Lukas 21
21
Painbob inan gaŋmalan kitekoi
1I itadmeg inasi, tamolpain filiadin Anut kunuplon gaŋmalan detani. 2I painbob waiz ta mai inasi, i gaŋmalan kinkin azugen mon itani. 3Meginge i ibol, Malik ŋepaiaŋ, Painbob waiz e i aenta daŋan me kunuplon gaŋmalan detanidime nenaza.#Kor II 8:12 4I inadin neŋadin subuŋanlon aenta mon detani, ge pain e waiz mok me inan gaŋmalan daŋan itanig aben kude.
Tempel pitiŋinekoi, fatu wadan bininenoi mai
5Taitai tempeloi dibol, i pat kubellon, jes abaŋlon mai bala panig ienime dibolge, Jesus ibol, 6Saen ta iduwoi, melon abaŋ kubel gazo ailame, menen pat ta aenta fonlak so binip ienoi, daŋan mok pitiŋina pasiwoi.#Luk 19:44 7I desedazeg depai, Peteŋanek, saŋeptap me iduwoi? Nal me gazop sizizlonmap bagoz aitlon anasip aloŋoi?
Wadan saen inan bagoz malanmalan
8I auadin jabig pidin, Dab anaup, ta aŋ so zegaip duzaŋoi! Kuzum gazop inag neaglon disop diboloi, Ŋa Mesias! Nal mug pisini! Aŋ auzpa so atozoi! 9Ge aŋ ju biŋ, tamol siailon bubula dimais mai aloŋmap, so azut mon, abaŋ megin gazop imugpa iduwoi. Fatu wadan bininen nal bo saen melon tea. 10Batemeg i pidin, Tamolbadim fun ta fun aenta mai, kiŋ ta kiŋ aenta mai bubula dimaispa, nug diŋiawoi. 11Mim metalun diduwoi, ente mente fatu pitol ijaboi, siasi salan ienoi, did latnen abaŋ dizeznen metalun bagoz iben mok mai ditasap denasiwoi.
Meglaumgaz ŋalek uzekoi
12Abaŋ me daŋan get so idulak eginmap, i aŋ dibiaŋoi, diŋiliaŋ duzaŋoi. I aŋ nadin betenaekablon donoaŋoi sebaneklon detanaŋoi, kiŋgaz, gowerner noadinnen duduzaŋpa alawoi, me daŋan inag neagoi.#Luk 12:11 13Ge megin denaumap aŋ inag neag sigianiwoi. 14Azu e me bubumilon agazep ien, meginpe gazop iduwoi inaumap aŋ lami so bebazewoi, getami pasinenoi dodin aboloi.#Mat 10:19 15Ŋa sibeg auami ŋubufatewoi, lami mai kaginkagin paniwoi, nami liwomi jabekgaz dadon isap auami so detalewoi, jami digeunen so mok diloŋoi.#Apos 6:10 16Megin mai nami tinami temamigaz, timi lumigaz, timi tauamigaz mai dibiaŋpa agez nimadinlon donoaŋoi, azi, namigaz taitai mai difup dimat pasiwoi. 17Dadondadon dimaispa, inag neagoi aŋ demeselanaŋoi.#Mat 10:21–22 18Ge getamizaun taimon ta mok so padaloi.#Luk 12:7 19Aŋ ibinip adunenlon mon nami nutumi atataz aŋaloi.#Sai II 15:7; Heb 10:36
Jerusalem pitiŋinekoi, tamolpainbadim jaeŋ funekoi mai.
20Aŋ Jerusalem anasimap inan agez ditilianip dililitip demadodime, melon aŋ aloŋoi, inan saen pitiŋineknen siziz ien. 21Meginpe me i Judealon demadodime, jabnen diauwoi, Jerusalemlon demadodime, dibinip ditasawoi, umlon, gazaŋlon me panulon so didulawoi. 22Me wagaznal abaŋ get igezge ien, me daŋan niŋon inauwoi.#Jer 5:29 23Gadon, melon paingaz aidaŋanlak, tinangaz nanun su dipinidindime me jaeŋ funek metalun fatu jabiwoi, tamolpain e buzun metalun toanawoi. 24Sebuzi malanlon aenta jaeŋ zudinoi, aenta diabpa gobgaz leŋadinlon denawoi. Gobwain Jerusalem dipiziŋiniwoi, gobgaz nadin saen idusemap eginmap.#Rom 11:25; Bo 11:2
Saen binek bagoz wadan. Tamolai imul isoknen
25Meginmap ad, fulei patuilon mai maŋau iben denasiwoi. Mas gauz liŋanmap, siz ujan duban metalun tani pisinimap, tanlak tamolpainbadim daŋan ladin deladalnenlon jaeŋ funek ijaboi. 26Meginmap abaŋabaŋ tan fufulek daŋanlak iduwoi inauime, me tamolpain dizeznen metalun pinidinoi, abaŋoi malan nauknen, tiliŋadin zuazouknen mai nadin jaeŋ zudinpa dimatoi. Didnen tiwon mai dininimap gojogoja diboloi. 27Me uzip Tamolai timtaenlon inan tiwondaŋan, biŋan, kubelkubeldaŋan imulpa idumap denasiwoi.#Dan 7:13; Fil 4:4, 5 28Abaŋ me daŋan inauwoi inaumap, aŋ amaispa getami bisap, nami putumipasinen isoime.
29I azu faŋanfaŋan pidin, sizizig ja aenta daŋan mai ailpa! 30I dilubmap aŋ aloŋame, saen ifunen sizizlon ien. 31Megin mon mai aŋ anasimap abaŋ ŋabollak pisinig iduime, aŋ aloŋoi Anut kiŋdom mug sizizlon ienime.#Luk 17:30 32Malik ŋepaiaŋŋame, Daz gazo e so biniwoi, abaŋ me daŋan get iduwoi eginmap. 33Did tan mai dibinip diauwoi, ge ŋainag azu ienlalon i so itautoi.#Luk 16:17
Demazaz, godoani maiwoi
34Aŋ sebami dab panaŋoi, nami bubumi aiulon anaŋ tetameknenlon, tan abaŋ aentawoi kankanlon mai so muzuan mon! Meginpe nal ŋabollak u ibolpa mawadan egin so biaŋoi.#Mar 4:19 35Me tanlak ditozdime daŋan fodinlak iduwoi.#Tes I 5:3; Mar 13:33; Bo 6:17 36Amazazmap, agodoanimap amadop, aŋ stemaneknen tiwon aŋalewoi, aŋ abaŋ alan metalun e daŋan idumap tuzugusinen aloŋpa, Tamolai naonnen atiuzoi.
37Adlon i tempellon azu pidin, juzameg muzinnen ileg tidomlon Gazeŋdidlak made. 38Tamolpain daŋan bomon tempellon didudime, inan auan diloŋoi demade.
Currently Selected:
Lukas 21: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
