaysariyaay geeboon giigiyaaniit, Minaasooniib oogaw haay ibeen hoon. Baruuh Gubrusaayiibu aree shꞌiika iifi aamanana. Bariiyooh geeb aamnaamna.
Baawloos Algudus iktim
17Algudus niktimihoob, yꞌaamanana daayiib yꞌashishna hoon. 18Tooyin tooraaw Baawlooswa hinin aarawwa Yaaguub niishbibi jillaay giigna. Kassaah tikaniisaati eegrima han iifiin. 19Baawloos bareeh dabaay dalhaasamiyaayt harꞌii, Ukwaasana bariiyooh geebii Ijintiili bitik ikwaaseet teena bareeh sooya.
20Baraah beet toona imaasiwnihoob, Ukwaasana yhamidna. Malya baraah Baawloosii dehaay, “Wꞌaraawuun, naaka alfa Yahuudi aamananaab ikeeneet toona oontꞌa shibiba. Aree kassaah Muusaay Whag isnaakiirneet toona winneet yhariwna. 21Laakiin baruuk Ijintiili bitik ikweer Iyahuudi kasseeh Muusaay Whag biisnaakiirneet toona soota diyee imaasiwna. Baruuk bareeyooh dehaay, ‘Yꞌareekna baashikwaashibna, Yahuudiit aada han baadꞌiina!’ tidiya diyee imaasiwna. 22Udehayuun bariiyook wꞌaay maaswaaba. Aflaay kak niwari hook? 23Baruuk hinin niyadeet toona sakaa. Fadhig da hineeb Ukwaasanaay dehaay waadiyaab abkaaba. 24Bareeyooh geeb oodiini gaw shuumaa, aree ateharama. Aanda tehamooteehna haay eeminneeb imhallaga dehaay kwisiya. Shaawti uudehay kassaah bariiyook maasiwaab iiktiineeb ibhali gwisir ikatiineet toona iikan iyadna. Malya baruuk Muusaay Whag haay shagaamtiniyeet toona han iikan iyadna. 25Suur door gaal Ijintiili aamanana hinin nhirweet idꞌaneet toona han sooyaaba. Isanamaayee dehaay farꞌaab ikatiineet toona biitamaynee dehaay sooyaaba. Toosha uubooy kehii eefiyeet tari sikuutii aya reewiit sha biitamayneet toona han sooyaaba. Masi biijakiinneet toona han sooyaaba.” idiin.
26Tooyin tooraaw Baawloos eenda ifadhig iyhaayt bareeyooh geeb ateharamiya. Malya Baawloos tutahaaraatiit tꞌasarama hooy tingideeb oombꞌi iiktibi jillaaywa, gaalka aree karaamaat iifirꞌani jillaaywa, oodiini gaw shuumiya.
27Baliit tꞌasaramaat yina ingadnihoob, Aasiyaay yꞌaab Yahuudi gali Baawloos oodiini gawiib rhiyaan. Baraah kasseeh oodehay isbibniit, Baawloos yꞌabikna. 28Baraah han waliikiyaana, “Yaa Yꞌisraaꞌiili, aween hoon! Uun uutak kasseeh yhasheeb indhiwaayeenwa, Muusaay whagwa, oon oodiini gawi kehiiwwa oodehay amaagna allamiini. Ijintiili han haay eeyaayt oon oodiini gaw umugaddas najjasiya.” idiin. 29Baraah suur Turoofiimuus Wꞌafasoosaayi tumadiinaatiib Baawloosi geeb rhaa iifiinayt, Baawloos barooh geebooh oodiini gawiib shuumsaab iiktiyeeb hiisiyaan.
30Kastuuh tumadiina ribshaaytiib tiifi. Uudehay han dhadhaabsamee eeyaaniit Baawloos yꞌabikna. Baawloos yꞌabikniit oodiini gawii irhifni mhaliyaan. Malya gaalhoob idheefa assamiyaan. 31Uudehay Baawloosi madar jarrabiyaan. Kastuuh tumadiina Algudus ribshaaytiib daatanihoob, Iroomaani dheeshi daabit usakana imaasiw. 32Baruuh willa shalik kajarwa daabtaabwa iyhaayt, uudehay ammarariyaab iiktiineeb oomhiin ookiik dhaabiya. Uudehay udaabitwa ikajarwa rhiyaanihoob, Baawloosiib ithibꞌi isingadna.
33Udheeshi daabit eeyaayt barooh yhaakwir, maloot shinshilaatee yhakwirneet toona ikajareeh sooya. Malya Baawloos aab iiktiyeebwa naan gwibbaab iiktiyeebwa kanaant yhariw. 34Oodehayii gali naat hadiidiyaana, aree aaraw weena hadiidiyaan. Laakiin baraah winneet tageega hissaayee bhaliiyiinayt, udaabit naat han hooy kanaab kiiki. Malya Baawloos umꞌaskar haay eebiineet toona ikajar sooya. 35Baawloos iragadaayee hiireeree usillim iktimihoob, uudehay winneet amaagkaab waliikiyaan. Aflaay ikajar barooh ifiyakna. 36Uudehay harꞌii sakiina, aree waliikiin “Barooh dirnaa!” iidna.
Baawloos oodehay infaraad
37Ikajar Baawloos umꞌaskar shuumsiineeb oodoor, baruuh udaabit raatiya, “Naat andi hooka?” idi.
Udheeshi daabit bariiyooh dehaay, “Baruuk Yoonaani bhali tikteena?” idi. 38Udheeshi daabit masi, “Baruuk Umasri fadhig alfa madooraab yakisiyaayt, suur tusabbootiib ribshaayt ikwaas barook kittaa han?” idi.
39Baawloos “Aneeb kaaki! Ani Yahuudiib Kiiliikiyaayt toomadiina toowin Tarsuusi tak akati. Anaahook oodehay bhaliisaaheeb.” idi.
40Udheeshi daabit oodehay bhaliisamiyeet toona sooya. Malya Baawloos usillimi kehii ingadaayt wꞌayooh asti yꞌabik, uudehay diniyaaneet tumasaafa, Araami bhali bhaliiya.
Currently Selected:
Ilinguumamti 21: BEJA
Highlight
Copy
Compare
Share
Want to have your highlights saved across all your devices? Sign up or sign in
2026 Seed Company and the MTT
