1 Samweli 12
12
Samweli gɛtabʋrʋ kala
1Ɛwʋ gɛ Samweli ɛ dɔ̀ Isareli bɛnɩ powu alan, <<Na nʋn ade-kamasɛ gɛtɛ ɩ dɔ̀ mɩ, gɛ na sɩ̀ egyu-dɩrɛ gɛtɛ ɛɛ̀ nya yii koro. 2Nkele ɩ̀ ba egyu-dɩrɛ gɛtɛ è gyegeye ɛ̀ tɛ yɩ. Mɔ nmɩ bɩrɛ, na dan gɛ maayungu i fo, gɛ miin bebi-tenibi bɛ̀ sa ma ɛyɩ. Na mɛ yiigyegeyelɛ ye mɩɩn gɛsaranyan gaanɩ be ye ma ǹdò. 3Ɩ nyaa mɩ, gengyi na mɛ ade-kpen ɩkɩ fɔ, ɩ dɔ̀ mɩ Yahwe ma egyu-dɩrɛ gɛtɛ ɛ sʋrʋ bʋnɔ fɔ bɔɔ bʋnʋn. Ɛnyan wɔkwɔ gɛ na to? Abɛɛ ɛnyan dɩkpɔŋɔ-tɩtɩɩ gɛ na to? Ɛnyan gɛ na kuti? Ɛnyan gɛ na nyanla? Ɛnyan gɛ na to gɩnyankɩ na ye wakʋn dibilin daanɩ? Gengyi gɛ na mɛ gɛlɛ gaade nyayɩ ɩkɩ fɔ, nan birima anyan gɛtɛ na to fɔ n tɛ wɔ.>>
4Bɛnɩ fɔ be tiri wuunyun alan, <<An kuti tɩ, an nyanla gɛ an to gɩnyankɩ ye ɛkɩ walɔ yaanɩ.>>
5Gɛ Samweli ɛ dɔ̀ bɛ alan, <<Yahwe ee di mɩ adansɛ, gɛ wɔsʋrʋlɛ bʋnɔ fɔ mɔ ee di mɩ adansɛ ǹdò gɛtɛ in we ade-kpen ɩkɩ miin koro.>>
Gɛ bɛnɩ fɔ be yera alan, <<Ɛwʋ lɛ, ee di adansɛ>>
6Ɛwʋ gɛ Samweli ɛ dɔ̀ bɛnɩ fɔ alan, <<Yahwe na tiri Mose ma Aaron, gɛ be tiri yiitu ɛbɛ be ye Egyipiti. 7Nkele i yela nfan yiridi Yahwe bʋnʋn, fɔ nan kʋna yɩ ade-tʋnalɛ powu gɛtɛ Yahwe ɛ mɛ ɛ tɛ ɛyɩ ma yiitu ɛbɛ.
8Ɔkʋna gɛtɛ Yakobu e gyu Egyipiti fɔ, be wula be kpèlè Yahwe alɛ ɛ kpà bɛ, gɛ Yahwe ɛ sa Mose ma Aaron, gɛ be tiri yiitu ɛbɛ be ye Egyipiti bɛ ba gɛtʋnkwaa nyagɩ gaanɩ.
9<<Mɔ be finla Yahwe boo Wurubwarɛ fɔ, okoro e fu bɛ ɛ tɛ Sisera gɛtɛ ɛ mɛ Haso wɔ bɩtà bʋʋ bɛtàlɛ boogyegeyelɛ fɔ. Gɛ ɛ nɩ ka bɛ ɛ sa Filisiti bete ma Mowabi wogyu gɛtɛ bɛ kpà ma ɛbɛ fɔ baalɔ yaanɩ. 10Be wula be kpèlè Yahwe alan, <Tɩ mɛ wɔ̀ ade-kpen. Ti kere awɔ Yahwe tɩ ya, gɛ tɩ ma sʋma Bali ma Asitaroti boo bekpen. Nkele tiri ti ye tɩɩ bɛkyʋnlɛ baalɔ yaanɩ, fɔ taà sʋma wɔ̀.> 11Gɛ Yahwe ɛ sa Yerubala, ma Baraki, ma Yefita, ma nmɩ, Samweli, gɛ e tiri yɩ e ye yɩɩ bɛkyʋnlɛ gɛtɛ be silin yɩ be tuma fɔ baalɔ yaanɩ, fɔ yàà sara olila waanɩ.
12Mɔ ɔkʋna gɛtɛ i we Nahasa gɛtɛ è di Amon bete boogyu fɔ ɛ̀ bɛ kpà ma ɛyɩ fɔ, ɩ dɔ̀ mɩ alan, <<Tii len egyu-dɩrɛ, gɛtɛ ɛ̀ɛ̀ nya tii koro,>> ma gɛtɛ Yahwe yii Wurubwarɛ n di yiigyu. 13Ɩ nya egyu-dɩrɛ gɛtɛ i tiri fɔ wɔlɛ, ɛwɔ gɛtɛ i lila fɔ gɛ Yahwe e tiri ɛ tɛ yɩ. 14Gengyi ì serenti Yahwe, gɛ ɩ̀ sʋma wɔ, gɛ ì bù wɔ gɛ ɩn tɔ yela wo-ise fɔ yii koro, gɛ gengyi ɛyɩ ma egyu gɛtɛ ɛ sɩ̀ ɛ tɛ yɩ lɛ, ɩ̀ tɛrɛma Yahwe yii Wurubwarɛ fɔ, wʋ̀ kɔlɔ 15Mɔ gengyi in bu Yahwe, gɛ ɩ tɔ yela wo-ise fɔ yii koro fɔ, Yahwe wowurufa waà tɔ ɛyɩ ma yiigyu-dɩrɛ fɔ wo koro anlɛ gɛtɛ wʋ tɔ yiitu ɛbɛ boo koro fɔ.
16<<Okoro nkele, i yela, fɔ yàà nya ade-dɩrɛ gɛtɛ Yahwe ɛɛ ba ɛ̀ɛ̀ bɛ mɛ yɩɩ bʋnʋn baanɩ. 17Nka anyan yii gesila yɩɩya wʋ lɛ? Nan tiri onyun n tɛ Yahwe, fɔ ɛ̀ɛ̀ yɛ dɩkpaaba dàà fa fɔ ɛsʋn ɛ̀ɛ̀ nʋ̀n. Fɔ yàà we nyɩnla ade-kpen gɛtɛ ɩ mɛ Yahwe, gɛtɛ i lila alɛ ii len egyu-dɩrɛ fɔ okoro.>>
18Gɛ Samweli e tiri onyun ɛ tɛ Yahwe, gɛ Yahwe ɛ yɛ dɩkpaaba dɩ fa gɛ ɛsʋn ɛ nʋ̀n duwi dɩtɔkɔ ke. Gɛ bɛnɩ fɔ powu be serenti Yahwe ma Samweli gepepe.
19Bɛnɩ fɔ powu bɛ dɔ̀ Samweli alan, <<Tiri onyun fɔ Yahwe aa Wurubwarɛ tɛ ɛtɩ aa bɛsaranyan, fɔ tɩ kara be ku, yema tɩ ka nyayɩ gɛtɛ tɩ dɔ̀ alɛ tii len egyu-dɩrɛ lɛ tɩ fɩya ma taade-kpen powu gɛtɛ ɩ̀ fʋrʋma ɩ̀ sa fɔ.>>
20Gɛ Samweli ɛ dɔ̀ bɛ alan, <<Gɩsaa gɩn kara ton yɩ, ɩ wɛrɛ mɛ ade-kpen nyayɩ powu ɩ bɛ da, mɔ ɩ kara fi gama i ten Yahwe, mɔ ɩ ka yiituru powu ɩ sʋma wɔ. 21Ɩ kara fi yɩɩ bʋnʋn ɩ san bekpen gɛtɛ bɛn ma tɔnɔ lɛ baakʋn! Bɛn talɩ bɛ mɛ ade-kpara ɩkɩ bɛ tɛ yɩ, gɛ bɛn talɩ be to yɩ bɛ ya, yema ben di gɩnyankɩ. 22Yahwe diyere-dɩrɛ fɔ dii koro, ɛn nan kere wɔ bɛnɩ ɛ ya, yema wu di wɔ gʋnʋn gɛtɛ ɛ̀ɛ̀ ka yɩ mɛ woyo ɛbɛ. 23Nmɩ bɩrɛ, mɩn nan mɛ Yahwe ade-kpen alɛ nan terema onyun wuu getiri n tɛ yɩ. Gɛ nan wùlà yɩ osele gɛtɛ wʋ̀ kɔlɔ ma ɛwʋ gɛtɛ wʋ̀ dɔ̀. 24Mɔ ɩ nya gepe gɛtɛ yàà serenti Yahwe, fɔ yàà ka yiituru powu ɩ sʋma wɔ nʋnkwarɩ anɩ. Ɩ yɛ ade-dɩrɛ gɛtɛ ɛ mɛ ɛ tɛ yɩ fɔ yàà di yɩ gʋnʋn. 25Mɔ gengyi gɛ ɛyɩ ma yiigyu ɩ̀ sɩna bʋnʋn ɩ mɛ ade-kpen fɔ, ɛyɩ powu yaà muru.>>
Currently Selected:
1 Samweli 12: ADE
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy and Bible Translation
