Matius 8
8
Yesusé nfafié kyat isó ta npado njé
(Mrk. 1:40-45; Luk. 5:12-16)
1Yesusé nduén yama métété njé ni, se kyaté né tadélé rfélé ta rdéréré I né. 2Po waktu ta néi, reni kyat isó njé npado se nwómo Yesusé. Pocé, ntiki buku nóp Yesus usno lo né bóngo ncuba I, se néceg faje, “Moke, iga wlemé, Awé bisa mfafié ya.”
3Pocé tabóngo Yesusé nétané kyat ta npado njé ni fao né se nécegé i faje, “Ya wlegé bo mfié. Se nte mfié awé ro!” Tabóngo po waktu ta néi óro, kyat ta npado njé nfié i.
4Rewóré ta néi, Yesusé nécegé i faje, “Mfatélolmo é, ndél pa bo méfétén po kyat pai le, ta Ya re kfafié awé nte. Mayta mfan néli po imamé njé ni, bo némnaw ta awé re mfié né, bóngo mpo nim sadaka haiwan faisó bo imamé njé ntapén i tadolo tatubé lima se nabi Musa nané mewé fpe né. Mpe fajé bo kyaté-kyaté né rémnaw re runé ta fatuw-fatuwé awé re mfié.”
Tentara né riri kapala njé ndélé Jou Yesus fié
(Luk. 7:1-10)
5Po waktu ta Yesusé nwóm po pnuw Kapernaumé né, pocé tentara Roma né kompi esó riri kapala njé nwóm po Yesus ni. Se néror po I ni se néceg faje, 6“Moke, po nik umé lo né nik yomya yabé isó npisé, sogado ni badané né re nmóté se bisa nfaméyawén i pa na, se tadélé nkangelangé.”
7Bóngo Yesusé nécegé i faje, “Iya, pana fajé Ya bo kfan néli po nim umé lo bo kfafié i.”
8Mayta tentara né riri kapala njé nécegé I faje, “Alli, Moke ta Awé, ma mwóm po nik umé lo le na, sababta ya nte pantas pa bo ktarima Awé né. Mayta masike méceg be méitén faesó pote ma nase nfié i nik yomya yabé ta npisé njé. 9Sababta ya kuné, Awé re nim kawasa ta bisa mfafié kyaté, se mécegé le nase nfié i, necé tadolo amé ma kécegé le mam tentara nesté rdéréré ndimé. Sababta ya renik kapala ta nané ya, bóngo renik yomya ta nlongé ya nóté. Se iga kparenta i, ‘Mfané!’, nase nfané. Iga kparenta ta iglé né, ‘Fwómé!’, nase rwómé. Re iga kparenta ta iglé nóté, ‘Fpe nte!’ Si nase rpe nóté sói ta ya kparenta si né.”
10Pocé Yesusé nlongé ta néceg fajé né, tadélé mgo wlo, se nécegé kyat ta rdéréré I né faje, “Flongé fafié ta Ya kécego mewé nte. Po farimé kyat Israelé né kduké kyat isó pafule ta ndélé Jou Lahatala fié ta dolo kyat ta i lima bangsa Roma nje né! 11Se fatélolmo mew fafié, nase reni kyat félé ta kyat Yahudi si pa po géwgów pua le po dunia nje ni wlólo nte, lima ngancóo sogado po ngancepo né, bo rdadi Jou Lahatala ni kyat si, se bo rtoléné rémnóm re Abrahamé, Ishaké re Yakob po géwgów ta Jou Lahatala nkawasa dolo Kolano po ni kyaté-kyat ta rdélé I né. 12Mayta masike bangsa Yahudi ta Jou Lahatala re npili si ntubé bo rdadi I ni kyaté-kyat si né, reni kyat félé pa ta si ntéli né. Se Jou Lahatala nase nwóté keé si po dérorémé wlólo. Pocé, nase réntangés re tadélé rkangelangé#8:12 Tentara né riri kapala njé kyat Roma i, kyat Yahudi i pa, ta mulo Yesusé ntélél ta i ndélé Jou né tadélé fié..”
13Rewóré ta néi, Yesusé nécegé tentara né riri kapala njé faje, “Wóré, nte méléyé ro moke! Sababta awé re mdélé masike Ya kméitén be pote ma, nim yomya yabé njé nase nfié. Se nte re nfié i, sababta awé re mdélé Ya.” Po waktu ta néi óro, tentara né riri kapala njé ni yomya yabé ta npisé njé re nfié i.
Yesusé nfafié Simoné ni kmo re kyat iglé nóté
(Mrk. 1:29-34; Luk. 4:38-41)
14Rewóré ta néi, Yesusé nfan po Petrusé ni umé lo. Se ncung néminé ga némnaw Petrusé ni kmo mépiné njé nénbóy i, sababta nlélété se. 15Pocé Yesusé nétané pégelé njé ni fao né, se nfié i. Tabóngo pégelé njé npangén néya se nfépelé wluné bo Yesusé némnómé.
16Po waktu ta rebo dorémé né, reni kyat ta rwómé rut kyaté-kyat ta setané ntolno si né po Yesus ni, tabóngo Yesusé nfaungé setan-setané né maduga néceg be méitén esó le ta rcópén si ndimé. I ma nfafié férimé kyat ta rpisé né. 17Férimé ta Yesusé npe né, necé re ndadi tadolo tatubé lima ta Jou Lahatala re néceg po kitab nabi Yesaya né, ni glio faje, “I ta nfafié keé ndimé ité rir péspisé sói le.#8:17 Nubuate njé rlefo po Yesaya 53:4. ”
Iga bo tdéréré Yesusé né, mare ta fatuw-fatuwé
(Luk. 9:51-62)
18Waktu Yesusé némnawé kyat ta félé né rfaljelé I, tabóngo nané ni motemote nesté rarué yelé né bo rlué si néli po talaga ni faspalé. 19Pocé reni guru agama isó ta nuné fié, Musa ni kitab abén limé njé nwóm po Yesus ni, se nécegé I faje, “Guru, ya nte bo kdéréré Awé. Masike Aw po géwgów pua le, nase keé Aw pa.”
20Bóngo Yesusé nécego i né npake adeade isó ni glio faje, “Iga yaw banga né re góori ta bo ryénéfé, fajé nóté re mané ta ranopé né, si ma re riri pup é. Mayta Ya nte kyat ta Ya I yama soroga lo né, renik géwgów ta bo kyénéf pa.”
21Pocé reni kyat nésé isó nóté ta ndéréré Yesusé njé, nécegé Yesus faje, “Moke, mpo ya fié bo kputé nik moke su, rewóré ga kwóm lima bo kdéréré Awé.”
22Mayta Yesusé nécegé i faje, “Kyat ta rdélé Ya pa né kfatailo si dolo kyat t re rmóté né. Se fajé bo si óro ta rpe riri kuburé né, mayta awé lima bo mdéréré Ya ro.”
Yesusé nfatébén moré re mawruwé
(Mrk. 4:35-41; Luk. 8:22-25)
23Rewóré ta néi, Yesusé rcapél I po yelé lo, pocé bóngo ni motemote nesté ma rdéréré I se rcobél si. 24Po waktu ta si po talaga lo né, télél be rato njé ntebé se mawruwé njé nawét sogado wóe ncung po riri yelé njé ni. Mayta po waktu ta néi, Yesusé nyénéf I. 25Se ni motemote nesté réi I, bóngo récegé I faje, “Alli, Jou! Mgali amé. Ité nte bo tmóté ya!”
26Pocé tabóngo nécegé si faje, “Ee, fpe sói se fémtaté? Mewé nte fdélé Jou né maduga cuci le.” Bóngo nosél néya se nécegé moré re mawruwé né re gli ta pélóyé, “Ftébén óro!” Bóngo po waktu ta néi óro, moré re mawruwé né ntebéné, se talaga njé ma tadélé nmaklóngéné.
27Pocé ni motemote nesté rémnawé né rherané, bóngo rfalécego, “Nfatébén moré re méwruwé né tabóngo rtébéné, rdéréré ni parenta né se. Kyat ta njé pai, sogado moré re méwruw ma rtébéné?”
Yesusé nfafié kyat séluw ta setané ntolno si nesté po bótén Gadara
(Mrk. 5:1-20; Luk. 8:26-39)
28Pocé Yesusé I re ni motemote nesté re rwóm po talaga njé ni féspalé, po kyat Gadara né riri bóténé lo. Pocé reni món séluwé né, setané ntolno si. Se kyaté né rémtaté keé si, se randé pocé pa. Pocé télél be si dórén luwé né rcópén lima kubur lóyé lo né, bo rfan po Yesus ni. 29Bóngo setan ta rtolno si nesté rméiténé né rfakuat si, se réceg faje, “Ado, Jou Lahatala ni ntu ta Awé, mwóm lima nte bo mpe am fawa? Dunia njé nkiamat pafule, ga bo mfasusa keé amé ro né?#8:29 Setan-setané né rémnaw Yesusé né, re runé ro ta I Jou Lahatala Ntu I. Si ma runé ta nase dunia nje nkiamaté, Jou bo nwóté keé si po luténé wlólo (Why. 20:10). Se rémnaw Yesusé nwómé né, rémtaté, récogoma ta né ro bo npo róri sélsólé né.”
30Po li fajé, reni bowé né tadélé rfélé raréyówé róri mnómé. 31Pocé setané nesté réror po Yesus ni, “Iga bo mfaungé amé, ta fié mané amé ksung po bowé nesté ni.”
32Bóngo Yesusé nécegé si faje, “Iya, ffan néli óro!” Tabóngo rcópéné se rfan néli ga rcung si po bowé nesté ni. Télél be bowé né nfasérero i néli po tériré lapo lo né, se férimé ryóg si nóp po talaga wlólo né bóngo rmót si pocé.
33Pocé kyat ta réjaga bowé né rémnaw ta néi, tabóngo rcéreré se rwóm po kota lo ga réféténé keé férimé ta rémnawé né. Bóngo réféténé nóté kyat séluw ta setané ntolno si se re rfié nesté. 34Se kyaté-kyat ta rtolén po kota njé ni né, rlongé ta réféténé né, bóngo rémtaté se rcópéné ga rfan po Yesus ni. Po waktu ta re rfapdipén re Yesusé né, réroré bo Yesusé nfatoléné keé riri bóténé njé ro.
Currently Selected:
Matius 8: PBS
Highlight
Share
Compare
Copy
Want to have your highlights saved across all your devices? Sign up or sign in
2026 Indonesia Bible Society
