Korint II 3
3
Korintgaz i Paulus inan biŋan biseknen gazek
1Am faun mug sebama biŋama ibisaame tat? Tea, am aenta egin biŋan bisek inan gazek apanaŋoi, tea, aŋ gazek menen ta gazep apenamawoi?#Kor II 5:12 2Aŋ sebami nama gazek biŋama biseknen, bubumilon gazelak, me tamolpain diloŋ dusuti maidime.#Kor I 9:2 3Aŋ beŋten anau mai aŋ Kristus inan gazek, am totollakoi apanaŋlak. Gaulon so gazelak, tea, Anut bas inan Uzlon, patlon tea, tea, tamol bubudinlon.#Ekso 24:12; Met 3:3; 7:3
Anut siben Paulus sedageg uzat iloŋ
4Am megin Kristuslon Anut anau apaniame.#Kor II 2:16 5Am sebama aduseg duduma abaŋ tata am fun e so abol, am adusaame me Anut i inaulak. 6I me temaneknen faun ta inan tizinek noamag aduselak, kibiaiŋ gazeklaklon tea, Uzlon, kibiaiŋ gazeklak me tamol funip imatnen, Uz me bas niŋon paninen.#Jer 31:31; Kor I 11:25; Rom 7:6; Joh 6:63
Kagin faun kubel gauai
7Ge imatnen inan bian uzat azu patlak gazelak me kubeldaŋan egin iseg Moses naon inan lelainoi Israelgaz deleŋaninen tea, lelain me bo binimeg,#Ekso 34:30 8meginge Uz inan bian uzat inan kubel i me so beleŋaniime tat?#Gal 3:2, 5 9Meselanek inan bian uzat me kubeldaŋantap taoz inan bian uzat inan kubel me i gauz beleŋaniime.#Deut 27:26; Rom 1:17; 3:21 10Malik, me i get kubeldaŋanlak me mug kubel tea, kubel ta i beleŋanilakoi. 11Lelain binilak me kubeldaŋan itasetap dedeŋaneknen i me beleŋanig kubel gizaud moklak.
Anut kagin gauai mok, mewoi totolgaz sililimeg azu deflaledime
12Am megin usuzuazoulakoi, mewoi am gauz sililimeg abolame. 13Moses egin tea, i jamellon naon toanilak, meginge Israel bineken inan kubel wadan me so denasiwoi.#Ekso 34:29–35 14Ge nadin kankan gegaun inau, getnenge gazo i temanek getnen inan azu dusutimap toaneknen jamel me ienimelak, so pasilak, Kristuslon mon me pasilakoi.#Rom 10:4; 11:25 15Auje, getnenge gazo i Moses azu dusutimap jamel ta nadin kankan toaniime.#Apos 15:21 16Ge tamol ta i Ujanzen daŋemap i jamel me pasiime.#Rom 11:23, 26; Ekso 34:34 17Me Ujanzen i Uz, Ujanzen inan Uz madoime melak tamol pasekge madoime.#Joh 7:39; 8:36 18Me is daŋan naod so toaneklaklon Ujanzen inan kubel tenasimap id buladsap inan kubellon tezepasadpa tedaiap i mok kilianime. Ujanzen i Uzlakoi megin inauime.#Mat 17:2; Ekso 16:7, 10; 24:17
Currently Selected:
Korint II 3: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
