ಮತ್ತಾಯನು಼ 9

ಯೇಸು ಕೈಕಾಲು಼ಬರದವಂನೆ ಗುಣಮಾಡೊದು

(ಮಾರ್ಕ 2:1–12; ಲೂಕ 5:17–26)

1ಆಗ, ಯೇಸು ದೋಣಿಲು಼ ಹತ್ತಿ, ಕೆ಼ರೆನ ಆಚೆಕರೆಗು಼ ದಾಟಿಬಂದು಼, ತಂಗ ಸೊಂತ ಊರ್ಗು಼ ವಾದರು಼. 2ಅಲ್ಲಿ ಹಾಸಿಗೆಲು಼ ಬುದ್ರ ಕೈಕಾಲು಼ಬರದವಂನೆ ಅವರು಼ತನಗು಼ ಹೊತ್ತೊಡು಼ ಬಂದಾರು಼. ಯೇಸು ಅವರ್ನ ವಿಸ್ವಾಸನೆ ಕಂಡು಼, ಆ ಕೈಕಾಲು಼ಬರದವಂನೆ ನೋಡಿ, “ಮಙನೇ! ದೈರ್ಯಾಗಿರು಼, ನಿನ್ನ ಪಾಪನೆಲ್ಲಾ ಸಮ್ಸಿರಾದು಼” ಅಂದು಼ ಹೇ಼ಳಿದಾರು಼.

3ಆಗ, ಯೆಹೂದ್ಯನ್ಯಾಮಕೆ಼ಲ್ಸಿಕೊಡೊವರ್ಲು಼ ಸಲ್ಪಮಂದಿ, “ಇವಂನು಼ ದೈವದೂಸಣೆ ಮಾಡ್ಯೊಡಿದ್ದೆನೆ” ಅಂದು಼ ತಂಗ ರುದಯಲು಼ ಹೇ಼ಳ್ಯೊಡಾರು಼.

4ಅವರೆಲ್ಲಾರ್ನು ಇಂತೆ ಯೋಚನೆಮಾಡ್ಯೊಡಿರದ್ನೆ ಯೇಸು ಗೊತ್ತುಮಾಡಿ, “ಯಾನು಼ಗ ನಿಂಗ ರುದಯಲು಼ ಕೆಟ್ಟದ್ನೆ ಯೋಚನೆಮಾಡ್ಯೊಡಿದ್ದೆರು಼? 5ಯಾವುದ ಸುಲ್ಬ? ನಿನ್ನ ಪಾಪನೆಲ್ಲಾ ಸಮ್ಸಿರಾದಂದು಼ ಹೇ಼ಳೊದವಾ, ಅಲ್ಲದಲೆ, ನೀನು಼ ಎದ್ದು಼ ನಡಿಹಂದು಼ ಹೇ಼ಳೊದವಾ? 6ಬೂಮಿಲು಼ ಪಾಪನೆಲ್ಲಾ ಸಮ್ಸೊಲೆ ಮೈಸನ ಮಙನ್ಗು಼ ಅದಿಕಾರಯಿದ್ದೆ ಅಂದು಼ ನಿಂಗ ಗೊತ್ತುಮಾಡಕು಼” ಅಂದು಼ ಹೇ಼ಳಿ, ಆ ಕೈಕಾಲು಼ಬರದವಂನೆ ನೋಡಿ, “ನೀನು಼ ಎದ್ದು಼, ನಿನ್ನ ಹಾಸಿಗೆನೆ ಎತ್ಯೊಡು಼, ನಿನ್ನ ಮನೆಗು಼ ವಾ” ಅಂದಾರು಼. 7ಆ ತಕ್ಸಣವೆ, ಆ ಮೈಸನು಼ ಎದ್ದು಼, ತನ್ನ ಮನೆಗು಼ ವಾದನು಼. 8ಜನಯಲ್ಲಾ ಇದ್ನೆ ನೋಡಿ ಆಚರ್ಯಪಟ್ಟು಼, ಮೈಸರ್ಗೆಲ್ಲಾ ಈಮಾದ್ರಿನ ಅದಿಕಾರನೆ ಕೊಟ್ಟ ದೈವನೆ ಮಹಿಮೆಪಡ್ಸಿದಾರು಼.

ಯೇಸು ಮತ್ತಾಯನೆ ತಂಗಯಿಂದಕು಼ ಬರೊದ್ಗಾಗಿ ಕರಿವಾದು಼

(ಮಾರ್ಕ 2:13–17; ಲೂಕ 5:27–32)

9ಯೇಸು ಆ ಜಾಗನೆಬುಟ್ಟು಼ ಹೋಗ್ಯೊಡಿರಗ, ವೊರಿವಸೂಲಿಮಾಡೊ ಜಾಗಲು಼ ಕುಳ್ತಿದ್ದ ಮತ್ತಾಯನಂಬ ವಬ್ಬ ಮೈಸನೆ ಅವರು಼ ಕಂಡು಼, “ನನ್ನಿಂದಕು಼ ಬಾ” ಅಂದು಼ ಹೇ಼ಳಿದಾರು಼. ಆಗ, ಅವಂನು಼ ಎದ್ದು಼, ಅವರಿಂದಕು಼ ವಾದನು಼.

10ಇಂದೆ, ಯೇಸು ಮತ್ತಾಯನ ಮನೆಲು಼ ಬಿರು಼ಂದು಼ತೀನಿ ತಿಂದೊಡಿರಗ, ಬಾಳ ವೊರಿವಸೂಲಿಮಾಡೊವರ್ನು, ಪಾಪಮಾಡೊವರ್ನು#9:10 ಪಾಪಮಾಡೊವರು಼ ಅಂದು಼ ಜನ ಕರ್ದಾರು಼. ಬಂದು಼, ಯೇಸುಕೂಡನು, ಅವರ್ನ ಸಿಸ್ಯರು಼ಕೂಡನು ಬಿರು಼ಂದು಼ತೀನಿ ತಿಂದೊಡಿದ್ದಾರು಼.#ಲೂಕ 15:1,2 11ಪರಿಸಾಯಗುಂಪುನವರು಼ ಅದ್ನೆ ಕಂಡು಼, ಅವರ್ನ ಸಿಸ್ಯರ್ನೆ ನೋಡಿ, “ನಿಂಗನ ಗುರು ಯಾನು಼ಗ ವೊರಿವಸೂಲಿಮಾಡೊವರು಼ಕೂಡನು, ಪಾಪಮಾಡೊವರು಼ಕೂಡನು ತೀನಿ ತಿಂದೊಡಿದ್ದೆರೆ?” ಅಂದು಼ ಕೇ಼ಳಿದಾರು಼.

12ಯೇಸು ಅದ್ನೆ ಕೇ಼ಳಿ, “ಸುಗವುಳ್ಳವರ್ಗಲ್ಲಾ, ರೋಗವುಳ್ಳವರ್ಗು಼ತ ದಾಕ್ಟರು಼ ಬೇಕು಼. 13‘ಬಲಿನೆಹಲ್ಲಾ, ದಯೆನೆವೆ ನಾನು಼ ಇಸ್ಟಪಟ್ಟೆನು಼’ ಅಂಬ ಮಾತ್ನ ಅರ್ತ ಯಾನಂದು಼ ನಿಂಗ ಹೋಗಿ ಕಲ್ತೊನು. ನೀತಿವುಳ್ಳವರ್ನೆಹಲ್ಲಾ, ಪಾಪಮಾಡೊವರ್ನೆವೆ ಮನ್ಸು಼ತಿರ್ಗೊದ್ಗಾಗಿ ಕರಿವಲೆ ಬಂದೆನು಼” ಅಂದು಼ ಹೇ಼ಳಿದಾರು಼.#ಮತ್ತಾ 12:7; ಹೋಸೇ 6:6

ಜನ ಯೇಸುತನಲು಼ ಉಪ್ವಾಸನಪತಿ ಪ್ರಸ್ನೆ ಕೇ಼ಳೊದು಼

(ಮಾರ್ಕ 2:18–22; ಲೂಕ 5:33–39)

14ಆಗ, ಯೋಹಾನನ ಸಿಸ್ಯರು಼ ಯೇಸುತನಗು಼ ಬಂದು಼, “ನಂಗನು, ಪರಿಸಾಯಗುಂಪುನವರ್ನು ಅಡೆಗಡೆಗು಼ ಉಪ್ವಾಸಮಾಡಿದೆವು. ಅಂದಲೆ, ನಿಂಗನ ಸಿಸ್ಯರು಼ ಯಾನು಼ಗ ಉಪ್ವಾಸಮಾಡೊದಿಲ್ಲೆ?” ಅಂದು಼ ಕೇ಼ಳಿದಾರು಼.

15ಅದ್ಗು಼ ಯೇಸು ಅವರ್ನೆ ನೋಡಿ, “ಮೊದೆಗಂಡು಼ ಮೊದೆಗಂಡು಼ನ ಕೂಟು಼ಕಾರರು಼ಕೂಡ ಇರೊಗ, ಆ ಕೂಟು಼ಕಾರರು಼ ಸಂಗಡಪಟ್ಟಾರವಾ? ಕಾಣೆ. ಮೊದೆಗಂಡು಼ ಅವರ್ನೆಬುಟ್ಟು಼ ವಾಪ ಸಮೆ ಬಂದಾದು಼. ಆ ಸಮೆಲು಼ ಅವರೆಲ್ಲಾರ್ನು ಉಪ್ವಾಸಮಾಡಿದರು಼.

16 ಯಾರ್ನು ವಸ ಬಟ್ಟೆತುಂಡು಼ನೆ ಹಳೆ ಬಟ್ಟೆಕೂಡ ಸೇರಿ ಓಲೊದಿಲ್ಲೆ. ಅಂತೆ ಮಾಡಿದಲೆ, ವಸ ಬಟ್ಟೆತುಂಡು಼ ನರ್ಗಿನರ್ಗಿ, ಆ ಹಳೆ ಬಟ್ಟೆನೆ ಬಾಳಹಾಗಿ ಕೀರಿಬುಟ್ಟಾದು಼. ಇದಲ್ಲದೆ, ಆ ಕನ್ನ ದೊಡ್ಡದಾಗಿಬುಟ್ಟಾದು಼. 17ಅದೆಮಾದ್ರಿ, ಯಾರ್ನು ವಸ ದ್ರಾಕ್ಸಿರಸನೆ ಹಳೆ ಸಕ್ಕಳಸೀರಲು಼ ಹಾಕೊದಿಲ್ಲೆ. ಅಂತೆ ಹಾಕಿದಲೆ, ಆ ವಸ ದ್ರಾಕ್ಸಿರಸ ಆ ಸಕ್ಕಳಸೀರನೆ ಕೀರಿಬುಟ್ಟಾದು಼. ಇದಲ್ಲದೆ, ಆ ದ್ರಾಕ್ಸಿರಸ ಸುರಿದು಼ವಾದದು಼. ಆ ಸಕ್ಕಳಸೀರನು ನಾಸಹಾದದು಼. ಅದ್ಗಾಗಿ, ವಸ ದ್ರಾಕ್ಸಿರಸನೆ ವಸ ಸಕ್ಕಳಸೀರಲು಼ ಹಾಕಿದರು಼. ಆಗ, ಅವೆ ಎರ್ಡುನು ಬದ್ರಾಗಿದ್ದಾದು಼” ಅಂದು಼ ಹೇ಼ಳಿದಾರು಼.

ಯೇಸು ವಬ್ಬ ಹೆಣ್ಣು಼ನೆ ಗುಣಮಾಡಿ, ಇನ್ನೊಬ್ಬ ಸತ್ತ ಸಣ್ಣ ಹೆಣ್ಣು಼ನೆ ಸಾವಿಂದ ಜೀವಾಗಿ ಏಳ್ಸೊದು಼

(ಮಾರ್ಕ 5:21–43; ಲೂಕ 8:40–56)

18ಯೇಸು ಇಂತೆ ಅವರು಼ತನಲು಼ ಹೇ಼ಳ್ಯೊಡಿರಗ, ವಬ್ಬ ಯೆಹೂದ್ಯರು಼ಕೂಡೊಮನೆನ ತಲೆವನು಼ ಬಂದು಼, ಅವರ್ನಮುಂದಕು಼ ಮಂಡಿಕಾಲಾಕಿ, “ನನ್ನ ಮಗ ಈಗತ ಸತ್ತು಼ವಾದ. ಅಂದಲೆನು, ನಿಂಗ ಬಂದು಼ ಅವನಮೇಲೆ ನಿಂಗ ಕೈನೆ ಹಾಕುನು, ಆಗ, ಅವ ಬದ್ಕಿದ” ಅಂದಾನು಼. 19ಅದ್ಗಾಗಿ, ಯೇಸು ಎದ್ದು಼, ತಂಗ ಸಿಸ್ಯರು಼ಕೂಡ ಅವಂನಿಂದಕು಼ ವಾದರು಼.

20ಆಗ, ಹನ್ನೆರ್ಡು಼ ವರ್ಸ ರತ್ತಕುಸುಮ ರೋಗಯಿಂದ ಕಸ್ಟಪಟ್ಟೊಡಿದ್ದ ವಬ್ಬ ಹೆಣ್ಣು಼: 21“ನಾನು಼ ಯೇಸುನ ಬಟ್ಟೆನ್ಯಾರು಼ ಮುಟ್ಟಿದಲೆ, ನಾನು಼ ಗುಣಹಾದೆನು಼” ಅಂದು಼ ತನ್ನ ಮನ್ಸು಼ವಳಗೆ ಗ್ಯಾನಮಾಡಿ, ಅವರ್ನ ಬಟ್ಟೆನ ತುದಿನೆ ಮುಟ್ಟಿದ.

22ಆಗ, ಯೇಸು ತಿರ್ಗಿ ಅವನೆ ನೋಡಿ, “ಮಗವೇ! ದೈರ್ಯಾಗಿರು಼. ನಿನ್ನ ವಿಸ್ವಾಸ ನಿನ್ನೆ ಗುಣಮಾಡಿತ್ತು಼” ಅಂದಾರು಼. ಆ ಗಳಿಗೆವೆ, ಅವ ಗುಣಹಾದ.

23ಇಂದೆ, ಯೇಸು ಆ ಯೆಹೂದ್ಯರು಼ಕೂಡೊಮನೆನ ತಲೆವನ ಮನೆಗು಼ ಬಂದು಼, ಅಲ್ಲಿ ಕೊಳಲು಼ ಊದೊವರ್ನೆನು, ಸದ್ದು಼ಮಾಡ್ಯೊಡಿದ್ದ ಜನನೆನು ಕಂಡು಼, 24“ವರಗೆ ವಾನು. ಯಾನು಼ಗಂದಲೆ, ಈ ಸಣ್ಣ ಹೆಣ್ಣು಼ ಸತ್ರಾ. ಅವ ಮನಗ್ಯೊಡಿದ್ದೆ” ಅಂದಾರು಼. ಅದ್ಗಾಗಿ, ಅವರೆಲ್ಲಾರ್ನು ಅವರ್ನೆ ನೋಡಿ ನಗಿದಾರು಼. 25ಜನನೆ ವರಗೆ ಕೆ಼ಳ್ಸಿದಮೇಲೆ, ಯೇಸು ವಳಗೆ ಹೋಗಿ, ಆ ಸಣ್ಣ ಹೆಣ್ಣು಼ನ ಕೈನೆ ಇಡ್ತಾರು಼. ಆ ತಕ್ಸಣವೆ, ಅವ ಎದ್ದ. 26ಈ ಸುದ್ದಿ ಆ ನಾಡು಼ಪೂರ್ತಿ ಅಬ್ಬಿತ್ತು಼.

ಯೇಸು ಇಬ್ಬರು಼ ಕುರುಡರ್ನೆನು, ವಬ್ಬ ಮೂಗನಾದ ಮೈಸನೆನು ಗುಣಮಾಡೊದು಼

27ಯೇಸು ಆ ಜಾಗನೆಬುಟ್ಟು಼ ವಾಪಗ, ಇಬ್ಬರು಼ ಕುರುಡರು಼ ಅವರಿಂದಕು಼ ಹೋಗಿ, “ದಾವೀದನ ಮಙನೇ! ನಂಗನಮೇಲೆ ದಯೆತೋರ್ಸುನು” ಅಂದು಼ ಕರ್ದಾರು಼.

28ಯೇಸು ಮನೆವಳಗೆ ಬಂದಮೇಲೆ, ಆ ಕುರುಡರು಼ ಅವರು಼ತನಗು಼ ಬಂದಾರು಼. ಯೇಸು ಅವರ್ನೆ ನೋಡಿ, “ಇದ್ನೆ ಮಾಡೊಲೆ ನನಗು಼ ಸಕ್ತಿಯಿದ್ದೆಹಂದು಼ ನಿಂಗ ವಿಸ್ವಾಸಮಾಡಿದೆರವಾ?” ಅಂದು಼ ಕೇ಼ಳಿದಾರು಼.

ಅದ್ಗು಼ ಅವರು಼, “ಹಾಂ ಗುರುವೇ! ನಂಗ ವಿಸ್ವಾಸಮಾಡಿದೆವು” ಅಂದಾರು಼.

29ಆಗ, ಯೇಸು ಅವರಿಬ್ಬರ್ನ ಕಣ್ಣು಼ನೆ ಮುಟ್ಟಿ, ಅವರ್ನೆ ನೋಡಿ, “ನಿಂಗ ವಿಸ್ವಾಸಮಾಡಿದಂತೆ ನಿಂಗಗು಼ ಹಾಗಲಿ” ಅಂದಾರು಼. 30ಆ ತಕ್ಸಣವೆ ಅವರಿಬ್ಬರ್ಗುನು ದೃಸ್ಟಿ ಬಂತು಼. ಆಗ, ಯೇಸು ಅವರ್ನೆ ನೋಡಿ, “ಈ ಕಾರ್ಯ ಯಾರ್ಗುನು ಗೊತ್ತಾಗದಂತೆ ಯಸರಾಗಿರ್ನು” ಅಂದು಼ ಗಟ್ಟಿಯಾಗಿ ಅಪ್ಪಣೆಕೊಟ್ಟಾರು಼. 31ಅಂದಲೆ, ಅವರಿಬ್ಬರ್ನು ವರಗೆ ಹೋಗಿ, ಆ ನಾಡು಼ಪೂರ್ತಿ ಯೇಸುನಪತಿನ ಸುದ್ದಿನೆ ಅಬ್ಬಿಸಿದಾರು಼.

32ಅವರು಼ ಅಲ್ಲಿಂದ ಹೋಗ್ಯೊಡಿರಗ, ಸಲ್ಪಮಂದಿ ಪಿಸಾಸು಼ ಇಡ್ತಿದ್ದ ವಬ್ಬ ಮೂಗನೆ ಯೇಸುತನಗು಼ ಕರ್ದೊಡು಼ಬಂದಾರು಼. 33ಇಂದೆ, ಯೇಸು ಆ ಮೈಸನವಳಗಿಂದ ಪಿಸಾಸು಼ನೆ ಓಡ್ಸಿದಾರು಼. ಆಗ, ಆ ಮೂಗನು಼ ಮಾತಡೊಲೆ ತೊಡಗಿದಾನು಼. ಅದ್ನೆ ಕಂಡ ಜನಯಲ್ಲಾರ್ನು ಆಚರ್ಯಪಟ್ಟು಼, “ಇಸ್ರಾಯೇಲು಼ ದೇಸಲು಼ ಈಮಾದ್ರಿ ಯಾನು ಯಾಗುಲುನು ನಡ್ದತಿಲ್ಲೆಹಲ್ಲವಾ?” ಅಂದಾರು಼.

34ಅಂದಲೆ, ಪರಿಸಾಯಗುಂಪುನವರು಼, “ಇವಂನು಼ ಪಿಸಾಸು಼ನ ತಲೆವನು಼ ಕೊಡೊ ಸಕ್ತಿಯಿಂದ ಪಿಸಾಸು಼ನೆ ಓಡ್ಸಿದಾನು಼” ಅಂದಾರು಼.#ಮತ್ತಾ 10:25; 12:24; ಮಾರ್ಕ 3:22; ಲೂಕ 11:15

ಬೆಳೆ ಬಾಳ, ಕೆಲ್ಸಗಾರರು಼ ಸಲ್ಪ

35ಇಂದೆ, ಯೇಸು ಯಲ್ಲಾ ಊರು಼ಗಣೆನು, ಗ್ರಾಮಗಣೆನು ತಿರ್ಗಾಡಿ, ಯೆಹೂದ್ಯರು಼ಕೂಡೊಮನೆಲೆಲ್ಲಾ ಕೆ಼ಲ್ಸಿಕೊಟ್ಟು಼, ರಾಜ್ಯನ ವಳ್ಳೆಸುದ್ದಿನೆ ಪ್ರಚಾರಮಾಡಿ, ಜನಗು಼ ಇದ್ದ ಯಲ್ಲಾ ರೋಗನೆನು, ನೋವುನೆನು ಗುಣಮಾಡಿದರು಼.#ಮತ್ತಾ 4:23; ಮಾರ್ಕ 1:39; ಲೂಕ 4:44 36ಜನ ದೊಡ್ಡ ಗುಂಪಾಗಿರದ್ನೆ ಯೇಸು ಕಂಡಾಗ, ಅವರೆಲ್ಲಾರ್ನು ಮೇಸೊವಂನು಼ ಇಲ್ಲದ ಕುರಿಮಾದ್ರಿ ಸಂಗಡಪಟ್ಟೊಡು಼, ಸಹಾಯ ಯಾನು ಯಿಲ್ಲದವರಾಗಿದ್ದದ್ಗಾಗಿ, ಅವರ್ನಮೇಲೆ ಕರುಣೆತೋರ್ಸಿ,#ಮಾರ್ಕ 6:34; ಪ್ರಯಾ 27:17; 1 ರಾಜ 22:17; 2 ಚರಿ 18:16; ಯೆಹೆಜ್ಕೇ 34:5 37ತಂಗ ಸಿಸ್ಯರ್ನೆ ನೋಡಿ, “ಬೆಳೆ ಬಾಳಯಿದ್ದೆ. ಅಂದಲೆ, ಕೆಲ್ಸಗಾರರು಼ ಸಲ್ಪವೆಯಿದ್ದೆರೆ.#ಲೂಕ 10:2 38ಅದ್ಗಾಗಿ, ಬೆಳೆನ ವಡೆನು಼ ತಂಗನ ಬೆಳೆನೆ ಕುಯ್ವಲೆ ಕೆಲ್ಸಗಾರರ್ನೆ ಕೆ಼ಳ್ಸಿಕೊಡಕಂದು಼ ನಿಂಗ ಅವರು಼ತನಲು಼ ಪ್ರಾರ್ತನೆಮಾಡುನು” ಅಂದಾರು಼.

Currently Selected:

ಮತ್ತಾಯನು಼ 9: JKKAN

Highlight

Compare

Copy