Genesis 23
23
Sara imat. Abraham fedafodnen tan idad
1Sara i umaz won hundert twenti‐sewen madelak, me Sara inan umaz tanlak. 2Sara i Kiriat‐arbanen, me Hebron, Kanaan fatulon imat. Abraham Saraoi tiŋia isaeg itawoi izinnen idu. 3Abraham sesanun dabinge imais Hittitgaz ipidin, 4Ŋa aŋ ilonnen baswain lo ŋatoz, fedafodnen tan ta apanagpa ŋa ŋainag sesanun inag tazaslon ienime me ŋenauwoi. 5Hittitwain Abraham auan diabig dibol, 6Auama uloŋpe, nama ujazen, o am leŋamalon tamoluja biŋadaŋan. Oina sesanun nama fedafod gauai talon unaupe; am tata inan fedafod so pizianiwoi, oina sesanun fedafodlon unaunenoi nao dal so falewoi. 7Abraham imaisge Hittit fatu melon demadodime me noadinnen takok. 8I pidin, Aŋ ŋainag sesanun naognen ienime me ŋenauwoi aboltap, auag aloŋpe, aŋ Efron Sohar inan ai godoanip 9i gogoŋ Makpela, me i fun, i panagoi. Me inan um wadannen ienime. Naon iduselak melon aŋ noaminen wou panagpa ŋa fun ŋenaup ŋainag fedafod e taboloi. 10Efron i Hittitwain leŋadinlon matalmeg Efron Hittitwain me inan panu inan dalauanlon diduladime, Hittitwain me daŋan diloŋmeg Abraham auan jabig ipai, 11Tea, ŋainag ujazen, auag uloŋ, ŋa um ŋepanomap gogoŋ melon ienime me mai ŋepanowoi; ŋainag tamolpain badim nadin ai noadinnen o ŋepanoŋame; segauz oina sesanun melon unau. 12Meginge Abraham fatu me inan tamolpain noadinnen takok. 13I fatu me inan tamolpain noadinnen Efron ipai, Uboltap auag uloŋ; ŋa um inan naon ŋenauwoi, nimaglon ŋalepe, meginpe ŋa ŋainag sesanun melak ŋenauwoi. 14Efron Abraham auan jabig ibol, 15Ŋainag ujazen, auag dab pani; tan naon me silwer sekel four hundertge id mewoi gauz taboloi? Segauz oina sesanun unau. 16Abraham Efron mai auadin taimon. Abraham i Hittitwain azu diloŋlak egin Efron silwer skellak sekel four hundert inau, dadeŋtamol saen melon abaŋ skellak denaudimelak egin.
17Meginge Efron inan um Mak‐pelanen Mamre ist salolon, um gogoŋdaŋan mai, ja daŋan umlon tan inan aten daŋanlon diendime mai me Abraham panig i fun inau. 18Hittitwain me inan panu inan dalauanlon diduladime, me daŋan denasig diloŋmeg ipani. 19Abaŋ e uzig Abraham inan iwon Sara Mak‐pela um inan gogoŋlon, Mamre ist salolon, me Hebron, Kanaan fatulon inau. 20Um gogoŋ melon ienime me mai Hittitwain dibitig Abraham depani, i melon fedafod fun inaug Abraham inangaz mai nadin.
Currently Selected:
Genesis 23: GDD1960
Highlight
Share
Compare
Copy
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
