Genesis 42
42
Josef inan taingaz anaŋoi Egiptanen dile
1Jakob baza Egiptanen ienime me iloŋge i inan nanungaz pidin, Aitoige aŋ nug lalelale? 2I ibol, Nasi, ŋa ŋaloŋlak, baza Egiptanen ienime; alap idoi adadpa, id basoi so tamatoi. 3Meginge Josef inan taingaz ten Egiptanen baza didadoi didu. 4Ge Jakob Benjamin, Josef inan tain, i taingaz mai so inaug dile, abaŋ alan ta funiwoi izez. 5Megin Israel inan ai i panu aentagaz ilonnen didadoi dile, Kanaan fatulon pitol ien.
6Josef i fatu inan gowerner; i fatu me inan tamolpain daŋan mai anaŋ didaddime. Josef inan taingaz dileg i naonnen noadin tanlak detakok. 7Josef inan taingaz ilge iloŋmeg i baswain egin noadinnen madeg azu gegaun ipidin. I ibol, Aŋ domtenge ase? I dibol, Am Kanaannenge anaŋ adadoi ase. 8Josef bo inan taingaz iloŋ, ge i Josef so diloŋ. 9Josef i ienmin me iwoi ienminlak mewoi ilon isouge i pidin, Aŋ fatu kibianeknen tamol, aŋ fatu inan dal ikibianiwoi atozame. 10I depai, Tea, ujazen, oina begabeg anaŋ didadoi dise. 11Am daŋan tamol taimon inan ai, am tamol sekauk tea, oina begabeg i kibianektamol tea. 12I pidin, Tea, aŋ fatu inan dalauan pasekge ien me anasip aloŋoi ase. 13I dibol, Am oina begabeg timagaz twelw, Kanaannen tamol taimon inan ai, nasi, mizimu mok me gazomnen temama maig demadodime, ta mug malan aben tea. 14Josef i pidin, Ŋa ŋepaiaŋlak megin mon, aŋ kibianektamol. 15Abaŋ elon aŋ ŋikibianaŋoi; Farao bas madoimelak elon nami timi mizimu elak so isetap, aŋ panu e so ibinip alawoi. 16Aŋ sebaneklon amademap ai ta anaup ilap timi duzip isowoi, nami azu inan niŋon tenasiwoi, aŋ lamilon azu malik ien tat, teap, Farao bas madoimelak elon aŋ malik kibianektamol. 17I daŋan nal tolgen sebaneklon inau.
18Nal tollon Josef i pidin, Megin anaumap aŋ bas amadowoi, ŋa Anutoi ŋazutlakoi. 19Aŋ tamol maliktap nami timi ta sebaneklon ibinip mademap aenta nami abbadimgaz nadin baza abezaup ala. 20Timi mizimu izignen uduzip aso, meginpe nami azu malik tat me aloŋpa aŋ so amatoi. I megin denau. 21Meginge i nug paipaig dibol, Malik, id tinidnen taidoi, daz izezge, so tadadoi igosigosmeg id dab so tepani, mewoilakoi gazo e abaŋ alan e fodlak idu. 22Ruben auadin jabig ibol, Aŋ ai so bedani mon! Get so ŋepaiaŋge? Ge aŋ auag dab so apani. Mewoi gazomnen inan dazoi aiai ŋaleg panadime. 23Josef nadin azu iloŋime me i so diloŋ, ai ta get liluŋlon azu poalilakoi. 24Meginge Josef naon feanig ibennen ileg ita; a faun zidinnen imulge azu ipidin. I leŋadinlonge Simeon ŋaleg i meladinlon ipau. 25Josef kibiai inaug nadin bek dadon isap baza didizip tamol dadodado inan gaŋmalan mai beklon didizip ilawoi, anaŋ dallak dianinen mai dipinidinoi. Me iwoi denaulak.
Josef inan taingaz faun Kanaannen dimul
26Meginge nadin doŋki fodinlak baza bekdaŋan denaug dile. 27Ai ta wonoŋ abenlon inan doŋki anaŋ paniwoi bek ipasig i bek auanlon inan gaŋmalan inasi. 28I inan taingaz ipidin, Inag gaŋmalan dubulig denaulak ŋan ie, inag bek auanlon ien. Melon nadin bubudin fu ibolge dizez maig nug lalelaleg dibol, Dodin tatge Anut megin noadlak?
29I Kanaannen ditaseg temadin Jakob abaŋ daŋan i denau alanlak me depaig dibol, 30Tamol, fatu inan ujanzen, i azu gegaun paiama, am fatu ikibianiwoi alelak, ibol. 31Ge am i apai, Am tamol sekauk tea, am fatu kibianek inan tamol tea; 32am timagaz twelw, temama inan ai. Taimon i malan tea, mizimu mok gazomnen temama mai Kanaan fatulon demadodime. 33Meginge tamol me fatu inan ujanzen i paiama, Melon aŋ tamol malik me ŋaloŋoi, nami timi ta izignen ibinimap baza nami abbadimgazoi me abezaup zidinnen ala. 34Nami timi mizimu izignen uduzip aso, meginpe ŋa ŋaloŋoi aŋ kibianektamol tea, aŋ tamol malik, ŋa timi ŋepasip ŋepanaŋpa aŋ fatu elon adadoi.
35I nadin bek dewalimeg, nasi, tamol dadodado nadin gaŋmalan dapdaŋan beklon ien: i temadin mai nadin gaŋmalan dapdaŋan denasig i dedeladal. 36Nadin temadin Jakob i pidin, Aŋ ŋainag ai iwiziaglak: Josef i malan tea, Simeon mai malan tea, gazo Benjamin mai aŋalewoi abolame. Abaŋ e daŋan ŋa mon diŋiaglak. 37Meginge Ruben inan taman ipai, Ŋa so ŋuduzip o izinen imulmap o ŋainag ai azugen me ufup dimatoi. Nimaglon unaupa ŋa ŋuduzip o izinen imuloi. 38Ge i ibol, Ŋainag ai aŋ maip so aduwoi, inan tain imatge, i siben mon madoime. Aŋ tazeŋ abiwoi abollak melon iwoi abaŋ ta idutap aŋ anaup ŋa waŋawaŋ ŋetabubpa tiŋialon mon ilap Seollon zaep iduwoi.
Currently Selected:
Genesis 42: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
Genesis 42
42
Josef inan taingaz anaŋoi Egiptanen dile
1Jakob baza Egiptanen ienime me iloŋge i inan nanungaz pidin, Aitoige aŋ nug lalelale? 2I ibol, Nasi, ŋa ŋaloŋlak, baza Egiptanen ienime; alap idoi adadpa, id basoi so tamatoi. 3Meginge Josef inan taingaz ten Egiptanen baza didadoi didu. 4Ge Jakob Benjamin, Josef inan tain, i taingaz mai so inaug dile, abaŋ alan ta funiwoi izez. 5Megin Israel inan ai i panu aentagaz ilonnen didadoi dile, Kanaan fatulon pitol ien.
6Josef i fatu inan gowerner; i fatu me inan tamolpain daŋan mai anaŋ didaddime. Josef inan taingaz dileg i naonnen noadin tanlak detakok. 7Josef inan taingaz ilge iloŋmeg i baswain egin noadinnen madeg azu gegaun ipidin. I ibol, Aŋ domtenge ase? I dibol, Am Kanaannenge anaŋ adadoi ase. 8Josef bo inan taingaz iloŋ, ge i Josef so diloŋ. 9Josef i ienmin me iwoi ienminlak mewoi ilon isouge i pidin, Aŋ fatu kibianeknen tamol, aŋ fatu inan dal ikibianiwoi atozame. 10I depai, Tea, ujazen, oina begabeg anaŋ didadoi dise. 11Am daŋan tamol taimon inan ai, am tamol sekauk tea, oina begabeg i kibianektamol tea. 12I pidin, Tea, aŋ fatu inan dalauan pasekge ien me anasip aloŋoi ase. 13I dibol, Am oina begabeg timagaz twelw, Kanaannen tamol taimon inan ai, nasi, mizimu mok me gazomnen temama maig demadodime, ta mug malan aben tea. 14Josef i pidin, Ŋa ŋepaiaŋlak megin mon, aŋ kibianektamol. 15Abaŋ elon aŋ ŋikibianaŋoi; Farao bas madoimelak elon nami timi mizimu elak so isetap, aŋ panu e so ibinip alawoi. 16Aŋ sebaneklon amademap ai ta anaup ilap timi duzip isowoi, nami azu inan niŋon tenasiwoi, aŋ lamilon azu malik ien tat, teap, Farao bas madoimelak elon aŋ malik kibianektamol. 17I daŋan nal tolgen sebaneklon inau.
18Nal tollon Josef i pidin, Megin anaumap aŋ bas amadowoi, ŋa Anutoi ŋazutlakoi. 19Aŋ tamol maliktap nami timi ta sebaneklon ibinip mademap aenta nami abbadimgaz nadin baza abezaup ala. 20Timi mizimu izignen uduzip aso, meginpe nami azu malik tat me aloŋpa aŋ so amatoi. I megin denau. 21Meginge i nug paipaig dibol, Malik, id tinidnen taidoi, daz izezge, so tadadoi igosigosmeg id dab so tepani, mewoilakoi gazo e abaŋ alan e fodlak idu. 22Ruben auadin jabig ibol, Aŋ ai so bedani mon! Get so ŋepaiaŋge? Ge aŋ auag dab so apani. Mewoi gazomnen inan dazoi aiai ŋaleg panadime. 23Josef nadin azu iloŋime me i so diloŋ, ai ta get liluŋlon azu poalilakoi. 24Meginge Josef naon feanig ibennen ileg ita; a faun zidinnen imulge azu ipidin. I leŋadinlonge Simeon ŋaleg i meladinlon ipau. 25Josef kibiai inaug nadin bek dadon isap baza didizip tamol dadodado inan gaŋmalan mai beklon didizip ilawoi, anaŋ dallak dianinen mai dipinidinoi. Me iwoi denaulak.
Josef inan taingaz faun Kanaannen dimul
26Meginge nadin doŋki fodinlak baza bekdaŋan denaug dile. 27Ai ta wonoŋ abenlon inan doŋki anaŋ paniwoi bek ipasig i bek auanlon inan gaŋmalan inasi. 28I inan taingaz ipidin, Inag gaŋmalan dubulig denaulak ŋan ie, inag bek auanlon ien. Melon nadin bubudin fu ibolge dizez maig nug lalelaleg dibol, Dodin tatge Anut megin noadlak?
29I Kanaannen ditaseg temadin Jakob abaŋ daŋan i denau alanlak me depaig dibol, 30Tamol, fatu inan ujanzen, i azu gegaun paiama, am fatu ikibianiwoi alelak, ibol. 31Ge am i apai, Am tamol sekauk tea, am fatu kibianek inan tamol tea; 32am timagaz twelw, temama inan ai. Taimon i malan tea, mizimu mok gazomnen temama mai Kanaan fatulon demadodime. 33Meginge tamol me fatu inan ujanzen i paiama, Melon aŋ tamol malik me ŋaloŋoi, nami timi ta izignen ibinimap baza nami abbadimgazoi me abezaup zidinnen ala. 34Nami timi mizimu izignen uduzip aso, meginpe ŋa ŋaloŋoi aŋ kibianektamol tea, aŋ tamol malik, ŋa timi ŋepasip ŋepanaŋpa aŋ fatu elon adadoi.
35I nadin bek dewalimeg, nasi, tamol dadodado nadin gaŋmalan dapdaŋan beklon ien: i temadin mai nadin gaŋmalan dapdaŋan denasig i dedeladal. 36Nadin temadin Jakob i pidin, Aŋ ŋainag ai iwiziaglak: Josef i malan tea, Simeon mai malan tea, gazo Benjamin mai aŋalewoi abolame. Abaŋ e daŋan ŋa mon diŋiaglak. 37Meginge Ruben inan taman ipai, Ŋa so ŋuduzip o izinen imulmap o ŋainag ai azugen me ufup dimatoi. Nimaglon unaupa ŋa ŋuduzip o izinen imuloi. 38Ge i ibol, Ŋainag ai aŋ maip so aduwoi, inan tain imatge, i siben mon madoime. Aŋ tazeŋ abiwoi abollak melon iwoi abaŋ ta idutap aŋ anaup ŋa waŋawaŋ ŋetabubpa tiŋialon mon ilap Seollon zaep iduwoi.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.