Samuweli gɩkpa-nyɔɔfɛ 10
10
Dafidi e di Amon bete boo koro
1Nyawʋ wʋʋ gama fɔ, Amon bete boogyu fɔ e ku, gɛ wobi Hanun e di bugyu e sere wɔ gɩsɩrɩ. 2Gɛ Dafidi ɛ dɔ̀ alan, <<Nan tiri gɩnɩ-kpara n wùlà Nahasa wobi Hanun, anlɛ gɛtɛ wote e tiri gɩnɩ-kpara e wùlà mɩ fɔ.>> Okoro Dafidi ɛ sa wɔ bɛsaranyan gɛ bɛ ma sa wɔ wote diku fɔ diinyun. Gɛtɛ Dafidi bɛsaranyan fɔ bɛ ma gyu Amon bete bɔɔ gɛtʋnkwaa gaanɩ fɔ, 3Amon bete bɔɔ bɛndɩrɛ be lila boofonte Hanun alan, <<Aa to a di alɛ Dafidi bɛsaranyan gɛtɛ ɛ sa aakʋn bàà bɛ sa wɔ̀ onyun lɛ, wù di gɛ gebù gɛ è de ɛɛ tɛ aate? Dafidi ɛn sa gɛ wɔ bɛsaranyan fɔ alɛ bɛ bɛ nya ditele fɔ bàà kpà ma ɛtɩ?>> 4Okoro Hanun e gye Dafidi bɛsaranyan fɔ, gɛ ɛ wɔrɔ baanɩ-kamasɛ bikpri ɔfan, gɛ be kebi bɔɔ ngba bʋʋ gama gatɩn-gatɩn, gɛ e berema bɛ.
5Gɛtɛ Dafidi ɛ nʋn ade fɔ, ɛ sa bɛnɩ gɛ bɛ ma tuma bɛ, yema bɛ sa bɛ ɩnɩnfa gepepe. Gɛ egyu Dafidi ɛ dɔ̀ bɛ alan, <<Ɩ sara Yeriko ma sere gɛtɛ yii bikpri fɔ bàà gyu, pɛ yàà ba.>>
6Gɛtɛ Amon bete bɛ nyɩnla alɛ bɛ sa Dafidi owurufa fɔ, bɛ ma hayɩ Siriya bɩtà bʋʋ bɛtàlɛ gɛtɛ bɛ̀ san ma bɩsɩrɩ disepekyi (20,000) be ye Beti-Rebo, ma Soba. Gɛlɛ ke gɛ bɛ hayɩ bɩtà bʋʋ bɛtàlɛ nkpɩn ton (1,000) be ye Maaka wogyu wakʋn. Gɛ be ni biri bɛ hayɩ bɛnɩ ɩgbaa kooron (12,000) mɔ be ye Tobi wakʋn.
7Gɛtɛ Dafidi ɛ nʋn ade nyayɩ fɔ, ɛ sa Yowabi ma bɩtà bʋʋ bɛtàlɛ fɔ powu bàà ma kpà ma ɛbɛ. 8Gɛ Amon bete fɔ be be yela ditele fɔ diitunu, fɔ Siriya bete gɛtɛ be ye Soba ma Rehobi, ma bɛnɩ gɛtɛ be ye Tobi ma Maaka fɔ mɔ bɛ pɩna koro bè yela gama bee so akpa.
9Gɛtɛ Yowabi e we alɛ bɛnɩ fɔ be silin be tuma wɔ bʋnʋn ma wɔ gama fɔ, e tiri Isareli bɩtà bʋʋ bɛtàlɛ gɛtɛ bɛ nyɩ̀ akpa fɔ bɛkɩ, gɛ e gyegeye bɔɔ bʋnʋn gɛ bɛ kpà ma Siriya bete fɔ. 10Yowabi ɛ ka bɩtà bʋʋ bɛtàlɛ-kurumakyɛɛ fɔ ɛ sa wonobi Abisayi gʋlɔ, gɛ e tiri bɛ osele alɛ bɛ ma kpà ma Amon bete fɔ. 11Gɛ Yowabi ɛ dɔ̀ wonobi Abisayi alan, <<Gengyi Siriya bete fɔ bɔɔkɛma wʋ̀ da mɩ fɔ, wù di gɛtɛ àà bɛ kpà mɩ, mɔ gengyi Amon bete fɔ bɔɔkɛma wʋ̀ da wɔ̀ fɔ, nmɩ mɔ nan bɛ kpa wɔ̀. 12Yela kin-kin fɔ àà yɛ taà sere oturu tɩ kpà tɩ tɛ tɩɩ bɛnɩ, ma Wurubwarɛ atele fɔ. Yahwe ɛɛ̀ mɛ ɛwʋ gɛtɛ wʋ̀ kɔlɔ.>>
13Gɛtɛ Yowabi ma wɔ bɛnɩ be serenti be gyu gɛtɛ bàà ma kpà ma Siriya bete fɔ, Siriya bete fɔ be serenti. 14Ɔkʋna gɛtɛ Amon bete fɔ be we alɛ Siriya bete fɔ bee serenti fɔ, ɛbɛ mɔ be serenti be ye Abisayi bʋnʋn, gɛ be be gyu ditele fɔ daanɩ. Okoro Yowabi e ye akpa fɔ yaanɩ ɛ ba Yerusalem.
15Nkele Siriya bete be we gɛtɛ nka bɔɔ dɩkʋsʋ n di Isareli bete, okoro be tuma akpi fɔ powu ɔkʋn-kɩlɩn. 16Gɛ Hadadese ɛ sa bɛnɩ, gɛ bɛ ma ka Siriya bete be ye Efurate getu giifen. Gɛ Sobaki gɛtɛ è di Hadadese bɩtà bʋʋ bɛtàlɛ bɔɔndɩrɛ fɔ e gyegeye bɔɔ bʋnʋn, gɛ bɛ san Helam ditele daanɩ. 17Gɛtɛ Dafidi ɛ nʋ̀n ade nyayɩ fɔ, ɛ kʋla Isareli bɩtà bʋʋ bɛtàlɛ powu, gɛ bɛ kààrà Yodan getu fɔ, gɛ bɛ da Helam ditele daanɩ. Fɔ Siriya bete fɔ bɛ tɩyɛ akpa yɩɩ gba bàà kpà ma Dafidi. 18Mɔ Siriya bete fɔ be serenti be ye Isareli bete fɔ baakʋn, gɛ Dafidi e wolo Siriya bete boo betiiramisan yɩɩ bɛsaralɛ fɔ baanɩ nkpɩn bisiyee ma akpilin ton (700), ma bɩtà bʋʋ bɛtàlɛ gɛtɛ bɛ̀ san ma bɩsɩrɩ asepekyi anyɔɔ (40,000). Dafidi e wolo Sobaki gɛtɛ è di bɔɔ bɩtà bʋʋtàlɛ ɛndɩrɛ fɔ dʋkɔ. 19Gɛtɛ begyu gɛtɛ bɛ mɛ onyun-kɩlɩn ma Hadadese fɔ powu be we alɛ Isareli bete be di boo koro fɔ, bɛ ka koro bɛ tɛ Isareli bete fɔ, gɛ bɛ sara bɔɔ gatɩn. Okoro gɩsaa gi ton Siriya bete fɔ gɛtɛ bàà biri nɩ mɛ onyun ma Amon bete, fɔ bàà kpà ma Isareli bete.
Currently Selected:
Samuweli gɩkpa-nyɔɔfɛ 10: ADE
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy and Bible Translation
