'O Yohanes 'O Habari ma Owa gee 'o Yohanes Wositota-totara ma Dumutu
'O Habari ma Owa gee 'o Yohanes Wositota-totara ma Dumutu
Moteke 'o nyawa yongaku-ngaku ma sirasi, yongose 'ato 'o buku ne'ena 'o Yohanes wolefo. 'Una ge'ena 'o Zebedeus 'awi ngowaka gee yomagiamanai ma sala de 'o Yesus. De 'o Yohanes 'una ge'ena 'o Yesus 'awi do-domoteke gee yamogiooko de modidioka wimoi. 'Unau mita wamake-make 'okia sonaa moi-moi 'o Yesus wadi-diai, 'isoka kokia naga gee walefo-lefoku ma bukuoka ne'ena. Moteke 'o nyawa yoba-barija, 'o Habari ma Owa ma buku gee ma du-du'uruokau 'isupu ge'ena la gee 'o Yohanes wositota-totara. 'O Yohanes wolefo ma buku ne'ena poilia ma taunu 85-95 'o Yesus wosupuoka 'o duniano. De ma buku ne'ena 'o Yohanes wolefo 'o Efesus ma kotaka.
'O Habari ma Owa gee 'o Yohanes wositota-totara ma dodaka ne'ena, 'isidemo 'ato 'o Yesus 'una ge'ena ma Jo'oungu ma Dutu 'awi demo 'ika-kakali gee 'imadadiokau 'o nyawa de womanoa naga ngoneka. 'Isoka 'isidemokau ma buku ne'ena ma dodaka, 'o Habari ma Owa 'ilefoku ma dumutu la 'o nyawa 'idadi yongaku 'ato 'o Yesusou ge'ena ma Koana 'o Nyawa Wosilaha-laha gee ma Jo'oungu ma Dutu wosijajiokau, 'una ge'ena ma Jo'oungu ma Dutu ma sirete 'awi Ngowaka. De mita ma ngale yongaku 'unaka, 'ona yamake 'o 'ahu (Yoh. 3:16; Yoh. 20:31).
Gedagee ma buku ne'ena ma gurueka 'isidemoka 'ato ma Jo'oungu ma Dutu 'awi demo 'ika-kakali ge'ena la 'o Yesus, ma buku ne'ena ma bula ma di-disiraka 'isijarita 'o no-nako 'ihera-herangi 'i'ini-'inioka gee 'o Yesus wodi-diai. 'O no-nako 'ihera-herangi ge'ena 'isidumutu 'ato 'o Yesus ge'ena ma Koana 'o Nyawa Wosilaha-laha gee ma Jo'oungu ma Dutu wosijajiokau, 'una ge'ena ma Jo'oungu ma Dutu 'awi Ngowaka. 'O jarita ma ngale 'o no-nako 'ihera-herangi moi-moi ge'ena 'isimoteke de 'o jarita ma ngale ma Jou Yesus de 'o nyawa manga gudai yomabi-bicara. Manga bicaraka dau ge'ena 'iwaitokau 'okia naga gee 'isisupuokau 'o no-nako 'ihera-herangi ge'ena. Ma bula ne'ena ma dodaka 'isidemo 'ato naga 'o nyawa gee yongaku-ngaku 'o Yesusika de yodadi 'awi do-domoteke, ma naga mita wiitomo de yooluku wingaku.
Ma go-goraka 13-17 'o gudai 'isilefoku kokia ma 'ofi 'o Yesus de 'awi do-domoteke yomagiamanai ma 'orasi 'o Yesus dua witagokou ma obiruku, de kokia 'una wakisi'aturu de manga singina wosikuata ma obiri ge'ena.
Ma go-goraka ma du-du'uruokau 'isidemo ma ngale kokia 'o Yesus witagoko de wi'urusu, kokia 'una wisidele 'o salipoka, wosongene de womomikoli, de kokia 'una womasidumutu 'awi do-domoteika gedagee wowangodeli.
Ma buku ne'ena ma dodaka 'o Yohanes wosilamo-lamo 'o co-catu, ge'ena la 'o 'ahu ma dutu 'ika-kakali gee ma Jo'oungu ma Dutu wokula ma ngekomo ma Yesus Kristus. 'Unau ge'ena 'o ngekomo ma Jo'oungu ma Dutuka, 'unau ge'ena wosidumu-dumutu ma Jo'oungu ma Dutu 'una kokia, de 'unau 'o 'ahu wokula-kula. 'O Yohanes gee wodotoko 'okia sonaa 'iti-tiai, 'una woduaka wosi'ade-'ade de 'okia sonaa 'idadi-dadi 'o wange 'isinoi-noimi, kogee 'o 'akere, 'o roti, 'o darangi, 'o domba woso-sowohi de 'awi domba, 'o 'anggur ma roese de ma sowoko.
Currently Selected:
'O Yohanes 'O Habari ma Owa gee 'o Yohanes Wositota-totara ma Dumutu: TBY
Highlight
Copy
Compare
Share
Want to have your highlights saved across all your devices? Sign up or sign in
2026 Indonesian Bible Society