Genesis 6
6
Tamol nadin salan nauk
1Tamol tanlak kuzumge i aipain tata denaulak, 2Anut inau wozou inan ai me tamol nadin aipain noadin gamun me dilge i sebadin dipilianalak me diŋalge maig demade. 3Meginge Ujanzen ibol, Ŋainag uz tamol ilonlon dedeŋanip so madowoi, i se tinin monlakoi, ŋa umaz won hundert twenti ŋepaniwoi. 4Saen melon Nefilimgaz#6:4 Nefilim me bilakzen, funekbibian tanlak demade, alouge mai Anut inangaz tamol nadin nunudinpain zidinnen diseg i ai didauzi. Me tamol getnen tiwodindaŋan, biŋadindaŋan mai.
5Ujanzen tamol inan salannauk tanlak zen mok me inasi, inan buben inan kankan, inan ilon gazek mai gaid salan mon. 6Ujanzen tanlak tamol inaulakoi i ilon alan, buben mai izoz. 7Meginge Ujanzen ibol, Tamol ŋa ŋenaulak me tan atenlonpa ŋegezeŋanip dazuk abaŋ depaleldimelak ma did paenlon, ŋa i ŋenaulak mewoi teŋaeg alan. 8Ge Noa Ujanzen malanlon kanim ŋale.
Noa wag ipau
9E me Noa inan daz uzek, Noa i tamol taoz, inan daz uzeklon i tininnen ja tea. Noa i Anut maig ditoz. 10Noa inan ai tolgen, Sem, Ham Jafet mai.
11Tan imaulak me Anut inasi, kagin wagai tan fuam. 12Anut tan deleŋanig imaulak me gauai inasig iloŋ. Tanlak tamol daŋan nadin dal dibibianilak. 13Anut Noa ipai, Ŋa tamolpain sese daŋan ŋenaup depadaloi ilog ibolime. I‐lon kagin wagai tan fuamlak. Uloŋ, ŋa i ŋenaup tan mai depadaloi. 14Nazki abaulon wag pau, wag ilonnen galun unau idu, ilon muzin mai dim sae. 15O megin unauwoi: Wag inan melaen niman sukusuk tri hundert, inan bebaŋan niman sukusuk fifti, inan melaen latnen niman sukusuk tirti. 16Wag tinin mai kibinep, paon paenlon auan ta inan bebaŋan niman sukusuk taimon wag tilianip unau. Wag inan dalauan gezaŋenlon unau. Wag ilonnen aten azugen fonfon unau. 17Nasi, ŋa siz ujan ŋezaep tamol dazuk abaŋ daŋan did paenlon basnen uzdaŋanlak me ŋipitiŋinawoi. Abaŋ tanlak diendime me dimatoi. 18Ge o ŋa mai temaneknen ŋenauwoi. O waglon udusawoi, o, oina ai, oina iwo, oina ai nadin iwodin mai. 19Dazuk abaŋ i basdaŋan menen azuazu o waglon udauzip i o maip bas amadowoi; i dauai paiat maiwoi. 20Ma funfun dazuk funfun mai, tan inan abaŋ depaleldimelak funfun menen azuazu o izinen didusawoi, bas demadonen mewoi. 21Anaŋ funfun janeknen me mai bageunen bezau me nami anaŋ, dazuk nadin mai. 22Anut Noa kibiai panilak me daŋan inau.
Currently Selected:
Genesis 6: GDD1960
Highlight
Share
Compare
Copy
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
