Samuweli gɩkpa-nyɔɔfɛ 16
16
Dafidi ma Siba
1Ɔkʋna gɛtɛ Dafidi ɛ waran e ye odon fɔ wʋʋ gatala bɛrɛɛ fɔ, ɛ bɛ tama Mefiboseti wɔsaranyan Siba gɛtɛ è yela ee so wɔ. Fɔ è de akpɔŋɔ-tɩtɩɩ anyɔɔ gɛtɛ ì tola boroboro gɛkpɩn, ma iyon yaabi wuu keki akpilin ton, ma figi wo keki akpilin ton, ma bʋkan gɛtɛ bʋ̀ sa ɛnan gɩkpa gaanɩ.
2Gɛ egyu e lila Siba alan, <<Anʋn yii koro gɛ a ka nyayɩ a ba?>>
Siba e tiri wuunyun alan, <<Akpɔŋɔ-tɩtɩɩ fɔ ì di egyu dɩkpaara diiyo, gɛtɛ bàà tɩ̀ sara yii koro, boroboro ma iyon yaabi fɔ ì di bɛsaranyan fɔ booyo gɛtɛ bàà di, gɛ bʋkan fɔ mɔ bù di ɛbɛ gɛtɛ waà taga bɛ otonkuma waanɩ fɔ booyo, fɔ bàà nyʋn.>>
3Gɛ egyu e lila Siba alan, <<Gaanɩ gɛ aafonte wɔnana fɔ ɛ̀ sa?>>
Gɛ Siba ɛ dɔ̀ wɔ alan, <<Ɛ̀ sa Yerusalem, yema ɛɛ sa amɩnlɛ alan, <Ndò Isareli dɩkpaara dɩɩ bɛnɩ baà ka miintu bugyu fɔ bɛ tɛ mɩ.> >> 4Gɛ egyu ɛ dɔ̀ Siba alan, <<Gɩnyan-kamasɛ gɛtɛ gì di Mefiboseti woyo fɔ nan ka n tɛ wɔ̀.>> Gɛ Siba ɛ dɔ̀ alan, <<Karan miinfonte. Yɛ maade yàà di wɔ̀ gʋnʋn ɔya-kamasɛ.>>
Simeyi ɛ fwala Dafidi
5Ɔkʋna gɛtɛ egyu Dafidi ma wɔ bɛnɩ bee gyu Bahurim fɔ, ete ɛkɩ gɛtɛ e ye Sawulo dɩkpaara daanɩ fɔ e ye ɛ ba ɛɛ fwala bɛ. Ete fɔ diyere n di Simeyi, gɛ wote n di Gera. 6Ma gɛtɛ bɩtà bʋʋ bɛtàlɛ fɔ powu be silin Dafidi dɩbɩyan ma ologyi gba fɔ, e fun-fun egyu Dafidi ma bɛndɩrɛ-bi fɔ powu ataa. 7Gɛ Simeyi ɛ fwala bɛ, gɛ ɛ fa Dafidi alan, <<Kpe ye nfan, kpe ye nfan, awɔ ewololɛ bɛnɩ, omiri-kpen wuute! 8Yahwe n te le wɔ̀ gutoro, Sawulo dɩkpaara dɩɩ bɛnɩ bɔɔ nkalan gɛtɛ a daa a lù fɔ wuu koro. A yuri wo bugyu, mɔ nkele bɩrɛ Yahwe e to bugyu fɔ ɛ tɛ aabi Abisalom. Nya, aade-kpen i biri aa koro, yema a daa nkalan a lulu.>> 9Gɛ Seruya wobi Abisayi e lila egyu fɔ alan, <<Anʋn yii koro gɛ a yɛ ɛkpɛɛ-kulɛ nyawɔ ɛɛ fwala awɔ miinfonte egyu? Yɛ mɩ nan ma belen wɔ duyu.>>
10Mɔ egyu fɔ ɛ dɔ̀ wɔ alan, <<Ɛyɩ Seruya bebi, nyawʋ wun di yaade. Gengyi ɛɛ fwala mɩ yema Yahwe ɛ dɔ̀ wɔ alɛ, <Fwala Dafidi!>fɔ, ɛnyan nan talɩ e lila alɛ, <Anʋn yii koro gɛ aa mɛ gɛlɛ?> >>
11Ɛwʋ gɛ Dafidi ɛ dɔ̀ Abisayi, ma wɔ bɛndɩrɛ-bi fɔ powu alan, <<Miinbi gɛtɛ è di nmɩ gbagba mɩɩn nkalan ee len èè wolo mɩ, waà mɛ lan gɛ Benyamin-te nyawɔ ɛn nan wolo mɩ. Kere wɔ ya! Yɛ wɔ ɛ̀ɛ̀ fwala, yema Yahwe na dɔ̀ wɔ alɛ ɛ fwala.
12Nkɩfɔ Yahwe eè we mɩɩn dɩyɩyɛ, fɔ èè hira mɩ sere ǹdò wʋʋ gɛfwala nyagɩ gɩɩ bɩsɩrɩ.
13Okoro Dafidi ma wɔ bɛnɩ bɛ kyaga boosele fɔ wuu koro, fɔ Simeyi mɔ ɛ̀ san odon-bi wʋkɩ gɛtɛ wʋ̀ gbɛma bɛ fɔ wuu koro. Ɛɛ fɔrɔ powu fɔ, ɛɛ fwala, gɛ ee fun Dafidi ataa gɛ ɛɛ kɔkɔ atɩn e fun wɔ. 14Gɛtɛ Dafidi ma wɔ bɛnɩ fɔ powu bɛ ma gyu Yodan getu fɔ gaanɩ fɔ, bɛ fana, gɛ bɛ sara dʋkɔ be tuna.
Wusayi ma Ayitofeli bɛ tɛ Abisalom amɩnlɛ
15Nkele Abisalom ma Isareli bete fɔ powu bɛ ba Yerusalem, fɔ Ayitofeli ɛ̀ fɩya ma ɛbɛ. 16Gɛ Ariki-te Wusayi gɛtɛ è di Dafidi wɔwɔlɔn fɔ, ɛ san ɛ ma dɔ̀ Abisalom alan, <<Egyu-kpara, sara nkpa ma ɔfɔ! Egyu-kpara, sara nkpa ma ɔfɔ!>> 17Gɛ Abisalom e lila Wusayi alan, <<Gelen gɛtɛ a tiri a wùlà aawɔlɔn gɩlɛ? Anʋn yii koro gɛ an tɛrɛma aawɔlɔn Dafidi san?>> 18Gɛ Wusayi ɛ dɔ̀ Abisalom alan, <<Kwa, ɛwɔ gɛtɛ Yahwe, ma bɛnɩ nyabɛ, ma Isareli bete powu be tiri fɔ, wakʋn gɛ nan san. 19Gɛ nkele mɔ, ɛnyan gɛ n sʋma? Nka wobi fɔ? Anlɛ gɛtɛ na sʋma aate fɔ, gɛlɛ ke gɛ nan sʋma awɔ mɔ.>>
20Gɛ Abisalom ɛ dɔ̀ Ayitofeli alan, <<Tɛ tɩ aamɩnlɛ. Lan gɛ tɩ mɛ?>>
21Ayitofeli e tiri wuunyun alan, <<San ma dʋrɔ ma aate wodima ɛbɛ gɛtɛ e kere ɛ ya alɛ bɛ nya digyu-kpara fɔ dii koro fɔ, gɛlɛ fɔ Isareli bete powu baà nʋn alan, aate wɔ kyʋnlɛ n di wɔ, gɛ ɛbɛ gɛtɛ bɛ̀ fɩya ma awɔ fɔ, baà wura ɔkɛma bɛ fɩya.>>
22Okoro be sere dɩyan dii dikwo bɛ tɛ Abisalom wɔ dɩkpaara dɩɩ gatala, gɛ ɛ dʋrɔ ma wote wodima ɛbɛ fɔ, Isareli bete powu bɔɔ bʋnʋn.>>
23Amɩnlɛ-kamasɛ gɛtɛ Ayitofeli ɛɛ̀ tɛ ɔya wʋtɔkɔ waanɩ fɔ, wù we anlɛ ɛnɩ gɛtɛ ee lila e ye gɛ Wurubwarɛ wakʋn. Gɛlɛ gɛ Dafidi ma Abisalom powu be we Ayitofeli wamɩnlɛ gɛtɛ ɛ tɛ bɛ fɔ powu.
Currently Selected:
Samuweli gɩkpa-nyɔɔfɛ 16: ADE
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy and Bible Translation
