Mateus 19
19
KRISTUS JORDAN AKILON, 19:1–20, 16
Jesus maiaidaŋan kibinia. Pain pasinenoi ibol
1Jesus azu me ibol binilag i Galilea fatu ibinig Judea fatulon ile, Jordan tinin aentalon. 2Tamolpain malanzen i duzig i melak kibinia.
3Farisea i izinnen diseg dikibiaimeg dibol, Azu daŋanoi pain pasinen me kagin tat?#Mat 5:31, 32 4Ge i auadin jabig ibol, Aŋ so usuti me i funlon tamol inaulak i pain mai inau?#Gen 1:27 5I ibol mai, Mewoi tamol ta inan taman tinan mai ibinpa inan iwon sipinip ditozoi, i auzun tinin taimonoi?#Gen 2:24; Ef 5:31 6Meginpe i mug azugen tea, tea, taimon. Mewoi abaŋ Anut betemanalak me tamolpain so detezepalewoi.#Kor I 7:10, 11 7I depai, Aitoige Moses kibiai inau, pasinenoi paseknen gazek ipanip i seflalep pasiwoi?#Deut 24:1 8I pidin, Moses nami bubumi gegaunlakoi aŋ nami iwomi apasnen so ipizianaŋ, ge funlon megin so ienlak. 9Ŋa aŋ ŋepaiaŋ, tata i se jait tealon pain pasip ta iŋaletap i jait jabiime.#Luk 16:18; Mat 14:4 10Meglaum i depai, Tamol inan painoi peneŋanek megin ienmap, i pain so ŋalemap me gauai. 11Ge i pidin, Tamol daŋan azu e uzi paninen tea, tea, aenta mon.#Kor I 7:7, 17 12Ta me tinadin didauzimeg mug tinidin imaisnen funatig demadelak, aenta me tamol denaug tinidin imaisnen dufunatilak, aenta sebadin denaug Anut inan kaginoi tinidin imaisnen dufunatilak. I azu me dab paninen iloŋ, i dab paniwoi.
Jesus ai kamo kadoi pinidin
13Saen melon tata ai kamo i izinnen didauzig i fodinlak niman inaumap godoaniwoi. Inan meglaum i dususua. 14Ge Jesus ibol, Ai kamo abinpa i izignen disowoi, so susua mon, didnen kagin me i egin me nadin.#Mat 18:2, 3 15I niman fodinlak inaug i menge ile.
Ai faun ta inan filianoi gauz imat
16Nasi, ta iseg ipai, Peteŋanek, abaŋte gauai ŋenaumap bas dedeŋaneknen ŋeŋalewoi? 17I ipai, Aitoige abaŋ gauaioi ŋa sidiziagume? Taimon i mon gauai. O basnenlon ulawoimap o kibiaiŋ uzi paniwoi.#Luk 10:26–28 18I ipai, Dodin? Jesus ibol, O ta so funip imat mon, O jait so wabi mon, O abaŋ ponau so ŋale mon, O se uf so nau mon.#Ekso 20:13–16; Deut 5:17–30 19O tama tina mai dagom naup madowoi. Ta mai, oina muduba ilo pani, o sibe ilo paniume egin.#Ekso 20:12; Lew 19:18; Deut 5:16 20Ai faun i ipai, Abaŋ e daŋan dab ŋepani. Ŋa abaŋte tat tealak? 21Jesus ipai, O tezepasop madowoi ubolmap, ulap oina abaŋ udad ilap waizgaz pinidinpa, meginpe o didnen jesdaŋan madowoi. O usop uzagpa utoz.#Mat 6:20; Luk 12:33 22Ge ai faun azu me iloŋge i ilon alange ile, i filiandaŋanlakoi.#Kan 62:11
23Jesus inan meglaum ipidin, Malik ŋa aŋ ŋepaiaŋ, tamol filiandaŋan didnen kaginlon idulanen muzuan. 24Ŋa faun te ŋepaiaŋ, kamel i jamel waek titui inan matuklon idulanen me kin pasak, ge tamol filiandaŋan Anut inan kaginlon idulanen me muzuan. 25Meglaumgaz me diloŋtag i gauz bezeteŋanag dibol, Meginpe it tat patun pasiwoi?#Mat 7:28 26Jesus i ilelmeg ipidin, Tamol me denaunen tea, ge Anut i abaŋ daŋan inaunen iloŋ.#Gen 18:14; Hiob 42:2
Nauk gauai inan naon panek
27Me uzig Petrus ipai, Nasi, am abaŋ daŋan ibinig o uzolak, am abaŋte aŋalewoi? 28Jesus ipidin, Malik ŋa aŋ ŋepaiaŋ, aŋ ŋa uzaglak aŋ fatu faunlon Tamolai inan pezatiu kubellak imatalmap aŋ mai pezatiu twelf fonlak amatalpa Israel bagen twelf ibitiniawoi.#Luk 22:30; Deut 7:9–10 29Ta i ab panu tat, taingaz, liungaz, taman tinan, nanungaz tat, um tat inag neagoi ibinlak me daŋan naon hundertpa iŋaloi, bas dedeŋaneknen mai iŋalewoi. 30Ge kuzum i malanlak demadelak me alounen demadowoi, alounen demadelak i dimugsawoi.#Mat 20:16; Luk 13:30
Currently Selected:
Mateus 19: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
