2 Begyu-dɩrɛ 11
11
Ataliya ma Yowasi
1Ɔkʋna gɛtɛ egyu-nanɩ Ataliya ɛ nʋn gɛtɛ wobi-teni Ahasiya e ku fɔ, ɛ san alɛ ɛ̀ ma wolo digyu-kpaara fɔ dɩɩ bɛnɩ powu. 2Mɔ egyu-dɩrɛ Yehoram wobi-nanɩ Yehoseba gɛtɛ e di Ahasiya wonosobi fɔ, ɛ ka Ahasiya wobi Yowasi e serenti e ye digyu-kpaara dɩɩ bɛnɩ gɛtɛ baà be wolo fɔ baanɩ. Ɛ ka ebi fɔ ma ɛnɩ gɛtɛ ɛɛ nya ebi fɔ wo koro fɔ ɛ ma bubwa Dikwo-dɩrɛ dii dikwo-dʋrɔlɛ dɩkɩ daanɩ. Okoro Ataliya en wura wolo wɔ. 3Yowasi ma wɔnyalɛ fɔ be bu Yahwe Dikwo-dɩrɛ fɔ daanɩ bɩkyan kooron, fɔ Ataliya ee di bugyu gɛtʋnkwaa fɔ gaanɩ.
4Mɔ gɩkyan kwarankɩfɛ gaanɩ fɔ, gedi gɩɩtɛlɛ Yehoyada ɛ sa bɛnɩ bɛ ma ka bɛndɩrɛ gɛtɛ bɛɛ nya bɩtà bʋʋ bɛtàlɛ dikpilin ma bɛndɩrɛbi gɛtɛ bɛɛ nya digyu-kpaara fɔ dii koro ma digyu-kpaara bɛdɩyɛlɛ fɔ bɛ ba Yahwe Dikwo-dɩrɛ fɔ dʋkɔ. Gɛ ɛ ta dikola ma ɛbɛ, gɛ ɛ yɛ bɛ kan ntam Yahwe Dikwo-dɩrɛ fɔ daanɩ. Gɛ e wùlà bɛ egyu wobi Yowasi. 5Gɛ ɛ dɔ̀ bɛ alan, <<Gengyi ɩ̀ ba gʋtʋn duwi-tʋnalɛ daanɩ fɔ, i yo yaanɩ akpen asiyee fɔ dikpen dɩkɩ dàà dɩyɛ digyu-kpaara fɔ, 6dikpen dɩkɩ mɔ dàà dɩyɛ Sur wotunu, fɔ dikpen siyeefɛ fɔ mɔ dàà dɩyɛ otunu gɛtɛ wʋ̀ sa digyu-kpaara dɩ̀ gama fɔ. 7Fɔ akpen anyɔɔ gɛtɛ ɩɩn san gʋtʋn duwi tunalɛ daanɩ fɔ yàà ma yela Dikwo-dɩrɛ fɔ dɩɩpɩ dɩyɛ egyu fɔ. 8Yaà mɛ egyu bɛdɩyɛlɛ gɛ yaà ton yaakpanyan. Ɔkʋn-kamasɛ gɛtɛ ɛɛ̀ san fɔ, ɩ gbɛma wɔ, gɛ ɛnɩ-kamasɛ gɛtɛ ɛɛ̀ gbɛma yɩ fɔ, i wolo wɔ. 9Bɛndɩrɛbi fɔ bɛ mɛ anlɛ gɛtɛ Yehoyada ɛ bɔ ɛ dɔ̀ bɛ fɔ. Ɛkamasɛ ɛ ka wɔ bɛnɩ, ɛbɛ gɛtɛ bɛɛ san gʋtʋn duwi tunalɛ daanɩ, ma ɛbɛ gɛtɛ bɛn taa san gʋtʋn duwi tunalɛ daanɩ powu gɛ bɛ ba gedi gɩɩtɛlɛ Yehoyada wakʋn. 10Gɛ ɛ tɛ bɛndɩrɛbi fɔ bɩtʋrʋnyan ma awɔrɔnyan-dɩyɛlɛ-koro gɛtɛ nafɔ ì di Dafidi woyo, gɛ bɛ ka yɩ bɛ sɩ̀ Yahwe Dikwo-dɩrɛ daanɩ fɔ. 11Gɛ bɛdɩyɛlɛ fɔ be yela be silin egyu fɔ gɛtɛ bè de baakpanyan. Be yela ye gbɛma gedi gɩɩ gɛtɛ̀kʋn ma Dikwo-dɩrɛ fɔ, ye gatɩn gɩɩ gɩlan ma sere gatala gɩɩ gɩlan. 12Ɛwʋ gɛ Yehoyada e ye ma egyu wobi Yowasi okòro, gɛ e tin wɔ digyu-koto, gɛ ɛ ka dikola gɛtɛ Wurubwarɛ ɛ tà ma ɛbɛ fɔ dɩɩ gɩkpa ɛ tɛ wɔ, gɛ e sere wɔ bugyu. Bɛ sʋrʋ wɔ bʋnɔ, gɛ bɛnɩ fɔ powu bɛ ka afala ma alɔ yɩɩ gɛ gbɛrɛ bɛ dɔ̀ alan, <<Egyu sara nkpa ma ɔfɔ!>> 13Gɛtɛ egyu-nanɩ Ataliya ɛ nʋn afala gɛtɛ bɛdɩyɛlɛ ma bɛnɩ fɔ bɛ gbɛrɛ fɔ, ɛ san bɛnɩ fɔ baakʋn Yahwe Dikwo-dɩrɛ fɔ daanɩ dʋkɔ. 14Gɛtɛ ɛ nya lɛ fɔ, egyu fɔ n yela ma pila anlɛ gɛtɛ boodu wade mɛlɛ ii wùlà fɔ. Bɛndɩrɛbi fɔ ma akantan yɩɩ bɛfʋ̀nlɛ be yela egyu fɔ wakʋn, gɛ gɛtʋnkwaa fɔ gɩɩ bɛnɩ powu bee di ɔsɛ gɛ bɛɛ fʋ̀n akantan. Gɛ Ataliya ɛ fɛɛran wɔ gɛgba gɛ gbɛrɛ afala kin-kin alan,<<Ɛgbanlɛ bɛnɩ! Ɛgbanlɛ bɛnɩ! 15Ɛwʋ gɛ gedi gɩɩtɛlɛ Yehoyada ɛ dɔ̀ bɛndɩrɛbi gɛtɛ bɛɛ nya akpen fɔ yii koro fɔ alan, <<I tiri wɔ i ye Dikwo-dɩrɛ fɔ daanɩ afan, fɔ yàà wolo ɛkamasɛ gɛtɛ ɛ̀ tɛrɛma wɔ fɔ. Ɩ kara wolo wɔ Yahwe Dikwo-dɩrɛ daanɩ nfan.>> 16Gɛlɛ wuu koro be gye wɔ, gɛ bɛ ka wɔ be ye ma otunu gɛtɛ abengyi yii ka i gyu digyu kpaara fɔ, gɛ be wolo wɔ dʋkɔbɛ. 17Yehoyada ɛ tà dikola ɛ tɛ Yahwe, ma egyu fɔ, ma bɛnɩ fɔ alɛ baà mɛ Yahwe bɛnɩ. Gɛ e biri ɛ tà dikola ɛ tɛ egyu ma bɛnɩ fɔ. 18Ɛwʋ gɛ bɛnɩ fɔ powu bɛ san Baali dikpen-kwo bɛ ma sila dɩ bɛ fɩna. Be gbena gedi gaatɛ̀kʋn ma bekpen fɔ buruburu gɛ be wolo Baali wokpente Matan gedi gaatɛ̀kʋn dʋkɔ.
Gɛ Yehoyada ɛ sɩ̀ bɛdɩyɛlɛ Yahwe Dikwo-dɩrɛ fɔ daanɩ. 19Gɛ ɛ ka bɛndɩrɛ gɛtɛ bɛɛ nya bɩtà bʋʋ bɛtàlɛ dikpilin, ma ɛbɛ gɛtɛ bɛɛ dɩyɛ egyu-dɩrɛ dɩkpaara diitunu, ma gɛtʋnkwaa fɔ gɩɩ bɛnɩ powu bɛ tɛrɛma egyu fɔ be ye Yahwe Dikwo-dɩrɛ fɔ daanɩ bɛ san digyu-kpaara, gɛ ɛ ma sara gigyu-bɩya fɔ gii koro. 20Gɛ gɛtʋnkwaa fɔ gɩɩ bɛnɩ powu be di ɔsɛ, gɛ ditele fɔ daanɩ dɩ mɛ yiridi yema be wolo Ataliya digyu-kpaara dʋkɔ. 21Yowasi e di bugyu fɔ, ɛ̀ ba bɩkyan kwarankɩ.
Currently Selected:
2 Begyu-dɩrɛ 11: ADE
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy and Bible Translation
