2 Begyu-dɩrɛ 4
4
Elisa e to ɛkpɩnsɔ ɛkɩ ɛ ya
1Ɛna ɛkɩ gɛtɛ nafɔ wɔsan è di Wurubwarɛ bɛtabʋrʋlɛ fɔ baanɩ ɛkɩ fɔ e wula ɛ tɛ Elisa alan, <<Mɩɩnsan gɛtɛ nafɔ è di aasaranyan fɔ e ku, gɛ à nyɩ̀ gɛtɛ ka ɛ ka oturu-kpara ɛ sʋma Yahwe. Mɔ è de gutoro, gɛtɛ wʋ yɛ ɛnɩ gɛtɛ è de gutoro fɔ ɛɛ ba ɛ̀ɛ̀ bɛ ka miin bebi-tenibi bɛnyɔɔ ma mɛ wɔ bɛdɩ̀.>>
2Ɛwʋ gɛ Elisa e tiri wuunyun ɛ tɛ wɔ alan, <<Anʋn gɛ nan talɩ n ka n kpa wɔ̀? Dɔ̀ mɩ gɩnyan gɛtɛ à ba aa dikwo daanɩ?>> Ɛwʋ gɛ ɛna fɔ e tiri wuunyun alan, <<Aasʋgʋgyan ɛn ma gɩnyankɩ pilim-pilim, bʋnɔ bɛrɛɛ bʋkɩ buuko n sa.>>
3Gɛ Elisa ɛ dɔ̀ alan, <<San ma fɔ aawɔlɔn ɛbɛ bɔɔ bɛgalɔn-kwaa bàà sɔ anlɛ gɛtɛ à len.>> 4Wʋʋ gama fɔ, gyu dikwo, fɔ àà tan ɔpʋnʋ sa ɛyɩ ma aa bebi fɔ, fɔ àà daa bʋnɔ fɔ sa bɛgalon fɔ baanɩ. Gengyi galon wʋkɩ wʋ̀ yɔn fɔ, kpema wʋ sɩ̀ gɩlan.>>
5Okoro ɛna fɔ e kpe e ye Elisa wakʋn. Gɛtɛ ɛ ba dɩkpaara fɔ, ɛ tan dikwo ɛ sa ɛbɛ ma wo bebi fɔ. Bebi fɔ bɛɛ ka bɛgalɔn fɔ bɛ mɔma wɔ, fɔ ɛwɔ mɔ ɛɛ da bʋnɔ fɔ ɛ sa baanɩ. 6Gɛtɛ bɛgalɔn fɔ powu bɛ yɔn fɔ, ɛ dɔ̀ wo bebi fɔ baanɩ ɛkɩ alan, <<Ka galɔn-fon tɛ mɩ.>>
Ɛwʋ gɛ wobi fɔ ɛ dɔ̀ wɔ alan, <<Galɔn wʋkɩ wun mini kuruma.>> Gɛ bʋnɔ fɔ bu ten.
7Ɛwʋ gɛ ɛna fɔ ɛ san ɛ ma dɔ̀ Wurubwarɛ wɔtabʋrʋlɛ fɔ. Gɛ Wurubwarɛ wɔtabʋrʋlɛ fɔ ɛ dɔ̀ wɔ alan, <<San ma fu bʋnɔ fɔ, fɔ àà le aatoro fɔ. Ka sɩka gɛtɛ eè kuruma fɔ nya ɛyɩ ma aa bebi yii koro.>>
Elisa ɛ yɛ Sunami-na ɛkɩ wobi e biri e wura nkpa
8Duwi dɩkɩ, Elisa ɛ san Sunemi. Fɔ ɛkyɩnyɩn-na ɛkɩ ɛ̀ sa dʋkɔ gɛtɛ ɛɛ tɩ̀ nyɩ̀ Elisa alɛ e ten wakʋn fɔ èè di. Okoro ɔya-kamasɛ gɛtɛ Elisa è gyu dʋkɔ fɔ, ee ten dʋkɔ e di. 9Gɛ ɛna fɔ ɛ dɔ̀ wɔsan alan, <<Ǹ nyɩ gɛtɛ ete nyawɔ gɛtɛ ɛɛ tɩ ba nfan lɛ è di gɛ Wurubwarɛ wɔnɩ. 10Okoro yɛ tàà mɛ dikwobi gɛwalɩkʋn gatala, fɔ tàà sɩ̀ wɔ npa, ma ɔkpʋlɔ, ma gɛbɩya, ma kandɩya dʋkɔ. Ɛwʋ fɔ, ɛɛ̀ talɩ ɛ tɩ̀ sara daanɩ ɔya-kamasɛ gɛtɛ ɛ̀ ba taakʋn fɔ.
11Duwi dɩkɩ Elisa e biri ɛ san Sunemi, gɛ ɛ bʋn ɛ san dikwo fɔ daanɩ ɛ ma dʋrɔ. 12Ɛwʋ gɛ ɛ dɔ̀ wɔsaranyan Gehasi alan, <<Kpèlè Sunami-na fɔ tɛ mɩ!>> Okoro e kpèlè ɛna fɔ, gɛ e be yela wɔ bʋnʋn. 13Gɛ Elisa ɛ dɔ̀ wɔsaranyan fɔ alan, <<Dɔ̀ wɔ alan, <Tii koro gɛ a fana dɩfana nyadɩ powu lɛ. Anʋn gɛ taà talɩ tɩ mɛ tɩ tɛ wɔ̀? Tɩ̀ talɩ tɩ tabʋrʋ ma egyu-dɩrɛ abɛɛ bɩtà bʋʋndɩrɛ tɩ tɛ wɔ̀?> >>
Ɛwʋ gɛ ɛna fɔ e tiri wuunyun alan, <<Mɩɩn bɛnɩ bɛɛ nya miin koro ade powu yaanɩ.>> 14Ɛwʋ gɛ Elisa e lila Gehasi alan, <<Anʋn nte hiyan gɛtɛ nan mɛ n tɛ wɔ?>> Gɛ Gehasi alan, <<To! Ɛn ma ebi, gɛ wɔsan mɔ ɛ dan ditenikwaa.>>
15Gɛ Elisa alan, <<Ɛwʋ bɩrɛ kpèlè wɔ ba!>> Ɛwʋ gɛ Gehasi e kpèlè ɛna fɔ, gɛ e be yela otunu. 16Gɛ Elisa ɛ dɔ̀ ɛna fɔ alan, <<Gɩkyan-fon, ɔya nyawʋ waanɩ anlɛ, aà ton ebi aalɔ yaanɩ!>>
Gɛ e tiri wuunyun alan, <<Oo miinfonte! Kara gban mɩ, à di gɛ Wurubwarɛ wɔnɩ.>>
17Ɔya bɛrɛɛ wʋkɩ wʋʋ gama fɔ, ɛna fɔ e ton diboro, gɛ gɛtɛ gɩkyan gi tuma, ɔya-kɩlɩn wʋtɔkɔ waanɩ fɔ, e wo ebi-tenibi anlɛ gɛtɛ Elisa ɛ bɔ ɛ dɔ̀ wɔ fɔ.
18Ebi fɔ ɛ dan, gɛ ɛ tɔ duwi dɩkɩ ɛ san wote wakʋn. Fɔ wote ɛ̀ sa oli waanɩ ma wɔ gʋtʋn gɩɩ bɛmɛlɛ. 19Disere-kɩlɩn fɔ, ɛ dɔ̀ wote alan, <<Agyee, miin duyu! Agyee miin duyu!>>
Gɛ wote ɛ dɔ̀ wɔsaranyan ɛkɩ alan, <<Ka wɔ sama wɔna!>> 20Ɛwʋ gɛ ɛsaranyan fɔ e tola ebi fɔ ɛ san ma wɔna. Ebi fɔ ɛ gyaga wɔna wakpin yii koro gɛlɛɛ ma sere gɛtɛ ofila wʋ sara atele, gɛ e ku. 21Ɛwʋ gɛ ɛna fɔ ɛ ka ebi fɔ ɛ bʋn ɛ san Elisa dikwo daanɩ, gɛ ɛ ka wɔ ɛ dʋrɔ wɔ npa wo koro, gɛ ɛ tan dikwo ɛ sa wɔ, gɛ e ye.
22Ɛwʋ gɛ e kpèlè wɔsan, gɛ ɛ dɔ̀ wɔ alan, <<Ǹ fɔ wɔ̀ gɛ, yɛ aasaranyan fɔ ɛkɩ ɛ̀ɛ̀ ka dɩkpɔŋɔ-tɩtɩɩ dɩkɩ mɔma mɩ nan serenti n san Wurubwarɛ wɔnɩ fɔ wakʋn nan ba.>>
23Gɛ wɔsan e lila wɔ alan, <<Anʋn yii koro gɛ aa fɔrɔ wakʋn ǹdò? Ǹdò wuun di gɛ ebon-fon wɔsɛ wuu gedi, gɛ wuun di gɛ duwi-tunalɛ.>>
Gɛ ɛna fɔ ɛ dɔ̀ wɔ alan, <<Ade ɩkɩ ɩn ma!>>
24Ɛ pɩna dɩkpɔŋɔ-tɩtɩɩ fɔ, gɛ ɛ dɔ̀ wɔsaranyan fɔ alan, <<Gyaga dɩkpɔŋɔ fɔ taà san! Kara nya alɛ miin koro fɔ aa yɔlɔ, sɩyɛɛ nmɩ na dɔ̀ wɔ̀ pɛ.>> 25Okoro ɛ tɔ ɛ ma gyu Wurubwarɛ wɔnɩ fɔ wakʋn, Karimeli wodon wuu koro.
Gɛtɛ Wurubwarɛ wɔnɩ fɔ e we ɛna fɔ ɔfɔ fɔ, ɛ dɔ̀ wɔsaranyan Gehasi alan, <<Nya, Sunami-na fɔ ɛɛ ba! 26Serenti ma tuma wɔ, fɔ àà lila alan, <À si gepe? Asaan è si gepe? Aabi è si gepe?> >>
Gɛ ɛna fɔ alan, <<Ɩɩn, tɩ̀ si gepe.>> 27Gɛtɛ ɛna fɔ e gyu Wurubwarɛ wɔnɩ fɔ wakʋn, odon fɔ wuu koro fɔ, e gye wɔ bɩsɩrɩ. Gɛ Gehasi ɛ san gɛtɛ ɛ̀ɛ̀ ma kpema wɔ ye gama. Mɔ Wurubwarɛ wɔnɩ fɔ ɛ dɔ̀ wɔ alan, <<Kere wɔ ya! Ɛ̀ sa dɩkpʋkpʋ daanɩ, mɔ Wurubwarɛ ɛ ka wʋ e bubwa mɩ. Ɛn yɛ mɩ nan nyɩnla ade-kɩlɩn fɔ.>>
28Gɛ ɛna fɔ e lila wɔ alan, <<Miinfonte, na fɔ wɔ̀ ebi ɛkɩ? Mɩn dɔ̀ wɔ̀ gɛ alɛ kara gban mɩ mɩɩn bʋnʋn bàà gyaga ade ɩkɩ yii koro tuntun?>> 29Ɛwʋ gɛ Elisa ɛ dɔ̀ Gehasi alan, <<Pɩna koro, fɔ àà ka miinyon-tonlɛ, fɔ àà serenti san. Gengyi à tuma ɛnɩ ɛkɩ fɔ, kara sa wɔ̀ onyun. Gɛ gengyi ɛnɩ ɛkɩ ɛ̀ sa wɔ̀ onyun fɔ, kara yera wɔ. À gyu fɔ ka miinyon-tonlɛ fɔ gyaga ebi fɔ bʋnʋn buu koro.>>
30Mɔ ebi fɔ wɔna ɛ dɔ̀ Elisa alan, <<Na nya Yahwe, gɛ na nya awɔ gbagba alɛ mɩn nan da gɛtɛ an fɩya ma nmɩ.>> Okoro ɛ tɔ ɛ tɛrɛma wɔ ɛ san.
31Gehasi e gyegeye bɛ ɛ ma gyu, gɛ ɛ ka oyon fɔ ɛ gyaga ebi fɔ bʋnʋn buu koro. Mɔ ebi fɔ ɛn tabʋrʋ, gɛ ɛn kya koro. Okoro Gehasi e biri ɛ san ɛ ma tuma Elisa, gɛ ɛ dɔ̀ wɔ alan, <<Ebi fɔ ɛn lama.>>
32Gɛtɛ Elisa e gyu dɩkpaara fɔ daanɩ fɔ, ebi fɔ e ku ɛ̀ dɔ wɔ npa wo koro. 33Ɛwʋ gɛ Elisa e gyu dikwo fɔ daanɩ, gɛ ɛ tan, gɛ e tiri onyun ɛ tɛ Yahwe. 34Gɛ ɛ waran ɛ dʋrɔ ebi fɔ wo koro ɛ ka wonyun e ten ma ebi fɔ wonyun, wɔ bʋnʋn bù ten ma ebi fɔ bʋnʋn, walɔ ɩ̀ sa ebi fɔ walɔ yaanɩ. Gɛtɛ Elisa ɛ̀ tʋna ebi fɔ wo koro gɛlɛ fɔ, ebi fɔ wo koro gɩ kya gɛya. 35Elisa ɛ tɔ ebi fɔ wo koro, gɛ ɛ̀ san ɛ̀ san ma dikwo fɔ, gɛ e biri ɛ ma dʋrɔ ebi fɔ wo koro. Gɛ ebi fɔ ɛ sɩrɩ disere kwarankɩ, gɛ e tirima bʋnʋn.
36Ɛwʋ gɛ Elisa e kpèlè Gehasi, gɛ ɛ dɔ̀ wɔ alan, <<Kpèlè ebi fɔ wɔna tɛ mɩ!>> Gɛ e kpèlè wɔ. Gɛtɛ ɛna fɔ e be gyu fɔ, Elisa ɛ dɔ̀ wɔ alan, <<To aabi!>> 37E gyu dikwo fɔ daanɩ, gɛ ɛ waran e kura gɛtʋnkwaa Elisa bɩsɩrɩ baanɩ, gɛ ɛ ka wobi, gɛ e ye okòro.
Elisa e biri ɛ mɛ apenterebi-de
38Duwi dɩkɩ, gɛtɛ dɩkpan dɩ nʋ̀n gɛtʋnkwaa fɔ powu gaanɩ fɔ, Elisa e biri ɛ san Giligali. Gɛtɛ ee wùlà Wurubwarɛ bɛtabʋrʋlɛ dikpi bɛkɩ ade fɔ, ɛ dɔ̀ wɔsaranyan alan, <<Ka gikunbi-dɩrɛ fɔ gyaga, fɔ àà mɛ dabuli tɛ bɛ.>>
39Ɛwʋ gɛ, baanɩ ɛkɩ e ye ɛ da dɩfa daanɩ ɛ̀ ma kʋla dɩfa, gɛ e we dɩfa dɩɩ wayɩn. Ɛ ya waabi fɔ ɛ yɔla wɔ gɛgba gii bekotoku baanɩ. Gɛtɛ e biri e be gyu fɔ, e kebi yɩ ɛ sa dabuli gikunbi fɔ gaanɩ, mɔ ɛnɩ ɛkɩ ɛn nyɩnla anyan gɛtɛ ì di. 40Gɛtɛ bɛ sa bɛnɩ fɔ dabuli fɔ gɛ bee di fɔ, bɛ gbɛrɛ afala alan, <<Oo, Wurubwarɛ wɔnɩ, gɛgbɛrɛ gɩ̀ sa dabuli fɔ wanɩ.>> Okoro bɛn talɩ di dabuli fɔ.
41Gɛ Elisa alan, <<Ɩ tɛ mɩ ɔnʋmʋ bɛrɛɛ.>> Ɛwʋ gɛ ɛ ka ɔnʋmʋ fɔ ɛ sa gikunbi fɔ gaanɩ, gɛ alan, <<Ɩ kpà ɩ tɛ bɛnɩ fɔ bàà di.>>Gɛ ben mini we gɛgbɛrɛ gɩkɩ gikunbi fɔ gaanɩ.
Elisa ɛ yɛ bɛnɩ akpilin ton be di anyandilɛ bɛ kʋtɩ
42Duwi dɩkɩ ete ɛkɩ gɛtɛ e ye Baali-Salisa ditele daanɩ fɔ ɛ ka wanyan-fon yaabi yii beboroboro dikpilin ma anyan-fon yaabi ɛ sa kotoku anɩ, gɛ ɛ ka yɩ ɛ mɔma Wurubwarɛ wɔtabʋrʋlɛ fɔ. Gɛ Elisa ɛ dɔ̀ wɔsaranyan fɔ alan,<<Yo yɩ tɛ bɛnɩ fɔ bàà di!>>
43Ɛwʋ gɛ wɔsaranyan fɔ e lila wɔ alan, <<Aa to a di alɛ anyan nyayɩ yaà nɩma nan yo n tɛ bɛnɩ akpilin ton?>>
Gɛ Elisa e tiri wuunyun alan, <<Yo yɩ tɛ bɛ bàà di, yema Yahwe ɛ dɔ̀ alɛ baà di yɩ, gɛtɛ yaà biri i kuruma.>> 44Okoro ɛsaranyan fɔ e yo anyandilɛ fɔ ɛ tɛ bɛ, gɛ be di yɩ be kuruma, anlɛ gɛtɛ Yahwe ɛ bɔ ɛ dɔ̀ fɔ.
Currently Selected:
2 Begyu-dɩrɛ 4: ADE
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy and Bible Translation
