Rom 15
15
Kristus i naolalek me tuzip muduban maip mazozlon tatozoi
1Id me zaguddaŋanlak bodokgaz satuk tipinidinoi, sibed gamun funadime abaŋ mewoi so taboloi.#Rom 14:1 2Id dadodado inan muduban gauai madowoi gamun funinen tepaniwoi, subuloanekoi.#Kor I 9:19; 10:24, 33 3Kristus siben mai gamun funip inauwoi so ibol, tea, gazelak egin, Azu gigien i owoi dibollak me ŋa foglak idu.#Kan 69:10 4Abaŋ wagam gazelak me id taloŋnenoi gazelak, me id segateklon, Anut inan gazek inan tansaeklon mai suzuazoukdaŋan temadowoi.#Rom 4:23, 24; Kor I 10:11 5Anut me segatekdaŋan tansaekdaŋan mailak i noaŋpa lami taimonpa amadowoi, Jesus Kristus wilisen.#Fil 3:16 6Meginpe aŋ auami abezaup taimonpa inad Ujanzen, Jesus Kristus, inan Anut Taman mai, biŋan ibisawoi.
Kristus panupanuwain iŋallak, mewoi krisgaz mai nug ŋaleŋalewoi
7Mewoi aŋ nug ŋaleŋale, Jesus Kristus Anut inan biŋanoi aŋ ŋiliaŋlak egin.#Rom 14:1 8Ŋa ŋepaiaŋ, Jesus Kristus i Israel inan muluŋ nasekgaz nadin dinek inaulak. Anut inan azu me malik niŋon inauwoi, tubudingaz nadin blani panek stemaniwoilakoi.#Mat 15:24; Apos 3:25; Kan 89:3 9Gobgaz mai Anut inan ilonpanekoi biŋan dibisawoilakoi, gazelak egin, Mewoi ŋa gobgaz leŋadinlon biŋa ŋibisawoi, oina neawoi dug ŋabiwoi.#Rom 11:30; Kan 18:50 10I faun te ibol, O gobgaz inan tamolpainbadim mai jumi isa.#Deut 32:43 11Ta mai ibol, Aŋ gobgaz daŋan Ujanzen biŋan ibisa, tamolpain daŋan kalel depaniŋan.#Kan 117:1 12Jesaia faun mug ibol, Jesse inan dilun isowoi i me imaispa gob idauziwoi, me gobgaz iwoi dusuzuazoup ditozoi.#Jes 11:10; Bo 5:5 13Suzuazouknen inan Anut i zigiek mazozdaŋan mailon lami maliknenoi ifuam, meginpe aŋ Auanuzgun tiwonlon suzuazouk dadon isaknenlon amadowoi.
AZU PAULUS SIBENOI, 15:14–33
Paulus inan uzatoi azu ta ibol
14Ŋa aŋoi azu tea, ŋainag taiggaz, aŋ bubumi kagin gauai ifuam, aŋ aloŋnendaŋan mai, meginpe nug kagin peteŋanaŋnen aloŋ. 15Ge abaŋ tawoi ŋa ŋisililig gazek beŋbeŋ ŋepanaŋlak, aŋ lami isouwoi, Anut i mewoi kanim panaglak,#Rom 1:5; 12:3 16ŋa gobgaz zidinnen Anut inan totol gamunoi Jesus Kristus inan waliŋtamol ŋenaumap, meginpe gobgaz nadin janauk idusawoi, Auanuzgun siben gun inaulak.#Rom 11:13; Fil 2:17 17Mewoi ŋa Jesus Kristuslon Anut inan uzatoi biŋag ŋibisaŋame. 18Abaŋ aenta daŋanoi auag ŋipiziani, taimon me Kristus azulon nauknauklon mai gobgaz dagom ditoznenoi ŋalon iŋallak, me mon ŋaboloi.#Rom 1:5; Kor II 3:5 19Me Anut bagoz tiwonlon kubelmaŋau mai, Anut inan Uzgun tiwon mailon inaulak. Meginlak Jerusalemnenge fatu tilianig ileg Ilirikumnen itapas ŋa totol gamun tezepasig ŋabollak.#Mar 16:17 20Au, megin inag daz imaislak, Kristus nean get so deblanilak melak ŋa totol gamun ŋipidinoi. Ŋa ta inan fodlak uzat so ŋenauwoi.#Kor II 10:15, 16 21Tea, gazelak egin, Me iwoi so pidinlak i denasiwoi, i me so diloŋlak i dab depaniwoi.#Jes 52:15
Paulus Rom medaeŋ mai iloi ibol
22Mewoi mai ŋa saen kuzum aŋ ziminen ŋalawoige abaŋ ta dal funati.#Rom 1:13 23Ge gazo fatu elon inag uzatoi mug dal tealakoi, umaz kuzum ziminen ŋalawoi jaeŋ mai funaglakoi,#Rom 1:10, 11 24mewoi ŋa ilog ibol ŋa Spainnen ŋalap nami panu ŋagegmap kin ŋenasaŋoi. Meginpe aŋ noagpa ŋa waiŋ ŋabip ŋalawoi, get aŋ maip lo kin temadop tikibiaioi.#Kor I 16:6 25Gazo bo Jerusalem medaeŋ anedin ŋaduwoi ŋalaŋame.#Apos 18:21; 19:21; 20:22 26Makedonia Akaia mai dibolge Jerusalem medaeŋ ilonlon waizgazoi gaŋmalan kin detanilak.#Kor II 8:1–4; 9:2, 12 27Au, i ladin gauaige denaulak, me malik i megin denauwoi me nadin jawadan, gobgaz i Jerusalem gungaz nadin uz abaŋoi depeleŋanag deŋalelak, meginge i mai tannen abaŋlon i didinawoi.#Rom 9:4; Kor I 9:11 28Mewoi ŋa abaŋ e ŋenau binimap lo inan niŋon detemanilak me ŋipinidinpa ŋa aŋ ziminenpa Spainnen ŋalawoi. 29Me ŋa ŋaloŋ, ŋa ziminen ŋalemap ŋa Kristus inan baz tiwon idusapdaŋan ŋalawoi.#Rom 1:11
Paulus medaeŋgaz nadin gadiŋoi igod
30Taiggaz, ŋa ŋogodoanaŋ, Ujanzen Jesus Kristus, Uzgun inan ilopaneklon mai aŋ ŋa maip ŋawoi nami gadiŋlon Anut mai bulebulewoi.#Kor II 1:11; Fil 1:27; Tes II 3:1 31Judeanen ladinlon so malikdime me so dibiagoi, me ŋainag louzat ŋa Jerusalemoi ŋenauŋame me gungaz so dimoioi.#Apos 21:13 32Meginpe Anut iboltap ŋa jaugdaŋan ŋalap aŋ ziminen jaeŋ kin ŋenaup ilog gauaioi. 33Mazoz niŋon inan Anut aŋ daŋan maip amado. Malik!#Rom 16:20
Currently Selected:
Rom 15: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
