2 Begyu-dɩrɛ 22
22
Yuda wogyu Yosiya
1Bɛ sɩ̀ Yosiya bugyu fɔ ɛ̀ ba bɩkyan nɩyɛ, gɛ e di bugyu Yerusalem bɩkyan dikpilin ma fwo-dɩkɩ. Wɔna diyere n di Yedida, Adaya wobi-nanɩ gɛtɛ e ye Bosikati fɔ. 2Ɛ mɛ ade gɛtɛ ɩ̀ tʋna Yahwe bʋnʋn gɛ ɛ san wotu Dafidi wo-isele powu yaanɩ. En fi san dɩbɩyan abɛɛ ologyi.
3Wo bugyu buu gedi wʋʋ gɩkyan fwo-nɩyɛfɛ gaanɩ fɔ, egyu Yosiya ɛ sa gɩkpa gɩɩŋwaralɛ Asaliya wobi-teni Safan gɛtɛ wotu n di Mesulam fɔ Yahwe Dikwo-dɩrɛ fɔ daanɩ alan, 4<<San gedi gɩɩtɛlɛ ɛndɩrɛ Hilikiya wakʋn fɔ àà ma dɔ̀ wɔ alɛ ɛ kʋla sɩka gɛtɛ bɛnɩ bɛ ka bɛ ba Yahwe Dikwo-dɩrɛ daanɩ gɛ otunu wʋʋ bɛnyalɛ be to be ye bɛnɩ baakʋn fɔ. 5Dɔ̀ wɔ ɛ̀ɛ̀ ka sɩka fɔ sa ɛbɛ gɛtɛ be tiri bɛ sɩ̀ gɛ bɛɛ nya Dikwo-dɩrɛ fɔ dii koro fɔ bɔɔ gʋlɔ, fɔ bàà ka sɩka fɔ le gʋtʋn gɩɩ bɛmɛlɛ gɛtɛ bɛɛ pɩna Yahwe Dikwo-dɩrɛ fɔ. 6Wù di gɛtɛ bàà le iyon yɩɩ bɛsalɩlɛ ma bɛmaralɛ, ma ɩpɔrɩ yii beserelɛ, fɔ àà biri yɛ bɛ bàà se iyon ma ataa kpalɩlɛ bàà ka pɩna Yahwe Dikwo-dɩrɛ fɔ. 7Ɛbɛ gɛtɛ bɛɛ nya gʋtʋn fɔ gii koro fɔ bɛ̀ ba nʋnkwarɩ, okoro wun di gɛtɛ yàà yɛ bɛ bàà mɛ akʋtan.>> 8Gedi gɩɩtɛlɛ ɛndɩrɛ Hilikiya ɛ dɔ̀ gɩkpa gɩɩ ŋwaralɛ Safan alan, <<Na we Ose wʋʋ gɩkpa fɔ Yahwe Dikwo-dɩrɛ fɔ daanɩ.>> Ɛ ka gɩ ɛ tɛ Safan gɛ ɛ kalan gɩ. 9Ɛwʋ gɛ gɩkpa gɩɩŋwaralɛ Safan ɛ san egyu wakʋn ɛ ma dɔ̀ wɔ alan, <<Aa bɛndɩrɛbi fɔ bɛ kʋla sɩka gɛtɛ wʋ̀ sa Yahwe Dikwo-dɩrɛ daanɩ fɔ gɛ bɛ ka wɔ bɛ sa gʋtʋn gɩɩ bɛmɛlɛ ma ɛbɛ gɛtɛ bɛɛ nya gʋtʋn fɔ gii koro fɔ.>> 10Ɛwʋ gɛ gɩkpa gɩɩŋwaralɛ Safan ɛ dɔ̀ egyu alan, <<Gedi gɩɩtɛlɛ Hilikiya ɛ ka gɩkpa gɩkɩ ɛ tɛ mɩ.>> Gɛ Safan ɛ kalan gɩ egyu bʋnʋn.
11Gɛtɛ egyu fɔ ɛ nʋn Ise yɩɩ Gɩkpa fɔ gaagyebi fɔ, ɛ fɛɛran wɔ ngba. 12Ɛ tɛ gedi gɩɩtɛlɛ Hilikiya, ma Safan wobi Ahikim, ma Mise wobi Akibori, ma gɩkpa gɩɩŋwaralɛ Safan, ma egyu wɔsaranyan Asaya ose alan, 13<<Ɩ san i ma lila Yahwe ɩ tɛ nmɩ ma Yuda bɛnɩ powu ka dama ade gɛtɛ bɛ ŋwara bɛ sa gɩkpa nyagɩ gɛtɛ be we fɔ gaanɩ lɛ. Yahwe ɛ ka wowurufa-dɩrɛ tii koro, yema tiitu ɛbɛ ben di gɩkpa fɔ gaade yii koro. Bɛn mɛ ade gɛtɛ bɛ ŋwara bɛ sa gɩkpa fɔ gaanɩ ka dama tii koro fɔ.>>
14Okoro gedi gɩɩtɛlɛ Hilikiya, ma Ahikam, ma Akibori, ma Safan, ma Asaya bɛ san ɛtabʋrʋlɛ-nanɩ Hulida gɛtɛ wɔsan n di Tikifa wobi Salum gɛ wotu n di Harihasi gɛtɛ ɛɛ nya ngba gɛtɛ bɩ̀ sa Dikwo-dɩrɛ daanɩ fɔ ii koro fɔ wakʋn. Ɛ̀ sa gɛ Yerusalem Wɔlanlan-Nyɔɔfɛ fɔ.
15Gɛ ɛ dɔ̀ bɛ alan, <<Yahwe, Isareli wo Wurubwarɛ fɔ alan, <Ɩ dɔ̀ ɛnɩ gɛtɛ ɛ sa yɩ maakʋn fɔ alan, 16Yahwe alan, < Nan yɛ gyerebi ɛ̀ɛ̀ nʋ̀n Yerusalem ma wɔ bɛnɩ boo koro anlɛ gɛtɛ bɛ ŋwara bɛ sa gɩkpa gɛtɛ Yuda wogyu ɛ kalan fɔ gaanɩ fɔ. 17Yema be kere mɩ gɛsʋma bɛ ya gɛ be kuma olife bɛ tɛ bekpen, gɛ bɛ mɛ bekpen bɛ sa mɩ owurufa. Miinwurufa waà tɔ Yerusalem wo koro gɛ wʋn nan nʋ̀n wʋ nya.> 18Ɩ ma dɔ̀ Yuda wogyu gɛtɛ ɛ sa yɩ alɛ ɩ ma lila Yahwe ɩ nʋn fɔ alan, <Yahwe, Isareli wo Wurubwarɛ ɛɛ dɔ̀ ka dama ade gɛtɛ ɩ nʋn lɛ alɛ, 19gɛtɛ i foma yaamɩnlɛ, gɛ ɩ warama koro gatɩn ɩ tɛ nmɩ Yahwe, ɔkʋna gɛtɛ ɩ nʋn gefura gɛtɛ na fura gɩfɩɩ fɔ ma gɩɩ bɛnɩ ma gɛfwala gaade gɛtɛ na dɔ̀ ka dama gɛtʋnkwaa fɔ ma gɩɩ bɛnɩ alɛ baà bɛ̀ mɛ bɛnɩ fwalalɛ fɔ, ɩ fɛɛran yɩɩ ngba gɛ i wula mɩɩn bʋnʋn fɔ, nmɩ Yahwe na nʋn yiinyun-tiri. 20Gɛlɛ wuu koro, nan yɛ yɩ yàà ku bàà lò yɩ olila waanɩ pɛ gyerebi gɛtɛ nan yɛ ɛ̀ɛ̀ ba Yerusalem fɔ ɛ̀ɛ̀ ba.> >>
Ɛwʋ gɛ be birima wanyun-gyebi fɔ bɛ ma dɔ̀ egyu-dɩrɛ.
Currently Selected:
2 Begyu-dɩrɛ 22: ADE
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy and Bible Translation
