1 Begyu-dɩrɛ 4
4
Solomon bɛndɩrɛbi ma bɔɔ bʋtʋn
1Okoro Egyu-dɩrɛ Solomon e di bugyu Isareli powu. 2Gɛ wɔ bɛndɩrɛbi gɛtɛ bɛ̀ ba gebù-dɩrɛ fɔ baayere n di, Sadoki wobi Asariya gɛtɛ è di gedi gɩɩtɛlɛ fɔ, ma 3Sisa wo bebi Eliyorefi, ma Ahiya n di bɛŋwaralɛ, gɛ Ahiludi wobi Yewosafati n di digbongbo dɩɩ gbɛrɛlɛ. 4Yohoyada wobi Benaya è di bɩtà bʋʋ bɛtàlɛ bɔɔndɩrɛ, gɛ Sadoki ma Abiyata bè di gedi gɩɩ bɛtɛlɛ. 5Natan wobi Asariya è di bɛndɩrɛ fɔ bɔɔndɩrɛ, gɛ Natan wobi Sabudi n di gedi gɩɩtɛlɛ ma egyu-dɩrɛ wamɩnlɛ yɩɩtɛlɛ. 6Ahisa n tɛ nya egyu-dɩrɛ bɛsʋgʋgyan ma wɔ bɛsaranyan gɛtɛ bɛɛ mɛ gʋtʋn wɔ dɩkpaara daanɩ fɔ boo koro, gɛ Abida wobi Adoniram n tɛ nya bɛnɩ gɛtɛ bɛɛ nyɩ bɛnɩ bàà mɛ gʋtʋn tɛ gɩfɩɩ fɔ boo koro.
7Solomon mɔ ɛ sɩ̀ bɛndɩrɛ fwo-bɛnyɔɔ, gɛtɛ baà kpakya Isareli wɔ-ɩlanlan fɔ powu. Gɛ bɛɛ kʋla anyandilɛ bɛ ba egyu-dɩrɛ ma wo digyu-kpaara. Ɛndɩrɛ-kamasɛ ɛɛ kʋla anyandilɛ ebon gɩkyan gaanɩ. 8Baayere n di, Ben-Wuri gɛtɛ ɛɛ nya Efrayim wo-idon yɩɩ gɛtʋnkwaa gii koro. 9Ben-Dekeri gɛtɛ ɛɛ nya Makasi, ma Salabim, ma Beti-Semesi, ma Elon-Betanan atele yii koro. 10Ben-Hesedi ɛɛ nya Aruboti, fɩya ma Soko atele, ma atele powu gɛtɛ ɩ̀ gbɛma Hefe fɔ buu koro. 11Ben-Abinadabi, gɛtɛ e to Solomon wobi Tafati gɩnan fɔ, ɛɛ nya Nafati-Dori gɩlan gii koro. 12Ahiludi wobi Baana n tɛ nya Taanaki, ma Megido, ma Beti-Sana powu ka san Yaretan gɛtɛ wʋ̀ sa Yesireli fɔ, ma Beti-Sena gɛtʋnkwaa ka san Abeli-Mehola, ka ma ye Yokimema ditele. 13Ben-Geberi n tɛ nya Ramoti-Gileyadi. Ɛwɔ na to Manase wobi Yari watele gɛtɛ ɩ̀ sa Gileyadi fɔ, ma Arigobi gɛtɛ wʋ̀ sa Basan gɛtʋnkwaa gaanɩ fɔ ma waatele dɩrɛ-dɩrɛ akpilin asiyee gɛtɛ bɛ mara ɩpɔrɩ be silin yɩ, gɛ bɛ mɛ gɩwɔrɔnyan-sɩya gɩɩpʋnʋ bɛ sa yɩ fɔ. 14Ido wobi Ahinadabi n tɛ nya Mahanami. 15Ahimasa gɛtɛ e to Solomon wobi Basemati gɩna fɔ, n tɛ nya Nafitali gɛtʋnkwaa gii koro. 16Husayi wobi Baana n tɛ nya Ase, ma Aloti ntʋnkwaa buu koro. 17Paruwa wobi Yewosafati n tɛ nya Isaka gɛtʋnkwaa gii koro. 18Ela wobi Simeyi n tɛ nya Benyamin gɛtʋnkwaa gii koro. 19Wuri wobi Geberi n tɛ nya Gileyadi gɛtʋnkwaa gɛtɛ gì di Amori bete boogyu Sihon, ma Basan boogyu Ogi booyo fɔ. Ɛndɩrɛ kɩlɩn ɛtɔkɔ na kpakya Yuda wɔlanlan wʋtɔkɔ powu.
Solomon bugyu bʋ san gepe
20Yuda bɛnɩ ma Isareli bete bɛ̀ sɔ anlɛ ɛpʋ-kere wɔ ɩŋɛrɛ. Be di ɔsɛ, be di, gɛ bɛ nyʋn. 21Gɛ Solomon bugyu bʋ yɛrɛ bu ye Efurate getu, ka san Filisiti bete bɔɔ gɛtʋnkwaa gɩɩ gɩlan, ka ma sere Egyipiti gɛtʋnkwaa gɩɩbalan baanɩ. Gɛlɛ gɩɩ ntʋnkwaa bʋtɔkɔ bʋʋ bɛnɩ be le gɩkyan-gɩkyan gii gutoro bɛ tɛbɛ tɛ Solomon gɛ bɛ sara wɔ gatɩn wɔ nkpa awi powu yaanɩ.
22Anyan-dilɛ kperen-kperen gɛtɛ Solomon ee hiyan ɛ̀ɛ̀ ka nya wɔ dɩkpaara dɩɩ bɛnɩ boo koro duwi daanɩ fɔ n di ɔnʋmʋ-sʋnlɛ, gali bɛbagɩ akpilin asiyee ma kooron (66), ma ɔnʋmʋ tuntun bɛbagɩ akpilin kooron ma fwo bɛnyɔɔ (132). 23Ma bɛkwɔ ma ayo fwo, ma bɛkwɔ gɛtɛ bɛ̀ sa gɛban gaanɩ dikpilin, ma bɛyɛran akpilin ton, ma begbebi fɩya ma ɔtʋrʋn ɛbɛ, ma bɛpɩtɩrɩkyɛ, ma bɛlɛlʋn, ma getu gɩɩ bɛkpakpafwe-dɩrɛ. 24Solomon bugyu bʋ yɛrɛ bʋ san Efurate wofila wʋʋ gɛnʋ̀nkʋn wʋʋ gɩlan ye Tifisa ma sere Gasa, gɛ ɛ sara ma olila ma wɔ-ɩbalan fɔ powu yɩɩ bɛnɩ. 25Gɛ Yuda gɛtʋnkwaa ma Isareli bete bɔɔ gɛtʋnkwaa gɩɩ bɛnɩ, ye Dan ka ma sere Beeseba powu, bɛ sara olila waanɩ Solomon wɔ nkpa awi powu yaanɩ. Ɛkamasɛ e wura ɛwɔ gbagba wɔ wayɩn wo-ili, ma wo figi wo-iyon.
26Solomon ɛ̀ ba abengyi-kwo ɩgbaa ɩnyɔɔ (4,000) tɛ wo tiiramisan ɛbɛ, ma abengyi yɩɩ bɛsaralɛ ɩgbaa kooron (12,000).
27Gɛ ɔlanlan wʋʋ bɛndɩrɛbi fɔ baanɩ-kamasɛ wobon anɩ, bɛɛ kʋla anyandilɛ bɛ bɛ tɛ egyu-dɩrɛ Solomon ma bɛnɩ powu gɛtɛ bɛɛ ba egyu-dɩrɛ Solomon ɔkpʋlɔ wʋʋpɩ fɔ. Bɛɛ ka gɩnyan-kamasɛ gɛtɛ egyu-dɩrɛ ee lila fɔ bɛ mɔma wɔ. 28Gɛlɛ ke gɛ bɛɛ ka afɩnaa, ma dɩfa-kɔlɛ bɛ bɛ tɛ tiiramisan ɛbɛ, ma abengyi, gɛtɛ ɩ̀ ba ɔsa gepepe fɔ yɩɩ gɛdʋrɔkʋn.
29Wurubwarɛ ɛ tɛ Solomon gɛsɛyɩ ma ade yaanɩ yɩɩ gɛnʋn, ma amɩnlɛ kpekpesi gɛtɛ ɩ̀ sɔ anlɛ ɛpʋ wokere wʋʋ-ɩŋɛrɛ. 30Solomon gɛsɛyɩ fɔ, gɩ da bɛnɩ powu gɛtɛ bɛ̀ sa ofila wʋʋ gɛtàkʋn wʋʋ gɩlan fɔ, ma Egyipiti bɛnɩ powu booyo. 31Solomon ɛ sɛyɩ ɛ da ɛnɩ-kamasɛ, ɛ sɛyɩ ɛ da Esira-te Etan, ma Malo wo bebi Eman, ma Kalikoli, ma Darida. Gɛ wo diyere dɩ yasɩ dɩ san ande powu gɛtɛ i silin wɔ i tuma fɔ yaanɩ. 32Solomon ɛ gbɛrɛ akpalɩ gbaa ma nkpɩn ton (3,000), gɛ ɛ nʋma ɩnʋn nkpɩn ton ma ton (1,005). 33Ɛ tabʋrʋ ɛ da ma iyon yii koro. Ɛ tabʋrʋ ɛ da ma seda woyon gɛtɛ wʋ̀ sa Lebanon, ma hisopu gɛtɛ wu ye ɔpɔrɩ wuu koro. Gɛ ɛ nɩ wùlà ade kadama bɛnan, ma bɛsɩsɩra, ma bɛnan-kpɩɩlɛ, ma bɛsʋ̀n boo koro. 34Gɛ bɛnɩ be ye ande-ande yaanɩ bɛ bɛ nʋn Solomon gɛsɛyɩ gaade. Gɛ begyu-dɩrɛ kpekpesi bɛ sa bɛnɩ bɛ ba Solomon wakʋn bɛ bɛ nʋn wɔ gɛsɛyɩ gaade fɔ.
Currently Selected:
1 Begyu-dɩrɛ 4: ADE
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy and Bible Translation
