Matius 27
27
Imam ta rpélóyé né rut Yesus néli po Gubernur Pilatus ni
(Mrk. 15:1; Luk. 23:1-2; Yoh. 18:28-32)
1Po waktu ta tamémóné i lesu né, férimé imam ta rpélóyé nesté si re kyat tut Yahudi né rfajólo si bóngo rfasogaro si re wlori be pusó bo rpuné keé Yesusé. 2Se pocé bóngo rpiténé keé Yesusé ga rut I néli bo rfatébono I re gubernur Pilatusé.#27:2 Kyat Yahudi né bo rfasólé kyaté, mare rut si po gubernur Roma ta nkawasa riri bóténé njé. Gubernur waktu ta né, Pilatusé.
Yudasé npuné ni diri
(Kis. 1:18-19)
3Yudas ta nwagé Yesusé njé némnaw ta bo rpuné keé Yesusé né, tabóngo nmanyasalé. Se nfan néli imam ta rpélóyé né re kyat tut Yahudi né ni, bo nfamul pipis guraci yófételé né. 4Néli, bóngo nécegé si faje, “Ya kwagé Yesus po mew ni né, tadélé re ksól pélóyé! Sababta I renó sélsól gélesó pa, ga ya kpo keé I po mew ni bo ffamóté keé I né.”
Mayta si ga rcónglo i faje, “O, amé re kuné pana. Necé awé!”
5Nlongé ta néi, tabóngo nfan néli ga ntéo keé pipisé né po Um Sambayang ta npélóyé ni wlólo. Rewóré ta néi, ga nfané nésóbéyé ni diri re wólé se nmót i.
6Imam ta rpélóyé né rpe néli se rfajólo pipis ta néi, bóngo réceg faje, “Pipis ta ntei, pipis léo, sababta nwagé kyaté se rfamóté keé i njé ni mulo. Iga po Hukum Tauraté né, npo fié pa bo pipis ta dolo fajé ga tfasung po Um Sambayangé ni sadéka góo lo né.” 7Pocé bóngo rfasogaro si, se pipis ta néi rgono keé kyat ta nénpe kulén bétbété njé nó bét esó. Rgon bétbét ta njéi, bo rfasadia kyat wémwómé né riri kubur góo i. 8Necé ta mulo ga bétbét ta njé i, rfangósno i, ‘Bétbét Léló.’ Ngósén ta néi, myangés pa sogado ngénngan pésénte. 9Rgon bétbét ta néi, bo sói ta tatubé lima Jou Lahatala re néceg po nabi Yeremia ni né, re ndadi i tadolo faje, “Si rtarima pipis guraci yófételé né, ni palóo ta néi óro ta kyat Israelé né re rfaréné né. 10Se rgono keé bétbét po kyat ta nénpe kulén ta lima bétbété lo né. Necé ta Jou re nané bo ya kpe né.”#27:10 Nubuate njé fwaca po Zak. 11:12, 13.
Rut Yesus po Gubernur Pilatus ni
(Mrk. 15:2-5; Luk. 23:1-5; Yoh. 18:28-37)
11Waktu ta néi, rut Yesus néli bo négbon po gubernur Pilatusé ni. Se gubernuré njé nutné Yesusé, “Fatuwé, ta Awé nte kyat Yahudi né riri Kolano Awé?”
Yesusé ncónglo i, “Tadolo awé re mécegé né.”
12Pocé imam ta rpélóyé né si re guru agama né rfébingo gubernuré njé, récegé cogo Yesusé npe sélsól félé, mayta Yesusé nfaténténgén I le. 13Pocé ga Pilatusé nutné Yesusé nóté, “Mlóngé pa, rfébingé Aw po ya ni ta féléo i né? Ga maduga mfaténténgén Awé né?”
14Mayta Yesusé ta délé ncóngél facuci le ma tisé, sogado gubernure njé nénuta, “Tabeu, rfalélé I ta féléo i né ga ncóngél pa né!”
Gubernur Pilatusé néyówé yéféné bo nfasópén Yesusé, mayta ndadi i pa
(Mrk. 15:6-15; Luk. 23:13-25; Yoh. 18:39–19:16)
15Étné be taongé, ga mgo po ngénngan Paska, gubernuré njé néncópné kyat ta si po bui wlólo né faisó, ndéréré kyat ta félé né wlori. 16Pocé po bui wlólo né, reni kyat léo isó ngósno Yesus Barabasé. 17Se waktu kyat ta félé né rfajólo si po gubernur Pilatusé ni kadatongé lo, bóngo gubernuré njé nutné si, “Ya bo ksópné kyat ta si po bui wlólo né faisó. Se pai ta mewé wlomi ncuka bo kfasópén i? Yesus Barabas pari, Yesus ta rkakmé I Kristusé njé?” 18Sogado gubernuré njé nutné si fajé né, i nuné kyat ta rkawasa po agama Yahudi né rtélengén Yesusé, ta mulo ga rpo keé I néli po i ni né.
19Waktu ta gubernuré njé ntolén po ni karapesa lo se bo npe keputusané né, télél be ni pégelé nfaftóté néli po i ni, “Ma mcapu na. Kyat ta njé renó sélsól gélesó pa. Sababta dorémé lo ya kbélisé sogado wlegé njé tadélé nkangelangé, se ta délé kémtaté.”
20Mayta, imam ta rpélóyé né re kyat tut Yahudi né re rfasungo kyat ta félé né méiténé, se réceg faje, “Féror po gubernuré njé ni bo nfasópén Barabasé, Yesusé ga rpuné keé I.”
21Se Gubernur Pilatusé nutné kyat ta félé né nóté, “Po si dórén luwé nte, pai ta ya bo kfasópén I?”
Bóngo kyat ta félé né rcónglo, “Msópné Barabas óro!”
22Tabóngo Pilatusé nutné si nóté, “Pana fajé, Yesus ta rkakmé I Kristusé njé bo kpe I fawa?”
Si rcónglo, “Msalibé keé I.”
23Pocé Pilatusé nutné si nmulé, “I ncól sói se?”
Mayta kyat ta félé né rgélayé rbóng ta rfakwat si, “Msalibé keé I!”
24Waktu ta néi, gubernuré njé ma nfakduko i pana. Sababta iga bo nfasópén Yesusé, nase kyaté né rgégliné. Se i néli néyó wóé, nut néli po kyat ta félé né usnor i lo, se néus fao né bóngo néceg faje, “Kyat ta njé I ga nmóté, ya kuné pa, necé mewé!”
25Bóngo férimé kyat ta pocé né rcónglo i, “Fajé óro! Iga nmóté, am re ntumamé né ta kduké ni hukumané né!”
26Bóngo Pilatusé ndéréré kyat ta félé né wlori, se ncópné keé Barabasé. Yesusé ga nané ni tentara né réswaké I re wólé ta wómo mdalémé né. Rewóré ta néi, ga npo keé Yesus néli bo rcalibé keé I.
Tentara-tentara né rfamia mia keé Yesusé
(Mrk. 15:16-20)
27Gubernuré njé ni tentara né rut Yesusé se rcungé I némin po Gubernure njé ni kadatongé wlólo, bóngo férimé si rfajól néli po Yesus ni. 28Pocé ga résólé keé Yesusé ni kabaya njé, ga réngalno I juba ungu isó ta dolo kolano né riri né. 29Bóngo ryóném wólé ta reni gémgaméné né, ga rpe dolo kolano né riri dailoké né, se rduo i nóp po Yesusé ni béboko lo né. Bóngo rfatano I tatón sosora wóm po fao wónéyé né bo rpe dolo kolano I, ga rtiki buku nóp usno lo né se rfamia-mia I bóngo réceg faje, “Tabea, Jou Kolano ksuba Awé, kyat Yahudi né riri Kolano ta Awé.” 30Pocé bóngo rfatitfo I, re ryó téton ta i po fao lo njé ga rfaspésé po béboko lo né. 31Rfamia-mia I rewóré, ga résólé keé ni juba njé se rduo I ni kabaya njé nmulé. Rewóré ta néi, ga rcópné I nóté, bo rut I néli po géwgów ta bo rcalib I lo né.
Rcalibé keé Yesusé
(Mrk. 15:21-32; Luk. 23:26-43; Yoh. 19:17-27)
32Waktu ta tentara-tentara né rut Yesusé se rcópén tóma kota Yerusalemé né, rfapdipén re kyat Kirene isó ngósno Simoné, bóngo rarosé i lima se rané i bo npó Yesusé ni salibé njé. 33Pocé rfané rwóm po géwgów ta ngósno Golgota, ta ni ngale né “gégegéy góo”, bo rcalib Yesus pocé. 34Pocé, tentara né rdo Yesus anggur ta rfangbóngo re urém diréncó, bo rpaku I né ma nbósém pisé na. Mayta taga néflép cuci, tabóngo wlo pana. 35Rewóré ta néi, bóngo rpaku I po salibé lo ga rfawoslé salibé njé néya. Rewóré, répatén undi bo runé pai ta nduké ni kabaya njé. 36Pocé bóngo réntolén si se réjaga I. 37Po béboko néyao né reni fófén wóm, ta rlefo faje, “Neje Yesusé, kyat Yahudi né riri Kolano I!” Cogo necé ta npe sogado kyaté né rhukum I né. 38Pocé fajé ma reni kyat ta rmafalewés séluwé, ta rcalib si re Yesusé né, isó i po ni féspal wónéyé, isó i po ni féspal balété. 39Kyat ta rwetco po salibé njé ni né, rfawgiwé babokor i bóngo rfamia-mia Yesusé, 40se rfakcegé I faje, “Cogo Awé ro ta bo mégéné keé Um Sambayang ta npélóyé njé, ni ngané telé le re mfawoslé i nmulé! Iga Awé ro ta Jou Lahatala ni Ntu Awé, mtebo Aw po salibé njé ni bo mfasalamaté nim diri!”
41Fajé nóté re imam ta rpélóyé né, guru-guru agama, re kyat tut-kyat tut Yahudi né ma rfagcegé Yesusé se réceg faje, 42“Kyat nésé I bisa nfasalamat si, mayta I ni diri bisa nfasalamat pa. Iga fatuw ta kyat Israelé né ité rir Kolano I, ta fié ntebé po salibé lo se nópé, bo ité tdélé I! 43I nécegé cogo ni ngongano maduga Jou Lahatala, sababta cogo Jou Lahatala ni ntu I. Se ta fié né, bo Jou Lahatala wlo, I ro ta nfasalamat I né.”
44Kyat ta rmafélewés séluw ta rcalib si re Yesusé nesté ma récegé I fajé nóté.
Yesusé nmóté
(Mrk. 15:33-41; Luk. 23:44-49; Yoh. 19:28-37)
45Ta ngénngan fapélun, tok nuén yófésó re nuén luwé né, férimé bótén ta pocé né ndarórémé ndimé sogado tok nuén tel mérimé. 46Hale ma tok nuén tel pa? Bóngo Yesusé n'gélayé né, tadélé nfakwat I se néceg faje, “Eli-Eli, lama sabakhtani?” Ta ni ngale né, “Jou Lahatala, Ya nik Jou Awé, pe sói se mfatoléné keé Ya?”#27:46 Yesusé néceg fajé né, nyó po buk Maz. 22:1. Yesusé npake ni méitén Aram, ta mulo kyat Roma ta pocé né rcae pa.
47Kyat séfis néli ta rwosél pocé né rlongé ta n'gélayé né, bóngo réceg faje, “Eh, flongé? Nkakém nabi Elia tatubé lima njé!”
48Se waktu ta néi óro, riri dél isó ncéreré néli, néyó barang diréncó ta ncilét wóé fié né. Pocé ncowlé nóp anggur ta nménilé lo né, se nétépsé i néli po sosora isó ga néyété i néya po Yesus ni bo nfalépo I. 49Kyat ta iglé né ga réceg faje, “Ma mfainmo I su na. Téftón facuci su. Nkakém Elia, se maga Elia bo nwómé ntebo I po salibé lo.”
50Pocé Yesusé n'gélayé nóté, nfakwat I, bóngo nserakané ni jiwa njé.
51Po Um Sambayang ta npélóyé njé ni wlólo né, reni ngalep ta msóy esó rasókté se rfaket Jou Lahatala góo re kyaté né góori. Se ta Yesusé re nmóté né, télél be ngalép ta néi ma némgawés abén luwé.#27:51 Fafaketé nje, résóbéy i po Kyat Yahudi riri Um Sambayang ta npélóyé njé ni, nfaket Jou Lahatala góo. Géwgów ta njé ta maduga imamé né le ta rcungé né. Yesusé nmóté né, bo nfayangésé keé kyat ta rdélé I né róri sélsólé né, se ta mulo ngalépé njé némgawésé né, bo ni ngale ta dosa ta nfaket it po Jou ni né re tiso se Jou npo it fié bo twóm po I ni. Taga reni suy ta pélóyé se bóténé njé n'géwgiwé ndimé, lóy-lóy ta pélóyé né ma nfatépówo i. 52Kubur-kuburé né ma nfatépilo i, se Jou Lahatala ni kyat ta wlori métegél ta re rmóté né ma, rpangéné nmulé se rcópén si lima kuburé lo né. 53Kyat ta nesté, ta Yesusé nmóté se npangéné nmulé né, si ta re rpangéné nmulé né rfan po kota Yerusalemé#27:53 Yerusalemé njé rkakmé i kota kudus, ni ngale Jou ni pnuw i. se rfaftulo riri diri néli po kyat ta félé né.
54Tentara né si re riri kapala ta réjaga Yesusé né, rbósém suyé bóngo rémnaw ta féléo ta ndadi i né, pocé ta délé rémtaté se réceg faje, “Fatuwé né ga, I ta njéi Jou Lahatala ni ntu I!”
55Pocé fajé, reni mépin félé ta rfataw si lówé se rémnaw sói ta ndadi i né. Mépin ta nesté si ta rénfadéréré re Yesus lima bótén Galilea se rleleyan I né. 56Po mépin-mépin ta néi ma, reni Maria kyat Magdala, Maria Yakobusé i re Yusufé ni neke, re Zebedeusé ni pégelé njé, Yakobusé i re Yohanesé riri neke i.#27:56 Zebedeusé i re ni pégelé, nturi né Yakobus i re Yohanes (Yesusé ni wyóy si).
Yusufé nput Yesusé
(Mrk. 15:42-47; Luk. 23:50-56; Yoh. 19:38-42)
57Pocé reni kyat isó i lima bótén Arimatea, ngósno Yusufé, i ma ndélé Yesusé fié. Kyat ta njéi, reni renó félé. Ta ngénngané njé rebo ncép nópé né, 58Yusufé nfan po gubernur Pilatus ni, néror Yesusé ni Mayaté njé bo nput I. Néli, Pilatusé ma npo i fié se nané ni kyaté né rpo i. 59Yusufé nyó Yesusé ni mayaté njé, bóngo néyémo I re ngalépé mfus ta nalusé né. 60Se nut I néli po ni kubur wóbno ta tagare nédoké i po métét lóyé myaku isó ni, se nfapel I pocé. Rewóré ta néi, nfalilés lóy ta pélóy pusó se nféketé keé kuburé ni gbono njé#27:60 Kubure njé Yusufé ni óro. Kyat Yahudi né, masike rmót pafule ma, re rfaléléyé riri kuburé né.. Rewóré ta néi, tabóngo nfan i. 61Waktu ta néi, Maria kyat Magdala njé, i re Maria ta isó nóté réntolén si pocé se régbono kuburé ni gbono njé.
Tentara né réjaga Yesusé ni kuburé njé
62Ni tamémóné ta mgo po ngénngan Sabaté né#27:62 Ngénngan Sabaté né, ni ngale ngénngan ta Jou nané kyaté né rfatóyné si se bisa rpe yabé pa. Sabaté né mgo po ngénngan Sabtu. Nécé ta mulo rput Yesus po ngénngan Jumate., imam ta rpélóyé né, si re kyat Yahudi ta rdéréré dodoto Farisi né rfané régbono gubernur Pilatusé. 63Se récegé i faje, “Moke, amé kfatélolmo amé, waktu kyat ta nmalólé njé nmót pafule né, re nécegé iga nmóté, ni ngané telé le nase npangéné nmulé. 64Se tamulo kfabingo awé né, amé kéroré mané tentara né rpe néli bo rejaga ni kuburé njé fafié fangané telé wlólo, ma sogado ni motemote né rpe néli ga rlewésé keé ni mayaté njé, tabóngo réfétén po kyaté-kyaté né cogo re npangéné nmulé. Bo sogado réfétén ta dolo fajé, nase kyaté né nbóng tadélé félé nóté ta rdéréré ta nmalólé njé se lebe lé nóté.”
65Pilatusé nlongé ta réceg fajé né, tabóngo nécegé si faje, “Iya, se nte mew re nik tentara nesté ffané bo féjaga kuburé njé fafié!”
66Pocé rfan néli po kuburé lo. Néli, bóngo tentara né rfaféketé keé kuburé ni gbono njé, bo kyaté né bisa rcung némin pa, bóngo tentara né réjaga kuburé njé.
Currently Selected:
Matius 27: PBS
Highlight
Share
Compare
Copy
Want to have your highlights saved across all your devices? Sign up or sign in
2026 Indonesia Bible Society
