Lukas 4
4
O Yesus gena o Iblis widahake iwibaja
(Matius 4:1-11, Markus 1:12-13)
1Ḋaboloku, o Yesus o Yordan ma Seleraka so he womajobo de o Gurumi Ḋatetebi ma kuasa ḋaasu-asu wipareta so wingaho o tona ibobeleuka. 2O orasi magena ma deka o putu moruha de o wange moruha o Yesus kagena wogogeku, de o Iblis iwibaja la ma ngale o dorouku wisitura. O orasi magena ma deka o putu moruha de o wange moruha wooḋowa de woudowa, so ḋabolo Una wisapika.
3So kagena de o Iblis iwibaja de itemo Unaka, <<Ngona gena igogou o Gikimoi Awi Ngopa. So hika o bi teto manena nasulo la imadadi o roti la aku naoḋo.>>
4Duma Una wosango wotemo, <<Kanaga o Gikimoi Awi Jaji ma Bukuka isilefoka, <Nako o bi nyawa gena upa ka cawali o ino so ioho.> >> 5Kagena de o Iblis iwingaho kali o riho moi ikukuru-kuruye, so ma ḋokuka de imatodoka wisikelelo o dunia ma bi bangsa ḋangodu Unaka, 6de itemo, <<O kuasa ma ngale o bi bangsa de manga kaya manena ḋangodu ngohi tapareta, de magena asa tonihike Ngonaka, sababu ngohi aku tahike nagoonaka o kia bato todudupa. 7So o orasi manena bato ngohi asa ḋangodu magena tonihike Ngonaka, hitilahi nobukuku de nosuba ngohika.>> 8Magena de o Yesus wotemo, <<Kanaga o Bukuka isilefoka, <Bilasu nowisuba nanga Jou Gikimoika de cawali ka Una nowileleani.> >> 9Ḋabolo de o Iblis o Yesus iwingaholi o Yerusalemka, de iwihado kadaku o Gikimoi Awi Tahu ma ponaka, de itemo Unaka, <<Igogou! Ngona o Gikimoi ma Ngopa. Hika kanena de kudahu nomatura. 10Ngona nidoohawa, sababu o Gikimoi Awi Jaji ma Bukuka isilefoka,
<Ma ngale Ngona gena
Una asa Awi malaikat wapareta,
la ona inijaga Ngona isidodiahi,
11so ona magena asa inigubare,
ma ngale Ani ḋohu lo o tetoku upa yadahe.> >>
12So o Yesus wosango wotemo, <<Kanagasi o Bukuka isilefoli komanena, <Ani Jou Gikimoi gena upa nowidahake.> >>
13O Iblis magena de o baja ḋangodu magena o Yesus iwibaja ḋabolo, de gila-gila woloḋa de wotamaha done o orasi ḋaloloha moili.
O Yesus Awi manara
wosolano o Galileaka
(Matius 4:12-17, Markus 1:14-15)
14Ḋabolo de o Yesus de o Gurumi Ḋatetebi magena ma kuasa wipareta so woliho wahika o Galilea ma tonaka. O Galilea ma sigilolino o habari ma ngale Una gena o bi nyawa yogiise de yanako. 15Una wahika manga puji ma bi tahuka wodoto, de o nyawa yangodu iwigiliri Unaka.
O Nazaretka iholu o Yesus wipiricaya
(Matius 13:53-58, Markus 6:1-6)
16O Yesus wotagi to Una Awi soa de Awi doku o Nazaretka. Kagena de, maro ma biasa to Una Awi manara ma rabaka, so o Sabat ma wangeka Una wotagi wowosa o puji ma tahuka. Kagena de Una womaokoye la o Gikimoi Awi Jaji ma Buku wabaca, 17de iwihike ma nabi Yesaya awi buku. O buku magena waḋehe de wapelenga sidago wamake o demo manena,
18<<O Jou Gikimoi Awi Gurumi kanaga Ngohika,
sababu Una Ngohi woisitatapu
la Ngohi o habari ḋaloloha tosihabari
o bi nyawa isususaka.
Una woisulo la
tasingangasu yatatagoka,
<Nogena ngini nipalakoka!>
Una woisulo la
tasingangasu ipipiloka,
<Orasi manena ḋabolo ngini nimasigeleloka!>
De Una woisulo la
yasidodipito gena tapalako.
19De Una woisulo la
tosihabari o habari ma loha,
gena ma orasi yaadoka
la o Jou Awi laha asa wosidumu Awi nyawaka.>>
20O Yesus wabaca ḋaboloka, de o buku magena walolo kali de wosigiliho woleleleanika, so womatamiye la wodoto. O bi nyawa o puji ma tahuka yangodu Una iwinano gena, yodupa Awi dodoto yoise. 21Kagena de Una wotemo onaka, <<O wange manenaka o Gikimoi Awi Jaji ma Buku ma gimina, kiaka tababacaka gena, kangano ma orasi nioise gena asa isiganapu.>>
22Ona isigigise gena yangodu yohairani, de yotemo, <<Igogou, Awi demo gena foloi itiai de ḋaloha bai! Duma Una gena ka o Yusuf awi ngopa.>>
23Magena de Una wotemo onaka, <<Igogou, done asa ngini ma binuka nisitemo o ade-ade manena Ngohika, <He, dokter! Hika Ani rohe masirete gena nosiloha kasi. Nakoso igogou Ngona o nabi moi, de Ngona lo kanena Ani doku masireteka naaka o nonako ihahairani, kiaka miiiseka naaka ḋaboloka o Kapernaumka.> 24Duma ngini gena tinisingangasuli igogou, nakoso o nabi moi kanaga to una awi doku masireteka wogoge gena asa iwihoromatiwa. 25Igogou, o kia naga asa idadadi o orasi manena, gena imatero de o kia naga idadadika ma orasi iḋoḋoma ma nabi Eliaka. O orasi magenaka, de idadi imuurawa ma deka o taungu saange de o ngoosa butanga, sidago o bare imasidiado o bi doku ḋangoduka so o ino ihiwa. O orasi magena o Israel ma tonaka kanaga ibabalo yadala manga oho isusa. 26Duma o Jou o Elia wisulowa la una ibabalo gena moi lo waali wariwo, ka cawali wisulo la wotagi mobabalo moi o Sarfat ma dokuka, ma ngale womiriwo muna o Sidonka ma nyawa, gena o Israelka ma nyawa misowo. 27Komagena lo ma orasi o Elisa iḋoḋomaka, kanaga yapapado yadala o Israel ma tonaka. Duma yapapado gena moi lo o Elisa wasilohawa, ka cawali o Naaman, una o Siriaka ma nyawa.>>
28O Yesus Awi demo magena yoiseka, de yangodu o puji ma tahu ma rabaka gena asa foloi yongamo. 29So ona imaoko de Una manga dokuno iwisisupu, de manga doku gena o tala ma ḋokuka, so iwingaho ma dirasuka. Manga edekati la o dirasuku wisipaka la wosone. 30Duma Una womabulutu ka wotagi, de yadadala gena manga sidongirabaka watola so womajoboka.
O Yesus o nyawa moi awi toka wodusu
(Markus 1:21-28)
31Ḋabolo de o Yesus wokahika o Kapernaum ma dokuka o Galilea ma tonaka. Kagena womasidiado gena o Sabat ma wangeka Una o puji ma tahuka wodoto. 32O nyawa yosigogigise Awi dodoto magena yangodu yohairani, sababu Una wodoto de wikuasaka. 33Ma orasi magena o puji ma tahu ma rabaka o nyawa wikokitoka moi de una womatoore wotemo o Yesuska, 34<<He, Yesus! Ngona o Nazaretno Ani edekati o kia dede ngomi. Ngona nahino la nomimorutu ngomi? Ngohi toninakoka, Ngona gena o Sosulo Nitetebi moi o Gikimoino.>>
35Kagena de o Yesus wodogore o toka magenaka wotemo, <<Nomapopongo de nosupu o nyawa una manenano!>> Kagena de o toka magena ḋatoosa so o nyawa magena iwisipaka yadadala manga sidongirabaku, de o nyawa una magenano isupu duma iwidoohawa.
36O bi nyawa yangodu yohairani poli, sidago ona itemo moi de moika, <<Wobarani bolo! Una Awi kuasa so aku wapareta o bi toka isupu, de igogou isupuka.>> 37Magena de o habari ma ngale Una yogiise sidago o bi doku magena ma sigilolika.
O Yesus o Simon Petrus ma toroa de yadala lo wasiloha
(Matius 8:14-17, Markus 1:29-34)
38Ḋabolo de o Yesus wosupu o puji ma tahuno, de wotagi o Simon awi tahuka. Kagena o Simon ma toroa womimake, muna magena misiri ḋatubuso de o sosahu mitubu. So o Yesus iwigolo la tanu womiriwo munaka. 39Kagena de Una wahika womaoko ami dangi ma dateka, de wotemo, <<Siri, nomahoi!>> Gila-gila miputuruka, so muna aku ona maleleani.
40O wange he itumuka, de o nyawa yadala kiaka yabisisiri de o panyake ma bio idala gena yatotota Unaka, de Awi gia wasipaḋa ona moi-moiku de asa yalohaka. 41De yakokitoka yadala manga toka wodusu so imahoika. De manga toka wodudusu gena imatoore itemo, <<We! Ngona manena o Gikimoi ma Ngopa!>> Duma Una wasimaha kawa manga toka ibicara, sababu o toka lo iwinako Una magena o Salamati ma Kolano.
O Yesus wodoto o doku wageto
(Markus 1:35-39)
42Ilangi-langi ḋaginitano, de o Yesus o doku magenaka de wosupu so wahika o riho moi imatitingano. O nyawa yadala iwisari sidago Una iwimakeka. Ona iwigolo la Una upa ona wadongosa. 43Duma Una wosango wotemo, <<Ngohi lo bilasu togila-gila totagi kadoke o doku ma somoaka, de o habari ḋaloloha tosihabari ma ngale o Gikimoi asa wopareta maro o kolano moi. Sababu ma ngale magegena so Ngohi isulo la tahino o dunia manena ma ḋokuka.>>
44Kagena de Una wotagi so o habari ḋaloloha wosihabari o bi puji ma tahu ma rabaka o Yudea ma daera ma sigilolika.
Currently Selected:
Lukas 4: GBI
Highlight
Copy
Compare
Share
Want to have your highlights saved across all your devices? Sign up or sign in
2026 Indonesian Bible Society
