Lukas 13
13
Tulufunek idaŋsaknen bebanek azu
1Taitai saen melon dise, i Jesus Galileawainoi sai depani, me nadin daz Pilatus fuzakmeg, inadin janauknen dazuk inan daz mai kubulilak, mewoi. 2I auadin jabig pidin, Aŋ abol tat, Galileawain me i Galileawain aenta daŋan beleŋanag aupasekbibian, i megin dimat pasilakoi?#Joh 9:2 3Tea ŋabol, aŋ sebami so tulufunaŋpa adaŋsemap, aŋ daŋan mon apadaloi.#Kan 7:13 4Ta ŋabol: Tamol eitin me fodinlak Siloa ab sutan ibal idulak, ifug dimatlak, me tat Jerusalemgaz beleŋanag tinidinnen jadaŋan tat abol? 5Tea ŋabol, aŋ so tulufunaŋpa adaŋsemap aŋ megin mon apadaloi.
Guzab so ifulak me
6Azu faŋanfaŋan ta ipidin, Tamol ta guzab ta inan umlon ipaelak. Alouge i niŋonoi ile, iŋaloi ibol, ge tata so inasi.#Mat 3:10; 21:19 7I umkibinek ipai, Uloŋ, umaz tolgen mug guzab elak niŋonoi malan ŋenaulak, ta bo so ŋenasi, segauz tazewoi, aitoi iwoi tan tiwon se bedaniwoi? 8I auanlon pasi ŋaleg ipai, Ujazen, biniŋan, umaz e maip itiuzoi, ŋa baŋen ŋetazep gauaipa dazuktaen ŋeŋalep ŋenauwoi,#Pet II 3:9, 15 9Meginpe umaz talon ifu gauaioi tat, ge mai teatap, segauz o tazewoi.
Uboulon Jesus pain kesepazup kibine, mewoi dupusai
10Uboulak sinagoglon azu ibol. 11Men pain ta made, i buga tininlon mesapen bodok mug umaz 18 daŋan kesepazup takok mon itoz, tiduk itoznen, itadnen so iloŋ. 12Jesus i nasimeg izinnen wagig ise, ipaig ibol, Pain o pisiop mado, buga o sifililiowoi! 13Meginge niman fonlak inau. Gazog pain imais gauai, tinin tiduk i Anut kalel pani.#Mar 7:32 14Sinagoggaten bo, Jesus uboulon me inaulakoi, ilon bebazeg imais, tamolpain pidin, Uzatnal siks diendime, menen ta asop tinimi kibiniap aŋalewoi, uboulon amoi! 15Meginmeg Ujanzen auanlon pasi ŋaleg ipai, Bubumi sakek aŋ! Aŋ sebami dudumi uboulon bulmakau doŋki mai so apas naz dimoloi adauziame?#Luk 14:5 16E i Abraham inan nanunpain, Satan i mug umaz 18 ipaug itozlak, aloŋ, ubou so pasi paniwoi, abol?#Luk 19:9 17I megin ibolmeg liwon diabilak me daŋan mamai ifu; ge tamolpain dadon isag abaŋ kubel, Jesus inaulak, mewoi zigia mon pasi.
Didnen kiŋdomoi faŋanfaŋan ibol
18Mewoi I ibol, Didnen kiŋdom it wilisen, ait ikol e ŋaboloi? 19mustard patun egin, me tamol ta iŋaleg inan umlon ipaelak. I isag ile, ja inau, ma did paenlon dizoudime, disediseg inan zaeŋ ilonnen uz denau.
20Faun te ibol, Ait didnen kiŋdom ikol e ŋaboloi? 21I sepalaŋ didinen abaŋ ikol, me pain ta ŋale, kau faun tabiz tolgen mai jabig ienmeg, alouge daŋan isol pasi.
Anut kiŋdomlon tadulawoi. Dalauan kokoŋ
22Meginmegin i panu ujan kitek mai zazeg uzge azu pidin itozmeg ileg Jerusalemnen itase. 23Santa ta i ipai, Ujazen, o dodin ubol, kuzum so tat putudin isap demadowoi? Meginge i pidin, 24Aŋ gik abolpa, dalauan kokoŋlon adulawoi! Ŋa ŋepaiaŋ, Kuzum didulanen bo so diloŋoi.#Fil 3:12 25Abfun imaispa dalauan funatip, saen aloupa aŋ beŋten atiuzmap dalauan ititip aboloi, Ujazen, pasi penamapa! Meginpe i aŋ auami jabip paiaŋoi, Ŋa aŋ so ŋaloŋ, domten tatge ase.#Mat 25:11, 12 26Ibolmap aŋ aboloi, Am o naonen anaŋ anilak, tuz imililak, o amnama panu atenlon azu paiamalak.#Mat 7:22, 23 27Ge i egin auami jabiwoi, Ŋa faun te ŋepaiaŋ, ŋa aŋ so ŋaloŋ, domten tatge ase; aŋ daŋan asaziz amulmap, aŋ salasalabibian!#Kan 6:9 28Aon tiŋia, jami tetete ibolnen gauz mok ienoi, aŋ gazop Abraham, Isak, Jakob profetgaz daŋan mai sagep Anut kiŋdomlon ailmap, ge aŋ muzinnen betetanaŋpa amadowoi. 29Jauazti baŋen, jauan baŋen, kazag baŋen, dadau baŋen gazop maip disowoi, Anut kiŋdomlon tuz dimilimap demataloi.#Luk 14:15 30Kabe aloŋoi: Tata aloualou mon diselak, i malanmalan demadowoi, aenta i malanmalan ditozlak i alou mon demadowoi.#Mat 19:30
Herodes Jesus ŋale uzi; Jesus Jerusalemoi teŋaen alan
31Nal melon farisea taitai diseg i depai, Umaispa, enpa uwauwoi, Herodes o funowoi ibol. 32Ge i pidin, Alap, foks me apaip: Uloŋ, ŋa buga ŋukuduaŋame, maiaidaŋan ŋikibiniaŋame, me gazo boŋanip mai zabop mon uzat e ŋibiniwoi, 33Ge gazo, boŋanip zabop mai ŋatozpaged. Egin mon sansan get inaulak, panu talon profet ta dufunip imatnen tea, Jerusalemnen mon.
34Jerusalem, Jerusalem, o profetgaz ufug dimatdime! O izinen Anut totol inaug diselak, me o patlon ufug dimat. Ŋa mug nal kuzumlon oina nanugaz ŋetemanawoi ŋabol, kekazek tinan inan nanun banin paenlon stoanaime egin, ge aŋ amoilak.#Mat 23:37–39 35Aloŋ, nami ab fuzai denaup ienoi. Ŋa ŋepaiaŋ, Aŋ ŋa faun te so anasagoi, get saen itasap abolmap: Biŋandaŋan me, i Ujanzen neanlon isoime! eginmap mon nasagoi.#Kan 69:26; Kan 118:26
Currently Selected:
Lukas 13: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
