Petrus I 5
5
Matugaz mizimugaz mai ibebana
1Mewoi ŋa Kristus inan alan nauk inan sigianeklakoi, kubel loantap boboloanip aŋalewoilakoi ŋa matubi egin matugaz medaeŋ leŋadinlon aŋ tansaek ŋepanaŋŋame.#Mat 17:5; Joh II 1; Rom 8:17 2Aŋ Anut inan daup aŋ tizinaame futua, gegaun panaŋmaplon tea, sebami lami ibolpa anau, naon subuŋan ŋalekoi tea, tea, jaeŋjaeŋlon.#Joh 21:16; Apos 20:28; Tim I 3:2–7 3Nami medaeŋ nadin duzektamol wagai egin tea, aŋ medaeŋ inan naolalek amado.#Kor II 1:24; Tit 2:7 4Tizinekgaten itasemap aŋ lilitkubel dedeŋaneknen aŋalewoi.#Pet I 2:25; Heb 13:20; Kor I 9:25
5Aŋ ai faunfaun megin mon, matugaz dagom ipinidin. Aŋ daŋan nugoi zaek imulnen unula. Anut i ŋagastamol daŋeimelakoi, ge i izae imullak me kanim ŋale paniime.#Ef 5:21; Met 3:34; Mat 23:12; Jak 4:6 6Mewoi aŋ Anut inan niman tiwondaŋan paenlon azae amulpa amado, meginpe i inan saenlon aŋ bisiaŋoi.#Hiob 22:29; Jak 4:10 7Nami jaeŋ funek daŋan i fonlak idizi, i aŋ kibiniaŋimelakoi.#Kan 55:23; Mat 6:25
Kibianekoi demazazoi
8Aŋ biliŋek tealon atoz, amazazpa amado, aŋnami liwomijabek, Satan, me laion babeŋdaŋan egin fenafunge ta teŋaliwoi ibol.#Tes I 5:6; Mat 5:25 9Aŋ i nami lamilon maliknenlon gugumip adaŋe, aŋ aloŋ timigaz fatu daŋanlon alan nauk egin mon fodinlak ienime.#Ef 6:11–13 10Aŋ saen tituk alan anaup amademap kanim daŋan inan Anut me aŋ Kristuslon kubel dedeŋaneknen aŋalewoi wigiaŋlak, i siben aŋ seŋanaŋoi, dud panaŋoi, tiwon mai panaŋoi.#Pet I 1:6 11I dedeŋanip dedeŋanip tiwondŋan madowoi. Malik.
Tabei panek azu
12Ŋa taig Silwanus buben malikdaŋan ŋabol, me tininlon ŋa nami azu tituk e ŋegazelak, tansae ŋepanaŋ ŋisigiani mai, ŋan me Anut inan kanim malik, aŋ melon gugumip atiuz.#Heb 13:22 13Medaeŋ me Babilon panulon madoime, i mai pilianilak, i aŋ tabei ipanaŋime, inag nanug Markus mai.#Apos 12:12, 25; Tim II 4:11 14Ilopanek inan musuklon nug musuk panipani.
Me aŋ Kristuslon amadoame aŋ daŋan mazoz toanaŋ.#Kor I 16:20
Currently Selected:
Petrus I 5: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
