ಮತ್ತಾಯನು಼ 6

ಬಡವರ್ಗು಼ ದಾನಕೊಡೊದು

1 ಜನಯಲ್ಲಾ ನೋಡಲಿಹಂದು಼ ನಿಂಗನ ವಳ್ಳೆ ಕಾರ್ಯನೆಲ್ಲಾ ಜನನಮುಂದಕು಼ ಮಾಡದಂತೆ ಯಸರಾಗಿರ್ನು. ಅಂತೆ ನಿಂಗ ಮಾಡಿದಲೆ, ಪರ್ಲೋಕಲಿರ ನಿಂಗ ಅಪ್ಪನತನಲಿಂದ ನಿಂಗಗು಼ ಪ್ರತಿಪಲ ಯಾನು ಸಿಕ್ಕೊದಿಲ್ಲೆ. # ಮತ್ತಾ 23:5

2 ಅದ್ಗಾಗಿ, ನೀನು಼ ಬಡವರ್ಗು಼ ದಾನಮಾಡೊಗ, ಜನ ತಂಗನಪತಿ ವಳ್ಳೆದಾಗಿ ಹೇ಼ಳಕಂದು಼, ಯೆಹೂದ್ಯರು಼ಕೂಡೊಮನೆಲುನು, ಬೀದಿಗಣೆನು ನಾಡಗಕಾರರು಼ # 6:2 ಪರಿಸುದ್ದವುಳ್ಳವರು಼ಮಾದ್ರಿ ನಾಡಗಮಾಡೊ ಮೈಸರು಼ ಮಾಡೊಮಾದ್ರಿ, ತುತೂರಿ ಊದಿ ನೀನು಼ ಮಾಡೊದ್ನೆ ಯಲ್ಲಾರ್ನು ಗೊತ್ತುಮಾಡೊಂತೆ ಮಾಡಬ್ಯಾಡ. ನಾನು಼ ನಿಂಗಗು಼ ನಿಜಾಗೆವೆ ಹೇ಼ಳಿದೆನು಼: ಅವರ್ಗು಼ ಸಿಕ್ಕೊಲಿರ ಪ್ರತಿಪಲ ಅವರ್ಗು಼ ಸಿಕ್ಕಿಬುಟ್ಟಾತು಼. 3ಅಂದಲೆ, ನೀನು಼ ಬಡವರ್ಗು಼ ದಾನಮಾಡೊಗ, ನಿನ್ನ ಬಲ ಕೈ ಮಾಡೊದು಼ ನಿನ್ನ ಎಡ ಕೈಗು಼ ಗೊತ್ತಾಗದೆಯಿರಲಿ. 4ಆಗ, ನೀನು಼ ಮಾಡೊ ದಾನ ಮರೆಹಾಗಿದ್ದಾದು಼. ಇಂದೆ, ಮರೆಲು಼ ನೀನು಼ ಮಾಡೊದ್ನೆ ನೋಡೊ ನಿನ್ನ ಪರ್ಲೋಕ ಅಪ್ಪನು಼ ನಿನಗು಼ ಪ್ರತಿಪಲ ಕೊಟ್ಟಾರು಼.

ಯಂತೆ ಪ್ರಾರ್ತನೆಮಾಡಕು಼?

(ಲೂಕ 11:2–4)

5 ಇಂದೆ, ನೀನು಼ ಪ್ರಾರ್ತನೆಮಾಡೊಗ, ನಾಡಗಕಾರರು಼ಮಾದ್ರಿ ಇರಬ್ಯಾಡ. ಯಾನು಼ಗಂದಲೆ, ಜನಯಲ್ಲಾ ನೋಡಲಿಹಂದು಼ ಅವರು಼ ಯೆಹೂದ್ಯರು಼ಕೂಡೊಮನೆಲುನು, ಬೀದಿಲುನು, ಬೀದಿನ ಮೂಲೆಲುನು ನಿಂದೊಟು಼ ಪ್ರಾರ್ತನೆಮಾಡೊಲೆ ಇಸ್ಟಪಟ್ಟಾರು಼. ನಾನು಼ ನಿಂಗಗು಼ ನಿಜಾಗೆವೆ ಹೇ಼ಳಿದೆನು಼: ಅವರ್ಗು಼ ಸಿಕ್ಕೊಲಿರ ಪ್ರತಿಪಲ ಅವರ್ಗು಼ ಸಿಕ್ಕಿಬುಟ್ಟಾತು಼. # ಲೂಕ 18:10–14 6ಅಂದಲೆ, ನೀನು಼ ಪ್ರಾರ್ತನೆಮಾಡೊಗ, ನಿನ್ನ ಕೋಣೆನ ವಳಗೆ ಹೋಗಿ, ಬಾಕಿಲ್ನೆ ಮುಚ್ಚಿ, ಕಣ್ಣು಼ಗು಼ ಕಾಣದೆಯಿರೊ ನಿನ್ನ ಪರ್ಲೋಕ ಅಪ್ಪನೆ ನೋಡಿ ಪ್ರಾರ್ತನೆಮಾಡು಼. ಆಗ, ಮರೆಲು಼ ನೀನು಼ ಮಾಡೊದ್ನೆ ನೋಡೊ ನಿನ್ನ ಪರ್ಲೋಕ ಅಪ್ಪನು಼ ನಿನಗು಼ ಪ್ರತಿಪಲ ಕೊಟ್ಟಾರು಼. 7ನಿಂಗ ಪ್ರಾರ್ತನೆಮಾಡೊಗ, ದೈವನೆ ಗೊತ್ತುಮಾಡದವರು಼ಮಾದ್ರಿ, ಹೇ಼ಳಿದದ್ನೆವೆ ಅರ್ತಯಿಲ್ಲದೆ ಸುಮ್ಮಸುಮ್ಮನೆ ಹೇ಼ಳದೆನು. ಯಾನು಼ಗಂದಲೆ, ಅಂತವರು಼ ಬಾಳ ಮಾತಡಿದಲೆ, ದೈವ ಅವರ್ನ ಪ್ರಾರ್ತನೆನೆ ಕೇ಼ಳಿದಾರಂದು಼ ನೆನ್ಸಿದಾರು಼. 8ನಿಂಗ ಅವರ್ನಮಾದ್ರಿ ಮಾಡದೆನು. ಯಾನು಼ಗಂದಲೆ, ನಿಂಗ ಅಪ್ಪನತನಲು಼ ಕೇ಼ಳದಮುಂಚೆವೆ ನಿಂಗಗು಼ ಯಾನಯಾನ ಬೇಕಂದು಼ ಅವರ್ಗು಼ ಗೊತ್ತಿದ್ದೆ.

9 ನಿಂಗ ಯಂತೆ ಪ್ರಾರ್ತನೆಮಾಡಕಂದಲೆ,

‘ಪರ್ಲೋಕಲಿರ ನಂಗ ಅಪ್ಪನೇ!

ನಿಂಗನ ನಾಮ ಪರಿಸುದ್ದಹಾಗಲಿ.

10 ನಿಂಗನ ರಾಜ್ಯ ಬರಲಿ.

ಪರ್ಲೋಕಲು಼ ನಿಂಗನ ಇಸ್ಟಂತೆ ನಡ್ದೊಡಿರಮಾದ್ರಿ,

ಬೂಲೋಕಲು಼ಕುಡಿ ನಡಿವಲಿ.

11 ನಂಗಗು಼ ಬೇಕಾದ ತೀನಿನೆ ಇಂದು಼ ನಂಗಗು಼ ಕೊಡುನು.

12 ನಂಗಗು಼ ಎದ್ರಾಗಿ ಪಾಪಮಾಡೊವರ್ನೆ ನಂಗ ಸಮ್ಸೊಮಾದ್ರಿ,

ನಂಗನ ಪಾಪನೆಲ್ಲಾ ಸಮ್ಸುನು.

13 ನಂಗ ಪಾಪನ ಬಲೆಲು಼ ಸಿಕ್ಕದಂತೆ,

ನಂಗನೆ ಕೆಟ್ಟದಿಂದ ಕಾಪಡ್ಯೊನು.

ರಾಜ್ಯನು, ಸಕ್ತಿನು, ಮಹಿಮೆನು ಯಾಗುಲುನು ನಿಂಗದೆವೆ, ಆಮೆನ್’

ಅಂದು಼ ಪ್ರಾರ್ತನೆಮಾಡಕು಼. 14ಜನನ ಪಾಪನೆಲ್ಲಾ ನಿಂಗ ಸಮ್ಸಿದಲೆ, ನಿಂಗನ ಪರ್ಲೋಕ ಅಪ್ಪನು಼ ನಿಂಗನ ಪಾಪನೆಲ್ಲಾ ಸಮ್ಸಿದಾರು಼.#ಮಾರ್ಕ 11:25,26 15ಅಂದಲೆ, ಜನನ ಪಾಪನೆಲ್ಲಾ ನಿಂಗ ಸಮ್ಸದೆಯಿದ್ದಲೆ, ನಿಂಗನ ಪರ್ಲೋಕ ಅಪ್ಪನು಼ ನಿಂಗನ ಪಾಪನೆಲ್ಲಾ ಸಮ್ಸೊದಿಲ್ಲೆ.

ಯಂತೆ ಉಪ್ವಾಸಮಾಡಕು಼?

16 ನಿಂಗ ಉಪ್ವಾಸಮಾಡೊಗ, ನಾಡಗಕಾರರು಼ಮಾದ್ರಿ ಮೊಕ ಬಾಡಿಹೋದಮಾದ್ರಿ ಇರದೆನು. ಯಾನು಼ಗಂದಲೆ, ಅಂತವರು಼ ಉಪ್ವಾಸಮಾಡೊದ್ನೆ ಜನಯಲ್ಲಾ ಕಾಣಲಿಹಂದು಼ ತಂಗ ಮೊಕನೆ ಬಾಡಿಹೋದಮಾದ್ರಿ ಮಾಡಿದರು಼. ನಾನು಼ ನಿಂಗಗು಼ ನಿಜಾಗೆವೆ ಹೇ಼ಳಿದೆನು಼: ಅವರ್ಗು಼ ಸಿಕ್ಕೊಲಿರ ಪಲ ಅವರ್ಗು಼ ಸಿಕ್ಕಿಬುಟ್ಟಾತು಼. 17ಅಂದಲೆ, ನೀನು಼ ಉಪ್ವಾಸಮಾಡೊಗ, ನಿನ್ನ ಮೊಕನೆ ತೊಳ್ದು಼, ನಿನ್ನ ತಲೆಗು಼ ಎಣ್ಣೆಹಾಕ್ಯೊ. 18ಅಂತೆ ಮಾಡೊಗ, ನೀನು಼ ಉಪ್ವಾಸಮಾಡೊದು಼ ಜನಗು಼ ಗೊತ್ತಾಗೊದಿಲ್ಲೆ. ಅಂದಲೆ, ಅದು಼ ನಿನ್ನ ಪರ್ಲೋಕ ಅಪ್ಪನ್ಗು಼ಮಾತ್ರ ಗೊತ್ತಾದದು಼. ಇಂದೆ, ಮರೆಲು಼ ನೀನು಼ ಮಾಡೊದ್ನೆ ನೋಡೊ ನಿನ್ನ ಪರ್ಲೋಕ ಅಪ್ಪನು಼ ನಿನಗು಼ ಪಲಕೊಟ್ಟಾರು಼.

ಪರ್ಲೋಕಲು಼ ಸೊತ್ತುನೆ ಸೇರ್ಸಿಹಾಕ್ಯೊನು

(ಲೂಕ 12:33–34)

19 ಬೂಮಿಲು಼ ನಿಂಗಗಾಗಿ ಸೊತ್ತುನೆ ಸೇರ್ಸಿಹಾಕಬ್ಯಾಡ. ಯಾನು಼ಗಂದಲೆ, ಇಲ್ಲಿ ಅವೆಯಲ್ಲಾ ಗ್ಯಜಲಿಡ್ತುನು, ಕಿಲುಬುಯಿಡ್ತುನು ನಾಸಹಾಗಿಬುಟ್ಟಾದು಼. ಇದಲ್ಲದೆ, ಇಲ್ಲಿ ಕಳ್ಳರು಼ ಬಂದು಼ ಕನ್ನಮಾಡಿ ಕಳವುಮಾಡಿದರು಼. # ಯಾಕೋ 5:2,3 20ಅಂದಲೆ, ಪರ್ಲೋಕಲು಼ ನಿಂಗಗಾಗಿ ಸೊತ್ತುನೆ ಸೇರ್ಸಿಹಾಕ್ಯೊನು. ಅಲ್ಲಿ ಅವೆಯಲ್ಲಾ ಗ್ಯಜಲಿಡ್ತುನು, ಕಿಲುಬುಯಿಡ್ತುನು ನಾಸಹಾಗೊದಿಲ್ಲೆ. ಇದಲ್ಲದೆ, ಅಲ್ಲಿ ಕಳ್ಳರು಼ ಬಂದು಼ ಕನ್ನಮಾಡಿ ಕಳವುಮಾಡೊದಿಲ್ಲೆ. 21ನಿಂಗನ ಸೊತ್ತು ಎಲ್ಲಿಯಿದ್ದೆವೊ, ಅಲ್ಲಿ ನಿಂಗನ ಮನ್ಸು಼ಕುಡಿ ಇದ್ದಾದು಼.

ಕಣ್ಣು಼ ಸರಿರಗು಼ ದೀಪ

(ಲೂಕ 11:34–36)

22 ಕಣ್ಣು಼ ಸರಿರಗು಼ ದೀಪಹಾಗಿದ್ದೆ. ನಿನ್ನ ಕಣ್ಣು಼ ವಳ್ಳೆದಾಗಿದ್ದಲೆ, ನಿನ್ನ ಸರಿರಪೂರ್ತಿ ಬಣಕಾಗಿದ್ದಾದು಼. 23ನಿನ್ನ ಕಣ್ಣು಼ ಕೆಟ್ಟದಾಗಿದ್ದಲೆ, ನಿನ್ನ ಸರಿರಪೂರ್ತಿ ಇರ್ಟಾಗಿದ್ದಾದು಼. ಇಂತೆ ನಿನ್ನವಳಗೆಯಿರ ಬಣಕು಼ ಇರ್ಟಾಗಿದ್ದಲೆ, ಆ ಇರ್ಟು಼ ಇನ್ನು ಯಾಸೊ ಜಾಸ್ತಿಯಾಗಿದ್ದಾದಲ್ಲವಾ?

ದೈವಗುನು, ಹಣಗುನು ಸೇವೆಮಾಡೊಲೆ ಕೊಳ್ಳಾ

(ಲೂಕ 16:13; 12:22–31)

24 ಯಾರ್ನು ಇಬ್ಬರು಼ ವಡೆರ್ಗು಼ ಸೇವೆಮಾಡೊಲೆ ಕೊಳ್ಳಾ. ಯಾನು಼ಗಂದಲೆ, ಅವಂನು಼ ವಬ್ಬಂನೆ ಹಗೆಮಾಡಿ, ಇನ್ನೊಬ್ಬಂನೆ ಪ್ರೀತಿಮಾಡಿದನು಼. ಅಲ್ಲದಲೆ, ಅವಂನು಼ ವಬ್ಬಂನ ಮಾತು಼ಕೇ಼ಳಿ ನಡ್ದಾನು಼. ಇನ್ನೊಬ್ಬಂನೆ ಮರ್ಯಾದಿ ಕೊಡದೆ ನಡ್ಸಿದಾನು಼. ನಿಂಗ ದೈವಗುನು, ಹಣಗುನು ಸೇವೆಮಾಡೊಲೆ ಕೊಳ್ಳಾ.

ಚಿಂತೆಮಾಡದೆನು

25 ಅದ್ಗಾಗಿ, ನಾನು಼ ನಿಂಗಗು಼ ಹೇ಼ಳಿದೆನು಼: ಯಾನ ತಿನಕು಼, ಯಾನ ಕುಡಿಯಕು಼ ಅಂದು಼ ನಿಂಗ ಜೀವಗಾಗಿ ಚಿಂತೆಮಾಡದೆನು. ಯಾವ ಬಟ್ಟೆ ಹಾಕಕಂದು಼ ನಿಂಗನ ಸರಿರಗಾಗಿ ಚಿಂತೆಮಾಡದೆನು. ತೀನಿಗಿಂತ ಜೀವ ಮುಕ್ಯಾಗಿದ್ದೆಹಲ್ಲವಾ? ಅದೆಮಾದ್ರಿ, ಬಟ್ಟೆಗಿಂತ ಸರಿರ ಮುಕ್ಯಾಗಿದ್ದೆಹಲ್ಲವಾ? 26ಮೋಡಲಿರ ಹಕ್ಕಿನೆಲ್ಲಾ ನೋಡುನು. ಅವೆ ಬಿತ್ತೊದು಼ ಕಾಣೆ, ಕುಯ್ವದು಼ ಕಾಣೆ. ಅವೆ ಕಣಜಲು಼ ಸೇರ್ಸಿಹಾಕೊದಿಲ್ಲೆ. ಅವೆನೆಕುಡಿ ನಿಂಗನ ಪರ್ಲೋಕ ಅಪ್ಪನು಼ ಸಾಕಿದಾರು಼. ಅವೆಗಿಂತ ನಿಂಗ ಬಾಳ ಮುಕ್ಯಾದವರಲ್ಲವಾ? 27ಚಿಂತೆಮಾಡೊಯಿಂದ ನಿಂಗಲು಼ ಯಾರಾರು಼ ನಿಂಗನ ಆಯಿಸುನೆ ಒಂದು಼ ಗಂಟೆ ಜಾಸ್ತಿಮಾಡಬೋದವಾ? ಮಾಡೊಲೆ ಕೊಳ್ಳಾ.

28 ಬಟ್ಟೆಗಾಗಿ ನಿಂಗ ಯಾನು಼ಗ ಚಿಂತೆಮಾಡಿದೆರು಼? ಕಾಡು಼ಲಿರ ಹೂವೆಲ್ಲಾ ಯಂತೆ ಬೆಳಿವದಂದು಼ ಗ್ಯಾನಮಾಡಿನೋಡುನು. ಅವೆ ಕೆಲ್ಸಮಾಡೊದಿಲ್ಲೆ, ತಂಗಗಾಗಿ ಬಟ್ಟೆ ಯಾನು ಉಂಟು಼ಮಾಡೊದಿಲ್ಲೆ. 29ಅಂದಲೆನು, ಸೊಲೊಮೋನನು಼ಕುಡಿ ತನ್ನ ಯಲ್ಲಾ ಮಹಿಮೆಲು಼ ಈ ಹೂವುಮಾದ್ರಿ ಸಂದಾಗಿ ಬಟ್ಟೆಹಾಕಿತಿಲ್ಲೆ ಅಂದು಼ ನಾನು಼ ನಿಂಗಗು಼ ಹೇ಼ಳಿದೆನು಼.#1 ರಾಜ 10:4–7; 2 ಚರಿ 9:3–6 30ಸಲ್ಪಮಾತ್ರ ವಿಸ್ವಾಸವುಳ್ಳವರೇ! ಇಂದು಼ ಇದ್ದು಼, ನಾಳೆಗ ಬಿಂಕಿಲು಼ ಹಾಕೊ ಕಾಡು಼ ಹುಲ್ಲು಼ಗು಼ ದೈವ ಇಂತೆ ಬಟ್ಟೆಹಾಕ್ಸಿದಲೆ, ನಿಂಗಗು಼ ಬಾಳ ನಿಜಾಗಿ ಬಟ್ಟೆಹಾಕ್ಸಿದರಲ್ಲವಾ? 31ಅದ್ಗಾಗಿ, ಯಾನ ತಿನಕು಼, ಯಾನ ಕುಡಿಯಕು಼, ಇಂದೆ, ಯಾವ ಬಟ್ಟೆ ಹಾಕಕಂದು಼ ನಿಂಗ ಚಿಂತೆಮಾಡಬ್ಯಾಡ. 32ಯಾನು಼ಗಂದಲೆ, ದೈವನೆ ಗೊತ್ತುಮಾಡದವರು಼ತ ಈಮಾದ್ರಿ ತಡಕಿದಾರು಼. ಇವೆಯಲ್ಲಾ ನಿಂಗಗು಼ ಬೇಕಂದು಼ ನಿಂಗನ ಪರ್ಲೋಕ ಅಪ್ಪನ್ಗು಼ ಗೊತ್ತಿದ್ದೆ. 33ಮೊದ್ಲು಼ ನಿಂಗ ದೈವರಾಜ್ಯನೆನು, ಅವರ್ನ ನೀತಿನೆನು ತಡಕುನು. ಆಗ, ಅವರು಼ ನಿಂಗಗು಼ ಇವೆನೆಲ್ಲಾ ಸೇರ್ಸಿಕೊಟ್ಟಾರು಼. 34ಅದ್ಗಾಗಿ, ನಾಳೆಜಿನಗಾಗಿ ಚಿಂತೆಮಾಡದೆನು. ಯಾನು಼ಗಂದಲೆ, ನಾಳೆಜಿನಲು಼ ಅದ್ನ ಸೊಂತ ಚಿಂತೆ ಇದ್ದಾದು಼. ಒಂದೊಂದು಼ ಜಿನಗು಼ ಆ ಜಿನನ ಕಸ್ಟವೆ ಸಾಕು಼.

Currently Selected:

ಮತ್ತಾಯನು಼ 6: JKKAN

Highlight

Compare

Copy