Yohane 13
13
Yesu yalɛ wʋ kpalɛnara nafara tie
1Gʋ dɩ ka chonii na baa di nyiŋi asadi adiya di na, Yesu jiŋ gʋ wʋ saŋa tala gʋ wʋ a lɩɩ dulunya gana naŋ na wʋ a ju wʋ Juo wʋŋ jaŋ. Gʋ wʋ cha wʋ wɩɛna jawʋ fa wʋ kpalɛnara baa ba wɩɛ dulunya gana naŋ dʋɔ, dɩtɩɛna wʋ lɩsɛ wʋ jawʋ kalaa ba na dieli.#13:1 Sabɩɛwɩɛ ŋii ŋarɛ wɩɛna wʋ ja ba wɩɛ ga tala gɩtɛ.
2Pɔɩ na Yesu na wʋ kpalɛnara a di bʋyanɔ adiya na, Sɩtanɩ taŋ fɩla jʋʋ Simoŋ bu Yudasi Isikariyoti tɩba sɛ wʋ n lɩsɛ Yesu fa. 3Yesu jiŋ gʋ wʋ Juo mʋ bʋrʋkʋma dʋ wʋ pam naŋ, takɩɛ wʋ cha lɩɩ Ɩsʋɔ jaŋ bɛ, sɛ wʋ jaŋ sɛ wʋ a ti bɔrɛ ju. 4Dɩmʋŋ dʋɔ wʋ kʋlʋ adiya ŋii jaŋ, sɛ wʋ fulu wʋ adugbe gagba, sɛ wʋ mʋ bɔrɔdɩba ka wʋ tɩŋa naŋ. 5Ŋina wʋrʋgbɩɛ na, wʋ chɩɛgɩ lɩŋ dʋ sapɩɛ naŋ sɛ wʋ faara wʋ a yalɛ wʋ kpalɛnara baa nafara, sɛ wʋ mʋ bɔrɔdɩba gaa wʋ mʋ ka wʋ tɩŋa naŋ na wʋ a kpaɩ ba nafara tie.
6Gʋ wʋ tala Simoŋ Petero dʋɔ na, wʋ tasɛ ɩ sɛ, <<Kpaŋjuo, nyaa ja sɛ nyaa yalɛ ma nafara tie bɛ?>>
7Sɛ Yesu lɩsɛ ɩ nʋɔ sɛ,<<Dɩtɩɛna nya ba jiŋ ŋii maa yɩɛ n na a, ama wʋrʋgbɩɛ na nyaa nyii tie.>>
8Sɛ Petero tawɩ ɩ sɛ,<<Aye, maa yela na nyaa yalɛ ma nafara tie e.>>
Sɛ Yesu tawɩ ɩ sɛ, <<Sɛ ma n yalɛ n nafara na, nyaa kpi ma dʋɔ ɔ.>>
9Sɛ Simoŋ Petero tawɩ ɩ sɛ, <<Kpaŋjuo, n baa yalɛ ma nafara tie nyiŋeŋ, ama yalɛ ma pamɩɛ na ma nyinaŋ gba kpi.>>
10Sɛ Yesu tawɩ ɩ sɛ,<<Wʋkpa wʋŋ wʋ taŋ sɔ na, wʋ wʋsɛ lɩɩ, wʋ nafara tie nyiŋeŋ n tiri na wʋ a yalɛ. Amɩɛ bɩrɛ amɩɛ wʋsɛ lɩɩ, ama naa amɩɛ kpiniŋ ŋ.>> 11Akala takɩɛ wʋ taŋ wʋ jiŋ wʋŋ wʋ a lɩsɛ ɩ fa na, dɩmʋŋ dʋɔ sɛ wʋ tawɩ sɛ amɩɛ tɩba wʋrʋ wʋsɛ n lɩɩ ɩ.
12Gʋ wʋ yalɛ ba nafara tie taŋ na, sɛ wʋ bɔsɩna wʋ adugbe gagba fu sɛ wʋ bɔrɛ gaa cha wʋ dɩchaɩ. Sɛ wʋ tasɛ ba sɛ, <<Ɩ nyii ŋii ma yɩɛ fa amɩɛ n na tie?>> 13E yagɛ maŋ sɛ, <<Wʋkalaasa na Kpaŋjuo, sɛ ŋɩ yɩɛ dɩmʋŋ akala takɩɛ dɩmʋŋ sɛ ma yɩɛ.>> 14Sɛ dɩtɩɛna maŋ wʋŋ ma yɩɛ amɩɛ Kpaŋjuo na wʋkalaasa ma yalɛ amɩɛ nafara tie na, dɩmʋŋ sɛ dɩ daga na amɩɛ gba ɩ yalɛ dɔŋa nafara tie. 15Ma yɩɛ ŋina takɩɛ kpalɩɛna mʋ fa amɩɛ, amɩɛ gba n yɩɛ takɩɛ ganaŋkʋ ma yɩɛ na. 16Maa tawɩ sɛ n nyii na dieli sɛ tʋmɩrɛ wʋrʋ taŋ sɛ wʋ kii wʋ Kpaŋjuo o, yaa gabʋɔ wʋrʋ taŋ sɛ wʋ kii wʋŋ wʋ kpiri ɩ na a. 17Dɩtɩɛna gʋ ɩ jiŋ ŋina na, sɛ ɩ yɩɛ ŋɛ na, amɩɛ asa aja di.
Yesu tawɩ wʋ lɩsɛrɛ wʋŋ wʋsɛ dʋɔ wɩɛ
18Sɛ Yesu tawɩ sɛ, <<Naa amɩɛ kpiniŋ wɩɛ sɛ maa tawɩ ɩ. Ma jiŋ baa ma lɩsɛ na. Ama ŋina aaŋ ja yela na ŋii ba sabɩɛ si Ɩsʋɔ Sabɩɛwɩɛ ŋii naŋ na a kɔŋ tɩba sɛ wʋŋ maŋ na ɩ dɩɩ di nyɩna garɛ naŋ na, aja kʋlʋ sɩŋ ma dʋɔ.>>#Num 41:9.
19<<Maa tawɩ amɩɛ bɛ pɔɩ na ŋii tibi, ganaŋkʋ ŋɩ tibi na, ɩ lɩɛ di gʋ maŋ n nyina ɩ. 20Maa tawɩ amɩɛ sɛ n nyii na dieli sɛ, wʋkʋma wʋŋ wʋ lɩɛ wʋŋ ma kpiri ɩ dʋ na, wʋ lɩɛ maŋ dʋ. Sɛ wʋkʋma wʋŋ wʋ lɩɛ maŋ dʋ na, wʋ lɩɛ wʋŋ wʋ kpiri maŋ na gba dʋ.>>
21Gʋ Yesu tawɩ ŋina taŋ na, sɛ wʋ digela warɩɛ ɩ sɛ wʋ tawɩ sɛ, <<Maa tawɩ amɩɛ sɛ n nyii na dieli sɛ, amɩɛ tɩba wʋrʋ aja wʋ a lɩsɛ maŋ fa.>>
22Sɛ wʋ kpalɛnara baa kɩɛ dɔŋa sɛ ba n jiŋ bʋrʋ gaa ba n yɩɛ ɛ, ba n nyii tie ba tɩba wʋŋ wʋ dʋɔna na a. 23Ba tɩba wʋrʋ wʋŋ wʋ yɩɛ kpalɛnarɛ wʋŋ Yesu a ja wʋ wɩɛ na cha tela ɩ. 24Sɛ Simoŋ Petero ŋabɩɛ wʋ asa kalaa dɩmʋŋ kpalɛnarɛ wina tawɩ sɛ, <<Tasɛ ɩ sɛ Mmʋɔ sɛ wʋ dʋɔna.>>
25Sɛ dɩmʋŋ kpalɛnarɛ wʋŋ wʋ cha tela Yesu na tasɛ ɩ sɛ, <<Kpaŋjuo, Mmʋɔ bɛ?>>
26Sɛ Yesu lɩsɛ ɩ nʋɔ sɛ, <<Wʋŋ n nyina wʋŋ maa mʋ bodobodo gaguŋ dʋ nyɩna naŋ fa ɩ na.>> Gʋ wʋ mʋ bodobodo gaguŋ gaa dʋ nyɩna naŋ na, wʋ mʋ fa Simoŋ bu Yudasi Isikariyoti. 27Gʋ Yudasi lɩɛ bodobodo gaa na, dɩmaŋ gana sɛ Sɩtanɩ jʋʋ wʋ tɩba.
Sɛ Yesu tawɩ ɩ sɛ, <<Bʋrʋ gaa nyaa ja sɛ nyaa yɩɛ na, yɩɛ ga bileŋ.>>
28Ama ba wʋkʋma wʋŋ wʋ chaɩ didiitiŋ dɩmaŋ na n nyii kpɩnɩdɩ dʋɔ sɛ Yesu tawɩ dɩmʋŋ fa ɩ na tie e. 29Gʋ Yudasi n nyina wʋŋ wʋ a chaŋ aterembie na dʋɔ, barɛ fa nfɩɛrɛ sɛ Yesu cha wʋ a tawɩ ɩ sɛ wʋ n ju ga lɩɛ bʋrʋ gaa baa tiri fa nyiŋi asadi adiya di ŋii, yaa wʋ n mʋ aterembie ga fa ayɔŋtina bɛ. 30Gʋ Yudasi lɩɛ bodobodo gaa na dɩmaŋ gana sɛ wʋ lɩɩ asʋŋ laŋ. Na ŋɩ cha yɩɛ yuluma bɛ.
Mbara afɔlɩɛ
31Gʋ Yudasi lam na, Yesu tawɩ sɛ, <<Dɩtɩɛna sɛ Wʋkpa Bu wʋŋ aja yu jilima, na Ɩsʋɔ a pala na wʋ dʋɔ yu jilima. 32Sɛ Ɩsʋɔ pala na wʋ dʋɔ yu jilima na, Ɩsʋɔ aja fa wʋ Bu wʋŋ jilima lɩɩna wʋ tɩŋtɩŋ wʋ dʋɔ na wʋ a mʋ jilima fa ɩ gabʋanaŋ.>>
33Sɛ Yesu tawɩ sɛ, <<Ma bie, maa wɩɛ amɩɛ jaŋ saŋa chonii bɛ. Ɩɩ kɩɛ ja maŋ takɩɛ ganaŋkʋ ma tawɩ Yudatina na, dɩmʋŋ dʋɔ maa tawɩ amɩɛ dɩtɩɛna sɛ diele gaa maa ju na, ɩɩ dɩlɛ kɔŋ dɩmaŋ ŋ.>>
34<<Mbara afɔlɩɛ sɛ maa fa amɩɛ sɛ n ja dɔŋa. Takɩɛ ganaŋkʋ ma ja amɩɛ na, dɩmʋŋ sɛ ŋɩ tiri gʋ n ja dɔŋa. 35Sɛ ɩ ja dɔŋa na, aja yela na bakpa kpiniŋ a jiŋ gʋ ɩ yɩɛ ma kpalɛnara.>>
Yesu tawɩ Petero pɩɛ dʋɔ wɩɛ
Matiyo 26:31-35; Maakɩ 14:27-31; Luka 22:31-34
36Sɛ Simoŋ Petero tasɛ Yesu sɛ, <<Kpaŋjuo, le sɛ nyaa ju.>>
Sɛ Yesu lɩsɛ ɩ nʋɔ sɛ, <<Diele gaa maa ju na, nyaa dɩlɛ kpaŋ maŋ dɩtɩɛna a, ama wʋrʋgbɩɛ na, nyaa kpaŋ maŋ.>>
37Sɛ Petero tasɛ sɛ, <<Kpaŋjuo, be n yɩɛ sɛ maa dɩlɛ kpaŋ nyaŋ dɩtɩɛna? Maa mʋ ma nkpa si fa nyaŋ.>>
38Sɛ Yesu lɩsɛ nʋɔ sɛ, <<Nyaa mʋ nya nkpa si fa maŋ gasiŋteŋ? Maa tawɩ sɛ nyii na dieli sɛ pɔɩ na dijimba a kɔlɛ na, nyaa pɩɛ maŋ gbɩɛta butoro!>>
Currently Selected:
Yohane 13: CLL
Highlight
Copy
Compare
Share
Want to have your highlights saved across all your devices? Sign up or sign in
2025 Ghana Institute of Linguistics Literacy amp Bible Translation
