Esita 5
5
Esita ɛ san egyu-dɩrɛ wakʋn
1Duwi-siyeefɛ fɔ, Esita ɛ sa wo bugyu bʋʋ ngba-serelɛ fɔ, gɛ ɛ ma yela digyu-kpaara, egyu-dɩrɛ wɔ kpata bʋnʋn. Fɔ egyu-dɩrɛ è si wo gigyu-bɩya gii koro, gɛ wɔ bʋnʋn bù ten wɔ dɩkpaara fɔ diitunu. 2Gɛtɛ e we Egyu-nanɩ-dɩrɛ Esita è yela dɩkpaara fɔ daanɩ fɔ, ɛ mɛ Esita gɛbwala gɛ ɛ tʋna wo bugyu buuyon-tonlɛ dɩrɛ fɔ e wùlà wɔ. Ɛwʋ gɛ Esita ɛ san wakʋn, gɛ ɛ tʋna gʋlɔ ɛ kya egyu-dɩrɛ wo bugyu buuyon-dɩrɛ fɔ wuunyun.
3Ɛwʋ gɛ egyu-dɩrɛ e lila wɔ alan, <<Egyu-nanɩ Esita, anʋn n de wɔ? Anʋn gɛ aa buguti? Gengyi miin bugyu buu gedikʋn nyabʋ dikpen dɩkɩ gba gɛ à len fɔ, nan ka n tɛ wɔ.>>
4Ɛwʋ gɛ Esita e tiri wuunyun alan, <<Egyu-dɩrɛ, gengyi waà sara ma awɔ fɔ, n len gɛtɛ awɔ ma Haman yàà ba ɔsɛ gɛtɛ ǹdò na pɩna na sɩ̀ wɔ̀ lɛ waanɩ.>>
5Egyu-dɩrɛ ɛ dɔ̀ alan, <<Ɩ ma ka Haman ɩ mɔma mɩ bilenten fɔ taà ma mɛ anlɛ gɛtɛ Esita e lila fɔ.>>
Okoro egyu-dɩrɛ ma Haman bɛ tɔ bɛ san Esita wɔsɛ fɔ wuu gedi gaanɩ. 6Gɛtɛ bè si bɛɛ nyʋn wayɩn fɔ, egyu-dɩrɛ e biri e lila Esita alan, <<Nkele dɔ̀ mɩ, anʋn gɛ aa len nàn mɛ n tɛ wɔ̀? Anʋn gɛ aa hiyan? Gengyi terema miin bugyu buu gedikʋn bʋʋfan gba gɛ aa bugiti fɔ, nan ka n tɛ wɔ.>>
7Ɛwʋ gɛ Esita alan, <<Maade gɛtɛ nte len ma maade hiyanlɛ n di alɛ, 8gengyi awɔ egyu-dɩrɛ aà we mɩ gutunkoro, gɛ aà to maade gɛtɛ nte len fɔ a sa, fɔ àà mɛ maade hiyanlɛ a tɛ mɩ fɔ, nte len gɛtɛ gɩsa awɔ egyu-dɩrɛ, ma Haman yàà ɩ ba ɔsɛ gɛtɛ nan pɩna n tɛ yɩ fɔ waanɩ. Dʋkɔ fɔ, nan dɔ̀ wɔ̀ ade gɛtɛ nte len.>>
Haman ɛ mɛ gɛtɛ èè wolo Modekayi
9Duwi dɩtɔkɔ, Haman ɛ tɔ ɛ da ɔsɛ waanɩ gɛ woturu wʋ nʋ̀n wɔ. Mɔ gɛtɛ ɛ ma tama Modekayi è si egyu-dɩrɛ wotunu, gɛ ɛn tɔ yela, gɛ ɛn ka gebù tɛ wɔ fɔ, ɛ ka owurufa-dɩrɛ Modekayi wo koro. 10Mɔ Haman e gye koro gepepe, gɛ ɛ san ɛ da wɔ dɩkpaara.
Ɛwʋ gɛ e kpèlè wɔwɔlɔn ɛbɛ ma wɔsɔ Seresi e tuma. 11Gɛ Haman ɛ tabʋrʋ ɛ bʋma koro ɛ dama wo koro gaanyan kpekpesi gɛtɛ ɛ̀ ba fɔ, ma wo bebi-teni kpekpesi, ma anlɛ gɛtɛ egyu-dɩrɛ ɛ tɛ wɔ gingyebi ma anlɛ gɛtɛ ɛ bʋma wɔ bɩndɩrɛ ɛ da gebù gɩɩ bɛnɩ, ma bɛndɩrɛbi-kurumakyɛɛ gɛtɛ bɛ̀ sa egyu-dɩrɛ gatɩn powu fɔ. 12Gɛ Haman ɛ nɩ dɔ̀ alan, <<Nka ɛwʋ powu wʋ lɛ! Ɩ nya, miinko-kwan gɛ egyu-dɩrɛ-nanɩ Esita ɛ fɩna gʋlɔ e kpèlè alɛ, gɩsa n fɩya ma egyu-dɩrɛ, taà ba ɔsɛ gɛtɛ ɛɛ̀ pɩna fɔ waanɩ. 13Mɔ ade gbaa-gbaa gɛtɛ na kalan lɛ powu, ɩn tɛ nɩma mɩ, yema gɛtɛ ǹ bɔ ǹ nyɩ nte we Modekayi, Yuda-te nyawɔ e si egyu-dɩrɛ dɩkpaara diitunu lɛ.>>
14Ɛwʋ gɛ wɔsɔ Seresi ma wɔwɔlɔn ɛbɛ fɔ powu bɛ dɔ̀ Haman alan, <<Yɛ bàà sere oyon gɛtɛ waatɔ waà mɛ anlɛ bɩsɩrɩ akpilin asiyee ma fwo-ton. Fɔ gɩsa gagyɩgyan àà fʋba a sa egyu-dɩrɛ ɛ̀ɛ̀ yɛ bàà sa Modekayi ɔŋʋʋ gigyen bɛ kyɔlɔga ma oyon fɔ. Fɔ ɛyɩ ma egyu-dɩrɛ yàà san ɔsɛ fɔ wʋʋpɩ ɔsɛ waanɩ.>> Haman e to ade nyayɩ ɛ sa ɔsɛ waanɩ, gɛ ɛ yɛ be sere oyon fɔ.
Currently Selected:
Esita 5: ADE
Highlight
Copy
Compare
Share
Want to have your highlights saved across all your devices? Sign up or sign in
2025 Ghana Institute of Linguistics Literacy and Bible Translation
