Lukas 4
4
Satan Jesus kibiani
1Jesus Auanuzgundaŋan Jordannenge imulge Uzgun i nal 40 fatu udaulon iduzise iduzile. 2Meginge Satan i kibiani. Nal me daŋanlon i anaŋ so jani. Meginge nal menen wadanlon i pitol funi. 3Satan i ipai, O Anut Aitap, ubolpa, pat e sepalaŋ inauwoi. 4Jesus auan jabig ipai, Anut inan gazek ienime ibol, Tamolpain anaŋlon mon bas so demadodime, tea, i Anut azu dadodadolon bas demadodime.#Deut 8:3 5Satan Jesus did ujanlak iduzig dile, tanlak panupanu daŋan peteŋani. 6Satan i ipai, Ŋa oina nimalon e daŋan ŋenauwoi, inan jes daŋan o ŋepanowoi, me inaglakoi, ŋa get daŋan panaglak, ŋa ta ŋepaniwoi ŋabol, ŋepaniŋame. 7O ŋa naognen ubal udup godoanagtap, daŋan mok oina ŋabol. 8Jesus auan jabig ipai, Gazek ta ienime, O Ujanzen, oina Anut mai mon godoani, i mon dagom paniwoi ibol.#Deut 6:13, 14 9Satan Jesus iduzig Jerusalemnen dile, ubouab fijuŋlak bise inaug ipai, O Anut Aitap, o elak sisup udu. 10Gazek ienime, ibol, i inan eŋel owoi pidinoi, o dibisiop ditizinowoi,#Kan 91:11, 12 11nimadinlon o dibiosawoi, meginpe o oina nie patlon so pututiwoi. 12Jesus auan jabig ipai, Azu ienime egin: o Ujanzen, oina Anut, so kibianiwoi.#Deut 6:16 13Satan kibianek daŋan inau binilag, i Jesus saen ta ibinig ile.#Heb 4:15
III. JESUS GALILEANEN UZAT INAU, 4:14—9:50
Jesus Galileanen imais; inan azu, inan meselanek Nasaretlon
14Jesus Uzgun tiwonlon Galileanen imul. Ilemeg inan biŋ fatu daŋan fuamime. 15Ubaouablon i sansan azu ibolime, tamolpain daŋan inan biŋan dibisadime. 16Itozmeg i Nasaretnen itase, melon get mademeg itub. Inan kagin egin: ubounallon i sansan sinagoglon iduimelak. En megin mon inau. I iduleg imaisge azu isutiwoi ibol. 17Profet Jesaia inan gazek depani. Jesus ipasig azu inasi, melak Jesaia egin gazelak.#Jes 61:1, 2 18Ujanzen inan uz ŋa foglak madoime, i ŋa kibiniaglak, tamolpain waiz totol gamun ŋipidinpe deŋalewoi. I ŋa noagge nase ŋa sebaneklon demadodime me pasek azu ŋipinidinoi, meladin ditaulak po ibolnen azu, titilialak putudin pasiwoi ŋase. 19Ŋa Ujanzen inan saen gamunoi azu ŋaboloi mewoi ŋase.#Lew 25:10 20I gazek funati, dinek panilag imatal; ablak demadelak i daŋan Jesus delale. 21Me i azu pidin ibol, Gazek e gazo niŋon inaug ienime. 22Daŋan iwoi sigianimeg dibol, inan azu auanlon pasi ibollak me kanimdaŋan, gamun mok, mewoi dizut deladalmeg dibol, Abolpa, me Josef inan ai?#Joh 6:42 23I pidin, Aŋ bo azu e paiagoi tat: Kibinektamol, o sibe kibiniowoi, maŋau Kapernaumnen unaulak am aloŋ, megin mon oina mezaupanu elon mai unau.#Mat 4:13 24Meginge i auan bateg ibol, Malik ŋa aŋ ŋepaiaŋŋame, profet ta inan mezaunpanulon gumun tea.#Joh 4:44 25Malik ŋepaiaŋ, Elias inan saenlon umaz tolgen fulei siks mai did funatig ien, ui teag, mewoi pitol idu. Melon Israel ilonlon painbob kuzum ditoz;#Kiŋ I 17:1, 9; 18:1; Jak 5:17 26ge Elias menen ta izinnen ilawoi, Anut so ibol. Tea, Sidon baŋenlon Sareptanen painbob ta izinnen mon Anut Elias inauge ile. 27Elisa inan nallon Israelwain tinidin pizapizdaŋan kuzum ditoz, ge menen ta tinin kibineknen so ŋale, tea, Siriawain Naeman siben mon.#Kiŋ II 5:14 28Tamolpain ubouablon azu me diloŋmeg daŋan buzudin isag, 29dimaisge panulonge Jesus dibitig duduzig did melak nadin panu saseg ienlak, geglon denau, detanip iduwoi dibol. 30Ge Jesus i liluŋ mon ileg ibin, i diabinen teabe.
Jesus Kapernaumnen azu ibol, ta bugadaŋan ikibine
31I Galilea panu Kapernaumnen itase. Ubounallon sansan azu pidin.#Joh 2:12 32Inan azuoi i daŋan dizut deladal, inan azu tiwondaŋanlakoi.#Mat 7:28, 29; Joh 7:46 33Ubouab melon tamol ta bugadaŋan iseg made, me gauz ibobmeg, ibol, 34Se! Jesus, Nasaretwain, o am maip abaŋte tat? Am funumawoi use? Ŋa o ŋaloŋ, o Anut inan Gun. 35Jesus i bebanig ipai, To ubol, o i binip ula! Mug buga tamol me aenta liluŋlon tanimeg, ibinig ile, tinin kin so funi. 36Daŋan dizutge nug dikibiaimeg dibol, Azu me dodin mok! Inan tiwonlon buga gegaun ipidinime, meginge diau, 37inan biŋ mug imais panupanu fatu daŋanlon ile.
Jesus Petrus inan zauan ikibine, tamolpain aenta mai
38Jesus ubouab me ibinilag, Simon inan ablak iduse. Simon inan zauan maiai ujan funig made, iwoi i Jesus digod. 39Jesus ipazge izinnen ile, maiai ipaimeg ibini. Mug imaisge biadin ipalumeg itoz.#Apos 28:8
40Ad idulawoi inaumeg tamolpain daŋan inadingaz, i maiai funfundaŋan, me diŋalge dise. Me dadodado Jesus inan niman fodinlak bise, meginge i faun tinidin pasa ibol gauai.#Mat 11:23; Apos 28:9 41Aenta kuzum buga ifulak, i dibinge didug dibob, O Anut Ai! Ge Jesus i bebanag ipidin, i azu ta so diboloi, i diloŋ i Kristus, mewoi.#Mat 8:29; Mar 3:11, 12
42Ad faun itaseg Jesus ablakge tapas idug fatu matonlon ile. Tamolpain dimaisge debezani. Diseg dililitiwoi denau, so ilawoi, mewoi. 43Ge i pidin, Ŋa panu aenta mai Anut kiŋdom inan azu gamun ŋipidin mokoi, mewoi ŋa noagge ŋase.#Luk 8:1 44I ileg Galilea fatu aentalon ubouablon azu ibolmeg itoz.#Mat 4:23
Currently Selected:
Lukas 4: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
