1 Samweli 25
25
Dafidi, ma Nabali, ma Abigeli
1Samweli e ku, gɛ Isareli bete powu be tuma be wula wɔ, gɛ be lò wɔ wɔlɛ Rama ditele daanɩ. Wʋʋ gama fɔ, Dafidi ɛ waran ɛ da Mayon wotonkuma waanɩ. 2Ete ɛkɩ ɛ sara Mayon ditele, gɛ e wura anyan kpekpesi Kameli ditele daanɩ. E wura begbebi nkpɩn ton, ma bɛyɛran gbaa ma nkpɩn-ton (3,000). 3Bee kpèlè wɔ alɛ Nabali gɛ e ye Kalebi dɩkpaara daanɩ. Bee kpèlè wɔsɔ alɛ Abigeli, ɛ̀ nyɩ̀ ade gepepe gɛ e ye gɩsʋgʋgyan, mɔ wɔsan ɛ̀ ba duyu-kɛma gɛ ɛn ta we ɛnɩ gutunkoro. 4Ɔya gɛtɛ Dafidi ɛ̀ sa otonkuma waanɩ fɔ, ɛ nʋn gɛtɛ Nabali ɛɛ wɔrɔ wɔ bɛyɛran anu. 5Okoro ɛ sa wɔ bɛsaranyan-bi fwo gɛ ɛ dɔ̀ bɛ alan, <Ɩ bʋn ɩ san Nabali wakʋn Karimeli fɔ yàà sa wɔ onyun ɩ tɛ mɩ. 6Ɩ dɔ̀ wɔ alan, <<Sara nkpa ma ɔfɔ. Awɔ ma aa dɩkpaara dɩɩ bɛnɩ yàà sara ɔkɛma waanɩ! Ɔkɛma wàà sara ma aa gɩnyan-kamasɛ!
7Nkele, na nʋn gɛtɛ aa bɛnɩ bɛɛ wɔrɔ aa bɛyɛran. Ɔya gɛtɛ aa bɛnan bɔɔ bɛnyalɛ bè si taakʋn fɔ, tɩn nyanla bɛ gɛ ɔya powu gɛtɛ bɛ sara Karimeli fɔ, bɔɔ gɩnyankɩ mɔ gin lulu. 8Lila awɔ gbagba aa bɛsaranyan fɔ bàà dɔ̀ wɔ̀. Gɛlɛ wuu koro, wula aa bɛsaranyan gutunkoro yema tii gyu ɔsɛ wuu gedi wʋʋya waanɩ. Ǹ fɔ wɔ gɛ tɛ aa bɛsaranyan ma nmɩ aabi Dafidi gɩnyan-kamasɛ gɛtɛ yaà wura ɩ tɛ bɛ fɔ.>> >
9Gɛtɛ Dafidi bɛnɩ fɔ bɛ ma gyu fɔ, bɛ dɔ̀ Nabali ɔtʋn gɛtɛ Dafidi ɛ tɛ bɛ fɔ, gɛ be so wɔ dʋkɔ.
10Nabali e tiri wuunyun ɛ tɛ Dafidi bɛsaranyan fɔ alan, <<Ɛnyan n di gɛlɛ wuu Dafidi nyawɔ? Ɛnyan n di Yese wobi nyawɔ? Ǹdò waawi nyayɩ, anlɛ gɛ bɛsaranyan kpekpesi bee serenti be ye boofonte ɛbɛ baakʋn bɛ̀ san bɛ̀ san. 11Anʋn yii koro gɛ nan ka miin boroboro ma miin butu ma mɩɩn gɩnan gɛtɛ na wolo nan tɛ mɩɩn bɛnɩ gɛtɛ bɛɛ wɔrɔ mɩɩn bɛyɛran baanu fɔ n tɛ bɛnɩ gɛtɛ mɩn nyɩ boo geyekʋn?>>
12Dafidi bɛnɩ fɔ be fi gɛ biri bɛ da. Gɛtɛ bɛ ma gyu fɔ, bɛ dɔ̀ Dafidi anʋn agyebi gɛtɛ Nabali ɛ dɔ̀ fɔ powu. 13Gɛtɛ Dafidi ɛ nʋn ade nyayɩ fɔ, ɛ dɔ̀ wɔ bɛnɩ fɔ alan, <<Ɩ ka yɩɩ bɛtata yàà ban bɛgbagya.>> Okoro ɛkamasɛ ɛ ka wɔ tata gɛ Dafidi mɔ ɛ ka woyo. Baà mɛ anlɛ bɛnɩ nkpɩn bʋnyɔɔ gɛtɛ bɛ bʋn bɛ da fɩya ma Dafidi, mɔ bɛnɩ gɛkpɩn bɛ wɔ bè si bɛɛ dɩyɛ baanyan.
14Nabali bɛsaranyan fɔ baanɩ ɛkɩ ɛ ma dɔ̀ Nabali wɔsɔ Abigayeli alan, <<Dafidi ɛ sa bɛsaranyan bɛkɩ e ye otonkuma waanɩ alɛ bɛ ma sa tiifonte onyun, mɔ ɛ ka owurufa gɛ e toro bɛ. 15Mɔ bè di bɛnɩ kpara tɛ tɩ. Bɛn nyanla tɩ gɛ ɔya powu gɛtɛ tɩ sara gɛtʋnkwaa fɔ gaanɩ tɩ gbɛma bɛ fɔ, tɩɩ gɩnyankɩ gin lulu. 16Ɔya gɛtɛ tɩ sara tɩ̀ gbɛma bɛ tɩ nya bɛnan boo koro fɔ, bɛ dɩyɛ odòn ma ofilibo anlɛ ɔpɔrɩ na silin tɩ wu tuma. 17Gɛlɛ wuu koro sa amɩnlɛ gepe fɔ àà nya gɩnyan gɛtɛ aà talɩ a mɛ, yema gyerebi wʋ talɩ wu di tiifonte ma wɔ dɩkpaara dɩɩ bɛnɩ powu. È di duyu-kɛma dɩɩnɩ ɛkɩ gɛtɛ ɛnɩ ɛkɩ ɛn nan talɩ ɛ tabʋrʋ ɛ tɛ wɔ.>>
18Abigeli ɛn kyɛrɩ gɛ ɛ ka boroboro gɛkpɩn, ma wayɩn bʋkan ɛnan-gɩkpa#25:18 Ɔya fɔ waanɩ fɔ, ɛnan gɩkpa gaanɩ gɛ bɛɛ sa bʋkan. bʋnyɔɔ, ma bɛyɛran kumalɛ ton, ma afɩnaa sʋnlɛ muru ton, ma oyon wabi dikpilin ma fwo, ma figi wabi-nyɩmalɛ yii boroboro gɛkpɩn gɛ ɛ ban yɩ ɛ gyaga akpɔŋɔ-tɩtɩɩ yii koro. 19Gɛ ɛ dɔ̀ wɔ bɛsaranyan alan, <<I gyegeye nan tɛrɛma yɩ.>> Mɔ ɛn dɔ̀ wɔsan Nabali.
20Gɛtɛ ɛ̀ gyaga wɔ dɩkpɔŋɔ-tɩtɩɩ dii koro gɛ ɛ ma nɩma gɛwaran-gyu gifoobi gaanɩ fɔ, Dafidi ma wɔ bɛnɩ bɛɛ waran bɛɛ ba ma wɔ gɩlan gɛ e tuma bɛ. 21Gɛtɛ Dafidi ɛ̀ bɔ ɛɛ dɔ̀ alan, <<Gɛnya gɛtɛ na nya ete nyawɔ wanyan yii koro otonkuma waanɩ gɛ gɩnyankɩ gɩn lulu fɔ powu, wʋ mɛ tuntun. Ɛ ka ade-kpen e le mɩ ade-kpara yii gutoro. 22Wurubwarɛ e wolo mɩ gengyi ma gɩsaa gɛgyɩgyan ǹ kere wo beteni gɛtɛ ɛ̀ ba fɔ ɛkɩ n ya nkpa fɔ.>>
23Gɛtɛ Abigeli e we Dafidi fɔ, ɛ waran bilen wɔ dɩkpɔŋɔ-tɩtɩɩ fɔ dii koro, gɛ ɛ waran e kura ɛ ka wɔ bʋnʋn e tin gɛtʋnkwaa Dafidi bʋnʋn. 24Ɛ waran e kura Dafidi bɩsɩrɩ baanɩ gɛ ɛ dɔ̀ alan, <<Miinfonte yɛ dɩpwɛ fɔ dàà tola miinko. Koturu gɛ yɛ aasʋgʋgyan ɛ̀ɛ̀ tabʋrʋ ma awɔ fɔ àà nʋn ade gɛtɛ ɛ̀ ba ɛ̀ɛ̀ dɔ̀ wɔ̀. 25Miinfonte, ǹ fɔ wɔ gɛ kara nʋn duyu-kɛma diite Nabali nyawɔ wakʋn. Ɛ̀ bɔ è we gɛ anlɛ wo diyere fɔ. Wo diyere fɔ dii wùlà alɛ enyimapulɛ gɛ anyimapu-de n tɛrɛma wɔ. Mɔ nmɩ aasʋgʋgyan bɩrɛ, min we bɛnɩ gɛtɛ miinfonte a sa fɔ.
26Yahwe na sʋ wɔ osele gɛ an wolo aa bɛkyʋnlɛ ka le ade-kpen gɛtɛ bɛ mɛ wɔ fɔ yii gutoro aa gʋlɔ gii koro. Gɛtɛ Yahwe ɛ̀ sa gɛ awɔ mɔ à si nkpa lɛ, aa bɛkyʋnlɛ powu ma ɛbɛ gɛtɛ baà tɔ be yela aa koro fɔ, Yahwe eè tiira bɛ giten anlɛ Nabali. 27Koturu gɛ miinfonte, to anyan-kyɛlɛ gɛtɛ aasʋgʋgyan ɛ ka ɛ mɔmɔ wɔ lɛ fɔ à ka tɛ aa bɛnɩ gɛtɛ bɛ̀ tɛrɛma wɔ̀ fɔ. 28Koturu gɛ gengyi aasʋgʋgyan ɛ mɛ wade-kpen ɩkɩ fɔ, ka kyɛ wɔ, yema Yahwe ɛɛ̀ ka bugyu boo gedi ɛ tɛ awɔ ma aa dɩkpaara yema akpa Yahwe wakpa. Ade-kpen ɩkɩ ɩ nan tama wɔ aa nkpa awi powu yaanɩ. 29Gengyi terema ɛnɩ ɛkɩ ee bugiti è wolo wɔ gba fɔ, Yahwe aa Wurubwarɛ eè to aa nkpa ɛ sɩ̀ anlɛ gɛtɛ ɛɛ dɩyɛ ɛnɩ wanyan fɔ. Mɔ aa bɛkyʋnlɛ fɔ bɩrɛ, eè fun bɛ e lulu anlɛ gɛtɛ bee fʋn dɩtaa fɔ. 30Gengyi Yahwe ɛ̀ mɛ ade-kpara powu gɛtɛ ɛ dɔ̀ ɛ sɩ̀ ɛ tɛ miinfonte, gɛ ɛ̀ɛ̀ mɛ wɔ Isareli wo gyegeyelɛ fɔ, 31Miinfonte wʋ̀ ba gɛlɛ fɔ, wʋn nɩ taga wɔ̀ alɛ a wolo ɛnɩ ɛkɩ tuntun abɛɛ awɔ gbagba na wolo ɛkɩ a le gutoro. Gɛ gengyi Yahwe e hira wɔ̀ fɔ, n fɔ gɛ miinfonte, kara finla mɩ.>>
32Dafidi ɛ dɔ̀ Abigeli alan, <<Sila Yahwe, Isareli wo Wurubwarɛ, gɛtɛ ɛ yɛ a be tuma mɩ ǹdò lɛ. 33Tɩɩ sa Yahwe onyun aamɩnlɛ kpara gɛtɛ a ba ma ade gɛtɛ a mɛ ǹdò gɛtɛ a yɛ miin wolo ɛnɩ gɛ miin le getoro mɩɩn gʋlɔ gii koro lɛ. 34Na nyà Yahwe, Isareli wo Wurubwarɛ gɛtɛ ɛn yɛ mɩ nan mɛ wɔ̀ ade-kpen ɩkɩ fɔ alɛ, an da bè tuma mɩ belen fɔ, nafɔ ma gɩsa gagyɩgyan Nabali ma wɔ bɛsaranyan powu baà ku
35Ɛwʋ gɛ Dafidi e to anyan gɛtɛ Abigeli ɛ ka ɛ mɔma wɔ fɔ gɛ ɛ dɔ̀ wɔ alan, <<Biri san dɩkpaara olila waanɩ, na nʋn aade gɛtɛ a dɔ̀ fɔ. Nan mɛ anlɛ gɛtɛ aa len fɔ.>>
36Gɛtɛ Abigeli e biri ɛ san Nabali wakʋn fɔ, ɛ̀ sa dɩkpaara ee di ɔsɛ dɩrɛ anlɛ egyu-dɩrɛ woyo. Ɛ nyʋn bʋkan e su. Gɛlɛ wuu koro Abigeli ɛn dɔ̀ wɔ ade ɩkɩ gɛlɛ kere gɩ kpa. 37Gɛtɛ kere gɩ kpa gɛ wɔ bʋkan fɔ bʋ da wokoro fɔ Abigayeli ɛ dɔ̀ wɔ ade nyayɩ powu, dʋkɔ fɔ woturu wu bele wɔ gɛ ɛ kʋn e yela anlɛ dɩtaa. 38Awi fwo yɩɩ gama fɔ, Yahwe ɛ gbɛrɛ Nabali gɛ e ku.
39Gɛtɛ Dafidi ɛ nʋn alɛ Nabali e ku fɔ, ɛ dɔ̀ alan, <<Tii sila Yahwe, gɛtɛ e le Nabali gutoro ɛ tɛ mɩ ɔya gɛtɛ e toro mɩ fɔ. Ɛn yɛ nmɩ wɔsaranyan nan wolo wɔ. Mɔ ɛ yɛ Nabali wade-kpen gɛtɛ ɛ mɛ fɔ yii biri wo koro.>>
Ɛwʋ gɛ Dafidi ɛ sa bɛnɩ alɛ bɛ ma dɔ̀ Abigeli alɛ eè to wɔ gɩna. 40Dafidi bɛsaranyan bɛ san Karimeli gɛ bɛ ma dɔ̀ Abigayeli alan, <<Dafidi ɛ sa tɩ aakʋn, alɛ tɩ bɛ wɔ tɩ mɔma wɔ fɔ àà mɛ wɔsɔ.>> 41Ɛ waran e kura ɛ ka wɔ bʋnʋn e tin gɛtʋnkwaa gɛ ɛ dɔ̀ alan, <<Nya aasʋgʋgyan, ɛ pɩna koro gɛtɛ ɛ̀ɛ̀ mɛ gʋtʋn ɛ tɛ wɔ̀, fɔ èè fere miinfonte bɛsaranyan bɔɔ bɩsɩrɩ.>> 42Dɩkpalan daanɩ fɔ Abigayeli ɛ bʋn dɩkpɔŋɔ tɩtɩɩ dii koro fɩya ma wɔ bɛsʋgʋgyan ton gɛ bɛ tɛrɛma Dafidi bɛsalɛ fɔ bɛ da gɛ e biligi wɔsɔ. 43Dafidi e were to Ahinoham gɛtɛ e ye Yesireli fɔ gɛ bɛ bɛnyɔɔ bɛ mɛ wɔsɔ ɛbɛ. 44Mɔ ɔya wʋtɔkɔ waanɩ fɔ, Sawulo ɛ fʋrʋma labɩrɩ wobi-nanɩ Mikali gɛtɛ nafɔ è di Dafidi wɔsɔ fɔ, ɛ tɛ Palitiyeli gɛtɛ è di Layisi wobi gɛ e ye Galim fɔ gɩna.
Currently Selected:
1 Samweli 25: ADE
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy and Bible Translation
