Israel Kan 118
118
1O Ujanzen pez apani, i gauailakoi;
inan ilopanek segatekdaŋan me dedeŋanipnen!
2Israel ibolŋan,
Inan ilopanek segatekdaŋan me dedeŋanipnen.
3Aron inan samungaz dibolŋan,
Inan ilopanek segatekdaŋan me dedeŋanipnen.
4I me Ujanzenoi dizutdime i dibolŋan,
Inan ilopanek segatekdaŋan me dedeŋanipnen.
5Ŋa jaeŋ funagge ŋemademeg ŋa Ujanzenoi ŋawog;
Ujanzen auag jabig pisiag.
6Ujanzen i ŋa maimeg ŋa so ŋazez.
Tamol ŋawoi abaŋte inaunen iloŋ?
7Ujanzen dinagoi ŋa maiame;
i me ŋa dumugunagdime i seŋanagpa ŋililiadinoi.
8Ujanzen izinnen seafunen me gauai,
tamol nau paninen me nenazi.
9Ujanzen izinnen seafunen me gauai,
tangaten nau paninen me nenazi.
10Panupanuwain dililitag;
Ujanzen neanlon ŋa ŋugusutag ŋabit!
11I dililitag, baŋeg daŋanlon dililitag;
Ujanzen neanlon ŋa ŋugusutag ŋabit.
12I ŋiŋiu egin dililitag,
i faiag inan ja egin gauz nana;
Ujanzen neanlon ŋa ŋugusutag ŋabit!
13Gik dibolge debetetanag, meginge ŋabal ŋaduwoi ŋenau,
ge Ujanzen i aneg idu.
14Ujanzen i ŋainag tiwog, inag kanam mai;
i inag patugisanen inau.
15Dab nau, seŋanek inan dug gamun
taozgaz nadin tazaslon me aloŋ:
Ujanzen inan niman waŋ seŋaniime,
16Ujanzen inan niman waŋ me biŋandaŋan,
Ujanzen inan niman waŋ seŋaniime!
17Ŋa so ŋamatoi, ŋa bas ŋemadowoi,
Ujanzen inan nauknauk sai ŋaniwoi.
18Ujanzen i kin gauz pututaglak,
ge mateŋlon ŋa so noaglak.
19Taoz inan dalauan pasi panag,
meginpe ŋa melon ŋadulap
Ujanzen pez ŋepaniwoi.
20E me Ujanzen inan dalauan;
taozgaz melon didulawoi.
21O auag wabilak, inag patugisanen
unau mailakoi ŋa pez ŋepano.
22Pat sasekkamaŋ demeselanilak
me pat fod inaulak.
23E me Ujanzen inaulak,
abaŋ siben mok e tabol.
24Nal me Ujanzen inaulak,
id iwoi zigiadoi jaud isa maiwoi.
25O Ujazen, am ogodoano zen, putuma pasipe!
O Ujazen, am ogodoano zen, nean anaulak niŋon penamape!
26Patun isap me Ujanzen neanlon idulaime!
Am Ujanzen inan ablonge kibineknen azu apanaŋ.
27Ujanzen i Anut,
i ilod lelaman panadlak.
Ubou ujan inan dal jazaenlon bala apanip
ilap wiwa inan failon itasawoi.
28O ŋainag Anut, ŋa o pez ŋepanowoi;
o ŋainag Anut, ŋa biŋa gauz ŋibisawoi.
29Ujanzen pez apaniŋan, i gauailakoi,
inan ilopanek segatekdaŋan me dedeŋanipnen.
Currently Selected:
Israel Kan 118: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
