1 Begyu-dɩrɛ 11
11
Solomon ɛ nʋ̀n Wurubwarɛ wo-ise yii koro
1Egyu-dɩrɛ Solomon e to bendeni-na gɩna kpekpesi. Farawo wobi-nanɩbi fɔ gama fɔ, e to bɛnanɩ e ye Moba bete, ma Amon bete, ma Edom bete, ma Sidon bete, ma Hiti bete baanɩ. 2Be ye gɛ bɩfɩɩ gɛtɛ Yahwe ɛ dɔ̀ Isareli bete alan,<<Ɩ kara to bɔɔ bɛnanɩ gɩna, gɛ ɛbɛ mɔ bɛ kara to yii bebi gɩna, yema baà fi yɩɩ bʋnʋn be ye maakʋn yàà ma sʋma boo bekpen>> fɔ baanɩ. Mɔ gɛlɛ gɩɩ bɛnanɩ bɛtɔkɔ gɛ Solomon ɛ kpa ɛ marama gɛ e len baade. 3E to bɛna nkpɩn bisiyee ma akpilin ton (700) gɛtɛ bè di egyu-wɔsɔ ɛbɛ, ma bedima gɛkpɩn ma akpilin ton (300), gɛ wɔsɔ ɛbɛ fɔ bɛ yɛ wɔ e kere Yahwe wosele ɛ ya. 4Gɛtɛ Solomon ɛ dan ditenikwaa fɔ, wɔsɔ ɛbɛ fɔ be fi wɔ bʋnʋn bɛ san bekpen baakʋn, gɛ ɛn mɩnɩ ka woturu powu tɛrɛma Yahwe, wo Wurubwarɛ anlɛ gɛtɛ Dafidi ɛ mɛ fɔ. 5Ɛ sʋma Sidon bete bookpen Asitoreti, ma Amon bete bookpen-kpen Moleki. 6Okoro Solomon e mɛ ade-kpen Yahwe bʋnʋn, gɛ ɛn ka woturu powu tɛrɛma Yahwe, wo Wurubwarɛ anlɛ gɛtɛ wote Dafidi ɛ mɛ fɔ.
7Solomon e sere dikpen-kwo ɛ tɛ Moba wokpen-kpen Kemosi, ma Amon bete bookpen-kpen Moleki, odon gɛtɛ wʋ̀ sa Yerusalem wofila wʋʋ gɛtàkʋn wʋʋ gɩlan fɔ wuu koro. 8Gɛlɛ ke gɛ mɛ ɛ tɛ wo bendeni-sɔ fɔ powu, gɛtɛ be kuma olifwi, bɛ tɛ boo bekpen fɔ gedi.
9Ɛwʋ gɛ Yahwe ɛ ka owurufa Solomon wo koro, yema woturu wu fi wu ye Yahwe, Isareli wo Wurubwarɛ gɛtɛ e tiri koro e wùlà wɔ disere dɩnyɔɔ fɔ wakʋn. 10Ma gɛtɛ Yahwe ɛ sʋ Solomon bekpen bɔɔ gɛsʋma gba fɔ, en di Yahwe wose fɔ wuu koro. 11Okoro Yahwe ɛ dɔ̀ Solomon alan, <<Gɛtɛ an di miin dikola, ma maade-wùlàlɛ gɛtɛ na dɔ̀ wɔ̀ fɔ yii koro okoro, nan nyɩ̀ n to bugyu fɔ n ye aa aakʋn, nan ka n tɛ aa bɛsaranyan fɔ baanɩ ɛkɩ. 12Mɔ aate Dafidi wo koro, mɩn nan mɛ ade nyayɩ aa nkpa waawi yaanɩ, mɔ nan to bu n ye aabi wakʋn. 13Mɔ mɩn nan to bugyu fɔ powu. Mɩɩnsaranyan Dafidi ma Yerusalem gɛtɛ na tiri na sɩ̀ fɔ wuu koro, nan kere ofoli wʋkɩ n ya n tɛ wɔ.
Solomon bɛkyʋnlɛ
14Gɛlɛ wuu koro Yahwe ɛ yɛ Edom-te Hadadi ɛ mɛ Solomon wokengbelilɛ. E ye gɛ Edom digyukpaara daanɩ. 15Fɔ ɔya wʋkɩ gɛtɛ Dafidi ɛ kpà, gɛ e di Edom bete boo koro fɔ, gɛtɛ bɩtà bʋʋ bɛtàlɛ bɔɔndɩrɛ Yowabi ɛ san ɛ̀ɛ̀ ma lò bekpena fɔ, e wolo beteni powu gɛtɛ bɛ̀ sa Edom ditele daanɩ fɔ. 16Yowabi ma Isareli bete powu bɛ sara Edom ditele daanɩ bebon kooron ka ma sere gɛtɛ e wolo beteni powu Edom ditele daanɩ. 17Mɔ Hadadi gɛtɛ ɛ̀ sangba è di ebi fɔ, ɛ fɩya ma Edom bɛndɩrɛbi gɛtɛ bɛ sʋma wote bɛ nya fɔ, gɛ be serenti bɛ da Egyipiti. 18Bɛ tɔ be ye Midiyan, gɛ bɛ san Paran. Gɛ bɛ ka Paran beteni bɛkɩ bɛ fɩya ma koro bɛ san Egyipiti wogyu-dɩrɛ Farawo wakʋn. Ɛ tɛ Hadadi dɩkpaara, ma gɛtʋnkwaa, ma anyandilɛ.
19Fɔ Hadadi wade i di Farawo gʋnʋn, okoro ɛ ka ɛwɔ gbagba wɔsɔ, egyu-nanɩ Tapenesi wonobi ɛ tɛ wɔ gɩna. 20Gɛ Tapenesi wonobi fɔ e wo ebi-teni ɛ tɛ Hadadi, gɛ bɛ sa wɔ diyere alɛ Genubati. Gɛ Tapenesi ɛ kyala Genubati Farawo digyukpaara daanɩ. Gɛ Genubati ɛ sara ma Farawo bebi-teni dʋkɔbɛ. 21Gɛtɛ Hadadi ɛ̀ sa Egyipiti fɔ, ɛ nʋn gɛtɛ Dafidi ma bɩtà bʋʋ bɛtàlɛ bɔɔndɩrɛ Yowabi be ku. Ɛwʋ gɛ Hadadi ɛ dɔ̀ Farawo alan, <<Tiri mɩ osele, yɛ mɩ nan san mɩɩn gɩfɩɩ gaanɩ.>>
22Mɔ Farawo e lila wɔ alan, <<Anʋn yii koro gɛ aa len àà biri san aa gɩfɩɩ gaanɩ? Gɩnyankɩ gii hiyan wɔ̀ gɛ mɩn mɛ tɛ wɔ?>>
Gɛ e tiri wuunyun alan, <<Kpakpaakpa! Mɔ awɔ yɛ mɩ nan san!>>
23Gɛ Wurubwarɛ ɛ yɛ Eliyada wobi Reson mɔ ɛ mɛ Solomon wokengbelilɛ. Ɛwɔ na serenti e ye wofonte Hadadese gɛtɛ è di Soba wogyu wakʋn fɔ. 24Ɔya gɛtɛ Dafidi e di Soba wo koro fɔ, Reson e kʋla bɛnɩ gɛ bɛ tɔ be yela Dafidi wo koro gɛ Reson ɛ mɛ boogyegeyelɛ. Bɛ tɔ bɛ san bɛ ma sara Damasiko gɛ be to dʋkɔ powu. 25Reson ɛ mɛ Isareli bete bɔɔkyʋnlɛ Solomon wɔ nkpa waawi powu yaanɩ, ka fɩya ma Hadadi wade gɛtɛ ɛ mɛ fɔ. Reson e di bugyu Aram gɛ ɛ kyʋn Isareli ɛ kààrà.
Yerobwam ɛ tɔ e yela Solomon wo koro
26Nebati wobi Yerobwam mɔ ke ɛ tɔ e yela egyu-dɩrɛ Solomon wo koro. Fɔ è di gɛ wɔ bɛndɩrɛbi fɔ baanɩ ɛkɩ gɛtɛ è di Efrayim-te, gɛ e ye Sereda. Wɔna è di ɛkpɩnsɔ gɛ bee kpèlè wɔ Seruwa.
27Ade gɛtɛ ɩ yɛ gɛ Nebati ɛ tɔ e yela egyu-dɩrɛ Solomon wo koro fɔ n di gɛtɛ, ɔya gɛtɛ Solomon ɛɛ pɩna e sere kpata gɛtɛ ɛ̀ sa Dafidi ditele dɩɩ gatɩn gɩɩ gɩlan fɔ, ma wote Dafidi ditele fɔ dɩɩpɔrɩ fɔ, 28Yerobwam è di ɛnɩ gɛtɛ è yela kin-kin. Gɛ gɛtɛ Solomon e we ɛsaranyanbi nyawɔ waniya yɩɩ gɛsa fɔ, e tiri wɔ e yela gɛtɛ ɛ̀ɛ̀ nya Yosefu dɩkpaara dɩɩ bɛnɩ bɔɔ dɩkpankpasan dɩɩ gʋtʋn gii koro. 29Duwi dɩkɩ fɔ, Yerobwam e ye Yerusalem ditele daanɩ ɛɛ fɔrɔ ɔkankɩ fɔ, e tuma Wurubwarɛ wɔtabʋrʋlɛ Ahiya gɛtɛ e ye Silo fɔ osele waanɩ. Fɔ Ahiya ɛ̀ sa gɛgba-fon-serelɛ, gɛ bɔɔ bɛnyɔɔ booko n sa dɩfa daanɩ dʋkɔ. 30Ɛwʋ gɛ Ahiya e gye wɔ gɛgba-fon-serelɛ fɔ, gɛ ɛ fɛɛran gɩ akpen fwo-anyɔɔ. 31Gɛ ɛ dɔ̀ Yerobwam alan, <<Tiri akpen fwo! Yema Yahwe, Isareli wo Wurubwarɛ fɔ ɛ dɔ̀ alan, <Nya, anlɛ gɛ nan lanla bugyu fɔ n ye Solomon gʋlɔ, fɔ nan ka ifoli fwo n tɛ wɔ̀. 32Mɔ mɩɩnsaranyan Dafidi, ma Yerusalem ditele gɛtɛ na tiri na ye Isareli wo-ifoli fɔ powu yaanɩ okoro, eè wura ofoli-kɩlɩn. 33Nan mɛ ade nyayɩ, yema be terema mɩ, gɛ bɛ sʋma Sidon wokpen Asitoreti, ma Moba bete bookpen Kemosi, ma Amon bete bookpen Moleki, gɛ bɛn san mii-isele yaanɩ, gɛ bɛn mɛ ade-tʋnalɛ mɩɩn bʋnʋn baanɩ, gɛ ben di maade, ma mii-ise yii koro, anlɛ gɛtɛ Solomon wote Dafidi ɛ mɛ fɔ.
34<<<Mɔ mɩɩn nan to bugyu fɔ powu n ye Solomon gʋlɔ. Mɩɩnsaranyan Dafidi, gɛtɛ na tiri, gɛ e di maade ma mii-ise yii koro fɔ wo koro, nan yɛ èè di bugyu wɔ nkpa waawi powu yaanɩ. 35Mɔ nan to bugyu fɔ n ye wobi gʋlɔ, fɔ nan ka ifoli fwo fɔ yii bugyu n tɛ wɔ̀. 36Nan ka ofoli fɔ wʋkɩ n tɛ wobi, fɔ mɩɩnsaranyan Dafidi wodu wàà wura sara Yerusalem, ɔya-kamasɛ ditele gɛtɛ na ka miin diyere na gyaga dii koro fɔ. 37Mɔ awɔ bɩrɛ, nan ka wɔ̀ àà mɛ egyu fɔ àà di bugyu ɔkʋn-kamasɛ gɛtɛ aaturu wuu len, fɔ àà mɛ Isareli wogyu. 38Gengyi à mɛ ade-kamasɛ gɛtɛ n dɔ̀ wɔ̀, gɛ àà san mii-isele yaanɩ, gɛ à mɛ ade gɛtɛ ɩ̀ tʋna mɩɩn bʋnʋn baanɩ, gɛ à di maade, ma mii-ise yii koro, anlɛ gɛtɛ mɩɩnsaranyan Dafidi ɛ mɛ fɔ, nan fɩya ma awɔ, gɛ nan yɛ aa bugyu buu gedi baà sara gakpaakpa, anlɛ gɛtɛ na sere Dafidi woyo fɔ, gɛ nan ka Isareli n tɛ wɔ̀. 39Solomon wade-kpen fɔ yii koro, nan warama Dafidi wodu waanɩ wʋʋ bɛnɩ gatɩn, mɔ nka gakpaakpa. 40Solomon e len èè wolo Yerobwam, mɔ Yerobwam e serenti ɛ san egyu-dɩrɛ Sisaki wakʋn Egyipiti, gɛ ɛ sara dʋkɔ ma sere gɛtɛ Solomon e ku.
Solomon diku
41Gɛ Solomon bugyu baade, ma ade gɛtɛ ɛ mɛ powu, ma wɔ gɛsɛyɩ gɛtɛ e tiri e wùlà fɔ powu fɔ, bɛ ŋwara yɩ bɛ sa Solomon wakpa yaanɩ. 42Solomon e di bugyu Yerusalem ma Isareli powu bɩkyan akpilin anyɔɔ (40). 43Ɛwʋ gɛ e ku, gɛ be lò wɔ wote Dafidi Ditele daanɩ. Gɛ wobi Rehobwam e di bugyu e sere wɔ gɩsɩrɩ.
Currently Selected:
1 Begyu-dɩrɛ 11: ADE
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy and Bible Translation
