Lukas 23
23
Jesus Pilatus naonnen
1Medaeŋ daŋan gugup depaug dimaisge Pilatus naonnen duduzig dile.#Luk 20:25 2Men i iwoi uf denau: Am tamol e anasilak, i panupanu ladin pasiime, kaisar gaŋmalan depaninen piziana, i ibol, i siben Kristus, i kiŋ. 3Pilatus i sedazeg ibol, O sibe Juda nadin kiŋ ubolume? I auan jabig ipai, Ŋan ubolume me, ŋa kiŋ. 4Meginmeg Pilatus waliŋgatengaz, tamolpain malanzen mai pidin, Ŋa tamol e siben tininnen ta so ŋenasiŋame. 5Ge i mug gik dibolge dibol, I tamolpainbadim daŋan etedin isaelak, Judea fatu daŋanlon inan azu ibol, bebaŋeg inaug ile, Galileanenge en idu. 6Pilatus me iloŋmeg sodoz inau, tamol e Galileawain tat? 7I iloŋtag i Herodes inan fatu menwain dibol, i inaug Herodes izinnen duduzig dile; i gazo e maig Jerusalemnen made.#Luk 3:1
Jesus Herodes naonnen
8Herodes Jesus nasimeg ilon gamun, i get nasiwoi sisikmeg itoz, inan biŋ iloŋlakoi. I ilon ibol i inan maŋau ta i naonnen inauwoi.#Luk 9:9 9I Jesus sedaze kuzum, ge Jesus auan kin so jabi. 10Waliŋgatengaz, gazekmaŋaugaz maig ditiuzge iwoi uf metalun denau. 11Herodes, inangaz mai megin mon daŋan dezezeŋanig dizan dewai depani. I jamel kubel mai dunule depanilag, faun inaug Pilatus izinnen imulge dile. 12Nal melon Herodes Pilatus mai faun detemanig tizan diabi, i get siailon ditozlak.
Jesus faun Pilatus naonnen
13Pilatus i waliŋgatengaz, kibiaipanekgaz tamolpainbadim mai wigidinge, 14i me pidin, Aŋ tamol e aŋaleg ase, i panupanu ladin pasiime abol. Aloŋ, ŋa aŋ noaminen ŋesedazelak, ge abaŋ menen, aŋ iwoi uf anauame, ta i siben tininnen so ŋenasilak. 15Herodes megin monge i faun inaug imulge ise. Melon aŋ aloŋame, abaŋ ta mewoi funip imatoi, i mai so inasi. 16Mewoi ŋa i mol tituidaŋan melon ŋufunip faun ŋepasiwoi ŋabol.
Jesus Barabas mai. Jesus demeselani, zaiwoi dibol
17Kibiaiŋ ienlak, kiap Juda nadin ubounal ujanlon sebanekai taimon pasiwoi. 18Meginge i debezaug deŋale taimon, dibob zen mok, dibol, Funip padaloi, Barabas mon pasi penamape! 19Tamol me aenta mai panu talon ju denaulakoi, ta mai funi imat pasilak, mewoi sebaneklon dufunatilak. 20Pilatus faun azu pidin, i Jesus pasiwoi, mewoi dadom inau. 21I auadin dibiseg diwog, Zai mok zai! 22I sidizia tol, ibol, I abaŋte salan ta inaulak? Ŋa abaŋ ta mewoi funip imatnen so ŋenasi, mewoi ŋa mol tituidaŋanlon ŋufuni monpa ŋepasiwoi. 23I Pilatus gauz dezezabemeg zen mok dibobdime, deseseŋanig depai, i jakebazeklak izaiwoi. Melon i deseŋani. 24Mewoi Pilatus auadin uzi pinidin, dibollak megin denauwoi ibol. 25Mewoi i wagai funekbibian mai me wadan i sebaneklon dufunatilak, ipasi, Juda dejapallak megin, ge Jesus i pinidin, dibollak egin i denaup depaniwoi ibol.#Mat 17:12; Apos 3:13, 14
Golgatanen duduzig dile
26Jesus duduzig Golgatanen dile. Meginmeg dallak i tamol ta diabi, nean Simon, Kirenewain, i umlonge ise, me Jesus inan jakebazek gegaun depanig i muzinnen joazep maip dilawoi.
27Tamol daup metalun pain kuzum mai i duzge dile. Pain iwoi dita, digosdigos duzge dile. 28Ge Jesus i diŋiag pidin, Jerusalem aipain, aŋ ŋawoi so ata mon, tea, aŋ sebami aŋoi, nami nunumigazoi mai ata. 29Aloŋ, saen ta isowoi, melon aŋ aboloi: Pain inig ditozlak, nanun so denaulak, me nadin su so dianilak, pain me tinidin pasa iboloi.#Luk 21:23 30Meginmap mai did dipidinoi, Am toanama! Bubun dipidinoi, Am stoanama!#Hosea 10:8 31Ja baslon megin denautap, makaz gazop dodin inauwoi?#Bo 6:16; 9:6; Pet I 4:17
32Wagaitamol azugen i maig didauzig dile, i Jesus mai dezaiwoi dibol.
Jesus jakebazeklak dezaig imat pasi
33Aben me i Jesus dezaiwoi dibollak men ditaseg i nean Lasen deblani. Men i Jesus dezai, wagaitamol azugen me mai, ta waŋlon, ta ŋaslon. 34Ge Jesus ibol, Mam, abaŋ e ilo padal, i denaudime me so diloŋ! Inan jamel diŋal, gaŋmalan dititig deŋaleg leŋadinlon dewae.#Mat 5:44; Jes 53:12; Kan 22:19 35Tamolpain abaŋ deleŋanimeg ditiuz, kibiaipanekgaz bo i dizan dewai depanimeg dibol, Aenta putudin pasilak, i Kristus, Anut inan pilianektap, siben mai patun pasiwoi. 36Opas mai naon dikibiani. I diseg naz kisipan mai dukubulilak depanig 37depai, O Juda nadin kiŋtap o sibe patu pasi! 38Jakebazek gatenlak Grik mai Rom mai, Juda mai nadin azulon degazelak: E Juda nadin kiŋ.
Jesus wagaitamol azugen mai
39Wagaitamol ta, i mai dezailak, mai dizan iwaig ibol, O sibe Mesias ubol? Meginpe o sibe patu pasi, am mai! 40Ta i laiŋ pazemeg ipai, O Anutoi mai so uzezume? O megin mon mai demeselanog madoume! 41Id auzun bo abaŋ tesaeg tatozlakoi gauai wadan depanaddime, me i siben tininnen teabe. 42I Jesus ipai, Jesus, oina kiŋdomlon ulemap ŋa kin ilo isoupa.#Mat 16:28 43Jesus ipai, Malik ŋepaoŋame, gazomnen o ŋa mai Paradislon temadowoi.
Jesus imat pasi. Anut bagoz iben ta inaug itase.
44Admetelaen 12 eginlon fatu jabi idug mafuz pani, admetelaen 3‐lon bini. 45Ad malan jabig so lelaman. Tempellon galuŋ gun mok gun inan dalauan jamel melaen geg denaulak, siben besesali azugen.#Ekso 36:35 46Mug Jesus auan metalunlon iwog ibol, Mam, ŋainag uz oina nimalon ŋepanop madowoi. Megin ibollag nitun ileg imat.#Kan 31:6; Apos 7:59
47Opasgaten abaŋ inaulak inasig, Anut kalel panimeg ibol, Malik mok, tamol e i siben tininnen tea, i taoz. 48Tamolpain malan metalun men abaŋ denasiwoi diseg ditiuz. I me denasimeg nadin petezadin dititig dimulge dile. 49Inan kadoigaz, paingaz mai me Galileanenge i maig duzge diselak i kin iben egin ditiuz, abaŋ mai denasi.#Luk 8:2
Jesus denau
50Uloŋ, tamol ta made, nean Josef, i Juda nadin betenaekgaten ta, i gauai taoz mai. 51Get aenta Jesus dufuniwoi dibollak, i mai bubudin taimon teag made. I Arimatiawain, Juda nadin panu ta. I mai Anut kiŋdomoi malan inaug made.#Luk 2:25, 38 52Pilatus izinnen ileg Jesus sesanunoi igod. 53Meginge ileg ipasig puzinen jamel gizaudlon inule, ŋaleg ileg, fedafod ta patlon depasilak ien, melon ta get so denaulak me ilonnen denau. 54Nal me ubouoi kibineknen nal, ubou mug pisiniwoi inauime.
55Paingaz i Jesus mai Galileanenge diselak me delalemeg demade, dodin sesanun fedafodlon denau.#Luk 23:49 56Meginge dimulge dileg gazeŋmoz dikibine. Ubounallon i se demade, kibiaiŋ ibolime megin.#Ekso 20:10
Currently Selected:
Lukas 23: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
