Matius 9
9
O Yesus wolulugu moi wisoloha la yanako Awi kuasa ma ngale
o dorou wosiapongu
(Markus 2:1-12, Lukas 5:17-26)
1Kagena de o Yesus o deruku wopaneka, de wokahino kali o talaga ma sonongano Awi doku o Kapernaumka. 2De kagena o nyawa wolulugu moi o dangiku#9:2 o dangiku : Gena ma ngale o dangi ma ceceke moi ma ronga o kokiroba, ma orasi o nyawa yasiri eko ibodito de kugena yasitide. iwisitide iwingaho o Yesuska. So o Yesus wakelelo manga piricaya ma lamo komagena, de wotemo woluluguka, <<Ai ngopa, ani sininga nosiputuru. To ngona ani dorou tosiaponguka.>>
3Kagena de o bi guru agama yamuruo naga manga sininga ma rabaka itemo, <<Wobarani bolo! Ka cawali o Gikimoi aku o dorou wahohoi, so Una de Awi demo magenena o Gikimoi wisiceke.>>
4Kagena de manga sininga ma takasiri o Yesus wanako so wotemo, <<Upa niafikiri ḋatorou to ngini nia sininga ma rabaka. 5Nako Ngohi totemo, <Ani dorou tosiapongu,> de nakoso imahoi eko hiwa ngini niakelelowa so nianakowa. Duma nako totemo, <Nomaoko la notagi,> de ngini aku niakelelo de nianakoka Ai buturu iwisilohaka. 6So Ngohi asa towisiloha la asa ninako Ngohi, o Nyawa ma Duhutu manena, o duniaka tahino de Ai kuasaka la nia dorou tasiapongu.>> So wotemo woluluguka, <<Nomaoko, de ani dangi naaho la noliho.>> 7De o nyawa magena womaoko awi dangi waaho de womajobo woliho.
8Ma orasi o nyawa yadadala o kia idadadika gena yakelelo, de ona magena yamodo de o Gikimoi wisigiliri itemo, <<Igogou! O Gikimoi Awi kuasa komagena ma lamo wahike o nyawaka.>>
O Yesus o Matius wiaso
O Farisika o Yesus iwigagaka
(Markus 2:13-17, Lukas 5:27-32)
9So ma orasi o Yesus kagena de wokahika de wikelelo una o balastengi wototolomu awi ronga o Matius (iwisiaso lo o Lewi) o kantorka wogogeku. Kagena de o Yesus wotemo unaka, <<Nahino noimote Ngohi.>> Gila-gila o Matius womaoko de wotagi o Yesus iwimoteka.
10Ma orasi magena ipasaka, o Yesus de Awi muri-muri o Matius awi tahuka imatamiye yooḋo. De o balastengi itotolomu yadala de o bi nyawa yadala manga sininga ḋatotorou, o bi kawasa yahoholu, ona magena lo imatamiye yooḋo de o Yesus. 11Kagena de o bi Farisika ma nyawa o Yesus wikelelo womatamiye wooḋo de o bi nyawa ma dorou magena. So o Yesus Awi muri-murika yotemo, <<Ḋadoohaso Una wooḋo de o balastengi itotolomu de o bi nyawa ma dorou ona magena.>>
12Duma o Yesus wogiise manga demo-demo magena de Una wosango wotemo, <<O nyawa yapoputuru upa he ma dokterka yahino, cawali ka o nyawa yasisiri. 13Magena imatero maro Ngohi tahino gena taasowa o nyawa la kanaga itemo manga sininga itotiai, duma ma ngale taaso o nyawa de manga dorouka, la ma ngale manga dorouno gena ona aku imatoba de imatoduba. So niatailako ma ngale o kia o Gikimoi Awi Jaji ma Buku ma rabaka isilelefoka, gena komanena, <Ngohi Ai dupa ma lamo gena upa nia gaso de nisisuba, duma ka niagalusiri.> >>
O Yesus de Awi muri-muri so upa he ona yooḋowa de lo youdowa
(Markus 2:18-20, Lukas 5:33-35)
14Ḋabolo de o Yohanes Wooosi awi nyawa wimomote yahino o Yesuska, yosano itemo, <<Baba, ngomi de o Farisika ma nyawa mioḋowa de miudowa, duma ḋadoohaso to Ngona Ani muri-muri gena ka ioḋo de lo iudosi.>>
15Kagena de o Yesus wosango de wosiade-ade wotemo, <<Ma orasi o kawi ma rarame ma rabaka, de igogou o nyawa yakokoro ona magena idodorawa. Nakoso wokakawi una magena de o nyawa yakokoro yahino kagena so imatamiye, de imatekedodiao so o nali de o more ma dongirabaka bilasu ona irarame. Duma done ma orasi imasidiado la wokakawi una magena wituda wisisupuka to ona manga sidongirabano. Done ma orasi magenaka asa ona ioḋowa de iudowa.>>
O ade-ade itemo idadiwa o Yesus Awi dodoto isicapu de
o Yahudika manga adati
(Markus 2:21-22, Lukas 5:36-39)
16Ḋabolo de o Yesus wotemo o ade-ade ngai sinotoli, <<O nyawa moi lo pamakewa o baju ḋamomanalo de asa isitapa de o baro ḋamomuane. Sababu ma dadapa ḋamomuane magena isilia sidago o baju ḋamomanalo magena itola so yaraca foloi ilamo. 17Komagenali o nyawa moi lo asa pamakewa o anggur ḋamomuane de yoguse ma ngihi iḋoḋomaku, upa sidago o anggur ḋamomuane done asa iwaka so ma ngihi iḋoḋoma magena yapolote. Ma dodoguku ma anggur de ma ngihi sinoto lo sona podahewa. So o anggur ḋamomuane gena bilasu poguse ma ngihi lo ḋamomuaneku, la ḋangodu idadi ka ḋaloha.>>
O ngopa o soneno womisioho
O ngopeḋeka misisiri
womisiloha kali
(Markus 5:21-43, Lukas 8:40-56)
18O Yesus gena o Yohanes wooosi awi nyawa wimomote wabobicara de wadoto ḋabolo waasi, de o nyawa moi asa wahino, una magena o puji ma tahu wapopareta. So o Yesus Awi simaka wosuba wobukuku, de wotemo, <<Baba, ai ngopa o ngopeḋeka moi asa ka mosoneku. Tanu nahino noimote la hiti nomipaḋa, de asa mooho kali.>> 19Magena de o Yesus de Awi muri-muri yomaoko de yotagi, iwimote o nyawa una magena.
20-21So yahika o ngeko ma soaka, de kanaga o ngopeḋeka moi mopanyake o au mosidagi de itekaka, duma itogu waasi ma deka o taungu mogiowo de sinoto ḋabolo. De ami sininga ma rabaka motemo, <<Hitilahi Awi jubaka tomasimaho bato, la ngohi asa isiloha.>> Muna mahino la Una mowidalate de Awi duduno mototuuru, de gila-gila momasimaho Awi juba ma pigika.
22De Una womakiliho Awi duduka, so womikelelo o ngopeḋeka muna magena. De wotemo munaka, <<He! Ai ngopa, sababu ngona noipiricaya so ngona nilohaka, so ani sininga naputuruno!>> So o orasi magena bato igogou o ngopeḋeka muna magena milohaka.
23So komagena ḋabolo, de Una wotagili so womasidiado de wowosa o puji ma tahu wapopareta gena awi tahuka. Kagena wowosa de wadaheno o suling yawuwu, o sone ma guule, de lo o nyawa yadadala yahika yahino so ikalala. 24Duma Una wotemo onaka, <<Ce! O ngopa muna manena mosonewa duma mikioloka. So nisupu kasi!>> Duma o nyawa yadadala magena yanako o ngopa muna magena mosoneka, so yangodu Una wisiihe. 25So o tahuka de o nyawa yangodu magena yasulo so isupuka, de Una wowosa o ngihi ma rabaka. Kagena de Una wacoho ami giaka, de womisimomi so mooho kali. 26La o habari magegena iise de yanako sidago yaado kagena o soa de o doku ma sigilolika.
O Yesus yopipilo yasinoto wasiloha
27Kagena de o Yesus womajobo so wahika o ngeko ma soaka, o nyawa manga lako ipipilo yasinoto iwinihi, de ona imatoore, <<Ya Yesus, o Daud awi ngopa de awi dano moiku, kodo! Nomigalusiri ngomi.>>
28De Una womawoma o tahuka, de manga lako ipipilo yasinoto ona magena yahino Unano. De Una wosano wotemo onaka, <<So, idodooha Ngohi de Ai kuasa la tinisiloloha gena ngini nipiricaya.>>
Ona itemo, <<Iya, Jou! Miagogou Ngona minipiricaya.>>
29Kagena de Una manga lako wapaḋa de wotemo, <<Ma ngale to ngini nia piricaya Ngohika so nisilohaka.>> 30So o orasi magena ḋabolo ipipilo asa yomasigeleloka. Kagena de Una wapoma wotemo, <<Upa niodedemo o nyawaka.>> 31Duma ona ka yotagi ma ngale isihabari kagena o soa de o doku ma sigilolika.
O Yesus womomou moi wisiloha
32Yopipilo yasinoto ona magena iliho, de o nyawa moili la kanaga wikokitoka so womomou una magena witota o Yesuska. 33So o Yesus wikokitoka awi toka wodusu so imahoika, de o orasi magena ḋabolo o nyawa una magena waaku wobicaraka. O nyawa yadadala gena asa yohairani de itemo, <<Wokuasa bai! Ngomi ma moi waasi o Israel ma tonaka o nyawa maro Una magegena miwimake.>> 34Duma o Farisika ma nyawa o Yesus Awi kuasa gena yopiricayawa, de yotemo, <<Icala! O Iblis, una magena o bi toka wakokolano, Unaka wihike o buturu la ma ngale o toka wodusu.>>
O Yesus yadadala wamamake gena wasayangi
35Magena de o Yesus o bi doku wakiloli so wahika manga puji ma bi tahuka, wodoto de o habari ḋaloloha wosihabari ma ngale o Gikimoi asa wopareta. De lo o nyawa yasisiri de yopopanyake gena yangodu wasiloha. 36Ma orasi Una o nyawa yadadala wamamake gena, wasayangi onaka wotemo, <<Kodo! Ona manena manga sangisara idala de nagoonawa yariwo, koloko o duba ma sowohi ihihiwa.>> 37Magena de Una Awi muri-murika wotemo, <<O nyawa yadadala la yodupa o habari ḋaloloha yoise, ona magena imatero maro o tamo ḋaoosaka gena bilasu yautu, duma kanaga youutu ma nyawa yadalawa. 38Komagena so ngini bilasu nimasigaso o doro ma duhutuka, de nigolo la ma ngale yobiuutu una wasulo la ona itagi awi doroka youtu.>>
Currently Selected:
Matius 9: GBI
Highlight
Share
Compare
Copy
Want to have your highlights saved across all your devices? Sign up or sign in
2026 Indonesian Bible Society
