Johanes 18
18
Judas opasgaz idauzig Jesus diabi
1Jesus azu ibol binilag i inan meglaum mai ditaseg dileg naz Kidron dedaiag um ta aentanen ien men didule. 2Judas me i blaninen i mai aben me iloŋ, Jesus nal kin kuzum meglaum mai men dilelak. 3Meginge Judas opas, waliŋgaten farisea mai nadin begabeg iŋalge lamp, sul judazuk maidaŋange dile.#Luk 21:37 4Jesus fonlak abaŋ idunen me daŋan iloŋge itaseg pidin, It abezaniame?#Joh 19:28 5I auan diabig dibol, Jesus, Nasaretwain. Jesus ipidin, Ŋa ŋan ie. Judas me i blanilak i maig ditiuz. 6Ŋa ŋan ie e pidinge i desazizge tanlak dibal didu.#Joh 7:46 7Meginge i faun sidizia, It abezaniame? I te dibol, Jesus Nasaretwain. 8Jesus ibol, Ŋa ŋan i get ŋepaiaŋlak; aŋ ŋa abezanagtap aŋ e ibin.#Apos 10:21 9Azu get ibollak me niŋon inauwoi mewoi ibol, O ŋa panaglak me ta izignen so padal.#Joh 17:12 10Meginge Simon Petrus badiz kurus ibolge waliŋgaten inan ai inan tiliŋan waŋ me sebazi, ai nean me Malkus. 11Meginge Jesus Petrus ipai, Oina badiz abenlon nula, nazgab Mam i panaglak me ŋa so ŋimiliwoi tat?#Mat 26:39
12Meginge opas opasgaten mai, Judagaz nadin begabeg mai Jesus diabig depau. 13I duduzig malanmalan Hanas izinnen dile, i Kaifas inan nenaten, me umaz melon waliŋgaten imade. 14Me Kaifas get Judagaz kibiai pinidinlak ibol, Tamol taimon tamolpainbadimoi imatmap me gauai.#Joh 11:29, 50
Petrus Jesusoi kakez
15Me Simon Petrus Jesus uzig ile, meglaum ta me mai megin inau. Meglaum me waliŋgaten iloŋlakoi i Jesus maig waliŋgaten inan panu atenlon didule.#Joh 20:3; 21:20 16Ge Petrus dalauan muzinnen itiuz. Meginge meglaum ta me waliŋgaten iloŋlak ileg aipain dalauan tizinilak me ipaig Petrus ilonnen duzi. 17Meginge aipain dalauan tiziniimelak me ipai, O mai tamol e inan meglaum ta tat? I ibol, Ŋa tea. 18Begabeggaz tempel inan tizinekgaz ta mai fatu jizunlakoi ja dutunig tinidin pazemeg ditiuz; Petrus mai tinin ja pazemeg maig ditiuz.
Waliŋgaten Jesus azuoi sedaze
19Waliŋgaten Jesus meglaumoi, inan azu peteŋanekoi mai sedaze. 20Jesus auan jabig ibol, Ŋa beŋten panupanu azu ŋipidinlak; ŋa sanasan sinagoglon, tempellon azu ŋabollak, Judagaz sansan melak demadodime, kukumlon ŋa azu ta so ŋabollak.#Joh 7:14, 26; Mat 10:27 21Aitoige ŋa sidiziag? Me i ŋainag azu diloŋlak me sidiziap nasi, ŋa dodin ŋipidinlak, azu ŋa ŋabollak me i diloŋ. 22Megin ibollag tempel inan tizinek ta me i izinnen itiuzmeg i niman atenlon fedazi, ibol, O waliŋgaten megin upaiume? 23Jesus auan jabig ipai, Ŋa azu salan ŋaboltap paiagpa ŋaloŋ, ge ŋabol gauailak, aitoige o funagume? 24Me Hanas i Jesus niman moldaŋan waliŋgaten Kaifas izinnen inaug ile.
Petrus faun Jesusoi kakez
25Simon Petrus tinin ja pazemeg itiuz. I depai, O mai inan meglaum tea tat. I kakezge ibol, Tea. 26Waliŋgaten inan ai ta me ai me inan tiliŋan Petrus sebazilak i inan badim ibol, Ŋa umlon i maig so ŋenaso tatge? 27Meginge Petrus faun ikakez mug, inaug kekazek buntaimon ibob.
Jesus Pilatus izinnen duduzig ile
28Meginge Jesus Kaifas izinnenge betenaekablon duduzig dile. Me bomon mok. I sebadin betenaekablon so dile, so foawoilakoi, i pasa dianiwoi, mewoi. 29Meginge Pilatus beŋten zidinnen idug ibol, Tamol ewoi azu dodin ienime?#Kan 66:12 30I auan diabig depai, I aupasekbibian teape me am o izinnen so uduzip asope. 31Pilatus i pidin, Sebami aŋalep alap nami kibiaiŋlon inan azu betenae. Judatamol depai, Am tamol ta funip imatnen so aloŋ.#Joh 19:6, 7; Apos 18:15 32Dibollak melon Jesus mateŋ aitlon imatoi me niŋon inaup itasawoi dibol.#Joh 8:28; 12:32, 33; Mat 20:19
33Pilatus faun betenaekablon ileg Jesus wagig ipai, O Juda nadin kiŋ? 34Jesus auan jabig ibol, O sibe dado azu e ubolume, tea, aenta i o depao tat?#Mat 16:13 35Pilatus ibol, Ŋa Judawain tat? Oina tamolpainbadim, waliŋgaten mai i o duduzog nimaglon dunuo. O abaŋte unaulak?#Mat 21:39 36Jesus ibol, Ŋainag kiŋdom tanlak tea, ŋainag kiŋdom tanlakpe me, ŋainag daup mewoi wagai denaup Judagaz ŋa so diŋiliagpe, ge ŋainag kiŋdom me en tea.#Joh 8:23; 19:16; Mat 26:53 37Pilatus i ipai, Meginpe o kiŋ ta? Jesus auan jabig ibol, Ŋan ubolume me, ŋa kiŋ ta. Ŋa mewoi tamol noag, ŋa mewoi fatu en ŋase, Ŋa azu malik ŋisigianip ŋatozoi. Tata i maliknenwain i ŋainag auag e diloŋoi.#Tim I 6:13 38Pilatus i ipai, Azu malik ŋan?
I megin ibollakge i faun Juda zidinnen idug pidin, Ŋa i tininnen ta so ŋenasi. 39Ge aŋnami kagin ta ien, me Pasa ubou ŋa tamol ta ŋepasip ŋepanaŋoi; aŋ dodin abol, ŋa Juda nadin kiŋ me ŋepasip ŋepanaŋoi? 40I daŋan faun te diwog dibol, Tamol e tea, Barabas pasi penamape. Barabas i wagaibibian.
Currently Selected:
Johanes 18: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
