Apostel Sai 25
25
Festus Jerusalemnen ile
1Gowerner Festus mademeg i nal zanap eginlon Kaisareanenge Jerusalemnen iduse. 2Men waliŋgatengaz, Juda ujanujangaz mai i naonnen Paulus malan desae.#Apos 24:1; Apos 23:15 3I digod, i meladin iŋalpa Paulus Jerusalemnen inaup isowoi; i dallak tawaŋ denaup dufunip imat menen. 4Mewoi Festus ipidin, Paulus Kaisareanen sebaneklon funatig madoime, kitek ta maip i siben melak ilawoi ibol. 5Meginpe aŋnami tamol ujanujangaz tata ŋa maip alap, tamol me siben tininnen ta ientap i diboloi.
Paulus Kaisareanen Festus naonnen kaisaroi ibol
6I nal ten egin i maig demadelag Kaisareanen imulge ile. Boŋanip egin i inan betenaek pezatiulak imatal idug Paulus duduzip isowoi ibol.#Apos 21:34; 22:30 7Iselag Juda dililitig tininnen ja metalun kuzum iwoi dibolse dibolle, ge azu malik ta iwoi dibolnen tea. 8Paulus siben inan gatenpasek azulon ibol, Ŋa Juda kibiaiŋ, tempel kaisar mai kin so ŋebenenailak.#Apos 24:27 9Ge Festus i Juda meladin iŋaloilakoi Paulus isedaze, O Jerusalemnen tat ulawoi, aon abaŋ mewoi naognen ibitiniowoi ubol? 10Meginge Paulus auan jabig ibol, Ŋa kaisar inan betenaek pezatiu naonnen ŋitiuzŋame, en mok bitiniagoi. Judagaz abaŋ salan so ŋenau ŋipinidinlak, me o sibe kabe uloŋume. 11Ge me, ja ŋa tiniglak ta ientap, tea, funag ŋamatnen ja tat siag ŋatoztap ŋa mewoi segauz ŋamatoi, tinig so pizianiŋame. Ge tamol e abaŋabaŋ diboldime melon i se mon tinig saesaetap, tata i se meladin ŋalekoi ŋa i nimadinlon noagnen teabe. Ŋa kaisaroi ŋabol.#Apos 23:29 12Festus i inan betenaekbi maig dikibiailag, ibol, O kaisaroi ubollak, kaisar izinnen ulawoi.
Festus Paulusoi kiŋ Agripa ipai
13Nal taitai binilag kiŋ Agripa Bernike maig Kaisareanen dise, Festus lo denasiwoi dibol. 14Nal tata demadelag Festus Paulusoi kiŋ ipaig ibol, Feliks i sebanekai ibinig madoime.#Apos 24:27 15Jerusalemnen ŋemademeg waliŋgatengaz, Juda ujanujangaz mai iwoi naognen uf denaug digod, ŋa i ŋibitip ilap ŋufuniwoi. 16Ge ŋa auadin ŋabig ŋipidin, Rom kagin megin tea, ta se aenta meladin ŋalekoi jawadan joazep paniwoi, i get inan malan saekgaz diŋiawoi, gatenpasekoi auan ibolnen iloŋoi eginmap. 17I en diselag ŋa pasak boŋanip egin betenaek pezatiulak ŋematal ŋadu, tamol me duduzip isowoi ŋabol. 18Uftamol dimaisge dibol; ge ja i tininnen ŋa ilog ŋabollak, menen ta kin so deblani. 19Tea, inadin kagin aben tawoi mon azu pusaik dibol, tamol tawoi mai, i nean Jesus dibol, me wagam mug imatlak, ge iwoi Paulus tezepasig ibol, i bas madoime.#Apos 18:15 20Ge ŋa abaŋ mewoi dubudabnen gauai so ŋaloŋlakoi ŋa Paulus ŋesedaze, i Jerusalemnen tat ilawoi, aon abaŋ uf e kumewoi tat ŋabol. 21Meginge Paulus japal inautag i kaisar inan azu malan inauwoi ibolge, eginmap i ŋabiwoi ibol. Meginge ŋa kibiai ŋenau, i se sebaneklon funatip madowoi, dal kaisar izinnen ilanen ienpe eginmap. 22Agripa Festus ipai, Ŋa sibeg tamol me mai auan kin ŋaloŋoi, ilog ibol. Festus ipai, Au, boŋanip o i auan uloŋoi.#Luk 23:8
Paulus kiŋ Agripa naonnen
23Boŋanip egin Agripa Berenike mai bala gauzdaŋan ditaseg dise, opasgatengaz mai, panu inan bilakzengaz mai betenaek galuŋlon didu. Festus kibiai inauge Paulus duduzig dise.#Mat 10:18 24Meginge Festus ibol, Kiŋ Agripa, aŋ aenta mai en mai temadotame! Aŋ tamol e anasiame, iwoi Judabadim daŋan Jerusalemnen, elak mai dizizibiaglak, dibob, i so bas madowoi imatoi dibol.#Apos 22:22; 25:2, 7 25Ge ŋa ja tininnen ta so ŋenasilak, mewoi i ŋufunip imatoi. I mai kaisaroi ibollakoi, mewoi ŋa nean ŋenaulak, i Romnen ŋenaup ilawoi. 26Ge ŋa so ŋaloŋ i abaŋte tat inaulak menenoi ŋa ujanzen gazek ŋepaniwoi. Mewoi ŋa i aŋ noaminen ŋenau o, kiŋ Agripa, owoi mok ŋenaulak. Id tikibiani gauailap azu tata ŋaloŋoi me ŋa kaisar ŋegazep ŋepaniwoi. 27Ŋa ŋabol sebanekai ta tininnen ja teap se mon ŋenaup ilemap me kin gedaged egin.
Currently Selected:
Apostel Sai 25: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
