Genesis 49
49
Jakob inan nanungazoi azu imugseg ibol
1Meginge Jakob inan ai wigidinge ibol, Aŋ atemanip, saen loantap abaŋ idup anasinen me ŋepaiaŋoi.
2O Jakob inan ai, atemanip aloŋ, Israel nami temami inan azu dab apani.
3Ruben, o ŋainag ai matu, inag tiwog, inag zagug inan niŋon matu, o tizinek biŋa zagundaŋan. 4Ge o naz kololo ibol iduime egin, o malanlak so madowoi, o oina tama inan badimlak uduselak. Meginge o benenailak, inag taeglak uduselak.
5Simeon Lewi mai i nug tain; nadin daz me judazuk wagaidaŋan. 6O nitug, o i so peleŋana mon; O inag uz, i mai so atemani mon. Nadin buzudinlon i tamol difulak, nadin bubudin sisunenlon bulmakau niedin bekabok inan dul dugusutilak. 7Nadin buzudin meselanip ienŋan, me salan moklakoi; buzun kekazun megin gisigaslakoi, ŋa Jakob ilonnen ŋetezepalewoi, Israel ilonnen sezanep dilawoi.
8Juda, oina taigaz biŋa dibisawoi; oina nima oina agez gududinlak iduwoi; tama inan ai o naonen tanlak detakokoi. 9Juda i laion faun; fenafun inan naon, ŋainag ai, o uduseg latnen ule. I sebenai idug laion egin tinin miŋiani, i laion paiat egin, it daŋenen iloŋ? 10Bu gaten taladdaŋan me Juda so biniwoi, kibiaipaneknen tok nien liluŋlon me mai so teaboi, inan fun izinnen isemap eginmap, tamolpain i dagom depaniwoi. 11Doŋki faun me greip inan wazlak saseg doŋki nanun me greip dazuŋ inan wazlak sasemeg, i inan jamel wainlon flaniime, inan jamel melaen greip inan dazlon. 12Inan malan me wain mileklon dazanoi, inan liwon me su mileklon kebazanoi.
13Sebulun i mas salo madowoi; wag inan lipan salo, inan geg me Sidon salo ienoi.
14Isakar i doŋki egin tiwondaŋan, belelek nadin az liluŋlon saŋikime. 15Jaeŋ ŋalek me abaŋ gauailak me iloŋ, fatu gauai me inasi; meginge i jazon abaŋ muzuan joazeknen jazon bini idug tamol aenta menen nean denaug i modoaneklon begabeg egin itoz.
16Dan siben inan tamolai betenaewoi, i Israel nadin bagen talakoi. 17Dan dallak mot eginoi, gaunwin dal gezaŋenlon, hors inan boz fiziŋon jazeime, meginpe tamol fonlak matalime me muzikmuzik ibal iduwoi. 18O Ujazen, ŋa oina patunpaseknen malan ŋenauŋame.
19Jutamol melabublon Gad izinnen ju dilawoi, ge i muzudin pasip ifuwoi.
20Aser inan anaŋ me numuzandaŋanoi, abaŋ gamun kiŋgaz dianidime menen.
21Naftali me gazaŋ inan isi egin itozoi, nanun naon gamun mai inauwoi.
22Josef i zaen fabuldaŋan, zaen fabuldaŋan naz bubuaik izinnen; inan zaen mad dodoloanidime. 23Fitamol gik dibolge dufuniwoi denau, tazom gauz depanig depanewoi dipan. 24Inan fi segatekdaŋan me bo jabi gegaun, tiwon fun me iwoi itautnen tealak melon ien. Jakob inan Anut me inan tiwon daŋanlon niman satuk panimeg inaunen mai iloŋlak, Tibud nean me Tizinek, Israel inan Pat, melon mon megin. 25Oina tama inan Anut me o dinowoi, Anut tiwondaŋan o kibiniowoi, did latnen inan bazlon, tan ilonnen naz bubuaik mai inan bazlon, pain inan su inan ai nauknen aben inan zaiŋlon. 26Oina tama inan baz me niŋondaŋan, did dedeŋaneknen me nenazi pasi, bubun dedeŋaneknen inan zaiŋ; me Josef gatenlak iduŋan, i me taingaz dibinig ibennen madelak me damonlak iduŋan.
27Benjamin i wolf gisigas bomon i abaŋ funilak me tetameime, juzalon i ju naon iwaeime.
28E me daŋan Israel bagen twelw; temadin baz pinidinmeg azu e pidinlak, dadodado iwoi iduselak melon i baz ipani.
Jakob imatge denau
29Meginge i kibiai pinidinge pidin, Ŋa inag tamolpain badim mai temanamawoi; ŋa mamgaz mai gogoŋ me Efron Hittitwain inan umlon ienime melon noag. 30Gogoŋ me Makpela umlon Mamre ist baŋenlon ien. Me Kanaan fatulon, Abraham Efron Hittitwain inan um idadge fedafod fun inaulak. 31Melak Abraham, inan iwon Sara mai denaulak; melak Isak, inan iwon Rebeka mai denau; melak ŋa Lea ŋenau. 32Um gogoŋ mai melon ienime me Hittitwain mai didadlak. 33Jakob inan ai kibiai pinidin binig i nien badimlak dizig jaeŋ wozaig imat, inangaz mai detemana.
Currently Selected:
Genesis 49: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
