Filemon 1
1
Tabei panek
1Ŋa Paulus, Kristus Jesusoi sebaneklon ŋemadoŋame, taid Timoteus mai, am auzun o, nama tima waza Filemon, amnama uzatbi,#Ef 3:1 2luma Apia, tima Arkipus, i nama jubi, medaeŋ oina ablon detemanidime mai tabei apanaŋ:#Rom 16:5; Kor I 16:19; Kol 4:17 3idinad Mam Anut mai Ujanzen Jesus Kristus mai inan kanim, mazoz maip aŋ toanaŋoi!#Rom 1:7
Anut pez ipani, Filemonoi igodime
4Ŋa o ilog isoumap ŋa ŋainag Anut sansan inag gadiŋlon pez ŋepaniŋame.#Ef 1:15, 16 5Ŋa sansan oina ilopaneknenoi mai ilolon maliknenoi mai azu ŋaloŋlakoi, me Jesus Kristusoi, gungaz daŋan maiwoi o bubelon ienimelak.#Kor I 3:4, 9 6Ŋa ŋagodŋame oina ilolon maliknenlon mai tepeleŋaninen bubelon tiwon pazep niŋon inauwoi, ŋan o abaŋ gauai daŋan me Kristuslon ienime gauai uloŋoi.#Fil 1:9 7Au, o aenta ilo pinidinumelakoi, mewoi ŋa gauz jaugdaŋan, ilog ŋalelak maig ŋemadoŋame; tima waza, o unaulak me gungaz kuzum ladin gamun ifulak.#Kor II 7:4
Onesimus Filemon gauai ŋalewoi
8Mewoi mon ŋagodoi, bo Kristuslon ŋa segauz kibiai ŋepanonen ŋaloŋ, 9ge ilonpanekoi o izinen mon ŋagodoi: ŋa Paulus, tamol besabes, gazo Kristus Jesusoi mai sebaneklon ŋemadoŋame. 10Ŋa o izinen ŋainag nanug wazan Onesimusoi ŋagodŋame, me ŋa sebaneklon inan taman egin ŋenaulak.#Kol 4:9; Kor I 4:15 11I bo get o izinen bian gauai teag itozlak; ge gazomnen i owoi mai ŋawoi mai ai bian gauaidaŋan itozime. 12Ŋa i, me ŋan ŋainag bubeg mok e ŋabol, ŋenaup o izinen faun mug imulpa ilawoi. 13Ŋa sibeg bo ilog ibol, i gauai izignen mon madowoi, meginpe i saen me ŋa totol gamunoi sebaneklon ŋemadoŋame, o nao iŋalpe ŋa biag paluwoi ŋabol.#Fil 2:30 14Ge o me get so uloŋlakoi, mewoi ŋabol ŋamoi; oina looi ŋa o gegaun so ŋunuowoi, tea, o sibe get Au ubolpe gauai.#Kor II 9:7; Pet I 5:2 15I o mai mewoi tat saen tituk ibeniben atozlak, o i dedeŋanek oina bube ban ŋalewoi. 16Ge faun begabeg egin mon tea, tea, begabeg nenazip tai wazan egin; i ŋa mai bo mug megin amadoame, mewoi ŋabol, o mai malik mok megin mon. I tininlon mug oina biabi ban, gazo mai Ujanzenoi oina ba mok.#Tim I 6:2 17O ŋainag badim mok uboltap, o ŋa uŋalepes egin, megin mok o i ŋa naog uŋalewoi.#Rom 14:1 18I get oina abaŋ tata niman gisigaslon bedanilak tat, tea, inan ja ta tininlak ien tat, mewoi get naon so ipanolak, me segauz ŋa tinignen egin gazewoi, ŋa ŋepanowoi. 19Ŋa Paulus sibeg ŋainag nimaglon gazek elon ŋegazeŋame: Ŋa gazop jawadan kibinep ŋepanowoi. Ŋa gazo ewoi so ŋaboloi: Oina jawadan mai naognen se ienime, ŋan me o sibe dado mok naognen ja egin.#Gal 6:11 20Au, taig waza, Ujanzenoi o ŋa gazo zigiek kin panagŋan, Kristusoi o ŋainag bubeg gamun funinen kin panagpe.#Filemon 7, 10
Wadan
21Oina dagom utoznen ilog malik ibollakoi, mewoi ŋa megin gazelak o ŋepanoŋame; au, ŋa ŋaloŋ, o subuŋan ta, mewoi ŋa so ŋabollak, mai unauwoi. 22Ge ta mai ŋesebatewoi: O oinanen inag madoknen abeg kibinep panagpe, ŋa ŋusuzuazouŋamelak nami gadiŋ sinanlon Anut ŋa aŋ faun ipanaŋ mugoi.#Fil 1:25; 2:24
23Epafras i Kristus Jesusoi ŋa maig sebaneklon amadoame, i o tabei ipanoime,#Kor I 7:4, 12 24Markus, Aristarkus, Demas, Lukas i daŋan ŋainag uzatbigaz megin mon.#Kol 4:10, 14
25Ujanzen Jesus Kristus inan kanim i nami uz maip madowoi. Malik.#Gal 6:18; Tim II 4:10, 11
Currently Selected:
Filemon 1: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
