Esita 1
1
Be tiri egyu-nanɩ-dɩrɛ Fasiti be ye bugyu buu gedi baanɩ
1Ade gɛtɛ i sere Egyu-dɩrɛ Herihesi wɔya waanɩ fɔ n tɛ ba lɛ. Herihesi e di bugyu ɛ tɛ ntʋnkwaa akpilin kooron ma kwarankɩ (127) ye Indiya ka ma sere Etiyopiya. 2Ɔya wʋtɔkɔ waanɩ fɔ, Egyu-dɩrɛ Herihesi ɛ sara wo gigyu-bɩya gii koro e di bugyu ditele-dɩrɛ Susa daanɩ. 3Gɛ wo bugyu buu gedi wuu gɩkyan-siyeefɛ gaanɩ fɔ, e kpèlè wo gebù gɩɩ bɛnɩ, ma wɔ bɛndɩrɛbi powu ɔsɛ wuu gedi. Fɔ Perisiya bɩtà bʋʋ bɛtàlɛ bɔɔ bɛndɩrɛ ma Mediya woyo ɛbɛ powu, fɩya ma ntʋnkwaa-kurumakyɛɛ buu begyu boo bebi ma boo gebù gɩɩ bɛnɩ fɔ bɛ ba dʋkɔ.
4Egyu Herihesi e di ɔsɛ awi-kpara-kpara akpilin yɛkɩ (180) ɛ ka e tiri wo bugyu buu gedikʋn bʋʋ gɩkyɩnyɩn-dɩrɛ, ma gɩɩmɩrɩ, ma gii gingyebi ma gii gebù e wùlà. 5Gɛtɛ awi fɔ i were fɔ, Egyu-dɩrɛ Herihesi e kpèlè ditele-dɩrɛ Susa dɩɩ bɛnɩ powu, beyenpu ma kɔba bete ɛ tɛ awi kwarankɩ yɩɩsɛ yii gedi digyu-kpaara, ɔkʋn gɛtɛ bɛ dɔ bɛkɔkɔkɔ fɔ. 6Bɛ ka ayan-fututu ma buluu ma ayan nkeni butu bɛ sa digyu-kpaara fɔ ɔmɩrɩ. Bɛ ka yɩ bɛ ma gye ma sɩka-fututu butola gɛtɛ bʋ̀ marama ataa-ŋalagɩlɛ ma ɔyɛkɛma yii bepila fɔ. Gɛ bɛ sɩ̀ sɩka-sɩya ma sɩka-fututu yaasarakʋn bɛ gyaga ataa-ŋalagɩlɛ ma ɔyɛkɛma kperen-kperen fɔ yii koro. 7Bɛ ka sɩka-sɩya bɛkɔpʋ kperen-kperen be yo wayɩn bʋkan bɛ tɛ bɛ, gɛ egyu wɔ wayɩn e gbintin gɛtɛ ɛkamasɛ ɛɛ nyʋn anlɛ gɛtɛ è len. 8Gɛ egyu-dɩrɛ fɔ ɛ tɛ wɔ bɛsaranyan fɔ powu ose alɛ, wù di gɛtɛ ɛnɩ-kamasɛ ɛ̀ɛ̀ nyʋn anlɛ gɛtɛ è len. Mɔ bɛ kara nyɩ̀ ɛkɩ alɛ ɛ nyʋn ɛ da wo gelenbi.
9Fɔ Egyu-nanɩ-dɩrɛ Fasiti mɔ e kpèlè bɛnanɩ gɛtɛ bè si Egyu-dɩrɛ Herihesi dɩkpaara fɔ gɛ bee di ɔsɛ.
10Duwi-kwarankɩfɛ fɔ Egyu-dɩrɛ Herihesi bʋkan gɛtɛ ɛ nyʋn fɔ bʋ da wɔ bɛrɛɛ, ɛwʋ gɛ ɛ dɔ̀ wɔ bɛsaranyan kwarankɩ Mehuman, ma Bisita, ma Haribona, ma Bigita, ma Abagita, ma Seta ma Karikasi gɛtɛ be tiri bɛ aforobi gɛ bɛɛ sʋma wɔ fɔ alɛ, 11bɛ yɛ egyu-nanɩ-dɩrɛ Fasiti èè tin wo digyu-koto, fɔ bàà ka wɔ bɛ mɔma wɔ. Fɔ egyu ee len èè tiri Egyu-nanɩ-dɩrɛ gʋsʋgʋgyan ma wɔmɩrɩ e wùlà bɛnɩ fɔ, ma gebù gɩɩ bɛnɩ fɔ. 12Mɔ gɛtɛ egyu-dɩrɛ bɛsaranyan fɔ bɛ ma dɔ̀ Egyu-nanɩ-dɩrɛ Fasiti ɔtʋn fɔ, e terema alɛ ɛn nan ba. Okoro egyu-dɩrɛ ɛ ka owurufa gepepe.
13Fɔ wù di ɔkɔnʋ gɛtɛ ade anlɛ nyayɩ yaanɩ fɔ, egyu-dɩrɛ ɛ̀ɛ̀ yɛ bɛsɛyɩlɛ gɛtɛ bɛ̀ nyɩ̀ ise yaade, ma gɔdɔ gɩɩ gɛdɔ̀ ma giisele fɔ, bàà tɛ wɔ dɩmɩnlɛ. Okoro e kpèlè wɔ bɛsɛyɩlɛ bàà wùlà wɔ gɩnyan gɛtɛ ɛ̀ɛ̀ mɛ. 14Bɛsɛyɩlɛ nyabɛ n di Perisiya ma Mediya bengyebi kwarankɩ gɛtɛ ɛbɛ n gbɛma egyu-dɩrɛ, gɛ bɔɔ bɩndɩrɛ bʋ da ɛkamasɛ egyu-dɩrɛ bɛndɩrɛbi fɔ powu baanɩ fɔ. Baayere n di Karisena, ma Setari, ma Adimata, ma Tarisisi, ma Meresi, ma Marisena, ma Memukan.
15Gɛ Egyu-dɩrɛ Herihesi e lila bɛ alan, <<Lan gɛ ǹ mɛ Egyu-nanɩ-dɩrɛ Fasiti gɛtɛ na sa mɩɩn bɛsaranyan alɛ bɛ ma kpèlè wɔ, gɛ e terema ɛn ba lɛ? Lan gɛ ise fɔ ii wùlà ka da ma ade nyayɩ yii koro?>>
16Ɛwʋ gɛ Memukan e tiri ade fɔ yii-inyun egyu-dɩrɛ ma wo gebù gɩɩ bɛnɩ fɔ bɔɔ bʋnʋn alan, <<Nka awɔ egyu-dɩrɛ aako gɛ Egyu-nanɩ-dɩrɛ Fasiti e toro, mɔ fɔ, e toro gɛ gebù gɩɩ bɛnɩ, ma bɛnɩ powu gɛtɛ bɛ̀ sa aa-ɩlanlan yaanɩ fɔ. 17Yema bɛnanɩ powu baà nʋn egyu-nanɩ wade gɛtɛ ɛ mɛ lɛ, gɛ waà yɛ bɛ bɛn nan nɩ bù bɔɔsan ɛbɛ. Baà dɔ̀ alan, <Egyu Herihesi ɛ sa alɛ bɛ ma ka Egyu-nanɩ-dɩrɛ Fasiti bɛ mɔma wɔ, mɔ e terema ɛn ba.> 18Nkele mɔ, ǹdò wuu duwi nyadɩ gengyi Perisiya ma Mediya bɔɔ bɛnanɩ gɛtɛ bɛ ba gebù ma gebù gɩɩ bɛnɩ bɔɔsɔ ɛbɛ bɛ̀ nʋn Egyu-nanɩ-dɩrɛ Fasiti wade nyayɩ fɔ waà yɛ bɛn nan ni bù bɔɔsan ɛbɛ, gɛ waà ka gɛmanbù, ma otiira wʋ ba. 19Gɛlɛ wuu koro awɔ Egyu-dɩrɛ Herihesi, gengyi waà sara ma awɔ fɔ, sɩ̀ ose, fɔ àà yɛ bàà ŋwara wʋ bɛ sa Mediya ma Perisiya wo-ise fɔ yaanɩ, fɔ ose fɔ wàà sara gakpaakpa alɛ, Egyu-nanɩ-dɩrɛ Fasiti ɛ kara ka wɔ gɩsɩrɩ e sere aa bʋnʋn kpakpaakpa. Fɔ àà sɩ̀ Egyu-nanɩ-dɩrɛ-fon gɛtɛ ɛ̀ kɔlɔ da ɛwɔ. 20Fɔ gengyi bɛnanɩ powu gɛtɛ bɛ̀ sa aa bugyu buu gedikʋn bɛ̀ nʋn ose-fon nyawʋ fɔ, bɔɔsan ɛbɛ bè di beyenpu oo, bè di bɛnɩ gbaa-gbaa oo, baà bù bɛ.>>
21Ɛwʋ gɛ Egyu-dɩrɛ Herihesi ma wo gebù gɩɩ bɛnɩ fɔ be to Memukan wade nyayɩ bɛ sa, gɛ egyu-dɩrɛ ɛ mɛ anlɛ gɛtɛ Memukan ɛ dɔ̀ fɔ. 22Gɛ egyu-dɩrɛ ɛ ŋwara akpa ɛ tɩyɛma ɩkʋn gɛtɛ ɩ̀ sa wɔ gatɩn fɔ powu, gɛtʋnkwaa-kamasɛ gii ginde ma gɩɩ gɛŋwarabi gaanɩ alɛ, wù di gɛtɛ eteni-kamasɛ ɛ̀ɛ̀ mɛ duyu wɔ dɩkpaara daanɩ.
Currently Selected:
Esita 1: ADE
Highlight
Copy
Compare
Share
Want to have your highlights saved across all your devices? Sign up or sign in
2025 Ghana Institute of Linguistics Literacy and Bible Translation
