Mateus 11
11
1Jesus inan meglaum twelf kibiai pinidin binig i menge ileg nadin panupanulon kagin peteŋanap azu mai ipidinoi itoz.
JUDAGAZ LADINLON SO MALIKGE AGEZ DENAU, 11:2—13:58
Johanes totol inaug Jesus izinnen dile
2Ge Johanes sebaneklon mademeg Jesus inan uzatoi biŋ iloŋge i inan meglaum azugen inaug#Mat 14:3 3ipai, I isoime me ŋan o, tea, am ta malan anauwoi?#Maleak 3:1 4Jesus auan jabig pidin, Alap abaŋ me aŋ aloŋame anasi maiame me Johanes apai. 5Meladin itaulak i abaŋ denasidime, laleglak ditozdime, pizapizdaŋan i dai sezane, tiliŋadin itaulak azu diloŋdime, dimatlak i fuŋunag dimaisdime, waizlak i totol gamun diloŋdime.#Jes 35:5, 6; 61:1 6Patun isap mado me i ŋawoi so deladalime.#Mat 13:57; 26:31
Jesus johanesoi sigiani
7I dilemeg Jesus i fun inaug tamolpain malan ujan Johanesoi ipidin, ibol, Abaŋte fatu udaulon nasiwoi ale? Auz timlon telelauime?#Mat 3:1, 5 8Abaŋte anasiwoi ale? Tamol ta jamel gizaud inulelak? Nasi, jamel gizauddaŋan i kiŋ nadin ablon demadodime. 9Ge abaŋtewoi ale? Profet anasiwoi? Ese, ŋa aŋ ŋepaiaŋ, profet ibeleŋani.#Luk 1:76 10E me iwoi gazelak, Nasi, ŋainag totol ŋenaup o naonnen imugpa oina dal kibinewoi.#Maleak 3:1 11Malik ŋa aŋ ŋepaiaŋ, paingaz didauzilak me ilonlon ta Flaneknen Johanes so nenaziime. Ge me i didnen kaginlon mitinlak me Johanes nenazig ujan.#Mat 13:17 12Flaneknen Johanes inan saenlonge ileg gazo e didnen kaginoi wagai nauk ien, wagaitamol me duzuaidime.#Luk 16:16; 13:24; Joh 6:15 13Profetgaz kibiaiŋ mai azu dimugseg dibol Johanes itaseg eginmeg geg. 14Aŋ me lamilon malikoi lami ientap, i Elias me isowoi dibollak me.#Maleak 3:23; Mat 17:10–13 15I me iloŋnen tiliŋandaŋan, i azu me dab paniwoi.
16Ge daz wozou e it kilian ŋaboloi? I aikamo ikol, me i panulon dematalmeg aenta dipidin, 17dibol, Am aŋoi dum iwi, ge aŋ so atazilak, am tiŋia siama, ge aŋ petezami so asaelak.#Met 29:9 18Johanes iseg i so jani, so imili, ge i dibol, I buga salandaŋan.#Mat 3:4 19Tamolai iseg i jani, imili maig i dibol, Nasi, anaŋ tetamektamol, wain milekbibian, selna aupasekwain mai tizadin. Ge ilon kaginkagin inan nauknauk sinan taoz inauime.#Mat 9:14, 15
Panu ta so tulufuna didaŋse Jesus bebana
20Meginge i imaisge panu melon i inan nauknauk ujan inaulak me ibebana, i so tulufuna didaŋselakoi. 21Ipidin, Waio Korasin! Waio Betsaida! Tirus Sidon mailon nauknauk ujan me aŋ leŋamilon idulak me men idupeges, i get mok jamel memasendaŋan sagaflon mai dutulufuna didaŋsape.#Jona 3:6 22Ge ŋa aŋ ŋepaiaŋ, Betenaek ujanlon aŋ nami naon ŋalekoi Tirus Sidon mai beleŋanap naon aŋalewoi. 23Kapernaum o, o did latnen bisiop madowoi? O Hadeslon uduwoi! Nauknauk ujan olon didulak me Sodomlon didupe, i nal gazo elon ienpe.#Mat 4:13; 8:5; 9:1 24Ge ŋa aŋ ŋepaiaŋ, Betenaek nallon o naon ŋalekoi Tirus Sidon beleŋanap naon ŋalewoi.#Mat 10:15
Jesus taman biŋan ibise
25Saen melon Jesus auadin jabig ibol, Mam, did tan mai inan Ujanzen, ŋa pez ŋepano, o abaŋ e tamol kaginkagindaŋan kamaŋgaz mai noadinnen miŋianilak, ge aikamo peteŋanalak.#Kor I 1:26–29; Apos 17:24 26Au, Mam, o kanimlon megin unauwoi ubollak. 27Abaŋ daŋan ŋainag Mam ipanaglak. Ta i Nanunai so iloŋime, ŋan Mam i mon. Ta i Mam so iloŋime, ŋan Nanunai i mon, tata Nanunai i boboloanip peteŋaniwoi ibolime i mon mai.#Mat 28:18; Joh 3:35; 17:2; Fil 2:9
Muzuandaŋan demadodime me Jesus iwigidin
28Ŋa izignen asoŋan, daŋan aŋ tiwomi izozime, lami muzuange atozame, ŋa ŋonoaŋpa aŋ bubumi pasa iboloi.#Mat 12:20; Jer 31:25; Jer 6:16 29Inag muzuan aŋ ukukudip atoz, ŋa anasagpa inag kagin aŋale, ŋa ilog mazoz, bubeg mai bini idug ŋatozŋamelakoi, meginpe aŋ nutumi pasa ibolp madonen aŋalewoi. 30Ŋainag muzuan me gamun, ŋainag joazeknen muzuan tea.#Joh I 5:3
Currently Selected:
Mateus 11: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
