1 Samweli 10
10
1Gɛ Samweli ɛ ka bʋnɔ ma parantwa, gɛ ɛ daa e lù Sawulo duyu, gɛ e mù wɔ ɛ dɔ̀ alan, <<Yahwe ɛ sʋrʋ wɔ̀ bʋnɔ, gɛ ɛ mɛ wɔ̀ egyegeyelɛ ɛ tɛ wɔ bɛnɩ Isareli bete.>> 2Gɛtɛ aa ye maakʋn ǹdò lɛ, aà tuma beteni bɛnyɔɔ ɔkʋn gɛtɛ wʋ̀ gbɛma Raheli gɩsàn gɛtɛ gɩ̀ sa Selisa gɛtɛ wʋ̀ gbɛma Benyamin wɔbalan fɔ. Baà dɔ̀ wɔ̀ alan, <<Be we akpɔŋɔ-tɩtɩɩ gɛtɛ a tɔ à san aa bugiti fɔ. Gɛ aate ɛn mɩnɩ taa nɩ sa yaamɩnlɛ mɔ ɛ yɛ ɛɛ sa gɛ awɔ amɩnlɛ, gɛ ee lila alan, <Lan gɛ nan mɛ miinbi wade nyayɩ?>
3À san bʋnʋn fɔ, pɛ àà bè gyu Tabo woyon-dɩrɛ fɔ wʋʋpɩ fɔ, aà tuma beteni besiyee gɛtɛ bɛɛ bʋn bɛɛ fɔrɔ Beteli bàà ma sʋma Wurubwarɛ. Ɛkɩ è tola begbebi atan asiyee, edo è tola boroboro besiyee, edo mɔ è tola wayɩn bʋkan osun. 4Baà sa wɔ̀ onyun, fɔ bɛ tɛ wɔ̀ boroboro bɛnyɔɔ. Gɛ wù di gɛtɛ àà to bɛ.
5Wʋʋ gama fɔ aà san Wurubwarɛ wodon gɛtɛ wʋ̀ sa Gibeya, Filisiti bɩtà bʋʋ bɛtàlɛ bɔɔ getumakʋn. Ɔkʋna gɛtɛ aa gbɛma ditele fɔ, aà tuma Wurubwarɛ bɛtabʋrʋlɛ dikpi, gɛtɛ bɛ waran be ye gedi gɩɩ gɛtɛ̀kʋn ma adʋlɛ, ma akyaka, ma akantan, ma adʋlɛ-dɩrɛ bè gyegeye bɔɔ bʋnʋn fɔ ɛbɛ mɔ bɛɛ dɔ̀ Wurubwarɛ wade. 6Fɔ Yahwe Gifiye gaà ba aa koro ɔkɛma waanɩ, gɛ awɔ ma ɛbɛ yaà tabʋrʋ Wurubwarɛ wade, gɛ aà foma a mɛ ɛnɩ-fon. 7Gengyi gɛlɛ gaade nyayɩ ɩ̀ ba waanɩ fɔ, mɛ gɩnyan-kamasɛ gɛtɛ gɩ kʋtʋma, yema Yahwe ɛ̀ fɩya ma awɔ.
8Waran gyegeye mɩ san Giligali, nan bɛ tama wɔ̀, fɔ nan tɛ Yahwe gekuma gii gedi, ma olila wuu gedi. Mɔ wù di gɛtɛ àà so mɩ awi kwarankɩ ma sere ɔya gɛtɛ nan bè wùlà wɔ̀ ade gɛtɛ wù di gɛtɛ àà mɛ.>>
Bɛ sɩ̀ Sawulo bugyu-dɩrɛ
9Gɛtɛ Sawulo e fi èè kpe ye Samweli wakʋn fɔ, Wurubwarɛ e foma Sawulo woturu, gɛ ade gɛtɛ Samweli ɛ dɔ̀ wɔ fɔ powu ɩ ba waanɩ duwi dɩtɔkɔ. 10Gɛtɛ be ma gyu Gibeya fɔ, Wurubwarɛ wɔ bɛtabʋrʋlɛ dikpi be tuma wɔ. Wurubwarɛ gifiye gɩ ba ma ɔkɛma Sawulo wo koro, gɛ ɛ ma fɩya ma Wurubwarɛ bɛtabʋrʋlɛ fɔ, gɛ be gyu gɛtabʋrʋ Wurubwarɛ wade. 11Gɛtɛ ɛbɛ powu gɛtɛ bɛ̀ fʋrʋma bɛ̀ nyɩ wɔ fɔ, be we wɔ ɛ̀ fɩya ma Wurubwarɛ bɛtabʋrʋlɛ bɛɛ tabʋrʋ Wurubwarɛ wade fɔ, be lila ma bɛwɔlɔn alan, <<Anʋn yaade n di nyayɩ gɛtɛ ɩɩ ba Kisi wobi wo koro lɛ? Okoro Sawulo mɔ ɛ̀ fɩya Wurubwarɛ bɛtabʋrʋlɛ baanɩ?>>
12Ete ɛkɩ gɛtɛ ɛ sara baakʋn fɔ, e lila alan, <<Gɛ ɛnyan ǹ di boogyegeyelɛ?>> Okoro wʋ bɛ dʋrɔ dɩkpalɩ alɛ, <<Sawulo mɔ ɛ̀ fɩya ma Wurubwarɛ bɛtabʋrʋlɛ fɔ?>> 13Gɛtɛ Sawulo e ten gɛtabʋrʋ fɔ, ɛ da gedi gɩɩ gɛtɛ̀kʋn fɔ.
14Sawulo wogbete e lila ɛwɔ ma wɔsaranyan fɔ alan, <<Gaanɩ gɛ ɩ san?>>
Sawulo e tiri wuunyun alan, <<Tii bugiti akpɔŋɔ-tɩtɩɩ fɔ, gɛ ɔkʋna gɛtɛ ti we tɩ nyɩnla alɛ, tɩn nan we yɩ fɔ, tɩ san Samweli wakʋn.>>
15Gɛ Sawulo wogbete alan, <<Dɔ̀ mɩ ade gɛtɛ Samweli ɛ dɔ̀ wɔ.>>
16Sawulo alan, <<Ɛ dɔ̀ tɩ ɛ tana alɛ be we akpɔŋɔ-tɩtɩɩ fɔ.>> Mɔ Sawulo ɛn dɔ̀ wogbete ade gɛtɛ Samweli ɛ dɔ̀ wɔ kadama bugyu buu gedi fɔ baade. 17Samweli e kpèlè Isareli bete fɔ e tuma Yahwe bʋnʋn Misipa ditele daanɩ, 18gɛ ɛ dɔ̀ bɛ alan, <<Ade gɛtɛ Yahwe, Isareli bete boo Wurubwarɛ fɔ ɛɛ dɔ̀ fɔ n di alan, <Na tiri Isareli na ye Egyipiti gɛtʋnkwaa gaanɩ, gɛ na tiri yɩ na ye Egyipiti wɔkɛma waanɩ ma bugyu-bugyu gɛtɛ bʋʋ nyɩ yɩ fɔ baanɩ.> 19Mɔ nkele i terema yii Wurubwarɛ, gɛtɛ e tiri yɩ e ye gyerebi ma dɩfana powu fɔ yaanɩ. Gɛ ɩ dɔ̀ alan, <Sɩ̀ egyu-dɩrɛ tɛ tɩ.> Wʋ kɔlɔ, i be yela Yahwe bʋnʋn yii-ifoli-ifoli ma yaakpara-akpara.>>
20Gɛtɛ Samweli ɛ yɛ Isareli wo-ifoli fɔ powu i ye ɩ ba bʋnʋn fɔ, Benyamin wofoli gɛ Yahwe e tiri. 21Ɛwʋ gɛ bɛ yɛ Benyamin wofoli fɔ wʋʋ bɛnɩ be ye bɛ ba bʋnʋn, akpara-akpara, gɛ be tiri Matiri dɩkpaara. Wʋʋ gama powu fɔ, Kisi wobi Sawulo gɛ be tiri. Mɔ gɛtɛ be bugiti wɔ fɔ, ben we wɔ. 22Gɛ be biri be lila Yahwe alan, <<Ɛnɩ fɔ ɛ wɛrɛ ba nfan?>>
Gɛ Yahwe alan, <<Ɛ ba, mɔ ɛ ma bu atola fɔ yaanɩ.>>
23Be serenti bɛ ma tiri wɔ be ye be be yela bɛnɩ fɔ boo getite. Gɛtɛ è yela fɔ, ɛ̀ ba abo da ɛkamasɛ. 24Gɛ Samweli ɛ dɔ̀ Isareli bete fɔ powu alan, <<I we ɛnɩ gɛtɛ Yahwe e tiri? Ɛkɩ ɛn ma yaanɩ gɛtɛ è we anlɛ ɛwɔ.>>
Gɛ bɛnɩ fɔ powu bɛ gbɛrɛ afala alan, <<Tiigyu ɛ sara nkpa ma ɔfɔ!>>
25Samweli e tiri bugyu buu gedi buu-ise e wùlà bɛnɩ fɔ. Ɛ ŋwara yɩ ɛ sa gɩkpa#10:25 Ɔya wʋtɔkɔ waanɩ fɔ bɛɛ ŋwara gɛ ade bɛ gyaga ɛnan gɩkpa gii koro gaanɩ, gɛ ɛ ka gɩ ɛ sɩ̀ Yahwe bʋnʋn. Gɛtɛ e were fɔ, Samweli ɛ yasɩ bɛnɩ fɔ, gɛ ɛkamasɛ e biri ɛ da wɔlɛ.
26Sawulo mɔ e biri ɛ da wɔlɛ Gibeya, fɩya ma dɩkpatɩ dɩɩ beteni gɛ Wurubwarɛ ɛ kya boo-ituru fɔ. 27Mɔ bɛnɩ bɛkɩ gɛtɛ bɛn ma tɔnɔ fɔ bɛ dɔ̀ alan, <<Lan gɛ ete nyawɔ ɛɛ̀ talɩ e to tɩ ɛ ya?>> Bɛn ka gebù tɛ wɔ, gɛ bɛn kyɛ wɔ anyan. Mɔ Sawulo ɛn dɔ ade ɩkɩ.
Currently Selected:
1 Samweli 10: ADE
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy and Bible Translation
