Samuweli gɩkpa-nyɔɔfɛ 13
13
Aminon ma Tama
1Fɔ Dafidi wobi-teni Abisalom ɛ̀ ba enosobi ma ɔmɩrɩ ɛkɩ gɛtɛ bee kpèlè wɔ alɛ Tama. Ɔya wʋkɩ waanɩ fɔ, wade ɩ mɛ wotesebi Aminon ɔmɩrɩ.
2Aminon duyu di ku wonosobi Tama wo koro gɛtɛ ɛn taa we ade gɛtɛ ɛɛ̀ mɛ gba, gɛ wʋ sa wɔ geyeba. Fɔ Tama ɛn nyɩ ete.
3Fɔ Aminon ɛ̀ ba ɛwɔlɔn ɛkɩ gɛtɛ bee kpèlè wɔ alɛ Yonadabi, gɛ wote n di Dafidi wonobi Simeya. Yonadabi ɛ̀ ba gɛsɛyɩ-kpen. 4Okoro e lila Aminon alan, <<Oo, egyu wobi, anʋn yii koro gɛ aa bʋnʋn bʋʋ nyaa gɛgyɩgyan-kamasɛ gɛlɛ? Dɔ̀ mɩ ɛwʋ gɛtɛ wʋ̀ sa?>>
Ɛwʋ gɛ Amon ɛ dɔ̀ wɔ alan, <<Ǹ te len Tama, mɩɩndɩrɛ Abisalom wonosobi fɔ.>>
5Gɛ Yonadabi ɛ dɔ̀ wɔ alan, <<Ma waran dʋrɔ, fɔ àà mɛ anlɛ gɛtɛ aa yeba. Gengyi aate ɛ̀ ba ɛ̀ bɛ nya wɔ̀ fɔ, dɔ̀ wɔ alan, <Nte len miinnosobi Tama ɛ̀ɛ̀ bɛ mɛ anyandilɛ ɩkɩ tɛ mɩ nan di. Nte len wɔ èè be kpele anyandilɛ fɔ mɩɩn bʋnʋn nan we, fɔ nan di yɩ n ye walɔ yaanɩ.>>
6Okoro Aminon ɛ ma dʋrɔ, gɛ ɛ mɛ anlɛ ee yeba. Gɛtɛ egyu Dafidi ɛ ba alɛ ɛ̀ bɛ nya wɔ fɔ, Aminon ɛ dɔ̀ wɔ alan, <<Ǹ fɔ wɔ̀ gɛ, yɛ miinnosobi Tama ɛ̀ɛ̀ bɛ mɛ boroboro wʋkɩ tɛ mɩ mɩɩn bʋnʋn baanɩ fɔ nan di yɩ n ye walɔ yaanɩ.>>
7Ɛwʋ gɛ Dafidi ɛ yɛ bɛ ma kpèlè Tama be ye digyu-kpaara, gɛ ɛ dɔ̀ wɔ alan, <<San aatesebi Aminon dɩkpaara, fɔ àà ma mɛ anyandilɛ tɛ wɔ.>> 8Okoro Tama ɛ san wotesebi Aminon gɛtɛ ɛ̀ dɔ fɔ dɩkpaara. Ɛ ka afɩnaa yɩɩnʋmʋ, gɛ ɛ ŋwàrà wʋ, gɛ e kuma boroboro fɔ wɔ bʋnʋn baanɩ. 9Gɛ e tiri boroboro fɔ ɛ sa kuruwa anɩ ɛ tɛ wɔ, mɔ e terema en di.
Gɛ Aminon ɛ dɔ̀ alan, <<Yɛ ɛkamasɛ èè ye maakʋn.>> Okoro ɛkamasɛ e ye wakʋn.
10Ɛwʋ gɛ Aminon ɛ dɔ̀ Tama alan, <<Ka anyandilɛ fɔ bɛ tɛ mɩ mɩɩn gɛdʋrɔkʋn fɔ nan di yɩ aalɔ yaanɩ.>> Gɛ Tama ɛ ka boroboro gɛtɛ e kuma fɔ ɛ san ma wotesebi Aminon wɔ gɛdʋrɔkʋn. 11Mɔ ɔkʋna gɛtɛ ɛ ka anyandilɛ fɔ ɛ san ma wɔ fɔ, Aminon e gye wɔ, gɛ ɛ dɔ̀ wɔ alan, <<Miinnosobi, yɛ nan dʋrɔ ma awɔ.>>
12Gɛ Tama ɛ dɔ̀ wɔ alan, <<Kwa, miintesebi! Kara tɩtɩrɩ mɩ. Bɛɛn taa mɛ ade nyayɩ yaakɩ Isareli. Kara mɛ duyu-kɛma daade nyayɩ. 13Gaanɩ gɛ nan ka bʋnʋn buu geku gaade nyayɩ n dama? Gɛ awɔ mɔ de? Baà kpèlè wɔ̀ enyimapulɛ kpekpesi Isareli. N fɔ wɔ̀ gɛ, tabʋrʋ ma egyu fɔ, ɛn nan terema alɛ n kara kpà wɔ̀.>> 14Mɔ Aminon ɛn nʋn wakʋn, gɛ gɛtɛ ɛ̀ ba ɔkɛma da wɔ okoro, ɛ tɩtɩrɩ wɔ e len. 15Ye dʋkɔ fɔ Aminon ɛ kyʋn wɔ kpen-kpen. Ɛ kyʋn wade ɛ da gelen gɛtɛ e tɩ̀ len wɔ fɔ. Gɛ Aminon ɛ dɔ̀ wɔ alan, <<Tɔ ye san!>>
16Mɔ Tama ɛ dɔ̀ wɔ alan, <<Kwa, à berema mɩ fɔ, wù di ade-kpen da ɛwʋ gɛtɛ a wɛrɛ mɛ mɩ lɛ.>>
Mɔ ɛn nʋn wakʋn. 17Gɛ e kpèlè wɔsaranyan, gɛ ɛ dɔ̀ wɔ alan, <<Tiri ɛsʋgʋgyan nyawɔ ye mɩɩn bʋnʋn baanɩ, fɔ àà tan dɩtana fɔ!>> 18Gɛlɛ wuu koro Aminon wɔsaranyan fɔ e tiira Tama e ye okòro, gɛ ɛ tan dɩtana fɔ. Fɔ ɛ̀ sa gɛgba wurukyaa ma ɔmɩrɩ gɩkɩ, anlɛ gɛtɛ baade mɛlɛ ii wùlà gɛtɛ egyu wobi-nanɩ gɛtɛ ɛn nyɩ ete ɛɛ sa fɔ. 19Gɛ Tama ɛ ka bʋtɔ ɛ sa wo duyu, gɛ ɛ fɛɛran wɔ gɛgba wurukyaa ma ɔmɩrɩ gɛtɛ ɛ̀ sa fɔ, gɛ ɛ ka walɔ ɛ gyaga wo duyu dii koro, gɛ ɛ san ɛ da ma gewula kin-kin. 20Gɛtɛ wotesebi Abisalom e we wɔ fɔ, e lila wɔ alan, <<Aatesebi Aminon e len wɔ̀? Miinosobi, kere gewula ya, è di aatesebi, okoro kara ka nyayɩ sa aaturu waanɩ.>> Okoro Tama ɛ wɔ wotesebi Abisalom dɩkpaara gɛtɛ ɛn mɩnɩ taa nɩ fɩya ma bɛnɩ. 21Gɛtɛ egyu Dafidi ɛ nʋn ade nyayɩ powu fɔ, ɛ ka owurufa ɛ kara. 22Mɔ Abisalom ɛn dɔ̀ ade-kpen abɛɛ ade-kpara ɩkɩ tɛ Aminon. Abisalom ɛ kyʋn Aminon wade, gɛtɛ ɛ tɩtɩrɩ wonosobi Tama e len fɔ wuu koro. 23Bɩkyan bʋnyɔɔ bʋʋ gama gɛtɛ bɛɛ wɔrɔ Abisalom wɔ bɛyɛran baanu Baali-Haso gɛtɛ wʋ̀ gbɛma Efrayim wɔ balan fɔ, ɛ fɩna gʋlɔ e kpèlè egyu Dafidi bebi-teni fɔ powu.#13.23 yema wù di ɔsɛ-dɩrɛ wuu gedi tɛ bɛyɛran boofonte fɔ. 24Gɛ Abisalom ɛ san egyu Dafidi wakʋn, gɛ ɛ dɔ̀ wɔ alan, <<Mɩɩn bɛnɩ gɛtɛ bɛɛ wɔrɔ mɩɩn bɛyɛran baanu fɔ bɛ ba. Ntɛ fɔ egyu ma wɔ bɛndɩrɛbi bàà bɛ fɩya ma nmɩ.>> 25Mɔ egyu ɛ dɔ̀ Abisalom alan, <<Kwa, miinbi, wun di gɛtɛ ɛtɩ powu tàà san. Yema taà mɛ ditola-dɩrɛ tɩ tɛ wɔ̀.>> Ma gɛtɛ Abisalom ɛ nyɩ̀ wɔ gepepe gba fɔ, e terema alɛ ɛn nan san, mɔ Dafidi e hira wɔ. 26Gɛ Abisalom ɛ dɔ̀ wɔ alan, <<Gengyi gɛlɛ bɩrɛ fɔ, n fɔ wɔ gɛ, yɛ Aminon ɛ̀ɛ̀ san ma ɛtɩ.>> Gɛ egyu Dafidi e lila wɔ alan, <<Anʋn yii koro gɛ wù di gɛtɛ ɛ̀ɛ̀ san ma ɛyɩ?>> 27Mɔ Abisalom e yela ade fɔ yii koro ma sere ɔkʋna gɛtɛ wote ɛ tɛ osele alɛ Aminon, ma egyu bebi fɔ powu bɛ nyɩma wɔ bɛ san. 28Gɛ Abisalom ɛ dɔ̀ wɔ bɛsaranyan fɔ alan, <<Ɩ nʋn, gengyi Aminon ɛ̀ nyʋn bʋkan, gɛ è su, gɛ ee di ɔsɛ, gɛ n dɔ̀ yɩ alan, <I wolo wɔ fɔ!> I wolo wɔ! Ɩ kara yɛ gɩsaa gàà ton yɩ, yema nmɩ na dɔ̀ yɩ alɛ, ɩ mɛ. I sere woturu ɩ mɛ.>> 29Okoro Abisalom bɛsaranyan fɔ bɛ mɛ Aminon anlɛ gɛtɛ Abisalom ɛ dɔ̀ bɛ alɛ bɛ mɛ fɔ. Ɛwʋ gɛ egyu bebi fɔ powu bɛ tɔ, gɛ ɛkamasɛ ɛ ka wɔ dɩkpɔŋɔ-tɩtɩɩ, gɛ be serenti bɛ da.
30Ɔkʋna gɛtɛ bɛ̀ san ma osele bɛɛ fɔrɔ fɔ, ɔtʋn wʋ tama egyu Dafidi alan, <<Aabi Abisalom e wolo aa bebi fɔ powu, gɛ ɛkɩlɩn gba en kuruma.>> 31Gɛ egyu fɔ ɛ tɔ, gɛ ɛ fɛɛran wɔ gɛgba, gɛ ɛ waran ɛ dʋrɔ gɛtʋnkwaa, gɛ wɔ bɛsaranyan gɛtɛ bɛ̀ sa wakʋn fɔ mɔ powu bɛ fɛɛran bɔɔ ngba.
32Mɔ Dafidi wonobi Simeya wobi Yonadabi ɛ dɔ̀ egyu Dafidi alan, <<Miinfonte, kara sa amɩnlɛ alɛ aa bebi fɔ powu be ku. Aminon woko gɛ be wolo. Bo ye duwi gɛtɛ Aminon ɛ tɩtɩrɩ Tama e len fɔ gɛ Abisalom ɛ sa amɩnlɛ alɛ, eè wolo wɔ. 33Miinfonte egyu, kara to di alɛ aa bebi fɔ powu be ku, Aminon woko gɛ be wolo.>>
34Ɔkʋna wʋtɔkɔ fɔ, Abisalom e serenti. Gɛ ɛnɩ gɛtɛ è yela Yerusalem ɩpɔrɩ yii koro ɛɛ dɩyɛ fɔ ɛ bʋma bʋnʋn ɛ nya, gɛ e we bɛnɩ kpekpesi dɩdan dii koro, ofila wʋ̀ gɛnʋ̀nkʋn wʋʋ gɩlan gɛtɛ bɛɛ waran odon fɔ wʋʋ bɩlan baanɩ bɛɛ ba. Gɛ ɛdɩyɛlɛ fɔ ɛ ma dɔ̀ egyu alan, <<Na we bɛnɩ bɛkɩ bɛɛ waran Horonayim wodon fɔ wʋʋ bɩlan baanɩ bɛɛ ba.
35Gɛ Yonadabi ɛ dɔ̀ egyu Dafidi alan, <<Nya, aa bebi fɔ n tɛ ba, wʋ ba waanɩ anlɛ gɛtɛ na bɔ na dɔ̀ fɔ.>>
36Gɛtɛ ɛ tabʋrʋ e were fɔ, egyu bebi fɔ be be gyu, gɛ bɛ gbɛrɛ afala be wula kin-kin. Egyu Dafidi ma wɔ bɛsaranyan fɔ powu mɔ be wula gepepe.
37Mɔ Abisalom e serenti ɛ san Gesuri wogyu Amidu wobi Talimayi wakʋn. Mɔ Dafidi ee wula wobi fɔ duwi n di duwi. 38Gɛtɛ Abisalom e serenti ɛ san Gesuri fɔ, ɛ sara dʋkɔ bɩkyan besiyee. 39Gɛ egyu Dafidi e kere Aminon diku fɔ daamɩnlɛ yɩɩ gɛsa ɛ ya, gɛ ɛ yɛ ee bugiti wobi Abisalom.
Currently Selected:
Samuweli gɩkpa-nyɔɔfɛ 13: ADE
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy and Bible Translation
