Lukas 23
23
O Yesus witota ma Gubernur Pilatuska
(Matius 27:1-2, 11-14, Markus 15:1-5, Yohanes 18:28-38)
1Ḋabolo de o Mahkamah Agama ona yangodu imaokoye, de o Yesus wingaho de witota ma Gubernur Pilatuska. 2Kagena imasidiadoka, de ona iwikalaki Unaka yotemo, <<O nyawa Una manena ngomi miwimake o kawasa wasigaro la o ngeko ḋasosowo yamote. Wotemo upa o balastengi pofangu ma Kolano Wilalamo ma Kaisarka, de lo wotemo Una masirete gena ma Kristus, ena gena o kolano moi.>>
3So o Pilatus wisano Unaka, <<So igogou Ngona manena o Yahudika manga kolano?>>
De Una wotemo, <<Iteroka, maro o kia ngona notetemoka.>>
4So kagena de o Pilatus o imamka ma bi sahe de lo o bi nyawa yadadala magenaka wotemo, <<O nyawa manena Awi sala ka moi lo tamakewa la bilasu wifanggali de o sangisara.>>
5Duma ona ifoloi wigegegoli yotemo, <<De Awi dodoto Una o kawasa wasigaro o Yahudika ma nyawa manga tona ma sigilolika. Ma nonomaka Una kanaga o Galileaka, duma o orasi manena Una wahino kanena.>>
6Magena o Pilatus woise, de una wosano, <<O nyawa Una manena o Galilea ma nyawa?>>
7Ona itemo, <<Iya, Una magena o Galilea ma nyawa.>> O Pilatus woise komagena, de una awi nyawa wasulo la o Yesus wingaho de witota ma Kolano Herodeska, sababu o Herodes una magena o Galilea ma tona wapopareta, de lo o orasi magena una lo kanaga o Yerusalemka.
O Yesus ma Kolano Herodes
awi simaka
8O Herodes una magena wosanangi o Yesus wikelelo, sababu ma dekaka ma ngale o Yesus gena una woise de lo wodupa wimake. Una wongongano o Yesus o nonako ihahairani waaka la magena aku wakelelo. 9Komagena so o sano idala wisano o Yesuska, duma o Yesus ka o demo moi lo wosangowa. 10O imamka ma bi sahe de lo o bi guru agama kagenadahu lo yongamo manga demo ḋatubuso ona iwikalaki Una. 11Ḋabolo de o Herodes de awi prajurit-prajurit wikalekono de wisiihe o Yesuska. Ona o bi kolano manga juba iwisitibaku, ḋabolo de iwisitotali o Pilatuska. 12O wange magenaka idadi o Herodes de o Pilatus ona imatekelolohaka, ngaroko iḋoḋoma ona imakasaturu.
O Pilatus o Yesus wisidoa la wisosone
(Matius 27:15-26, Markus 15:6-15, Yohanes 18:39-19:16)
13Kagena de o Pilatus watolomu o imamka ma bi sahe de o Yahudika ma roriri de lo ma kawasa, 14so wotemo onaka, <<Ngini o nyawa Una manena niwingaho ngohika, de nitemo Una o kawasa wasigaro la o ngeko ḋasosowo yamote. O orasi manena to ngini nia simaka ngohi Una towitailako, duma ngohi gena Awi sala moi lo tamakewa maro kia ngini niwikokalakika. 15Komagena lo o Herodes awi gamake, sababu magegena o Yesus gena wisidingo kali ngomino. Igogou, o nyawa Una manena o kia naga moi lo waakawa de ma ngale wisisala sidago bilasu witooma. 16So ngohi asa tosulo la Una ka wingangapo, ḋabolo de bilasu Una towipalako.>>
(( 17Sababu o Paskah ma Rarame imasidiado so bilasu o nyawa moi wipalako o bui ma tahuno, so o Pilatus wotemo asa o Yesus wipalako gena komagena.))
18Duma awi demo komagena yoise de yadadala ona magena imatoore, <<Una nowitooma! O Barabas nowipalako de nomihike ngomika!>> 19O Barabas una magena o bui ma rabaka wisingosaka, sababu iḋomaka o kotaka o nyawa icanga o Roma ma bobaretaka de ma orasi magena una kanaga manga sidongirabaka de lo una wototooma moi. 20So o Pilatus wodupa o Yesus wipalako so wasano kali yadadala ona magenaka. 21Duma ona imatoore itemo, <<Powisidasangahadi! Powisidasangahadi!>>
22Duma ma saangeka una wotemo onaka, <<Asitagala! Awi dorou o kia. Nakoso maro ngohi to Una Awi sala moi lo tamakewa de ma ngale wisisala sidago bilasu witooma. So ngohi asa tosulo la Una ka wingangapo, ḋabolo de bilasu Una towipalako.>>
23Duma ona ifoloi wigegego bilasu o Yesus iwisidasangahadi, sidago ma duuruka de ma ngale imatotoore so ma sopo magena ona aku yamake. 24So manga sininga magena una wosimote o Yesus iwisidasangahadi. 25De lo o Barabas ona wigogolo gena wisisupu de wihike onaka, una magena o bui ma rabaka sababu iḋomaka wocanga o Roma ma bobaretaka de lo wototooma moi. De o Yesus ka wisidoa o bi prajuritka la iwisidasangahadi, yamote to Yahudi ma nyawa manga dupa.
O Yesus wisidasangahadi
(Matius 27:32-44, Markus 15:21-32, Yohanes 19:17-27)
26Kagena de o Yesus gena o bi prajurit iwingoso so itagi iwingahoka, so yahika o ngeko ma soaka, de o Kirene ma nyawa moi, awi ronga o Simon wimake. O nyawa una magena asa o soano wokahino de wokahika o kotaka, de wigegego o Yesus Awi sangahadi wamoku de o Yesus Awi duduno wototuuru. 27Kanaga manga duduno o bi nyawa yadadala gena itotuuru, de komagena lo manga sidongirabaka o bi ngopeḋeka yamuruo naga. O ngopeḋeka ona magena iari de lo idodora ma ngale Una. 28Kagena de Una womakiliho de watemo onaka, <<Awa-awa o Yerusalemno, kodo! Upa Ngohi nisigari. Lebelaha nigari nia rohe masirete de lo nia ngopa-ngopa. 29Sababu done asa ma orasi yaado de o nyawa itemo, <Igogou, o bi ngopeḋeka la kanaga ma moi waasi yatilibu, so ma moi waasi ipuo, de lo onaka ma moi waasi o ngopa isusu, ona magena asa yosanangi bai!> 30O orasi magenaka o nyawa asa o tala de o tetoka igolo de itemo, <Hika nitura la nimitalake ngomiku!> 31So o orasi manena ngaroko Ai sala moi lo ihiwa de ona iaka komanena Ngohika, duma done asa iniaka nginika foloisi ḋatubuso bai!>>
32Ma orasi o Yesus wingaho la wisidasangahadi, de kanagali o nyawa yasinoto ma somoa yangaho la yatooma ka ma moi dede Una. Ona yasinoto gena o nyawa ma dorou. 33Itekawa, de ona imasidiado o riho moi ma ronga o Sahe ma Papala ma Riho, so kagena de gila-gila ona wisidasangahadi. De o orasi magena kanagali o nyawa ma dorou yasinoto gena yasidasangahadi ka o wange moi, so moi Una Awi girinaka de moili Awi gubalika. 34De Una wosumbayang wotemo, <<Baba, tanu ona nasiapongu! O kia ona yaaaka gena ona yanakowa.>>
O bi prajurit o Yesus wisidodasangahadika, ona magena Awi baju imatekesikotoku yaaka moi-moi de manga gimina yamote o undi ma rabaka. 35O bi nyawa yadadala yahino imaokono kagena de yotomina. Komagena lo o Yahudika manga roriri wisimaḋe, de yotemo, <<Cedeke! O nyawa ma somoa wasisalamati, hika o orasi manena Una Awi rohe masirete de wosisalamati, nakoso igogou Una o Salamati ma Kolano o Gikimoi wihihirika.>> 36O bi prajurit lo Una wisimaḋe. Ona iwidateka de iwihike Unaka o anggur ḋakokiopi, 37de yotemo, <<Nakoso igogou Ngona o Yahudika manga Kolano, hika Ani rohe masirete so nosisalamati!>>
38Awi sangahadika Awi sahe ma ḋokuye yalefo ma demo itemo: UNA MANENA O YAHUDIKA MANGA KOLANO.
39De o nyawa ma dorou moi wisisasangahadi kagena womasimote Una wisibicara ḋatorou, de wotemo, <<Cedeke! Ka igogou Ngona o Salamati ma Kolano? Nako komagena, hika Ani rohe masirete nosisalamati de komagena lo ngomi!>>
40Duma o nyawa ma dorou moili una magena awi dodiao gena wisidapano, wotemo unaka, <<Awadede! Bilasu ngona nowimodo o Gikimoika. Ngona lo nisisala so nitooma maro Una. 41O sangisara ngone inasinoto gena, igogou kanaga inadahe de to ngone nanga manara. Duma Una gena Awi sala lo ihiwa.>> 42Ḋabolo de una wotemo, <<Yesus, tanu noisininga ngohi, ma orasi Ngona nokolano!>>
43So o Yesus wotemo unaka, <<Ngonaka igogou tonisingangasu, o wange manena ḋabolo ngona dede Ngohi o Firdaus ma rabaka.>>
O Yesus wosone
(Matius 27:45-56, Markus 15:33-41, Yohanes 19:28-30)
44La o wange itotiai, de o doku ma sigilolino magegena ḋapuputuka ma deka o orasi saange, 45sababu o wange lo idadi ḋapuputuka. Ato imatodoka o baro isifafati o Gikimoi Awi Tahu ma rabaka gena iraca de ileta sinotoka. 46Ḋabolo de o Yesus womatoore de wotemo, <<Baba! Ai gurumi tosisaraha Ani gia ma sohaka!>> Wotemo komagena, de wosoneka.
47O prajurit-prajurit manga kapita moi o kia naga idadadi magena wakelelo, de una o Gikimoi wigiliri, de wotemo, <<We! O nyawa Una manena igogou Awi sala ihiwa!>>
48Ona yahino yototomina gena o kia naga idadadi magena yakelelo, de ona yangodu asa yoliho de manga mamata masireteka yangangapo, ma ngale manga sininga foloi ipeleso. 49Nako o nyawa Una winanako de lo o bi ngopeḋeka ma orasi Una o Galilea ma dokuka so wimomote de wiriwoka, ona yangodu kagenadahu lo o kia naga idadadi magena ḋangodu yakelelo, gena ma soa sutu ikuruka.
O Yesus wipoosu
(Matius 27:57-61, Markus 15:42-47, Yohanes 19:38-42)
50-51Kanaga o nyawa moi awi ronga o Yusuf o Arimatea ma dokuno o Yudea ma daeraka. Una magena o nyawa ma loha moi de lo wododamaha o Gikimoi Awi orasi wopareta maro o kolano moi. Ngaroko una lo o Mahkamah Agama ma nyawa moi, duma una wosimotewa manga edekati de manga manara magena ma ngale o Yesus bilasu witooma. 52O Yusuf una magena wahika o Pilatuska, de wagolo o Yesus Awi sone ma bake. 53So una o sone ma bake magena waḋeheka la de o baro ḋaaare wosisangika, ḋabolo de wapoosu o boosu moika, kiaka ḋamomuanesi yaaka o teto ma rabaka de o sone ma bake moi lo waasi yapoosu.
54Orasi magena he ḋamaḋa-maḋa, so ilangi o Sabat ma wange ma solanoka, so asa isimaha kawa o manara yaaka duma bilasu o nyawa imawoma. 55Komagena so o bi ngopeḋeka, o Yesus o Galileano wimomote, ona magena o Yusuf wisiduuru yahika o boosuka, de kagena ma rabaka yananano idodooha o Yesus wipoosu. 56Ḋabolo ona imajobo so yoliho o dokuka, de o bi rapa yosidailako ma ngale o Yesus Awi sone ma bake isimuja. Ḋaboloka, de o Sabat ma wange yaadoka, so ona manga manara imawoma, yamote o bobita o Musa wosilelefoka.
Currently Selected:
Lukas 23: GBI
Highlight
Copy
Compare
Share
Want to have your highlights saved across all your devices? Sign up or sign in
2026 Indonesian Bible Society
