Samuweli gɩkpa-nyɔɔfɛ 19
19
Yowabi ɛ tabʋrʋ e sere Dafidi
1Bɛ dɔ̀ Yowabi alan, <<Abisalom wo koro egyu ee wula, gɛ ɛɛ yɩyɛ.>> 2Okoro duwi dɩtɔkɔ dɩɩsɩyɛ wuu gedi fɔ wu biligi dɩyɩyɛ tɛ Dafidi bɩtà bʋʋ bɛtàlɛ fɔ powu, yema bɛ nʋn duwi dɩtɔkɔ alan, <<Egyu fɔ ee wula wobi Abisalom.>> 3Gɛ bɛnɩ fɔ bɛ mɔlɩ be gyu ditele fɔ daanɩ, anlɛ bɩtà bʋʋ bɛtàlɛ gɛtɛ be serenti be ye akpa yaanɩ gɛ bɔɔ bʋnʋn buu ku fɔ. 4Egyu fɔ e tin wɔ bʋnʋn, gɛ e wula kin-kin alan, <<Oo miinbi Abisalom, oo Abisalom, miinbi, miinbi!>> 5Ɛwʋ gɛ Yowabi ɛ san egyu fɔ wakʋn dɩkpaara, gɛ ɛ dɔ̀ wɔ alan, <<Ǹdò a sa aa bɛnɩ powu gɛtɛ be to wɔ nkpa, ma aa bebi, ma aasɔ ɛbɛ, ma aadima ɛbɛ powu ɩnɩnfa. 6Yema aa len ɛbɛ gɛtɛ bɛɛ kyʋn wɔ̀, gɛ aa kyʋn ɛbɛ gɛtɛ bee len wɔ̀ fɔ. A yɛ tɩ nyɩnla ǹdò alɛ, aa bɩtà bʋʋ bɛtàlɛ bɔɔ bɛndɩrɛbi, ma aa bɛsaranyan fɔ powu ben di gɩnyankɩ aa bʋnʋn baanɩ. Na we gɛtɛ nafɔ ɛtɩ powu ti ku, gɛ Abisalom è si nkpa fɔ, ɛwʋ nan di wɔ̀ gʋnʋn. 7Tɔ ye san fɔ àà ma tabʋrʋ sa aa bɛsaranyan ɔkɛma. Na nya Yahwe alɛ, gengyi an ye san àà ma tabʋrʋ ma ɛbɛ fɔ, ɛnɩ-kɩlɩn gba ɛn nan kuruma nfan ǹdò odente nyawʋ, gɛ nyawʋ waà mɛ ade-dɩrɛ da ade gɛtɛ ɩ tama wɔ̀ ye aa gɩsaranyan gaanɩ be sere ma ǹdò lɛ.>> 8Gɛlɛ wuu koro egyu fɔ ɛ tɔ ɛ bɛ sara wɔ gɛbɩya gii koro ditele fɔ diitunu. Gɛ gɛtɛ bɛ dɔ̀ bɛnɩ fɔ alan, <<Ɩ nya, egyu fɔ n si otunu-yon fɔ.>> Ɛbɛ powu bɛ bɛ kʋla egyu fɔ wakʋn. Gɛ Isareli bete fɔ powu be serenti bɛ da bɔɔlɛ.
Dafidi e biri ɛ da Yerusalem
9Gɛ bɛnɩ be gyu iworo yii geto booko-booko Isareli ifoli fɔ powu yaanɩ alan, <<Egyu fɔ e tiri tɩ e ye tɩɩ bɛkyʋnlɛ baalɔ yaanɩ. Ɛwɔ na to tɩ e ye Filisiti bete baalɔ yaanɩ. Mɔ Abisalom wo koro e ye ditele fɔ daanɩ. 10Gɛ Abisalom gɛtɛ tɩ sʋrʋ bʋnɔ èè di bugyu tɛ tɩ fɔ e ku akpa yaanɩ. Anʋn yii koro gɛ ɩn taa sa amɩnlɛ anlɛ gɛtɛ yaà birima egyu Dafidi ɩ ba?>> 11Ade fɔ ɩ nʋn egyu Dafidi, okoro ɛ sa Sadoki ma Abiyata gɛtɛ bè di gedi gɩɩ bɛtɛlɛ fɔ alan, <<I lila Yuda bɛndɩrɛ alan, <Anʋn yii koro gɛ ɛyɩ na wɔ gama gɛtɛ yaà birima egyu ɩ ba wo digyu-kpara? 12Ì di miinobi ɛbɛ, nmɩ gbagba mɩɩn bɛnɩ nkalan-kɩlɩn. Anʋn yii koro gɛ ɛyɩ na wɔ gama gɛtɛ yaà birima egyu ɩ ba?>> 13Fɔ àà lila Amasa alan, <An di gɛ nmɩ gbagba mɩɩnnɩ? Gengyi mɩn ka wɔ̀ mɛ mɩɩn bɩtà bʋʋ bɛtàlɛ bɔɔndɩrɛ sere Yowabi bɩsɩrɩ fɔ, Wurubwarɛ e we mɩ.>>> 14Yuda bete fɔ powu be to egyu Dafidi wanyun-gyebi fɔ bɛ sa, gɛ bɛ sa bɛnɩ wakʋn, gɛ bɛ ma dɔ̀ wɔ alan, <<Ɛyɩ ma aa bɛnɩ fɔ powu, i biri ɩ ba.>> 15Okoro egyu ma wɔ bɛnɩ powu be biri bɛɛ ba gɛ be be gyu Yodan getu fɔ gaanɩ. Fɔ Yuda bete fɔ bɛ ba Giligali be be tuma egyu fɔ bàà ka wɔ kààrà Yodan. 16Gɛ Gera wobi Simeyi gɛtɛ è di Benyamin-te, gɛ e ye Bawurim fɔ, ɛ waran bilen ma Yuda bete fɔ be be tuma egyu Dafidi. 17Gɛ Benyamin bɛnɩ nkpɩn ton (1,000) bɛ̀ fɩya ma wɔ. Gɛ Sawulo wɔsaranyan Siba, ma wo bebi fwo-ton (15), ma wɔ bɛsaranyan dikpilin (20) fɔ mɔ be kutuma bɛ san Yodan getu fɔ, ɔkʋn gɛtɛ egyu fɔ ɛ̀ sa fɔ. 18Gɛ bɛ kààrà bɛ ma ka egyu fɔ bɛnɩ, gɛ bɛ mɛ ade-kamasɛ gɛtɛ ee len. Gɛtɛ Gera wobi Simeyi ɛ kààrà Yodan getu fɔ, ɛ waran ɛ dʋrɔ egyu fɔ bʋnʋn, 19gɛ ɛ dɔ̀ egyu fɔ alan, <<Ǹ fɔ wɔ̀ gɛ, miinfonte, ɛ kara nya maade-kpen, abɛɛ ɛ kara kʋna wɔsaranyan wade-kpen duwi gɛtɛ miinfonte egyu aa ye Yerusalem fɔ. Egyu ɛ kara ka wʋ ɛ sa woturu waanɩ. 20Yema nmɩ aasaranyan n nyɩ̀ gɛtɛ na mɛ ade-kpen. Mɔ ǹdò na gyegeye na ba aakʋn ye Yosefu dɩkpaara powu daanɩ, na ba n be tuma miinfonte egyu.>> 21Gɛ Seruya wobi Abisayi e tiri ɛ dɔ̀ alan, <<Wù di gɛtɛ bàà wolo Simeyi yema ɛ fwala Yahwe wɔnɩ, gɛtɛ ɛ sʋrʋ bʋnɔ.>> 22Mɔ Dafidi ɛ dɔ̀ alan, <<Anʋn yaawɔlɔn gɛ Seruya bebi ma nmɩ tɩ ba gɛ ǹdò i biligi bɛnɩ gɛtɛ bee wùlà mɩ gɩnyan gɛtɛ n mɛ? Ǹ nyɩ gɛtɛ nmɩ n di egyu tɛ Isareli bete ǹdò. Ɛnɩ ɛkɩ ɛn nan ku Isareli ǹdò.>> 23Gɛ egyu fɔ ɛ kan ntam ɛ tɛ Simeyi alan, <<An nan ku.>> 24Gɛ Sawulo wɔnana Mefiboseti mɔ ɛ waran e be tuma egyu fɔ. Ye duwi gɛtɛ egyu Dafidi ɛ da fɔ, Mefiboseti een te kù, gɛ ɛɛn tɛ wɔrɔ wo bikpri, gɛ en te fere wɔ ngba bè sere duwi gɛtɛ Dafidi e biri ɛ ba olila waanɩ fɔ. 25Ɔya gɛtɛ e ye Yerusalem e be tuma egyu fɔ, Dafidi e lila wɔ alan, <<Mefiboseti, anʋn yii koro gɛ an tɛrɛma mɩ san?>> 26E tiri wuunyun alan, <<Miinfonte egyu, nmɩ gbagba mɩɩnsaranyan Siba na gban mɩ. À nyɩ̀ gɛtɛ nmɩ aasaranyan n di gɛ ɔtagasɩ, okoro na mɛ maamɩnlɛ gɛtɛ nan ka mɩɩn dɩkpɔŋɔ-tɩtɩɩ, fɔ nan gyaga dii koro, n tɛrɛma miinfonte. Mɔ mɩɩnsaranyan e tiri mɩ ɛ tɛ. 27E di miin didebila ɛ tɛ miinfonte egyu. Mɔ miinfonte egyu à we anlɛ Wurubwarɛ wɔsalɛ, okoro mɛ ɛwʋ gɛtɛ wʋ̀ kɔlɔ tɛ wɔ̀. 28Miinte dɩkpaara dɩɩ bɛnɩ powu bɛ kʋtʋma bàà ku miinfonte egyu gʋlɔ gaanɩ, mɔ a ka nmɩ, aasaranyan a fɩya ɛbɛ gɛtɛ bee di aakpʋlɔ wuu koro fɔ baanɩ. Osele mɔmɔ gɛ ǹ ba gɛtɛ nan nɩ fɔ egyu gɩnyankɩ?>> 29Egyu fɔ ɛ dɔ̀ wɔ alan, <<Anʋn yii koro gɛ à sangba aa tabʋrʋ? Na mɛ maamɩnlɛ alɛ, awɔ ma Siba yaà yo aatu gɛtʋnkwaa.>> 30Mefiboseti ɛ dɔ̀ egyu alan, <<Yɛ Siba ɛ̀ɛ̀ ka powu, gɛtɛ miinfonte egyu a biri a ba ditele olila waanɩ lɛ wuuko wʋ̀ sɔ mɩ.>> 31Gileyadi-te Basilayi mɔ e ye Rogelim e be yela egyu ɛ kààrà Yodan fɔ. 32Basilayi ɛ dan gepepe. E di bɩkyan akpilin anaa (80). Ɛ̀ ba kɔba gepepe, gɛ ɛ tɛ egyu fɔ anyandilɛ ɔkʋna gɛtɛ è si Mahanayim ditele fɔ. 33Gɛ egyu fɔ ɛ dɔ̀ Basilayi alan, <<Kààrà ba maakʋn fɔ àà bɛ sara maakʋn Yerusalem, fɔ nan nya àà koro.>> 34Mɔ Basilayi e lila egyu fɔ alan, <<Bɩkyan bilen gɛ nan nɩ sara nkpa anɩ, gɛ nan nɩ tɛrɛma egyu n san Yerusalem? 35Na di bɩkyan akpilin anaa nkenkele. Nan nɩ talɩ n wùlà ɛwʋ gɛtɛ wù di ade-kpara ma ade-kpen? Aasaranyan ɛɛ̀ talɩ ɛ dɩya anyandilɛ ma bʋkan? Nan talɩ n nʋn ɩnʋn yɩɩ bɛnʋmalɛ beteni ma bɛnanɩ bɔɔ bɩta? Anʋn yii koro gɛ aasaranyan ɛɛ̀ nɩ ka dɩfana ɛ bɛ fɩya miinfonte egyu? 36Aasaranyan ɛɛ̀ tɛrɛma wɔ ɛ kààrà Yodan fɔ n san bɛrɛɛ, mɔ anʋn yii koro gɛ egyu èè le mɩ gɛlɛ wuu gutoro nyagɩ? 37N fɔ wɔ̀ gɛ, yɛ nmɩ aasaranyan nan biri, fɔ nan ma ku nmɩ gbagba mɩɩnlɛ, fɔ nan wura n gbɛma miinte ma mɩɩnna bɔɔ bɩsàn. Aasaranyan Kimiham. Miinfonte, yɛ wɔ ɛ̀ɛ̀ kààrà fɔ ɛ̀ɛ̀ nyɩma wɔ̀ san Yerusalem, fɔ ɛ ma mɛ gɩnyan-kamasɛ gɛtɛ à len ɛ tɛ wɔ̀.>> 38Ɛwʋ gɛ egyu fɔ e tiri wuunyun alan, <<Kimiham ɛɛ̀ kààrà ɛ tɛrɛma mɩ ɛ san, gɛ nan mɛ aa gelenbi n tɛ wɔ̀, ma gɩnyan-kamasɛ gɛtɛ aa len a ye maakʋn fɔ powu.>> 39Gɛlɛ wuu koro bɛnɩ fɔ powu bɛ kààrà Yodan getu fɔ, gɛ egyu fɔ ɛ kààrà. Gɛ egyu fɔ e mù Basilayi, gɛ e hira wɔ, gɛ Basilayi e biri ɛ da wɔlɛ. 40Gɛtɛ egyu fɔ ɛ kààrà ɛ san Giligali fɔ, Kimiham ɛ fɩya ma ɛwɔ ɛ kààrà. Yuda bɩtà bʋʋ bɛtàlɛ akpi-akpi fɔ powu, ma Isareli bɩtà bʋʋ bɛtàlɛ akpi-akpi fɔ ɔfan bɛ kààrà ma ɛwɔ. 41Gɛ Isareli bɛnɩ powu bɛ san egyu wakʋn bɛ ma lila wɔ alan, <<Anʋn yii koro gɛ tɩɩ bɛfʋrɩ Yuda bete be yuri wɔ̀ bɛ da, gɛ bɛ ka egyu ma wɔ bɛnɩ powu bɛ kààrà Yodan getu bɛ ba?>> 42Gɛ Yuda bete fɔ powu be tiri wuunyun bɛ tɛ Isareli bete fɔ alan, <<Tɩ mɛ gɛlɛ yema egyu fɔ è di tɩɩfʋrɩ. Anʋn yii koro gɛ ɩ ka owurufa ade nyayɩ yii koro? Ti dì egyu fɔ gɩnyankɩ? Abɛɛ tɩ ka wɔ gɩnyankɩ ti bilingi tiiyo?>> 43Gɛ Isareli bete fɔ be tiri wuunyun bɛ tɛ Yuda bete fɔ alan, <<Tɩ̀ ba gedikʋn egyu waanɩ disere fwo, gɛ tɩ̀ ba Dafidi da yɩ. Anʋn yii koro gɛ ɩɩ nya tɩ ɩ waran? Nka ɛtɩ na dàà dɔ̀ egyu gebiri ba fɔ gaade?>>
Mɔ Yuda bɛnɩ fɔ bɛ tabʋrʋ ma akpanyanyan bɛ da Isareli bɛnɩ fɔ.
Currently Selected:
Samuweli gɩkpa-nyɔɔfɛ 19: ADE
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy and Bible Translation
