Genesis 17
17
Muluŋ nasek me temanek inan bagoz
1Abram umaz nainti‐nain madelakge Ujanzen i Abram izinnen itaseg ipai, Ŋa Anut Tiwogdaŋan, o malaglon mon kagin tezepasip utoz. 2Ŋa o mai liluŋlon ŋainag temaneknen ŋenaup oina daz ŋetezepalep kuzumoi. 3Meginge Abram naonlon ibal idug Anut ipai, 4Nasi, ŋainag temaneknen me owoi ibol, o fatubadim kuzum nadin temadin unauwoi. 5Oina nea mug Abram tea, tea oina nea Abraham deblaniwoi; ŋa o ŋunuog o fatubadim kuzum nadin temadinlakoi. 6Ŋa ŋunuop o fabul kuzumdaŋanoi, olonpa fatubadim tata ŋenaup olonpa kiŋgaz mai ditasawoi. 7Ŋa sibeg o mai begazagaz o duzodime me, daz uzek daŋanlon ŋa ŋainag temanek dedeŋaneknen ŋenaumap, ŋa oina begazagaz o duzodime me mai nadin Anut ŋenaup ŋemadowoi. 8Ŋa o ŋepanop, oina begazagaz o duzodime me mai, tan melon o baswain egin utozume, Kanaan fatu daŋan me nami fun dedeŋaneknen ŋepanaŋoi. Ŋa inadin Anut ŋenaup ŋemadowoi.
9Anut i Abraham ipai, Mewoi o ŋainag temaneknen dab paniwoi, begazagaz o duzowoi me mai, inadin daz uzek daŋanlon. 10E me ŋainag temaneknen me aŋ dab apaniwoi, ŋa o mai oina begazagaz o duzodime me mai liluŋlon ŋenauŋame, me megin: Aitamol me daŋan muluŋ peteŋanawoi. 11Aŋ muluŋ anasiwoi, me ŋa aŋ mai liluŋlon temaneknen bagozoi. 12I me aŋ leŋamilon nal eit imadelak i muluŋ peteŋaniwoi; aitamol daŋan nami daz uzek daŋanlon, tinan nami ablon duzi tat, nami daz tea, gaŋmalanlon tamol bas izinnen adad tat me mai, 13i me nami ablon duzilak me, nami gaŋmalanlon adadlak me mai muluŋ peteŋanawoi. Megin nami tinimilon ŋainag temaneknen me temanek dedeŋaneknen. 14Ai tata i muluŋ so nasilak me inan tamolpain badim maip so demadowoi; i ŋainag temaneknen pitiŋinilakoi.
15Anut Abraham ipai, Oina iwo Sarai me o Sarai so blaniwoi, tea, nean Sara blaniwoi. 16Ŋa ŋikibinep, i‐lon ŋa aitamol ta ŋepanowoi. Ŋa ŋikibinep i fatu badimbadim nadin tinadinoi; i‐lonpa tamolpain badimbadim nadin kiŋgaz ditasawoi. 17Meginge Abraham naon takokge di isaeg ilonlon ibol, Tamol umaz won hundert itozlak i ai ta inauwoi tat? Sara i umaz nainti me ai ta duziwoi? 18Abraham Anut ipai, Gadon, Ismael o malalon madope! 19Anut ibol, Tea, oina iwo Sara i ai ta duzip panowoi, o inan nean Isak blaniwoi. Ŋa i mai begazangaz i duzinen iwoi ŋainag temaneknen me temanek dedeŋanipnen ŋenauwoi. 20Ŋa Ismaeloi bo oina gadiŋ ŋaloŋ; uloŋ, ŋa i ŋikibinewoi, ŋa ŋenaup i fabuldaŋanmap inan daz ŋetezepalep kuzum mokoi. I tamolujan twelw temadin inauwoi, ŋa i ŋenaup i panubadim ujanoi. 21Ge ŋainag temaneknen Isak mai ŋenaup ienoi, ai me saen e umaz talon Sara duzi panowoi.
22I auzun azu dikibiai binig Anut Abraham binig itase. 23Meginge Abraham inan ai Ismael, aibegabeg tinadin Abraham inan panulon denaulak, inan gaŋmalanlon idadlak me mai, aitamol Abraham inan panulon me daŋan iŋalge nal me moklon muluŋ peteŋana, Anut i ipailak egin. 24Abraham i umaz nainti‐nain itozlakge, i mai muluŋ nasi. 25Inan ai Ismael umaz tirtin itozlag i mai muluŋ peteŋani. 26Nal taimon Abraham, inan ai Ismael mai muluŋ denasi. 27Inan panu inan tamol daŋan, tinadin panulon denaulak baswain mai, gaŋmalanlon didadlak me mai, i maig muluŋ denasi.
Currently Selected:
Genesis 17: GDD1960
Highlight
Share
Compare
Copy
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
