Matius 21
21
Waktu ta Yesusé ncung po kota Yerusalemé né, kyat félé rcéngé I
(Mrk. 11:1-11; Luk. 19:28-44; Yoh. 12:12-19)
1Waktu ta Yesusé I re ni motemote nesté re rérakén po kota Yerusalemé, se re rwóm po pnuw Betfage ta po Métét Zaituné né. Pocé Yesusé nané ni motemote séluwé, 2se nfaftóto si faje, “Ftubé néli po pnuw ta tagbono i néli njé. Néli, nase fémnaw keledai pégelo isó rpitné i, ni ntu njé ga i po lapo lo né. Ffasólé ni wólé né bo ftuda si lima po Ya ni nte. 3Iga reni kyat ta rutné mewé, fécegé si faje, ‘Jou bo npake si. Iga npake si pana, ga tagare nfamul si lima nmulé.’ ”
4Ta mulo Yesusé nané ryó keledai njé né, sababta férimé ta bo ndadi i né, tatubé lima lesu Jou Lahatala re nécegé ndimé po ni nabi-nabi né, ni glio né tadolo faje,
5“Ffébingo kyaté-kyat ta rtolén po kota Yerusalem, kota ta kyaté rfangósno Sioné njé, bo fécegé si faje,
‘Coba fémnawé, nimi Kolano njé re nwóm po mew ni.
I nuné pa nfaséngé I né.
Se maduga ncaplo be ni keleday wóbno isó ta tagare néntubé nó néya njé.’ ”#21:5 Nabi Zakharia nlefo nubuate njé po buk Zakharia 9:9. Se nte re ndadi i ro.
6Rlongé ta néi rewóré, tabóngo Yesusé ni motemote séluwé nesté rfané se rpe ta dolo Yesusé nané si né. 7Néli tabóngo ryó keledai pégelo njé i re ni ntu njé se rtuda si lima po Yesus ni. Lima ga ryéfo tóori né re riri juba né tabóngo Yesusé ncapél néya po keledai ta isó njé ni too lo né. 8Waktu ta Yesusé ndé po yéféné lo né, kyaté né ta délé félé résaéné riri juba né nóp yéfén papo lo né. Reni iglé né ga rfatwetcé ay séngsóngo ta wlu galólé né, se résyapé nóp po yéfén ta Yesusé bo ndélo né. 9Kyat félé ta rdéréré Yesusé né iglé réntubé, iglé réismo I, bóngo rén'gagélay faje,
“Jou Kolano, tsuba I.
I ro kolano Daudé ni ntu re gbu I.
Nwómé nte nut Jou Lahatala ngósno,
se amé ktail maduga I le, po ni géwgów ta némógé njé ni!”
10Waktu ta Yesusé re nwóm po kota Yerusalemé né, farimé kyat ta pocé né rherané se rfatuténé, “Kyat ta njé pai?”
11Tabóngo kyat ta félé né rcónglo, “Nejé Yesusé, nabi ta I lima Nazaret po bótén Galilea njé!”
Yesusé nfaungé kyat ta rfalwagé po Um Sambayang ta npélóyé njé ni kintalé lo né
(Mrk. 11:12-19; Luk. 19:45-48)
12Rewóré ta néi, Yesusé ncung némin po agama Yahudi né riri Um Sambayang ta npélóyé njé ni kintalé lo né. Pocé reni kyat félé ta rénfalalo pipis nésé re pipis Yahudi, bo kyat ta tagare rwómé né rpe riri sadaka. Iglé nóté rénwagé mané pombo bo kyaté né rpe riri sadaka po um sambayang ta npélóyé njé ni. Pocé Yesusé némnaw kyat ta nesté, si re kyat ta rfalgon pocé né, bóngo nféungé si ndimé. Se nfaftófé re nfalalolté keé kyat ta rénlal pipisé né róri meja, re kyat ta rénwagé mané pombo né riri bangko né. 13Bóngo nécegé kyaté-kyat ta pocé né, “Po Jou Lahatala ni Buké wlólo né, rlefo faje, ‘Ya nik Umé njé, géwgów ta kyaté né bo rméiténé rdé Ya.’#21:13 Jou Lahatala néceg ta né po buk Yeremia 7:11. Mayta mewé ga fpe keé i géwgów ta fépiné mewé bo fakalé kyaté né!”
14Rewóré ta néi, kyaté-kyat ta rébyaf re ta rkafé né rwóm po Um Sambayang ta npélóyé njé ni mabé lo né, se Yesusé nfafié keé si. 15Mayta waktu imam-imam ta rpélóyé né, re guru-guru agama Yahudi ta runé fié Musa ni kitab abén limé nesté rémnaw ta Yesusé nfafié keé kyaté-kyaté né, tabóngo rcawané. Pocé rlongé ta yomya-yomya né rgagélay faje, “Hosana! Ttail I kolano Daudé ni ntu re gbu I nje!”
16Pocé rcawané se récegé I faje, “É, mlóngé pa, ta yomya né récegé né?”
Bóngo Yesusé ncónglo, “Klongé. Se mewé fbaca pafule, ta Jou Lahatala néceg po ni Buké wlólo ta ni glio faje,
‘Jou Lahatala re nfaftulo yomya ta rgélól re ta rémyaku lesu né bo rtail I.’ Se nete ta re ndadi i né.”#21:16 Daudé nlefo ta né po buk Mazmur 8:2.
17Rewóré ta néi, Yesusé nfatoléné keé si pocé. Se ncópén po kota Yerusalemé, bóngo nfan néli po pnuw Betania, se nyénfé I dorém esó pocé.
Yesusé ncawan ay ara isó ta népyon pa njé
(Mrk. 11:20-26)
18Ni tamémóné né, Yesusé I re ni motemote nesté rpólén si nmulé po kota Yerusalemé. Po waktu ta rénfan néli né, Yesusé nbósémé ntélóté. 19Né ga némnawé reni ay ara isó po yéfén lapo lo né. Tabóngo nfan néli bo néyówé ni pyono né, mayta nduk fapusó le ma tisé, maduga ni wlu bóto. Se pocé bóngo nécegé ayé njé faje, “Awé nase mépyon pana sogado fajé néli le!” Po waktu ta néi óro, ayé njé némlayé se nmót i.
20Pocé Yesusé ni motemote nesté rémnawé né rfawgiwé bébokori, bóngo rutné Yesusé, “Tabeu! Pe sói se ga ayé njé télél be nmót i?”
21Tabóngo Yesusé nécegé si faje, “Flongé fafié é ta Ya kécego mewé nte. Iga fdélé Jou ta fatuw-fatuwé, taga wlomi né ma nfatutén pa, mewé nase bisa fpe ta dolo Ya kpe po ayé njé ni né, mayta necé le pa. Mewé ma nase féfené fécegé métété njé faje, ‘Terélóngé awé bo mlué aw nélaw po wolété lo né!’ Necé nase ndadi i. 22Re, iga fdélé ta fatuw-fatuwé, sói le ta féror po Jou ni né, nase ndadi i ndimé.”
Ta Yesusé nfaungé kyat ta si po Um Sambayang ta Npélóyé njé ni né, kyaté né rutné pai ta nané I
(Mrk. 11:27-33; Luk. 20:1-8)
23Pocé re rwóm po kota Yerusalemé, tabóngo Yesusé ncung némin po Um Sambayang ta npélóyé njé ni mabé lo né, se nfasodoto kyaté-kyat pocé né. Se waktu ta Yesusé nfasodoto si né, imam ta rpélóyé né re agama Yahudi né riri kyat tuté nesté rwóm néli se rutné I, “Ta féléo ta mpe nte, mduk kawasa fawa lima? Pai ta npo Awé?”
24Tabóngo Yesusé nécegé si faje, “Ya ma bo kutné mewé. Mare fsóngél sói ta Ya kutné mewé nte su, ga tagare Ya ma nase kfébingo mewé pai ta nané Ya sogado kpe farimé ta néi. 25Wóré fécegé. Ta Yohanesé nbaptisé kyaté né pai ta nané i? Jou Lahatala pari, kyaté ta rané i?”
Rlongé ta Yesusé néceg fajé né, tabóngo rfalécego, “Iga técegé Jou Lahatala ta nané i, I nase nécegé it faje, ‘Néga fpe sói se fdélé Yohanes pa?’ 26Mayta iga ité técegé kyaté ta rané i, témtat be kyat ta félé nte rcawané, sababta si runé, Yohanesé njé nabi ta nénfawómo Jou Lahatala ni faftóté njé.” 27Se récegé Yesusé faje, “Ayo, amé kuné pa pai ta nané i!”
Bóngo Yesusé nécegé si faje, “Pana fajé, Ya ma kfébingo mew pa, farimé ta kpe né pai ta nané Ya.”
Yesusé nfatailo kyat Yahudi né dolo yomya isó ta ndéréré ni moke ni sogaro né pa
28Yesusé nécegé agama Yahudi né riri kyat tuté nesté faje, “Flongé Ya kéfétén adeade isó nje su, rewóré ta néi ga bo kutné mewé. Reni légaé isó, ntu món séluwé. Nuéncó, nfan po ni ntu ta nténlóyé njé ni se nécegé i faje, ‘Ya ntig ta awé, mfané bo mpe yabé po bét angguré lo.’
29Mayta yomya njé ncónglo ni moke njé faje, ‘É, kfan pa moke.’ Mayta mnuw pa, yomya njé wlo bo nfané npe yabé po bété lo.
30Rewóré ta néi, légaé njé nfan po ni ntu ta wyóy i njé nóté se nécegé i faje, ‘Ya ntig ta awé, mfané bo mpe yabé po bét angguré lo.’
Bóngo Yomya njé ncónglo ni moke faje, ‘Iya moke.’ Nópé ga nfan pa.
31Se nte Ya bo kutné, iga mewé, yomya séluwé nesté, ta i pua ta ndéréré ta riri moke njé nané si né?”
Pocé bóngo agama Yahudi né riri imam ta rpélóyé nesté rcónglo, “Ta nténlóyé njé.”
Bóngo Yesusé nécegé si faje, “Pana fajé, flongé fafié ta Ya bo kécego mewé nte. Kyat léo ta riri yabé né rénfalutno pajaké, re mépin-mépin léo né, si ta néi ta rngali si se rdadi Jou Lahatala ni kyat si bo nkawasa dolo Kolano po riri hidupé wlólo, mewé ga fngali mew pa se nase fdadi Jou ni kyaté mew pa. 32Sababta waktu Yohanes ta nénbaptisé kyaté njé nwóm po mew ni né, re nfaftulo yéféné bo fpe ta métegél po Jou Lahatala usno lo, mayta mewé fdélé pa sói ta i nécegé né. Coba fémnawé, waktu kyat ta rénfalutno pajak re mépin-mépin léo nesté rlongé ta Yohanesé nécegé né rdélé. Mayta kyat tut Yahudi mew ta ntéi, masike re fémnaw ta si rdélé né, mayta wlomi pa bo fngali mewé se fdélé pa le sói ta Yohanesé nécegé né.”
Yesusé npe adeade kyat ta réjaga bété né
(Mrk. 12:1-12; Luk. 20:9-19)
33Yesusé nécegé nóté, “Flongé bo kéfétén adeade isó nje nóté. Reni légaé isó npe bété. Se ntónmo i angguré, bóngo néjelo i re pagaré. Angguré né pyon pafule, re nóléyé mdóké bo npe góo ntubé, bo angguré né re pyono ga ringété, ni géo né bisa rpe pocé. Bóngo npe ni umé mlóngé isó po bété lo né, bo kyat ta réjaga bété né rtolno i. Se npe i rewóré ndimé, tabóngo néyówé kyaté bo rpe yabé po nó bété lo né. Rewóré ta néi, nfan i po bótén nésé. 34Sogado angguré né re pyoné se re nwómo ni waktu ta bo ringét óro, bóngo nané ni kyat yabé séfis rfan po kyat ta rpe yabé po nó bét angguré lo né, bo ryó nó téné né.
35Mayta waktu ta re rwómé ntéli né, kyaté-kyat ta réjaga bété njé, rgó keé kyaté-kyat yabé nesté se rpun ta isó njé, ta iglé né ga rpuné keé si, ta iglé nóté rtéo róri lóy sogado rfamóté keé si.
36Rewóré ta néi, légaé njé nané ni kyat iglé néli nóté, nesté lébé rfélé po ta rtubé nesté né. Mayta si ma rpe si dolo ta faiwóbno nesté nóté. 37Ni wóré nópé, légaé njé nénuta, ‘Ta fié né, kané ntig tuo njé ro. Néli bo rémnaw i, nase rémtat i se rpo i nak ténténé né.’ Bóngo nané ntu njé i néli nóté.
38Mayta waktu kyat ta réjaga bété nesté rémnaw i, tabóngo rfalécego faje, ‘Nejé ta npe lima njé, légaé ta nó bété njé ni ntu i. Pote se néli, iga légaé njé re nmóté, yomya ta njé i ta nase nyó bété njé. Se ta fié né, tpuné keé i bo tyó róré nó bété nje!’ 39Bóngo rwókfo yomya njé se rwóté i nétó bét lapo, ga rpuné keé i.”
40Pocé bóngo Yesusé nutné agama Yahudi né riri kyat tuté nesté, “Se iga mewé, légaé ta nó bété njé ga nwóm néli nase bo npe si fanfawa kyat ta rejaga bété njé?”
41Si rcónglo Yesusé, “Nesté kyat léo si, se nase npuné keé si! Rewóré ga nané kyat nésé nóté bo réjaga nó bété njé. Iga sogado re nwómo ni waktu ta rfalingété, kyat ta réjaga bété nesté nase rpo kyat ta nó bété njé nó ténténé né.”
42Bóngo Yesusé nécegé si faje, “Mewé ma re funé ta rlefo po Jou Lahatala ni Buké wlólo. Pocé rfatailo Ya dolo lóyé, mayta fsae pa. Ta rlefo né faje,
‘Reni lóy pusó, kyat ta rpe umé né réngóto i dolo reni ngale pa se rpake i pa ga rwóté keé i,
momongo lóy ta njé óro ta Jou nyó i se npeé i lóy ta faywóbno ta nfamatué umé njé né.
Jou npe ta néi, tamulo ga témnawé né fié re birahi!’ ”#21:42 Nubuate njé po Mazmur 118:22, 23. Lóyé njé Yesus I.
43Yesusé nécego si nóté, “Se nte fatélolmo mew fafié: Tatube lima, Jou Lahatala re npili kyat Yahudi mewé bo fdadi ni kyaté bo nkawasa dolo Kolano po nimi hidupé wlólo. Mayta mewé wlomi pa, se Jou bo npo keé kyat nésé bo rdadi ni kyat si, bóngo kyat ta nesté si bo rpe ta Jou mgo wlo né. Si ta néi tadolo ay ta pyono fié né. [44Se pai ta némnap po lóy ta kéfétén i péséwé njé ni, nase némjakémé le, mayta bo sogado ga Lóyé njé ta ntón si, nase lebe ta rémjakémé.”]
45Waktu imam ta rpélóyé né re kyat ta rdéréré dodoto Farisi nesté rlongé Yesusé ni adeade njé né, si re runé ta Yesusé ni maksuté né si óro kyat léo nesté. 46Pocé bóngo réyówé yéféné bo rgó Yesusé. Mayta rémtaté kyat ta félé né, sababta kyat ta néi, runé ta Yesusé njé nabi ta nénfawómo Jou Lahatala ni faftóté njé.
Currently Selected:
Matius 21: PBS
Highlight
Share
Compare
Copy
Want to have your highlights saved across all your devices? Sign up or sign in
2026 Indonesia Bible Society
