Markus 7
7
Niman flanek inan azu ta
1Farisea gazekmaŋau taitai mai me Jerusalemnenge diseg Jesus izinnen detemani. 2I dab denau, Jesus inan meglaum aenta i se, nimadin so deflanimeg, anaŋ diani.#Luk 11:38 3Ge farisea Judagaz daŋan mai nimadin so deflanameg anaŋ so diani. I tubudingaz nadin kibiaik duzi depani. 4Dadeŋ abenlonpa dimulmap i get so disugmeg anaŋ so diani. Kagin azu getnen kuzum ta mai dab depanidime, gab, bod, brons inan tabiz abaŋ flaneknen. 5Farisea gazekmaŋau mai i desedaze, Aitoige oina meglaum tubudingaz nadin kibiaiŋlon so ditozdime, tea, nimadin foadaŋanlon anaŋ dianidime? 6I ipidin, Jesaia gauai malabiabgaz aŋoi ibollak, gazelak egin, Tamolpainbadim e fiziŋodinlon ŋa biŋag dibisadime, ge bubudin ŋawoi o ibennen ien, izignen tea.#Jes 29:13 7Se mok ŋa biŋag dibisadime, Anut kagin abenlon i tamol nadin kagin me tamolpain depeteŋanadime. 8Aŋ Anut inan kibiaiŋ ibinimeg tamol nadin kibiaik uzi apaniame.
9I pidin, Aŋ nami kibiaik uzi apaniwoilakoi aŋ kagin gamun malaŋaleklon Anut inan kibiaiŋ ibitiame. 10Moses ibollakoi, Oina tina tama mai dagom pinidin. Ta i tamanoi, tea, tinanoi azu salan ibolime i malik imatoi.#Ekso 20:12; 21:17; Deut 5:16 11Ge aŋ abol, Ta i inan taman, tea, tinan ipaitap, Korban, me fun, o ŋepanonen me lo abaŋ, Anutoi sagen ŋenaulak. 12Meginpe aŋ mug ai me taman tinan kibinianenoi pizianiame. 13Nami kibiaik me nunumigaz duzi depaninenoi apeteŋanameg melon Anut azu asebaziame. Menen kuzum anauame.
Foa panek inan azu
14I faun mug tamolpain malandaŋan wigidinge ipidin, Aŋ daŋan auag dab apanip aloŋ gauai. 15Tamol muzinnen abaŋ ta ilonnen idulaime me tamol foa paninen tea. Tea, tamol ilonnenge itasaime melon foaime.#Apos 10:14, 15 16Tamol tata iloŋnen tiliŋandaŋan, i azu me dab paniwoi. 17Jesus tamolpain malan ujan ibinge ablak iduseg mademeg inan meglaum azu faŋan ewoi sodoz depani. 18I pidin, Dodinge aŋ mai aloŋnen tea? Aŋ so aloŋ abaŋ tata muzinnenge tamol ilonlon idulaime me foa paninen tea. 19Nasi, me bubenlon so idulaime, tea, kazoilon, uzip tezameklon iduime. Azu melon taloŋ anaŋ daŋan ikok. 20I ibol, Tamol ilonnenge itasaime me foa paniime. 21Au, tamol ilonlonge, inan bubenlon kankan salan itasaime, aipain maip ditoznen, ponau, tamol funek, jait, 22malaisek, kagin salan, kakeznen, loaŋloan itoznen, malan salan, uf nauk, ŋagas kagin gedagad mai.#Mat 6:23; 20:15 23Abaŋ salan e daŋan ilonnenge ditasadime, me tamol foa paniime.
Gob fatulon pain ta Jesus izinnen ise
24Melak imaisge Tirus Sidon fatulon ile. I ab talak iduseg ta so iloŋoi ibol. Ge i kukumlon madonen tea. 25Buntaimon pain ta me inan nanunpain uzgatafdaŋan i Jesusoi biŋ iloŋge iseg i nien funlon ibal idu. 26Pain me Grikwain, Siriafoinika daz. I igod, Jesus i buga salan nanunpainlon madoime me kudui paniwoi. 27Jesus i ipai, Nanungaz get futuap loadin didipe, aikamo nadin sepalaŋ wizidinpa gaun tani pinidinnen me kagin gauai tea. 28Ge i auan jabig ibol, Au, Ujazen, ge gaun me mai aikamo nadin anaŋ nenamun idumap dianidime.#Luk 16:21 29I pain ipai, Azu ewoi segauz umul ula, buga salan me oina nanupain ibinilak. 30I inannen ileg inan aipain kamo badimlak ienmeg nasi, buga ibinilak.
Tamol ta tiliŋan auan mai itau, Jesus ikibine
31Jesus faun mug kin pasak Tirus fatu ibinig Sidon tezebabeg Dekapolis bison mon Galilea inan wililuk izinnen ile. 32I tamol ta tiliŋan itau balen muzuan mai izinnen deŋaleg digosdigos depai, i niman fonlak inauwoi.#Mar 5:23 33Jesus i tamolai malan ujan leŋadinge ŋaleg ibeniben inaug inan niman tikun tiliŋanlon isouge fuzeg balen mai ititig,#Mar 8:23 34didlak itadmeg isagaig ipai, Efata, azu me Fue.#Mar 6:41; Joh 11:41 35I inan tiliŋan po ibol, balen ipaulak me seflaleg azu taoz ibol. 36Jesus i kibiai pinidin, i tata so depaiwoi. Ge i kibiai gauz pinidinmeg tamolai me dab so depanig gauz mok dibolge ditoz.#Mar 1:43–45 37I dizut malan itauge dibol, i abaŋ daŋan gauai inaulak tata tiliŋadin itaulak i azu diloŋ, auadin itaulak me azu diboldime.
Currently Selected:
Markus 7: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
