Johanes 20
20
Jesus imaislak
1Wik inan nal matulon Maria Magdalena, fatu so sesali gauaimeg, fedafodlon ileg pat auanlon pasilak ienmeg nasi. 2Meginge i palug Simon Petrus meglaum aenta mai iwoi Jesus imatlak me zidinnen ileg ipidin, Ujanzen deŋaleg dilelak, domten tat denau, am so aloŋ.#Joh 13:23 3Meginge Petrus meglaum ta mai ditaseg fedafodlon dile. 4I auzun depalu taimon, meglaum ta me kin pasak palu Petrus beleŋanig malanmalan fedafodlon itase. 5Takokge idug malan ilonnen ilelag jamel kebazan ienmeg nasi, ge ilonnen so idule. 6Alouge Simon Petrus uzig ileg fedafodlon iduleg jamel nasi. 7Me jamel kamo, gaten inan, me jamel aenta mai so ien, tea, funig aben ibenlon ien.#Joh 11:44 8Meginge meglaum i malan fedafodlon itaselak me mai iduleg nasig ilonlon malik. 9Ge i wagam azu gazek so diloŋ, i faun mateŋlonge imais mokoi me.#Kor I 15:4; Apos 2:24–32 10Meginge meglaum faun nadin ablon dile.
Maria Magdalena Jesus nasi
11Ge Maria fedafod muzinnen itameg itiuz, itameg i takokge fedafodlon soak. 12I eŋel azugen jamel kebazadindaŋan, Jesus tinin ienlak, ta gaten fun ta nien funge dematalmeg il. 13I depai, Pain, o aitoige utaume? I pidin, Ŋainag Ujanzen deŋaleg diaulakoi, domten tat denau, ŋa so ŋaloŋ. 14I megin ibolmeg i idaŋseg Jesus itiuzmeg nasi. Ge i so iloŋ tamol me Jesus.#Kor II 5:16 15Jesus i ipai, Pain, o aitoige utaume? O it bezaniume? Tamol me umfun tat e ilon ibolge i ipai, Tamoluja, o tat ŋaleg ule, paiagpe o domten unaulak, ŋa ŋalap ŋeŋalewoi. 16Jesus i ipai, Maria. I idaŋseg Hebrea azulon ipai, Rabboni, me fun Peteŋanek. 17Jesus i ipai, O so biag mon, ŋa get Mam izinnen so ŋalelak; ge ŋainag taiggaz zidinnen ulap pidin, Ŋa ŋainag Mam aŋnami Temami mai, ŋainag Anut aŋnami Anut mai izinnen ŋalaŋame.#Heb 2:11, 12; Kan 22:23 18Maria Magdalena ileg meglaum pidin, Ŋa Ujanzen ŋenasilak. Azu i ipailak me daŋan ipidin.
Meglaum Jesus denasi
19Meginge nal melon mon juza, wik nal matulon, meglaum Judaoi dizezge dalauan dufunati depasig Jesus ileg leŋadinlon itiuzge ipidin, Aŋ mazozdaŋan amado! 20I megin ibolge i inan niman gezaŋen mai peteŋana. Meginge meglaum Ujanzen denasimeg i ladin gauai.#Joh I 1:1; Joh 16:22 21Jesus faun te pidin, Aŋ mazozdaŋan amado, ŋainag Mam ŋa noaglak egin, megin ŋa aŋ ŋonoaŋŋame.#Joh 17:18 22Me ibollag i wi pinidinge ipidin, Aŋ Auanuzgun aŋale.#Kor I 15:45 23Tata inan aupasek aŋ apaze idumap ŋan paze idu, tata inan so apaze idulak ien monoi.#Mat 16:19; 18:18
Tomas mai Jesus nasi
24Tomas, ai twelf menen ta, nean ta Didimus, i Jesus itaseg aenta maig so demade.#Joh 11:16; 14:5 25Mewoi meglaum aenta depai, Am Ujanzen anasilak. Ge i pidin ibol, Ŋa nimanlon titui inan batez so ŋenasip, nimag batezlak so ŋenaup, nimag mai gezaŋenlak so ŋenaup, ŋa iloglon so malikoi.#Joh 19:34
26Ubou taimon binig inan meglaum faun ab ilonnen demade, me Tomas i maig demade. Dalauan funatig ienmeg Jesus ileg i leŋadinlon itiuzge ibol, Aŋ mazozdaŋan amado!#Joh 20:19 27Uzig i Tomas ipai, Oina nima tikun wotep isop ŋainag nimag sae nasipe, oina nima wotep gezaŋeglak nau, so ilose ilole mon, ilolon malik. 28Tomas auan jabig ibol, Ŋainag Ujanzen, ŋainag Anut.#Joh 1:1 29Jesus i ipaig ibol, Tomas, o ŋa nasaglakoi o ilolon malik? Putudin isap demado me so denasimeg ladinlon malikdime.#Pet I 1:8
30Bagoz kuzum ta mai Jesus meglaum noadinnen inau me buk elon so gazelak. 31E bo gazelak me aŋ lamilon malikoi, Jesus i Kristus, Anut inan Ai. Meginpe lamilon malikmap aŋ inan neanlon bas niŋon aŋalewoi.#Joh I 5:13
Currently Selected:
Johanes 20: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
