'O Roma
'O Paulus 'awi Surati 'o Roma ma Jamatika ma Dumutu
'O Paulus 'awi surati wolefo 'o Romaka ma jamatika, ma dumutu la yomadudu-duanga ma ngale dua waika 'onaka. Moteke 'o Paulus 'awi mau, 'una womanaramosi 'o 'orasi moi 'o Sarani ma nyawaka ge'enaka doka, deika de to 'ona manga ro-riwo, 'una womau wotagi 'o Spanyolika. 'O Paulus wolefo 'o surati ne'ena ma ngale wosiwaiti 'o Saranioka ma 'agama de to 'ena ma mau-mau 'igapa-gapangi ma ngale 'o Saranioka ma nyawa nanga 'ahu.
Gedagee 'awi tabea wositotaroka 'o nyawa-nyawaka 'o Romaka ma jamatioka, de wosidemo 'onaka ma ngale wakisilahidoa. 'O Paulus wositotara 'awi surati ne'ena ma titi: <<De 'o Habari ma Owa ge'ena, ma Jo'oungu ma Dutu wosidumutu kokia ma ngekomo 'o nyawa de de 'una pomakasanangioli; ma ngekomo ge'ena la pongaku ka ma gurueka sigado ma do-dogumika.>> (1:17).
Ge'ena 'iduanga de 'o Paulus wosiwaiti 'awi surati ma titi ge'ena. 'O nyawa 'iodumu 'o Yahudioka bolo ko 'o Yahudiokawa, salingou yosidiai manga rimoi de ma Jo'oungu ma Dutu, sababu 'iodumu naga 'o sowono ma paretaka. 'O nyawa manga rimoi de ma Jo'oungu ma Dutu 'idadi 'isureli, nako yongaku ma Yesus Kristusika. Ge'enaka de 'o Paulus wosiwaiti 'o 'ahu ma sungi gee 'o nyawa yamao nako yomarimoi de ma Yesus Kristus. 'O 'ahu ma sungi ge'ena 'ifero sababu nanga rimoi ma sungi de ma Jo'oungu ma Dutu. 'O nyawa gee yongakuokau 'o Yesusika, yo'ahu 'isa-sanangi de ma Jo'oungu ma Dutu. De 'o Ngomasa 'Itebi-tebini yakisipidili 'o sowono de 'o songene ma paretaka. Ma go-goraka 5-8 ma dodaka 'o Paulus wosiwaiti mita ma Jo'oungu ma Dutu 'awi besesongo de 'o Ngomasa 'Itebi-tebini ma kuasa 'o nyawa yongaku-ngaku manga 'ahu ma sigoronaka. Ge'enaka de 'o Paulus wosiwaiti 'ato 'o Yahudioka de ko 'o Yahudiokawa mita ma Jo'oungu ma Dutu 'awi rencana ma sigoronaka ma ngale 'awi 'umati. 'O Paulus watipokono 'ato 'o Yahudioka 'o Yesus wioluku ge'ena mita naga ma Jo'oungu ma Dutu 'awi rencana ma sigoronakau ma ngale 'o nyawa wakiriwo ma titi 'awi dora, ma ngekomo ma Yesus Kristus. 'O Paulus wanako 'ato 'o Yahudioka dua koisi'ado-'adonikawa wiitomo 'o Yesus. Ma duanguku 'o Paulus wolefo ma ngale kokia salingou 'o nyawa yo'ahu ma ngale 'o Saranioka, ma lamo-lamo ge'ena gee kokia ma ngekomo yosidumutu manga dora 'o nyawa 'ireguka. Ge'enau so 'o Paulus wairiki ma titi koneda: 'O leleani ma Jo'oungu ma Dutuka, 'okia naga gee salingou 'o Saranioka yadiai 'o negaraka de mita yomasisa-saranika, de 'okia sonaa 'i'ini-'inioka ma ngale 'o nyawa manga singina ma dodaka. 'O Paulus wositogumu 'awi surati ne'ena de 'awi besesongo de 'o siarene ma Jo'oungu ma Dutuika.
Currently Selected:
'O Roma : TBY
Highlight
Share
Compare
Copy
Want to have your highlights saved across all your devices? Sign up or sign in
2026 Indonesian Bible Society