Apostel Sai 20
20
Makedonia, Grik fatu Troas
1Tamol me dezezabeg detemanilak me faun depetetaleg Paulus meglaumgaz wigidinge tansaek azu pidin. Meginge niman ipinidin, imaisge Makedonianen ile. 2I fatu me uzig itozlag krisgaz mai gauai stemanag ileg Grik fatulon idule. 3Men fulei tolgen made. Uzig i imaisge Sirianen jauawoi ibol. Juda iwoi tawaŋ denaug dufuniwoi dibolge i Makedonianen isaziz imuloi nean inau.#Kor II 11:26 4I maig ditozdime me: Sopater me Pirus inan ai, Beroiawain; Aristarkus Sekundus mai, i Tesalonikawain; Gajus Timoteus mai, i Derbewain; Tikikus Tropimus mai i Asiawain.#Apos 17:10; 19:29 5Ge i dimugge Troasnen dileg men i am melama denaug demade.#Apos 16:8 6Am mon Sepalaŋ Didek Zagun Tea inan nal binilag Filipinenge ajauag aleg zebanup am Troasnen adu. Men nal sewen amade.
Paulus Troasnen Eutikus fuŋuni
7Am ubou juzalon atemanimeg Nitud Anaŋ aniwoi abol, Paulus medaeŋgaz mai azu pidin, nal uzip ilawoilakoi. I azu melaen ibol, tidom loan.#Kor I 16:2; Apos 2:42, 46 8Galuŋ falalak detemanilak men lamp kuzum nanig dien. 9Aifaun nean Eutikus, dalauan kiteklon imatalmeg malan jofge idoz; Paulus azu ibol saseg ienlakoi ai me ien padalge abaten tol latnenge tanlak ibal idu; dibisemeg imatlak denasi. 10Ge Paulus tapasge idug inan tininlon ai tinin doloanig nimanlon isegagemeg ipidin, Aŋ so abebaze mon, inan nitun iseg ilonnen madoime.#Kiŋ I 17:21; Mar 5:39 11I faunmug latnen iduseg sepalaŋ ibufatemeg diani. Faunte azu ibol mon ile, fatu igigimeg geg. Meginge imaisge Amaduo! ipidinlag ibinge ile. 12Aifaun basge inannen debezaulak, melon i ladin gauai iŋalge demade.
Miletusnen dejaua
13Am aenta amugge waglak aduseg ajauag aleg Asosnen abal, men Paulus mai waglak idusawoi; i siben ibol i Troasnenge dal mon isowoi ibollak. 14Asosnen i am mai naon tazetazelag, maig waglak iduseg aleg Mitilenenen abal. 15Menge ataseg aleg boŋanip egin nui Kios siziz pani. Nal talon nui Samos izinnen ataseg Trogilionnen abal. Nal uzig Miletusnen adu. 16Paulus nean inaulak, i Efesus panu nenazip jauawoi, i Asia fatulon saen ta so bedanip madowoi; i sisikime, inaunen iloŋtap i Auanuzgun inan ubou Jerusalemnen nasiwoi ibollakoi.#Apos 18:21
Miletusnen Efesus medaeŋ matugaz mai naon taze
17Miletusnenge totol inaug Efesus medaeŋ matugaz diwigidinoi. 18Diselag ipidin, Aŋ sebami aloŋame, ŋa Asia fatulon ŋaselag aŋ maig temademeg, melonge ŋa nal daŋan dodin mon aŋ leŋamilon ŋatozlak.#Apos 18:19; 19:10 19Ŋa Ujanzen inan uzatlon binig ŋadug ŋatozlak, melaug idumeg uzat ŋenau; Judagaz mai alan donoag defenafunge dufunagoi dibolge ditoz.#Apos 20:3; Tes I 2:6, 15 20Azu aŋ dinaŋnen stemanaŋnen ŋa sansan medaeŋlon abablon mai daŋan ŋepaiaŋlak, ŋepeteŋanaŋlak, tata ŋa so ŋibinilak. 21Juda Grik mai bubudinlon ŋesaeg idulak, i Anut izinnen didaŋsap inad Ujanzen Jesus Kristus ladinlon malikoi.
22Gazog iloglon seseŋanagmeg ŋa Jerusalemnen ŋalaŋame. Ŋa so ŋaloŋ, men abaŋte tat noagoi.#Apos 19:21 23Taimon bo malik: Auanugun panu daŋanlon ŋa sigianagime, aon sebanek alannauknen maig ŋa malag inauime.#Apos 9:16; 21:4, 11 24Ge bas tanlak ŋatoznen mewoi ŋa sibeg kin so ŋabol Taimon e mon ŋabol: inag dal jaugjaugdaŋan ŋatoz idusawoi, uzat ŋenaup biniwoi me Ujanzen Jesus Kristus panaglak, patun pasinen totol gamun Anut kanimoi ŋipinidinpe.#Apos 21:13; Tim II 4:7; Tes I 2:8
25Ŋan gazog anasi, ŋa ŋaloŋŋame, aŋ naog faun so anasiwoi, aŋ daŋan leŋamilon ŋa get Anut kiŋdom inan totol ŋatozlak. 26Mewoi gazo malik ŋepaiaŋŋame: Aŋ tata padal tat ilemap me ŋa tinignen tea.#Apos 18:6; Tes I 2:10; Joh 15:15 27Ŋa Anut inan patunpasinen daloi azu tata so ŋipizianaŋlak, tea, dadon isag ŋeflaleg ŋepaiaŋlak.
28Meginge aŋ sebami aŋoi dab panaŋpa wozou daŋan mai itizina, ilonlon Auanuzgun aŋ tizinek noaŋlak, Ujanzen inan medaeŋ, me i siben dazlon idadlak, aŋ i kibinep apaniwoi.#Kan 74:2; Tes I 5:12; Tim I 4:16 29Ŋa ŋalon ŋibinaŋpa ŋalemap dazuk wagai aŋ leŋamilon diduwoi, i medaeŋ so denenazip dilawoi.#Mat 7:15 30Au, aŋ sebami leŋamilon mai tamol dimaisoi, i dal zegaik depeteŋanaŋoi, i meglaum ladin depasiwoi. 31Mewoi amazazmap! Lami isouwoi ŋa umaz tolgen ad zen tidom zen so ŋibinilak, aŋ dudumi anenanen melaug idumeg bebanaŋlak.#Mar 13:35, 37
32Ŋan gazo e ŋa aŋ Anut nimanlon, inan kanim azu paenlon mai ŋonoaŋŋame, i siben tiwondaŋan, i inaup aŋ subuloanaŋnen iloŋ, i aŋ mai gungaz aenta mai fuzan iwae panaŋnen mai iloŋime.#Kol 1:12
33Gaŋmalan, gold, jamel maiwoi ŋa aŋ ziminen kin so ŋabollak.#Mat 10:8; Kor I 9:12 34Aŋ sebami aloŋame, ŋa sibeg ŋawoi, inag uzatbiwoi mai nimag elon uzat ŋenaulak, nama anaŋ ŋadad.#Apos 18:3; Kor I 4:12 35Ŋa aŋ inag uzatlon naolalek ŋepeteŋanaŋlak: maiabdaŋan uzat tenauwoi, id waizgaz lo pinidinnen mai taloŋoi. Mewoi id, Ujanzen Jesus inan azu ibollak, mai ilod isouwoi. I siben ibollak, Ta abaŋ paninen me ŋaleknen nenaziime.#Tes I 4:11
36Megin ibollag dagun sebenai idu, daŋan mai godoani.#Apos 21:5 37Mug daŋan tiŋia zen denau, dimaisge Paulus biziwon desegagemeg musuk depani. 38Azu taimon, inan naon faun so denasiwoi, mewoi ladin gauz izoz. Meginge i duduzig waglak denau.#Apos 20:25; Kol 2:1
Currently Selected:
Apostel Sai 20: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
