Genesis 2
2
1Megin did tan mai, abaŋ daŋan mai inau bini. 2Nal sewenlon Anut uzat inaulak me inau bini, nal sewenlon uzat i inaulak me daŋanoi jaeŋ inau. 3Meginge Anut nal sewen me baz panig gun inau, Anut nal melon uzat i inaulak me daŋanoi jaeŋ inaulakoi.
4Did tan mai inaumeg nadin uzek megin: nal Ujanzen Anut tan did mai inaulag, 5um inan biab ta tanlak so ienmeg, um inan abaŋ ta so isalag, Ujanzen Anut ui so inaug tanlak idulakoi, tan pulueknen tamol ta mai so made. 6Tanlonge bug ui pisikpisik egin itaseg tan daŋan wizez pani. 7Meginge Ujanzen Anut tamol kulukallon kibineg inan winlon uz bas iwi ileg i tamol basdaŋan.
Eden inan um
8Ujanzen Anut Edenlon ist salolon um ta ipae. I tamol inaulak me melon inau. 9Ujanzen Anut ja naseknen gamun, janeknen mai me daŋan inaug tanlonge disa, ja bas um atenlon me mai, ja abaŋ gauai abaŋ salan diloŋnen me mai.
10Naz ta um wizez paniwoi Edennenge idug melak tezepaleg nien palgen inau. 11Ta me nean Pison. Me Hawi‐la fatu daŋan melon gold ienime me tilianiime. 12Fatu me inan gold me gauai, pat bedelium oniks mai melak dien. 13Naz ta nean me Gihon. Naz me Kus fatu daŋan tilianig paluime. 14Naz tol me nean Hidde‐kel, me Assiria ist baŋenlon paluime. Naz pal me Eu‐frates.
15Ujanzen Anut tamol ŋaleg um Edenlon inau, i uzat inaumap tiziniwoi. 16Ujanzen Anut tamol kibiai panig ibol, O ja daŋan inan patun segauz waniwoi. 17Ja abaŋ gauai abaŋ salan mai uloŋnen me o so waniwoi. Naltap o menen wanitap o umatoi.
18Me uzig Ujanzen Anut ibol, Tamol siben itoznen gauai tea, ŋa dinek ta iwoi iduselak ŋenaup ŋepaniwoi. 19Meginge Ujanzen Anut gazaŋ inan dazuk daŋan, ma daŋan mai tenatanlon inaulak me tamol izinnen idauzig neadin dodin ipinidinnen me iloŋoi. Tamol i abaŋ bas me daŋan dodin tat nean ipanip inan nean meginoi. 20Tamol bulmakau abaŋ, ma did paenlon, gazaŋ inan dazuk daŋan neadin pinidin, ge tamol inan dinek iwoi iduselak menen ta so made. 21Mewoi Ujanzen Anut inaug tamol ien padal. I ien padalmeg inan gezaŋen dog ta ŋaleg aben mudanlon funati. 22Gezaŋen dog Ujanzen Anut tamol tininlon pasilak melon i pain inaug tamol izinnen duzig ise. 23Meginge tamol ibol, Gadon e me ŋainag dog menen dog ta, ŋainag mudag inan mudan ta. I Pain blaniwoi, i Tamol inan tininlon kibineg itaselakoi. 24Mewoi tamol inan taman tinan mai ibinge inan iwon mon sipinig ditozdime, i tinin taimon egin ditozdime. 25Tamol inan iwon mai auzun i noŋodin monge i mamai so ifu.
Currently Selected:
Genesis 2: GDD1960
Highlight
Share
Compare
Copy
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
